دهۆك، لەزگین جۆقی:

بەرپرسێ راگەهاندنا سەرۆكاتیا باژێرڤانیا دهۆكێ دیاركر كو كابینەیا نەهێ یا حكومەتا هەرێما كوردستانێ گرنگیەكا مەزن دایە زێدەكرنا رێژەیا كەسكاتیێ و دبێژیت: رێژەیا كەسكاتیێ ل دهۆكێ‌ بەر ب ستاندەرێن جیهانی دچیت.
شێروان حەسەن، بەرپرسێ راگەهاندنا سەرۆكاتیا باژێرڤانیا دهۆكێ بۆ ئەڤرۆ خویا كر، پاركا سەرهلدان، كو تەمامبوویە و كەفتیە د خزمەتا وەلاتیان دا، دیسا پاركا ئالۆكا كو ئێك ژ پاركێن مەزنە لسەر ئاستێ ئیراقێ، نوكە كار تێدا دهێتە كرن و ب تەمامبوونا وێ‌ ژی رێژەیا كەسكاتیێ بۆ 16% هاتیە زێدەكرن و گۆت: «مە ل بەرە رێژەیا كەسكاتیێ‌ ل دهۆكێ‌ بگەهینینە 20% و بەر ب ستاندەرێن جیهانێ بچین ل دهۆكێ».
گۆت ژی: «بۆ جارا ئێكێ‌ یە د كابینەیا نەهێ دا، دارێن بەرهەمی ل پارێزگەها دهۆكێ بهێنە چاندن، دیسا د ناڤ تاخێن ئاكنجیبوونێ دا چەندین پارك هاتینە چێكرن، لسەر جادەیان ژی رێژەكا مەزن یا داران هاتینە چاندن بۆ زێدەكرنا رێژەیا كەسكاتیێ‌«.

د ڕێوڕەسمەكێ ژ هەژی دا ل باژێرێ‌ هەولێرێ‌، ب ئامادەبوونا سیداد بارزانی، نوونەرێ جەنابێ سەرۆك بارزانی، فازل میرانی، بەرپرسێ دەستەیا كارگێڕی یا مەكتەبا سیاسی یا پ. د. ك، و هەژمارەیەكا ئەندامێن دەستەیا كارگێڕی و ئەندامێن مەكتەبا سیاسی و كۆمیتەیا ناڤەندی، بەرپرسێن حزبی و حكومی و هەژمارەیەكا بەرچاڤ ژ نڤیسەران و ڕاگەهاندنكاران و هەڤسەنگەرێن وی د شۆڕشا ئیلۆن و گولانێ‌ دا، دوهی 2/6/2026 تەرمێ نڤیسەر و میدیاكارێ دیارێ كوردستانێ‌ و پێشمەرگەهێ‌ دێرین (ئەحمەد دەشتی) ل وەلاتێ ئەلمانیا گەهشتە هەرێما كوردستانێ‌ و ل جهێ‌ وی هاتە ڤەشارتن.
ئەحمەد دەشتی وەكو پێشمەرگەیەكێ دێرین و قەلەمەكێ دیارێ مەیدانا ڕۆژنامەگەریێ‌، ژییێ‌ خۆ پێخەمەت گەهاندنا دەنگێ ڕەوایێ‌ گەلێ كوردستانێ‌ و كاروانێ ڕەوشەنبیریێ‌ تەرخان كربوو، هەروەسا ڕۆلەكێ بەرچاڤ د میدیایا گۆهلێبووی ب گشتی و ئیزگێ دەنگێ كوردستانێ‌ ب تایبەتی دا هەبوو.
فازل میرانی، بەپرسێ دەستەیا كارگێڕی یا مەكتەبا سیاسی د پەیڤەكێ‌ دا پەسنا ڕۆلێ گرنگێ خودێ‌ ژێ‌ رازی د وارێ‌ میدیایی و پێشمەرگاتیێ‌ دا كر.

دهۆك، دلۆڤان ئاكرەیی:

ڕێڤەبەرێ گشتی یێ بازرگانی ل وەزارەتا بازرگانی و پیشەسازیا حوكمەتا هەرێما كوردستانێ دیاركر، حەفتیا بهێت چار خزمەتگوزاریێن نوو یێن فۆرما ئاهێن خوارنێ ب شێوازێ ئەلیكترۆنی دێ هێنە كاراكرن و د ڤی واری دا ئاسانكاریێن زێدەتر بۆ مامەلەیێن وەلاتیان دێ هێنە كرن.
نەوزاد شێخ كامل، ڕێڤەبەرێ گشتی یێ بازرگان ل وەزارەتا بازرگانی و پیشەسازی بۆ رۆژنامەیا ئەڤرۆ گۆت: «حەفتیا بهێت و پێڤە چار خزمەتگوزاریێن نوو دێ ل بەردەست بن، كو پێك دهێن ژ تۆماركرنا ناڤێ زارۆكان، ڤەگوهاستنا فۆرمێ‌ ژ بریكارەكی بۆ بریكارەكێ دی یان ژ باژێڕەكی بۆ باژێڕەكێ دی، هەروەسا تۆماركرنا وان كەسێن نوو هەڤژینی پێكئینای و بەری نوكە فۆرما ئاهێن خوارنێ نەبوویە، د ڤێ قووناغێ دا تەمامیا خزمەتگوزارییان دێ بنە ب پارە و بۆ هەر مامەلەیەكێ دێ شەش هزار دینار ژ وەلاتی دێ‌ هێنە وەرگرتن، بۆ نموونە: ئەگەر كەسەكی پێدڤی ب هەر چار خزمەتگوزارییان هەبیت، دڤێت 24 هزار دیناران بدەت و پارە ب شێوازێ كاش ناهێتە وەرگرتن، بەلكو ب تنێ ب ڕێیا ڤیزا كارتێ و ب شێوازێ ئەلیكترۆنی بیت».
گۆت ژی: «زێدەكرن دێ ب تنێ بۆ وان زارۆكان بیت، یێ‌ تەمەنێ وان د بن 12 سالیێ دا و نوكە ئەڤ خزمەتگوزارییە ل پارێزگەهێن دهۆك، سلێمانی و هەلەبجە یا كارایە، بڕیارە ڕۆژا ئەینیێ ل پارێزگەها هەولێرێ ژی ب فەرمی بهێتە كاراكرن».

