هەرهین محەمەد:

پەیکەرساز عومەر جەمیل ددیدارەکێ دا بۆ بەرپەڕێ هونەری یێ ڕۆژنامەیا ئەڤرۆ گۆت: د جیهانا هونەری دا، پەیکەرسازی تەنها تێکەڵکرنا کەرەستان نینە، بەلکو زمانەکی بێ دەنگە کو دەربرینێ ژ قووڵاتیا مرۆڤایەتیێ، مێژوویێ و ناسنامێ دکەت. هەر هونەرمەندەک ب ڕێکا کارێن خۆ هەوڵ ددەت شێوازەکێ تایبەت ئاوا بکەت کو پێ بهێتە ناسین. د ڤێ دیدارێ دا، ل سەر ناسنامەیا هونەری، پەیامێن مرۆڤایەتی و پرۆژەیێن پاشەڕۆژێ، مە گەشتەک د ناڤ جیهانا هزری یا پەیکەرسازی دا کر.
ناڤهاتی دبێژیت: دبینم ستایلێ هونەرمەندی ب شێوەیەکێ نەڕاستەوخۆ ژ ئەزموونێن ژیانێ، ژینگەها جڤاکی و بیرکردنەوەیێن فەلسەفی دروست دبیت. ئەز ژی ل سەر بنەمایێ تێڕوانینا بەردەوام بۆ مێژوو، کەلتوور و مرۆڤایەتیێ، بزاڤێ دکەم زمانەکێ تایبەت بۆ خوە بگرم گەلەک جاران فۆڕمێن من د ناڤبەرا ڕاستەقینەیی (ڕیالیزم) و هێمایاندا دلڤن ، داکو بینەر بتنێ شێوەیێ دەرڤە بەلکو د ناڤەڕۆک و پەیامێ ژی بگەهیت».
دووڤ دا ژی گۆت: بزاڤێ دکەم بەرهەمێن من بتنێ بۆ جوانی و دیتنێ نەبن، بەلکو هەڵگرین پەیامەکا مرۆڤایەتی بن و گرنگترین بابەت لنک من پاراستنا ناسنامەیا کەلتووری، ئازادی، دادپەروەری و ئاشتییا جڤاکینە. هەروەها بیرەوەرییا مێژوویی و خەباتا گەلێ مە بۆ پاراستنا بوون و ناسنامەیا خۆ، ئێکە ژ ژێدەرێن سەرەکی یێن ئیلهامێ د کارێن من دا
مرۆڤایەتی، حەزژێکرن و ئازار. عومەری گۆت: حەزژێکرن وەک هێزەکا ئاڤاکەر و ئازار وەک ئەزموونەک کو مرۆڤی پێ دگەهینیت، بەردەوام د کارێن من دا ئامادەنە و بزاڤێ دکەم ب ڕێکا لڤین و فۆڕم، هێل و هەستێن مرۆڤایەتی ڤەگوهێزم و بۆ من هونەر زمانەکێ جیهانییە کو دشێت بێی پەیڤ بەحسێ دڵێ خەڵکی بکەت گۆت:ئەز بەردەوام ل سەر هزر و پرۆژەیێن نوو کار دکەم، د نوکە دا مژویلی کارەکێ نوی مە کو پێکدهێت ژ دروستکرناسێ پەیکەران بۆ هەولێرا پایتەخت. ئەڤ پەیکەرە ژی بۆ سێ قامات و سمبولێن مەزنێن هونەرێ کوردی نە کو ئەو ژی (ڕەسول گەردی، تایەر تۆفیق و تەحسین تەها).

