د چارچۆڤەیا پشتەڤانییا بەردەوام یا حوكمەتا هەرێما كوردستانێ بۆ شیانێن گەنجان و رەخساندنا ژینگەهەكا گونجای بۆ داهێنانێن وان، مەسرور بارزانی، سەرۆكێ حوكمەتا هەرێما كوردستانێ، مەزنترین و پێشكەفتیترین سەنتەرێ گەنجان ل هەرێما كوردستانێ و ئیراقێ ڤەكر، كو ژ ئالیێ(كوردستان فاوندەیشن) ڤە دهێتە برێڤەبرن.
ئەڤ سەنتەرێ مۆدێرن وەك پڕۆژەیەكێ ستراتیژی، دەرگەهەكێ نوو ل هەمبەر گەنجان ڤەدكەت بۆ پێشئێخستنا شیانان، فێربوونا كارامەییێن نوو و دروستكرنا تۆڕەكا پەیوەندیێن بهێز د ناڤبەرا گەنجێن داهێنەر دا.
سەنتەر ب سیستەمەكێ نێڤدەولەتی و ب بلندترین ستانداردێن جیهانی دهێتە برێڤەبرن. د دەمێ ئەزموونا خۆ یا سەرەتایی دا، شیایە سەرنجا هەژمارەكا پێڤانەیی یا گەنجان راكێشیت: نها خودانێ پتر ژ 1400 ئەندامانە و زێدەتر ژ 12 هزار پرتووكێن جودا یێن د بوارێن جودا جودا دا تێدا هەنە. سەرباری وێ چەندێ، د دەمێ كاركرنا خۆ یا ئەزموونی دا، 129 هزار كەسان سەرەدانا وی كریە، و هەموو خزمەتگوزاریێن سەنتەری بێبەرامبەر دهێنە پێشكێشكرن.
سەنتەرێ گەنجان یێ كوردستان فاوندەیشن كۆمەكا دەلیڤەیێن جودا ل بوارێن تەكنەلۆژیێ، كارسازیێ، فێربوون و پێشئێخستنا پیشەیی دابین دكەت. ئارمانجا سەرەكییا ڤی پڕۆژەی، ئاڤاكرنا سەكۆیەكێ یە بۆ گەنجێن هەرێما كوردستانێ دا كو شیانێن خۆ پێشبێخن و پشكدارییا كارتێكەر د ئاڤەدانكرن و پێشئێخستنا جڤاكی دا بكەن.

ئامێدیێ، مەحمود نهێلی:

ب بەهەڤبوونا سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ‌ و بەهرام عریف یاسین، بەرپرسێ لقێ 18 یێ پارتی ل ئامێدیێ‌ و هەژمارەكا بەرپرسێن حزبی و حكومی و كەسایەتیێن دەڤەرێ و پێشمەرگەیێن شۆڕەشێن ئیلۆن و گولانێ، پەردە ل سەر مێنۆمێنتێ شەهیدێن گوندێ گەربەراسكێ ل سنۆرێ دەڤەردارییا ئامێدیێ هاتە لادان.
سەربەست لەزگین، د پەیڤەكێ‌ دا ئاماژە دا رۆلێ خەلكێ دەڤەرا ئامێدیێ د شۆڕەشێن كوردی دا، ب تایبەتی ژی خەلكێ بنارێ چیایێ دەڤەرا سەرسنكێ و گوندێن دوسكییان و گۆت: «قوربانیدان و شەهیدبوونا خەلكێ گوندێن ڤێ ناوچەیێ دیارترین بەلگەیە ل سەر خەبات و قوربانیدانا وانا و گوندێ گەربەراسكێ ژی ئێك بوویە ژ وان گوندێن ڕێژەكا زۆرا گەنجێن خوە كریە قوربانی ئاخا پیرۆزا كوردستانێ».
پشتی ب دووماهی هاتنا رێورەسمێ لادانا پەردەیێ لسەر مێنۆمێنتێ شەهیدێن گوندێ گەربەراسكێ، بەرهەڤبوویان ب رێپیڤانەكێ سەرەدانا شكەفتا (كورتەپكێ) یا دیرۆكی كر، كو بارزانیێ نەمر د وێ‌ شكەفتێ‌ ڤە كۆمبوونێن خوە ئەنجام ددان ژ بۆ دارشتنا پلان و سەركردایەتیكرنا داستانا زاویتە و لۆمانا.