دهۆك، دلۆڤان ئاكرەیی:

رێڤەبەرێ كۆچ و كۆچبەران ل پارێزگەها دهۆكێ دیاركر، 500 خێزانێن ئێزدی یێن ئاوارە ل كەمپێن دهۆكێ دێ ڤەگەڕنە سەر مالێن خۆ، ئەڤ پرۆسە ب هەڤكارییا ئای ئۆ ئێم و دەزگەهێ خێرخوازیێ بارزانی بجهـ دهێت.
پیر دەیان جەعفەر، رێڤەبەرێ كۆچ و كۆچبەران ل پارێزگەها دهۆكێ بۆ رۆژنامەیا ئەڤرۆ گۆت: «بەری نوكە وان ئاوارەیان خۆ تۆمار كریە، ئەڤ خێزانە ئەون یێن بەری نوكە ب دلێ خۆ ناڤێن خۆ بۆ ڤەگەڕیانێ تۆماركرین، ژبەر پاراستنا سلامەتی و رێكخستنا كاروانان، ب شێوەیێ قووناغ و گرۆپێن ژ 30 هەتا 40 خێزانان دهێنە برێكرن، پڕانیا ڤان خێزانان دێ ڤەگەڕنە سەر جهـ و وارێن خۆ یێن رەسەن ل دەڤەرداریا شنگالێ، ناوچەداریا سنوونێ و كۆمەلگەهێن دەوروبەر».
گۆت ژی: «هێشتا ب هزاران خێزانێن ئاوارە ل كەمپێن پارێزگەها دهۆكێ دژین، ژبەر كو هندەك دەڤەر هێشتا پێدڤی ب ئاڤادانكرن، دابینكرنا خزمەتگوزاریێن سەرەكی وەكی: ئاڤ، كارەب و ساخلەمی و ئارامیێ نە، دا كو بشێن ب تەمامی بزڤڕن».

ئامێدیێ، مەحمود نهێلی:

ژ بۆ پتر خزمەتكرنا دەڤەرێ د هەموو بیاڤان دا، ب تایبەت بیاڤێ‌ رەوشەنبیری، دەست ب پڕۆژەیێ چێكرنا ئاڤاهییەكێ نوو بۆ پرتووكخانەیا گشتی یا ئامێدیێ هاتیە كرن.
سەلمان نهێلی، رێڤەبەرێ پرتووكخانەیا ئامێدیێ بۆ رۆژناما ئەڤرۆ دیار كر، ئێك ژ وان پڕۆژەیێن نوكە دهێنە چێكرن، پڕۆژەیێ چێكرنا ئاڤاهیێ پرتووكخانەیا ئامێدیێ یە و گۆت: «ئەڤ پرۆژەیە ل سەر بودجەیا تایبەت یا پارێزگەها دهۆكێ دهێتە بجهئینان و گوژمێ 325 ملیۆن دیناران بۆ هاتینە تەرخانكرن.
رێڤەبەرێ پرتووكخانەیا ئامێدیێ دیار ژی كر، نوكە دۆرێن 35% كار د پڕۆژەی دا هاتیە كرن و كار د چێكرنا پڕۆژەی دا بەردەوامە و گۆت: «ئاڤاكرنا ئاڤاهیەكێ مودێرن بۆ پرتووكخانەیا ئامێدیێ ئێك ژ كارێن فەر بوویە، دڤێت بەری نوكە هاتباكرن، ژ بەر كو ئەڤە دێ بیتە ئەگەر پتر خزمەتا خواندەڤان و خەلكێ دەڤەرێ بهێتە كرن».

كاركرن ل سەر پڕۆژەیێ ستراتیژی یێ دیزاینكرن و بجهئینانا جۆتسایدكرنا 26 كیلۆمەترێن ڕێكا ئێتیت بۆ باعەدرێ بەردەوامە و هەتا نوكە پڕۆژەی قووناغێن باش دەرباس كرینە.
ئەڤ پڕۆژە، ئێك ژ پڕۆژەیێن ستراتیژی یێن حوكمەتا هەرێما كوردستانێ یە، ب تەمامبوونا پڕۆژەی ڕێكا د ناڤبەرا دهۆك بۆ هەولێرێ ب تەمامی دێ بیتە جۆتساید.
پڕۆژە ژ سێ قووناغان پێك دهێت، نوكە كار لسەر دووماهییا دو قووناغێن دەستپێكێ و بڕین و داگرتنا قووناغا دووماهیێ دهێتە كرن.
ب مەرەما سلامەتییا دەربازبوون و هاتنوچوونا وەلاتیێن گوند و دەڤەر و باژێڕێن دكەڤنە سەر ڤێ‌ رێكێ‌، د ناڤ پڕۆژەی دا پتر ژ 10 ئەندەرپاس و ئۆڤەرپاس ل گەل ڤەكرن و قێركرنا پتر ژ 30 كیلۆمەترێن ڕێكێن خزمەتگوزاری هاتینە چێكرن.
پڕۆژە دكەڤیتە دەڤەرەكا چیایی یا ئاسێ‌، لەو هەژمارەكا زۆرا ئاڤڕێژان هاتینە چێكرن.