دهۆك، دلۆڤان ئاكرەیی:

وەزیرێ باژێرڤانی و گەشتوگوزارێ‌ ل حوكمەتا هەرێما كوردستانێ دیاركر، لسەر ڕاسپاردەیا مەسرور بارزانی، سەرۆكوەزیرێن هەرێما كوردستانێ، كەرتی گەشتیاری بوویە ئێك ژ پێشینەیێن هەرە گرنگ بۆ هەمەجۆركرنا ژێدەرێن داهاتی و دبێژیت: هەتا نوكە ل هەرێمێ زێدەتر ژ 80 پڕۆژەیێن مەزن یێن گەشتیاری ب گوژمێ حەفت ملیار و 500 ملیۆن دۆلاران هاتینە بجهئینان.
ساسان عەونی، وەزیرێ باژێرڤانی و گەشتوگوزارێ‌ ل حوكمەتا هەرێما كوردستانێ بۆ رۆژنامەیا ئەڤرۆ گۆت: «د كابینەیا نەهێ یا حكومەتا هەرێمێ دا زێدەتر ژ 80 پڕۆژەیێن ستراتیژی یێن گەشتیاری ب گوژمێ حەفت ملیار و 500 ملیۆن دۆلاران هاتینە بجهئینان، نوكە ل هەرێما كوردستانێ زێدەتر ژ سێ‌ هزار بنگەهـ و جهێن گەشتیاری هەنە، حكومەتێ دەرگەهـ ل هەمبەر وەبەرهێنەران ڤەكرینە، داكو ڤێ هەژمارەیێ گەلەك زێدەتر لێ بكەن، دیسا ب رێكا ڤان پڕۆژەیان زێدەتر ژ 20 هزار دەلیڤەیێن كاری د كەرتێ گەشتیاری دا بۆ وەلاتیان هاتینە پەیداكرن، كو 80% ژ وێ هێزا دەستێ كاری یێ ناڤخۆیی نە و حكومەت لسەر رێیا براندكرنا بەرهەمێن كوردستانێ، كار بۆ پاراستنا ناسنامەیا نیشتمانی و زمانێ كوردی دكەت».
وەزیری گۆت ژی: «گەشەپێدانا ڕێ و رێباران ڕۆلەكێ سەرەكی هەبوویە د ڤەژاندنا كەرتێ‌ گەشتیاری دا و زێدەتر ژ 700 پڕۆژەیێن ڕێ و رێباران د ڤێ كابینەیێ دا هاتینە بجهئینان، دیسا داخوازێ‌ ژ وەبەرهێنەران دكەین، مفای ژ ڤان ئاسانكاریان وەربگرن یێن حكومەت بۆ وان دابین دكەت، داكو كوردستان د هەر چار وەرزێن سالێ دا ببیتە ناڤەندەكا جیهانی یا وەبەرهێنان و گەشتیاری».

دهۆك، دلۆڤان ئاكرەیی:

ڕێڤەبەرێ شوونوار و كەلەپووری ل پارێزگەها دهۆكێ دیاركر، درێژترین پڕۆژەیێ دیرۆكی یێ گەهاندنا ئاڤێ ل سەر ئاستێ جیهانێ، د ناڤ پاركا شوونواریا دهۆكێ دایە و درێژاهیا وێ دگەهیتە 340 كیلۆمەتران، كو ل سەدەیێن حەفت و هەشت یێن بەری زایینێ هاتیە چێكرن، دەما كو ئاڤا ڕووبارێ دیجلە شێلی دبوو و بكێر ڤەخوارنێ نەدهات، ئاڤا پاقژ یا ڤەخوارنێ ژ دهۆكێ ب ڕێیا كارێز و جۆیان دگەهاندە مووسلێ.
د، بێكەس بریفكانی، ڕێڤەبەرێ شوونوار و كەلەپووری ل پارێزگەها دهۆكێ بۆ رۆژنامەیا ئەڤرۆ گۆت: «ئەڤ پاركە ب شێوەیەكێ ڤەكرییە، ل سەر ڕووبەرێ 130 كیلۆمەترێن چارگۆشەیە، ڕێڤەبەریا شوونواران ل دهۆكێ چەندین سالە ب هەڤكاری ل گەل زانكۆیا ئۆدینە یا ئیتالی كاری ل سەر دكەت، ب ڤەكرنا ڤێ پاركێ دێ بیتە مەزنترین پاركا شوونواری ل سەر ئاستێ هەرێما كوردستانێ و ئیراقێ».
گۆت ژی: «ئەڤ شوونوارێ مەزن د ناڤەندێن جیهانی دا، ب پاركا شوونواریا (جەروان – فایدە) دهێتە ناسین، ژ چەندین وەستگەهێن گرنگ وەكو: (كەنالێ فایدە، پرا جەروان و دەڤەرا خەنس) پێك دهێت، كو تمامیا سیستەمێ ئەندازیاریا ئاڤێ د وی سەردەمی دا نیشا ددت و مەزنترین نەخشێ سەر بەری، كو بۆ سەردەمێ ئاشووریان دزڤڕیت، كەڤنترین نافوورە و پرا دەربازبوونا ئاڤێ ل سەر ئاستێ جیهانێ، د ناڤ ڤێ پاركێ دا هەنە، بۆ هندێ پاركەك د یۆنیسكۆدا بهێتە تۆماركرن، پێدڤییە پیڤەرێن كەڤنترین و دەگمەنترین دەڤەر و شوونواران ل بەر چاڤ بهێتە وەرگرتن و پاركا شوونواریا دهۆكێ ئەڤ پیڤەرە هەمی تێدا هەنە، لەوما ئەم بزاڤان دكەین د یۆنیسكۆ دا تۆمار بكەین».