دهۆك، دلۆڤان ئاكرەیی:

خودانێ كۆمپانیا مزگین یا بەلاڤكرنا غازێ ل دهۆكێ دیاركر، ژ بەر كێشە و قەرەبالغیا بەلاڤكرنا غازێ، وان ل دهۆكێ سیستەمێ وەرگرتنا غازێ كرە ب ڕێكا ئەپلیكەیشنەكێ ئۆنلاین، چونكو بەری هینگی خەلكی ب ڕێكا تێلەفۆنێ غاز داخواز دكر، بەلێ ڤێ چەندێ هندەك كێشە چێ دكرن، ژبۆ ڤێ چەندێ ئەڤ ئەپلیكەیشنە هاتە بەرهەڤكرن.
محەمەد سالح، خودانێ كۆمپانیا غازا مزگین ل دهۆكێ بۆ رۆژنامەیا ئەڤرۆ گۆت: «مەرەم ژ چێكرنا ڤی ئەپلیكەیشنی دادپەروەری یە د بەلاڤكرنا غازێ‌ دا و سیستەم ب نۆبە یە، كەس نەشێت فێلبازیێ تێدا بكەت یان نۆبەیا كەسەكێ دی ببەت، بۆ ڤێ مەرەمێ چار ژوورێن كۆنترۆلكرنێ یێن هەین، ناڤ و ناڤونیشانێن هەمی داخوازكاران تۆمار دكەن، ئەڤ چەندە ژ لایێ ئێمناهیێ‌ ڤە ژی یا گرنگە بۆ زانینا وێ چەندێ كا غاز بۆ كێ هاتیە برن و كەنگی هاتیە برن، د دەمێ ڕوودانێن ئاگربەربوونێ ژی دا، دێ هاریكار بیت، سیستەم گەلەك یێ ب سەناهی یە و ب تنێ ب دو كلیكان غاز دێ هێتە داخوازكرن و وەلاتی دشێن ب كەیفا خۆ پارەی ب ڕێكا ئۆنلاین بدەن یان ژی د دەمێ گەهشتنا غازێ دا ب دەستی بدەن».
گۆت ژی: «غاز ل سەرانسەری ڕۆژێ دێ هێتە بەلاڤكرن، ئەگەرەكێ مەزن هەیە د كێمتر ژ دەمژمێرەكێ دا بگەهیتە بەر دەرگەهێ مالا داخوازكاری، ئەڤ ئەپلیكەیشنە نە یێ نەچاری یە، بەلێ یێ‌ ب مفا و پاراستی ترە بۆ وەلاتیان و كۆمپانیێ ژی، ئەڤ پرۆسەیە دێ هاریكاریا خەلكی كەت دا كو ب ساناهی غازێ ب دەست خۆ ڤە بینن و قەرەبالغی چێ نەبیت».

دهۆك، لەزگین جۆقی:

ل ژێر چاڤدێریا د. عەلی تەتەر، پارێزگارێ دهۆكێ و ب ئامادەبوونا د. ئەفراسیاب موسا، رێڤەبەرێ گشتی یێ ساخلەمیێ ل پارێزگەها دهۆكێ و رێڤەبەرێ نەخۆشخانەیا ئومێد یا پەنجەشێرێ و راگرێن كۆلیژێن نۆشداری ل دهۆكێ و نوونەرێن پارتی و نۆشدار و پەرستار و كارمەندێن ساخلەمیێ، دوهی 10/6/2026 سالڤەگەرا ئێكێ یا نەخۆشخانەیا ئومێد یا پەنجەشێرێ هاتە ساخكرن.
د. چەكدار ئەحمەد، رێڤەبەرێ نەخۆشخانەیا ئومێد یا پەنجەشێرێ، د پەیڤەكێ دا باس ل كار و چالاكی و ئامارێن نەخۆشخانەیێ د سالەكێ دا كرن و گۆت: «د سالەكێ‌ دا پتر ژ 30 هزار نەخۆشان سەرەدانا نەخۆشخانەیێ كریە و 9 ملیار دینار ژبۆ نەخۆشان هاتینە مەزاختن، ب سەدان خزمەتگوزاری هاتینە پێشكێشكرن، هیڤیدارین بشێین باشتر خزمەتا نەخۆشان د ئەڤ سالە دا بكەین».
د. ئەفراسیاب موسا، رێڤەبەرێ گشتی یێ ساخلەمیا پارێزگەها دهوكێ پەیڤەك پێشكێشكر و سوپاسیا هەمی نۆشدار و پەرستار و كارمەندێن ساخلەمیێ و فەرمانبەرێن نەخۆشخانەیێ كر، كو د سالەكێ دا شیاینە خزمەتەكا باش پێشكێشی نەخۆشان بكەن و گۆت: «چەندین پڕۆژەیێن گرنگ یێن گرێدایی پەنجەشێرێ ل پارێزگەها دهۆكێ دهێنە بجهئینان، وەكو: ئاڤاكرنا سەنتەرێ لیناك یێ چارەسەریا پەنجەشێری ب تیشكێ ب گوژمێ‌ 16 ملیار دیناران و ل نێزیك دێ كەڤیتە د خزمەتا نەخوشان دا، ئاڤاكرنا سەنتەرێ گەلاڤێژ یێ چارەسەركرنا زارۆكێن توشی پەنجەشێرێ بووین و سەنتەرێ چاندنا هەستی و مەژی یێ دهۆكێ، ب تەمامبوونا ڤان پڕۆژەیان خزمەتەكا مەزن ژبۆ نەخۆشێن پەنجەشێرێ دێ هێتە كرن».

