سێمێل، موسا خالد:

د. عەلی تەتەر، پارێزگارێ دهۆكێ دوهی 12/7/2026 سەرا دەڤەردارییا سێمێلێ دا و ژ لایێ دژوار شەوكەت، دەڤەردارێ سێمێلێ و دیار بەحری، ڕێڤەرێ گشتی یێ باژێرڤانیان ل پارێزگەهێ هاتە پێشوازیكرن و د ڕوونشتنەكێ دا جەخت لسەر خۆرتكرنا كاروبارێن ئیداری یێن دەڤەرێ و بەردەوامییا كاری لسەر پڕۆژەیێن خزمەتگوزاری و چەندین پێدڤیێن گشتی كر.
پاش ب ئامادەبوونا زكری بەشیر، ڕێڤەبەرێ كۆمپانییا بجهئینەر یا كاڤین گرۆپ دووڤچوونا قووناغێن پڕۆژەیێ چێكرنا جۆتسایدێ ژ ئاندەرپاسا سێمێلێ‌ بۆ مسێریكێ كر و د كۆنگرەكێ ڕۆژنامەڤانی دا دەستخۆشی ل ئەندازیارێن سەرپەرشت و كۆمپانییا بجهئینەر كر و دیاركر كو پڕۆژەیێ ناڤبری ل گەل چێكرنا ڕێڕەوێن ئاڤێ و چەندین پڕۆژەیێن دی یێن كار لسەر دهێتە كرن ب كوالێتیەكا باش و زووتر ژ دەمێ بۆ هاتیە دەستیشانكرن دێ كەڤنە د خزمەتا گشتی دا و ب تەمابوونا پڕۆژەیێ ناڤبری، كو د قووناغا قێركرنێ دایە، هاتنوچوونا ناوچەدارییا مسێریكێ ڕاستەوخۆ ب ئەندەرپاسا سێمێلێ‌ و جادەیا نێڤدەولەتی ڤە دێ هێتە گرێدان.

دهۆك، دلۆڤان ئاكرەیی:

وەزیرێ ساخلەمییا حكومەتا هەرێما كوردستانێ دیاركر، ب مەرەما چارەسەركرنا كێشەیا مامەلەیێن وەلاتییان ل گەل بەغدا، دێ حكومەتا هەرێما كوردستانێ سیستەمێ (پێناسەیا دیجیتالی) دروست كەت و دبێژیت: بۆ جارا ئێكێ‌ د دیرۆكا هەرێما كوردستانێ دا باوەرنامەیا بوون و مرنێ دێ بیتە ب زمانێ كوردی.
د. سامان بەرزنجی، وەزیرێ ساخلەمییا حكومەتا هەرێما كوردستانێ بۆ رۆژنامەیا ئەڤرۆ گۆت: «سیستەمێ پێناسەیا دیجیتالی، كو ب رێیا مۆبایلێ دهێتە سكانكرن، هەمی پێزانینێن وەلاتی تێدانە و داتا و پێزانینێن هەمی خەلكی ل سەر سیستەمەكێ مۆدێرن و مەزن یێ دیجیتالی دهێنە پاراستن، ئەڤ چەندە ژی كارئاسانیێ دكەت، كو ل فەرمانگەهان پێدڤی ب گەڕیانێ ل دووڤ دۆسیەیێن لاپەری نەبیت و رێگریێ ل ساختەكاریێ ژی دكەت».
گۆت ژی: «بۆ سەرئێخستنا ڤی پڕۆژەی، كو ژ لایێ رێكخراوا یونسێف ڤە پشتەڤانی لێ دهێتە كرن، راهێنان ب 400 فەرمانبەران ل سەرانسەری كوردستانێ هاتیە كرن، ژ روویێ تەكنیكی ڤە هەمی تشت ئامادەنە، لینكەك د ناڤبەرا داتا سەنتەرێ‌ حكومەتا هەرێما كوردستانێ و حكومەتا فیدرال دا دێ‌ هێتە دروستكرن، تایبەت ب سیستەمێ بوون، مرن و هەڤژینیێ؛ ئەڤ پێنگاڤە ژی پێدڤی ب رازیبوونا جڤاتا وەزیرێن كوردستانێ و فەرمانگەها تەكنۆلۆژییا پێزانینان هەیە».

زاخۆ، دلۆڤان هالۆ:

جۆتیار خدر، ئەندامێ فراكسیۆنا پارتی ل پەرلەمانێ كوردستانێ بۆ ڕۆژناما ئەڤرۆ دیاركر كو وی سەرەدانا وەزارەتا ساخلەمیا حكومەتا فیدرال كر ژ بۆ مەرەما دابینكرنا دەرمان و كەلوپەلێن پێدڤی بۆ نەخوەشخانێن سنۆرێ ئیدارەیا سەربخوە یا زاخۆ.
ناڤهاتی گۆت: «مە داخوازەكا دی ژی ژ وەزارەتا ساخلەمیا حكومەتا ئیراقێ كر، ئەو ژی بەهرا هەرێما كوردستانێ یا ئامیرێن گوهلێبوونێ بۆ مە بهنێرن».
گۆت ژی:»ژ بۆ وەرگرتنا ئامیرێن گۆهلێبوونێ نەخوەشێن مە نەچار دبن، سەرەدانا بەغدا بكەن و ل وێرێ وەربگرن، ژ بەركو ئەڤ چەندە بۆ خێزانێن وان ببوو بارگرانی، لەوما مە داخوازكریە، پشكا هەرێما كوردستانێ یا ڤی ئامیرێ گۆهلێبوونێ بهنێرن».