رەمەزان زەكەریا:

رێڤەبەریا چاندنا ئاكرێ ب مەرەما ژ نێزیك ئاگەهداربوون لسەر ڕەوشا بەرهەمێ خۆمالی و دابینكرنا پشتەڤانیێ بۆ كەرتێ چاندنێ، سەرەدانەكا مەیدانی بۆ ئەردێن چاندنێ یێن دەڤەرێ ئەنجام دا.
رێڤەبەریا چاندنا ئاكرێ ژ نێزیك چاڤدێریا ڕەوش و ئاستێ بەرهەمئینانا بەرهەمێن سەرەكی یێن خۆمالی كر، دیسا ڕێڤەبەرێ چاندنێ ل گەل جۆتیارێن دەڤەرێ كۆمبوو و دانوستاندن لسەر رەوشا نوكە یا چاندنێ و ڤەدیتنا ڕێكان بۆ پێشڤەبرنا كار و بەرهەمێ خۆمالی كر.
دیسا پێشنیار و داخوازیێن جۆتیاران هاتنە وەرگرتن و بەحس ل میكانیزمێن گونجای بۆ چارەسەركرنا ئەو ئاستەنگێن بەرهنگاری پرۆسێسا چاندنێ دبن هاتە كرن.

دهۆك، لەزگین جۆقی:

رێڤەبەرێ گشتیێ باژێرڤانیان ل پارێزگەها دهۆكێ دیار كر كو پڕۆژەیێ جۆتسایدێ سێمێل بۆ سێجێ ب درێژاهیا شەش كیلۆمەتران د قووناغێن چێكرنێ دایە.
دیار بەحری، رێڤەبەرێ گشتیێ باژێرڤانیان بۆ ئەڤرۆ گۆت: «پڕۆژەیێ جۆتسایدێ سێمێل بۆ سێجێ ل مەها 10 یا سالا 2025 دەست پێ كریە و ماوێ پڕۆژەی دو سالن، درێژاهیا پڕۆژەی شەش كیلۆمەترن و دو دۆڕیان ب شێوەیێ ئۆڤەرپاس د ناڤا پڕۆژەی دا هەنە».
گۆت ژی: «پڕۆژە ژبلی جۆتسایدی، جادەیێن خزمەتگوزاری ژی د گەل دانە و شەش كیلۆمەترێن رێكێ جادە 64 مەتری یە و چار كیلۆمەتر ژی جادە 40 مەتری یە ل گەل پتر ژ پێنج كیلۆمەتران سۆلینێن ئاڤڕێژ د گەل دانە».

زاخۆ، دلۆڤان هالۆ:

یونس محەمەد، سەرۆكێ باژێڕڤانیا ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو ب گوژمێ 537 ملیۆن دیناران و ب درێژاهیا سێ‌ كیلۆمەتر و 600 مەتران، ڕێكا هەردو گوندێن ناڤكەندالا و سەرسیلاڤكێ ل سنۆرێ ئیدارەیا سەربخوە یا زاخۆ دهێتە چێكرن و قێركرن.
سەرۆكێ باژێڕڤانیا زاخۆ گۆت: «بجهئینانا ڤی پڕۆژەی نە ب تنێ بۆ ڕێكا ڤان هەردو گوندانە، بەلكو ڕێكەكا سەرەكی و گرنگە بۆ چەندین گوندێن دی یێن سەر ب سنۆرێ ناوچەداریا دەركارێ و ناوچەداریا بێگۆڤا ڤە».
گۆت ژی: «چێكرن و قێركرنا ڤێ ڕێكا سەرەكی دێ بیتە ئاسانكاریەكا مەزن بۆ هاتنوچوونا وەلاتیان و دێ ڕێژەیا قەرەبالغیێ‌ ل وان جاددەیان كێم كەت».

زاخۆ، دلۆڤان هالۆ:

محەمەد مەهدی، بەرپرسێ نڤیسینگەها زاخۆ یا دەزگەهێ خێرخوازی یێ بارزانی بۆ ڕۆژناما ئەڤرۆ دیار كر كو سێ گەنجێن كورد ب هەڤكاری ل گەل نڤیسینگەها دەزگەهێ خێرخوازی یێ بارزانی ل ئیدارەیا سەربخوە یا زاخۆ، هاریكاریا ئێتیم و كێم دەرامەتێن دەڤەرداریا باتیفا كرن.
بەرپرسێ نڤیسینگەها زاخۆ یا دەزگەهێ خێرخوازی یێ بارزانی گۆت: «ئەڤ هاریكاریە پێكهاتیبوون ژ دابینكرنا پێدڤیێن دەستپێكی یێن خوارنێ بۆ 100 خێزانێن كێم دەرامەت، هەروەسا كڕینا جلكان بۆ 200 زاڕۆكێن ئێتیم».
گۆت ژی: «ئەڤ هاریكاریە ب مەرەما پشتەڤانی و كەیفخوەشكرنا زاڕۆكێن ئێتیم و دابینكرنا پێدڤیێن دەستپێكی یێن خوارنێ بۆ خێزانێن كێم دەرامەت بوو، هەرسێ گەنجێن سپۆنسەر ژی ژ دەرڤەی وەلاتی هاتبوونە ئیدارەیا سەربخوە یا زاخۆ، كو هەر ئێك ژ وان خەلكێ باشوور و باكوور و ڕۆژئاڤایێ كوردستانێ بوون».