سندس سالح سلێڤانەیی:

پاركا گەلی، ئەوا دكەڤیتە تاخێ گەلی ل دهۆكێ، كو ئێك ژ كەڤنترین پاركێن سەنتەرێ‌ دهۆكێ یە، خەلكەك گازندان دكەن و دبێژن: ئەڤ پاركە هاتیە پشتگۆه ئێخستن، بەرپرسێ ڕاگەهاندنا سەرۆكاتیا باژێرڤانیا دهۆكێ ژی دیار دكەت كو ل نێزیك دێ تیمەكێ وان سەرەدانا وێ پاركێ كەت و كیماسی دێ هێنە چارەسەركرن.
شێروان حەسەن، بەرپرسێ ڕاگەهاندنا سەرۆكاتیا باژێرڤانیا دهۆكێ بۆ ڕۆژنامەیا ئەڤرۆ گۆت: «پاركا گەلی، ئێك ژ پاركێن كەڤنێن دهۆكێ یە و نوكە ژی هندەك فەرمانبەرێن باژێرڤانیێ لڤێ پاركێ كار دكەن و چاڤدان بۆ هەیە، لێ وەكو مە گۆتی پاركا كەڤنە چو پێ نەڤێت دێ هندەك كێماسی هەبن، وەكو: سیستەمێ ئاڤێ، بۆ ڤێ مەرەمێ ل نێزیك تیمەكێ ئەندازەیا پاركان دێ سەرەدانا ڤێ پاركێ كەت و كێماسی دێ هێنە چارەكرن».

رەمەزان زەكەریا:

ل سنۆرێ دەڤەرداریا ئاكرێ و بەردەڕەشێ هەژمارەكا رێكان ژ لایێ تیمێن رێڤەبەریا سەخبێركرنا رێك و پران ل ئاكرێ دهێنە سەخبێركرن.
ئەندازیار محسن میرانی، رێڤەبەرێ سەخبێری و پاراستنا رێك و پران ل ئاكرێ بۆ ئەڤرۆ گۆت: «ب مەرەما پاراستنا شۆفێران و نەهێلانا ئاستەنگێن هاتنوچوونێ، تیمێن تەكنیكی یێن سەر ب ڕێڤەبەریا ناڤبری ب شێوەیەكێ ڕاستەوخۆ بەردەوامن د كارێن سەخبێركرنا بلەز دا ل سنۆرێ دەڤەرداریا ئاكرێ و بەردەڕەشێ».
ناڤبری گۆت ژی: «ڕێكا دارەتوو بۆ بەهرەوان و ڕێكا سەرەكی یا بەردەڕەشێ‌ بۆ كەلەكێ‌ دهێنە سەخبێركرن و ئەو چالێن ل سەر رێكێ‌ چێبووین دهێنە پڕكرن».
ئەندازیار محسن زێدەتر گۆت: «ل سنۆرێ ناوچەداریا دینارتێ‌ ژی هەژمارەكا رێكا دهێنە سەخبێركرن و كاركرن ژی بەردەوامە هەتا هەموو رێكێن پێدڤی سەخبێركرنێ‌، سەخبێر دكەین».