بۆ جارا ئیكێ، نووترین به‌رهه‌مێ سینه‌ماكارێ كورد هه‌لكه‌وت مسته‌فا، د خولا 83 یا فیستیڤالا نێڤده‌وله‌تی یا فلمێن ڤینیس ل ئیتالیا پشكدار دبیت و هه‌ڤركییێ لسه‌ر خه‌لاتێن وێ فیستیڤالێ دكه‌ت.
فیستیڤالا ڤینیس كو ب كه‌ڤنترین فیستیڤالا فلمان ل جیهانێ دهێته‌ نیاسین، د كۆنگره‌كێ رۆژنامه‌ڤانی دا ناڤێن وان فلمان هاتنه‌ ئاشكراكرن یێن كو د خولا ئه‌ڤ ساله‌ دا پشكدارن، د ناڤ وان فلمان دا فلمێ (تو بهه‌شتێ نابینی، ئه‌گه‌ر ژنا ب كوژی) وه‌ك نووترین كارێ هه‌لكه‌وت مسته‌فایی هاتییه‌ دیاركرن.
ئه‌و فلمه‌ چیرۆكا كچه‌كا نیشانشكێن یا پیشمه‌رگه‌یی ڤه‌دگێریت كو ژ بۆ رزگاركرنا خووشكا خۆ یا بچووك، ب نهێنی دچیته‌ دناڤ تیرورستێن داعشێ دا، فلم وێنه‌كێ شعری یێ ژنه‌كا پێشمه‌رگه‌ نیشا جیهانێ دده‌ت كو ل به‌رامبه‌ر تاریاتیێ سه‌رێ خو ناچه‌مینیت.
هه‌لكه‌وت مسته‌فا، نڤیسه‌ر و ده‌رهێنه‌رێ ڤی فلمی ل دۆر سه‌ركه‌فتنا ڤی فلمی راگه‌هاند: ئه‌ز یێ خۆشحالم كو ئێكه‌مین نیشاندانا جیهانی یا فلمێ من یێ نوو ل ڤینیس بیت، ئه‌ڤ فلمه‌ ئازایه‌تی و خۆراگریا ژنا كورد نیشا جیهانێ دده‌ت، ژ بۆ نڤێسینا سیناریۆیێ، دیدار ل گه‌ل چه‌ندین ژنێن پیشمه‌رگه‌ ئه‌نجام داینه‌ كو ل دژی داعشێ شه‌ركرینه‌.
ئه‌ڤ فلمه‌ ژ لایێ كۆمپانیا (هینه‌ فلم) یا نه‌رویجی و ب هه‌ڤپشكی ل گه‌ل وه‌لاتێن نه‌رویج، سوید، ئیماراتا عه‌ره‌بی و هه‌رێما كوردستانێ هاتییه‌ به‌رهه‌مئینان.
هه‌لكه‌وت مسته‌فا، خه‌لكێ هه‌ریما كوردستانێ یه‌ و ل وه‌لاتێ نه‌رویج دژیت، هه‌روه‌سا بریاره‌ خولا 83 یا فیستیڤالا نێڤده‌وله‌تیا فلمێن ڤینیس، ل 2 هه‌تا 12 ئیلۆنا 2026 ل باژێرێ ڤینیس ل ئیتالیا بهێته‌ گێران، تێدا فلمێ كوردی ده‌رگه‌هه‌كێ نوو ژ بۆ ناساندنا سینه‌ما كوردی ب ره‌خنه‌گر و بینه‌رێن جیهانی ڤه‌دكه‌ت.

زاخۆ، دلۆڤان هالۆ:

دەرهێنەرێ کورد یێ ئیدارەیا سەربخوە یا زاخۆ (ڕعەد سەعید)، دبیته ئەندامێ لیژنا ڤیستەڤالا تەندۆف یا نێڤدەولەتی یا کورتە فلمان.

ڕێڤەبەریا فیستەڤالا تەندۆف یا نێڤدەولەتی یا کورتە فلمان، ئەوا ژ لایێ تۆڕەکا عەرەبی یا سینەمایێ ب هەڤکاری ل گەل کۆمەلا سەحرا بۆ هونەرێن بهیستن و بینینێ تەندۆف ڤە هاتیە ڕێکخستن، و پێکئینانا فەرمی یا لیژنەیا چاڤدێری یا نێڤدەولەتی بۆ خۆلا ئێکێ یا فیستەڤالێ ڕاگەهاندیە، کو ژ کوردستانێ دەرهێنەرێ کورد یێ ئیدارەیا سەربخوە یا زاخۆ (ڕعەد سەعید) ژی بوویە ئەندامێ لیژنا فیستەڤالا تەندۆف یا نێڤدەولەتی یا کورتە فلمان.
ئەندامێن لیژنەیا ڤیستەڤالێ ژ کۆمەکا نایاب یا سینەماکار و دەرهێنەر و هونەرمەند و بسپۆرێن بیاڤێ سینەمایێ ژ وەلاتێن جیهانێ پێك دهێن، وەکو جۆرج هۆلاندا ئەکتەر و دەرهێنەرێ سینەمایی ل بەڕازیل، و (ڕعد سەعید) دەرهێنەرێ سینەمایی ژ کوردستانێ، یوسف ئەلحووسەنی ئەکتەر و دەرهێنەرێ سینەمایی ژ عۆمانێ، موراد ئەلغەرسەلی ئەکتەر ژ تۆنسێ، سۆنیا مۆرسیا مۆلینا ئەکتەر و دەرهێنەر ژ ئیسپانیا، فایمە حەزباوی دیزاینەرا جلوبەرگان و شارەزایا مکیاجێ ژ ئیرانێ.
پێکئینانا ڤێ لیژنەیا نێڤدولەتی د چوارچۆڤێ پێگیریا وان دا دهێت ب شەفافیەت و پڕۆفیشناڵیەتێ، و مفا وەرگرتن ژ شارەزایێن سینەمایی یێن جیهانی بۆ مسۆگەرکرنا هەلسەنگاندنا کارێن پشکداران ل دووڤ بلندترین پیڤەرێن هونەری و پیشەیی، ب شێوەیەکێ کو پێگەهێ ڤیستەڤالێ بهێز بکەت، و وەکو پلاتفۆرمەكێ بۆ دیالۆگا ڕەوشەنبیری و لێكگۆهارتنا سینەمایێ د ناڤبەرا گەلان دا.