ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند: پارتی بەرهەڤی بۆ وان پڕۆژەقانوونان یێن گرنگ بۆ هەرێما كوردستانێ كریە، ل حەفتییا داهاتی ژی لژنەیێن جڤاتا نوونەران دێ هێنە دیاركرن.
د. دانەر عەبدولغەفار، ئەندامێ جڤاتا نوونەرێن ئیراقێ ژ فراكسیۆنا پارتی گوت» بەری هەلبژارتنێن ئیراقێ ل سالا بۆری كارنامەیا پارتی بۆ چار سالێن داهاتی یێن جڤاتا نوونەرێن ئیراقێ دیاربوویە، كارێ ئێكی یێ مە بجهئینانا دەستوورییە، ب تایبەتی ئەو مادە و بڕگەیێن دەستووری كو هەتا نوكە نەهاتینە بجهئینان، چونكە پارتی یا رژدە ل سەر بجهئینانا دەستوورێ بەردەوامێ ئیراقێ، هەروەسا چەندین قانوون هەنە پارتی بەرهەڤی بۆ كریە، وەك پێشنیازا پڕۆژەقانوون پێشكێشی جڤاتا نوونەران بكەت».
گوت ژی» دەركرنا قانوونەكا ئێكگرتی بۆ پەترۆل و غازێ ئێك ژ كارێن بەراهیێ یێن فراكسیۆنا پارتی یە، چونكە چەندین كێشە د ناڤبەرا هەرێما كوردستانێ و بەغدایێ دا ل سەر كەرتێ پەترۆل و غازێ هەیە ب قانوون دێ هێنە چارەسەركرن، هەروەسا راستڤەكرنا قانوونا هەلبژارتنان كو پێدڤییە ئەو قانوونا بۆ هەلبژارتنان دهێتە دەركرن دادپەروەری تێدا بیت، ئەو قانوونا هەلبژارتنان یا نوكە دادپەروەری تێدا نینە و هەرێما كوردستانێ زیاندارە».
د. دانەر عەبدولغەفار ئاماژە بۆ وێ چەندێ ژی كر» راستڤەكرنا قانوونا دادگەها فیدرالی و جڤاتا بلند یا فیدرالی ژی ژ كارنامەیێن مەنە، ل گەل قەرەبووكرنا زیاندارێن خەلكێ كوردستانێ ل سەر دەستێ رژێما بەعس، مە بەرهەڤییا خوە كریە، بەلێ پشتی هەلبژارتنا سەرۆككۆماری و پێكئینانا حوكمەتا ئیراقێ دێ پێشكێشی جڤاتا نوونەران كەین».
ل دۆر لژنەیێن جڤاتا نوونەران گوت» بڕیارە ل حەفتییا داهاتی لژنەیێن جڤاتا نوونەران بهێنە دیاركرن».

ل دووڤ ژێدەرێن د ناڤ هەڤپەیمانییا چارچۆڤەیێ هەماهەنگیێ شیعی، هەڤپەیمانییا ناڤبری نووری مالكی بۆ پۆستێ سەرۆك وەزیرێن ئیراقێ بەربژاركریە.
چارچۆڤەیێ هەماهەنگیێ پشتی دووماهی كۆمبوونا خوە راگەهاندبوو، د پرسا پێكئینانا حوكمەتا نوو و ئێكلاكرنا بەربژارێ پۆستێ سەرۆك وەزیران، گەهشتنە پێنگاڤەكا پێشكەفتی و پێشهاتێن گرنگ هاتینە پێش.
ل دووڤ بەیاننامەیەكا فەرمانگەها راگەهاندنا چارچۆڤەیێ هەماهەنگیێ، كۆمبوونا ئالیێن د ناڤ چارچۆڤەیێ هەماهەنگیێدا كو ل نڤیسینگەها محسن مەندەلاوی بڕێڤەچوو» تەوەرێ سەرەكیێ كۆمبوونێ تایبەت بوو ب بەردەوامبوون ب دانوستاندنێن پێكئینانا حوكمەتا داهاتی و ئێكلاكرنا ناڤێ سەرۆك وەزیرێن نوو، وەك پشكەك ژ مافێن دەستووری یێن قووناغا بهێت».
د بەیاننامەیێدا هاتیە» كۆمبوون د سەقایەكێ ئەرێنی دا بڕێڤەچوو و تێدا دانوستاندنێن بەرپرسیارانە هاتنە كرن، كو دەرئەنجامێن وێ پێشهاتێن گرنگ بوون، ب شێوەیەكی ل گەل پێدڤیێن ئارامییا سیاسی و بەرژەوەندیێن بلند یێن ئیراقی بگونجیت».
یاسر تەلال، رێڤەبەرێ راگەهاندنا نڤیسینگەها نووری مالكی د داخۆیانییەكا رۆژنامەڤانیدا گوت» چارچۆڤەیێ هەماهەنگیێ نووری مالكی بۆ پۆستێ سەرۆك وەزیرێن ئیراقێ بەربژار كریە».