هەولێر، قائید میرۆ:

سەرۆكێ زانكۆیا دهۆكێ دیار كر كو بڕیار هاتیەدان دو پشكێن نوو ل زانكۆیا دهۆكێ بهێنە ڤەكرن، ئەوژێ پشكا سینەما هونەرێن جوان و پشكا كەلتوورناسی ل كۆلیژا مرۆڤایەتی نە.
د. داود ئەترووشی، سەرۆكێ زانكۆیا دهۆكێ بۆ ئەڤرۆ گۆت: «ئەڤ هەردو پشكێن نوو بۆ سالا نوو یا خواندنێ‌ 2026 – 2027ێ دێ هێنە ڤەكرن، ئەم دێ دەست ب بەرهەڤیان كەین، داكو ئەڤ پشكە ل زانكۆیا دهۆكێ بۆ وەرگرتنا قوتابیان بهێنە ڤەكڕن، ئەڤە چەندین سالن كار لسەر ڤەكرنا ڤان پشكێن نوو دهێتە كرن».

ئامێدیێ، مەحمود نهێلی:

ئەڤە هەیاما چەندین رۆژایە ژینگەهپارێزان ل سنۆرێ دەڤەردارییا ئامێدیێ دەست ب مانگرتنێ كریە و كارێ خوە یێ راكرنا گلێشی و بەرمایكان راگرتیە، ئەڤە ژی بوویە ئەگەرێ وێ چەندێ، گلێش ل بەردەرگەهێ مالان و بازاران كۆم ببیت، ئەڤە ژی بوویە جهێ دلگرانیا وەلاتیان و داخواز دكەن گلێش بهێتە راكرن.
ئەندازیار، ئەڤراز حەسەن، سەرۆكێ باژێرڤانیا ئامێدیێ و بەرپرسێ لژنا پاقژیێ ل دەڤەرا ئامێدیێ دیار كر، ژینگەهپارێزان ل سنۆرێ هەموو باژێرڤانیێن دەڤەردارییا ئامێدیێ دەست ب مانگرتنێ‌ كریە و گۆت: «ئەگەر ئەوە، كۆمپانیا راكرنا گلێشی ل دەڤەرێ مووچەیێ كارمەند و ژینگەهپارێزێن خوە د دەمی دا نادەتێ، ژ بەر وێ یەكێ ئەوان مانگرتن ژ كاری كریە و داخوازا مووچەیێ خوە دكەن».
ناڤهاتی دیاركر، ئەگەركێ دی ژی ئەو بوویە، ئەڤ ئامیرێن ئەو پێ كار دكەن و گلێشی رادكەن ژ كار كەفتینە، ژ بەر كو ئەڤە 12 سالە د كاری دا و زۆر د وەستییانە و ئێدی ب كێر كاری ناهێن و گۆت: «ئەڤ مانگرتنە ژی بوویە ئەگەرێ كۆمبوونا گلێشی د كۆلانان دا و بوویە جهێ بێزاریا وەلاتیان».

رەمەزان زەكریا:

ل هەرسێ تاخێن ئازادی، نەورۆز و سماقۆكا نوی، كارێ قێركرن و رائێخستنا بەرێ شكەستی دهێتە كرن بۆ وێ چەندێ، كو هەژمارەكا زۆر یا جادەیان بهێنە قێركرن.
زێرەڤان تەمۆ، پەیڤدارێ سەرۆكاتیا باژێرڤانیا ئاكرێ بۆ ئەڤرۆ گۆت: «پڕۆژە ل سەر ئاستێ باژێڕێ ئاكرێ د چەندین قووناغێن جودا دا دهێتە بجهئینان، دا كو كار ب باشترین كوالیتی و د كێمترین دەم دا ب دوماهی بهێت، نوكە كارێ قێركرنێ بۆ 32 جادەیان گەهشتیە قووناغێن دوماهییێ و د دەمەكێ نێزیك دا دێ ب تەمامی ب دوماهی هێن».
گۆت ژی: «جاددەیێن دی یێن ماین د نوكە دا د قووناغا ڤەكرن و ئامادەكرنێ دانە، بۆ هندێ د پێنگاڤا بهێت دا بهێنە قێركرن، د نوكە دا كار ل سەر ڕووبەرێ پتر ژ 40 هزار مەترێن چارگۆشە بۆ قێركرنێ دهێتە ئەنجامدان».
ئاشكرا ژی كر، ئەڤ پڕۆژەیە ب گشتی ب درێژاهیا 11 كیلۆمەتران هاتییە دارشتن، بەری نوكە كار ل سەر شەش كیلۆمەتران ب سەركەفتیانە هاتییە كرن، نوكە كار بەردەوام ل سەر پێنج كیلۆمەترێن مایی ل سەرانسەری وان تاخان دهێتە كرن.