ئهڤرۆ:
د. عهلی تهتهر، پارێزگارێ دهۆكێ دوهی جودا پێشوازی ل دهیكا “عهتیا رهسول” خێزانا شههیدی و دهیكا شههیدی و مالباتا وان، دیسا پێشوازی ل “بهرهڤان حهمدی” بریكارێ وهزارهتا كاروبارێن شههید و ئهنفالكریان یێ حكومهتا ههرێما كوردستانێ و شاندێ د گهل دا كر.
د. عهلی تهتهر، پارێزگارێ دهۆكێ، دوهی 24/7/2022 پێشوازی ل دهیكا “عهتیا رهسول” خێزانا شههید “ناسح سۆرچی” و دهیكا شههید ”سهردار سۆرچی” و كهسوكارێن وان كر، كو د رۆژهكێ دا كوڕ و باب د شهڕێ دژی تیرۆرێ دا شههید ببوون. د ههڤدیتنێ دا پارێزگارێ دهۆكێ خۆشحالیا خوه ب سهرهدانا وان دهربڕی و گۆت: “ههر دهستكهفتیهكێ ئهڤرۆ مه ههی بهرههمێ خوینا شههیدان و خهبات و قوربانیدانا پێشمهرگههێن كوردستانێ یه و ئهم خزمهتكارێن ههوهینه”.
مالباتا شههیدێن ناڤبری سوپاسیا پێشوازیا گهرما پارێزگارێ دهۆكێ كر و دۆپات كر د خزمهتكرنا گهل و وهلاتێ خوه دا ب ههموو شانازی ڤه دێ د بهردهوام بن.
دیسا ههر دوهی د. عهلی تهتهر، پارێزگارێ دهۆكێ پێشوازی ل “بهرهڤان حهمدی” بریكارێ وهزارهتا كاروبارێن شههید و ئهنفالكریان یێ حكومهتا ههرێما كوردستانێ و شاندێ د گهل دا كر و د ههڤدیتنهكێ دا باس ل بهرنامه و پلانێن وهزارهتا ناڤبری بۆ خزمهتكرنا خێزان و مالبات و كهسوكارێن شههیدان و نێزیكبوونا سالڤهگهرا جینۆسادا بارزانیان و شنگالێ و ههوێن جینۆسایدێن بادینان “ئهنفالان” هاته كرن.
پارێزگارێ دهۆكێ و شاندێ ناڤبری دۆپاتی ل پتر خزمهتكرنا كهسوكارێن شههیدان و خێزانێن وان و بهرنامێ حكومهتا ههرێما كوردستانێ د داهاتی دا كر.
نيشاندان