ژ ئالیێ خوەڤە فەهەد جبووری، ئەندامێ مەكتەبا سیاسییا رەوتێ حیكمە یێ نیشتمانی گوت» سوودانی دەست ژ بەربژاركرنا خوە بۆ پۆستێ سەرۆك وەزیران د بەرژەوەندییا نووری مالكیدا، بەردایە».
عوسمان شەیبانی، سەركردە ل هەڤپەیمانییا دەولەتا قانوونێ ب سەرۆكایەتییا نووری مالكی د بەرپەرێ خوە ل تۆرا جڤاكییا فەیسبووكی بەلاڤكر» هەموو ئالیێن د ناڤا چارچۆڤەیێ هەماهەنگیێدا، نووری مالكی، سەرۆكێ هەڤپەیمانییا دەولەتا قانوونێ، بۆ پۆستێ سەرۆك وەزیرێن ئیراقێ بەربژاركر».
قوسەی مەحبووبە، سەركردە ل هەڤپەیمانییا ئاڤەدانكرن و گەشەپێدانێ ب سەرۆكایەتییا محەمەد شیاع سوودانی د داخۆیانییەكا رۆژنامەڤانیدا راگەهاند» پڕۆژەیێ محەمەد شیاع سوودانی پڕۆژەیێ دەولەتێیە نەك حەزا تاكەكەسی و ژ پێخەمەت وێ چەندێ خوە ژ هەڤڕكیێ ل سەر پۆستێ سەرۆك وەزیران د بەرژەوەندییا نووری مالكی ڤەكێشا».

شرۆڤەكارەكێ سیاسی و سەربازی راگەهاند، ئەو گرۆپێن چەكدارێن ل بن ئالایێ عەقیدەی كاردكەن و دبێژن چەك یێ پیرۆزە، راستە بۆ وان چەك پیرۆزە، چونكە چەك ل دەف وان بوویە بیر و باوەر.
كازم ئەلزوبەیدی، شرۆڤەكارێ سیاسیێ ئیراقی گوت» ئەو گرۆپێن چەكدارێن سەر ب بەرەیێ موقاوەمێ ڤە، ناخوازن چەكی دانن» هەروەسا دیاركر» ئەم دێ كەڤینە بەر مەترییەكا مەزن ژ ئالیێ ئەمریكا ڤە، ب تایبەتی كو دووپاتی ل وێ چەندێ كریە، دڤێت چەك د دەستێ دەولەتێدا بیت، هەروەسا دڤێت هەموو هێز ل بن فەرمانا فەرماندەیێ گشتیێ هێزێن چەكدارێن ئیراقێدا بن».
كازم ئەلزوبەیدی ئاماژە ب وێ چەندێ ژی كر» میلیشیان خوە ئێخستییە رەوشەكا هەستیار دا، چونكە هەموو ئالیێن سیاسی و حكومی و سەرۆك وەزیران ژی باس ل وێ چەندێ كریە دڤێت چەك تنێ د دەستێ دەولەتێدا بیت، لەوما ل دووڤ قانوونێن نێڤدەولەتی، چەكێ دەستێ میلیشیان ژ دەرڤەی دەستهەلاتا دەولەتێ و دڤێت بهێنە سزادان».
ئەلزوبەیدی راگەهاند ژی» ب دیتنا من بڕیارێن وان گرۆپێن چەكدار بێی ئەگەر نینە و رێنما بۆ هاتینە، ئیرادەیەك هەیە و ژ ئالیێ كۆمارا ئیسلامییا ئیرانێ ڤە ل سەر هاتیە سەپاندن. ئەڤە ژی ئاخڤتنا وانە و دبێژن ئەم ل گەل ئیرانێنە و ئەو چ دبێژیت ئەم بجه دئینین».
باس ل وێ چەندێ ژی كر» بەرەیێ موقاوەمە ب كریارێن خوە سەلماندیە چەكێ د دەستێ واندا چەكێ ئیرانێیە، ئەم د روو ب رووبوونەكا مەزنداینە ل گەل ئەمریكا، لەوما هەكە ئەڤ كێشەیە نەهێتە چارەسەركرن دێ ئیراق تووشی كارەساتێ بیت».
گوت ژی» د راپۆرتێن هەوالگیریدا ئەو پێزانین بەلاڤبووینە، كو دهێتە گوتن هێزا دەلتا یا ئەمریكا كو مادورۆ، سەرۆكێ ڤەنزوێلا دەستەسەركریە، هاتیە سەر سنۆرێ ئیراقێ و ل ئالیێ سووریێ و ئوردنێ نە، لەوما ل ڤان نێزیكان دێ روودانەكا مەزن ل ئیراقێ روودەت».
رۆهنكر ژی» هەكە بەرەیێ موقاوەمە ل سەر نەدانانا چەكێن خوە بەردەوام بن، دێ ئەمریكا هێرشێ كەتە سەر گرۆپێن چەكدار و بنگەهێن وان و سەركردەیێن وان، ئەڤە ژی ئاخڤتنا من نینە بەلكو ئاخڤتنا وەزیرێ شەڕی یێ ئەمریكایە كو بەری چەند رۆژان داخۆیانی ل سەر ڤێ چەندێ دایە».