رەمەزان زەكەریا:
ب ئامادەبوونا دكتۆر سالار عوسمان، بەرپرسێ پشكا رەوشەنبیری و راگەهاندنا پارتی، دوهی 6/7/2026 د رێورسمەكێ ژ هەژی دا رێز ل نڤیسكار و هەلبەستڤان كەمال رەمەزان ئاكرەیی ل ئاكرێ هاتە گرتن، دیسا رێورسمێن دەست ب كاربوونا سولین تەیب عەبدولرەحمان هاتنە برێڤەبرن، كو وەكو رێڤەبەرا نوو یا رادیۆیا دەنگێ كوردستان – ئاكرێ دەست ب كاربوو.
نڤیسەر و هەلبەستڤان كەمال رەمەزان ئاكرەیی د پەیڤەكێ دا گۆت: «ئەڤرۆ بۆ من جهێ شانازیێ یە، رێز ل خەبات و خزمەتا من بهێتە گرتن، ئەز باوەرم ئەڤرۆ دێ مێژوویا سەربلندیێ بیت، دیسا سەربلندیەكا مەزنە دەمێ هەلسەنگاندنا مرۆڤێن ئەمەكدارێن پرۆسەیا پەیڤێ و پەیڤا سیاسی دهێتە كرن، ژ بەر كو پەیڤ ل بەراهیێ یە و سەركێشیا پێشڤەچوونا هەر تاك و جڤاكەكی یە».
دكتۆر سالار عوسمان، بەرپرسێ پشكا رەوشەنبیری و راگەهاندنا پارتی د پەیڤا خۆ دا گۆت: «كەیفخۆشین ل باژێڕكێ ئاكرێ، كو بۆ مە و بۆ هەموو خەلكێ كوردستانێ یێ پڕە ژ بیرهاتنێن شرین و یێ پڕە ژ خەباتا مەزن و پڕە ژ پەیڤ و هونەر و سترانێن زەنگین، ئەڤرۆ د رێورەسمەكی دا، كۆم دبین، كو رێورەسمێ رێزگرتنێ یە ل ئێك ژ هۆزانڤانێن دیارێن كوردستانێ و ئاكرێ، ئەو ژی مامۆستا كەمال رەمەزان ئاكرەیی یە».
دكتۆر سالار گۆت ژی: «مامۆستا كەمال رەمەزان ئاكرەیی ژیانا خۆ كریە پشكەك ژ هۆزانێ و هۆزان ژی كریە پشكەك ژ ژیانێ و خواستیە د رێیا هۆزان و پەیڤا رەنگین را بۆ كوردستانێ، بۆ نیشتیمانی، بۆ ئەڤیداریێ، بۆ ئایندەسازیێ كار بكەت».
دیسا هەر دوهی 6/7/2026 ل ئاكرێ د. سالار عوسمان، بەرپرسێ پشكا رەوشەنبیری و راگەهاندنا پارتی ب هەڤالینا هەژمارەكا ئەندامێن پشكێ، سەرەدانا هونەرمەند و فۆتۆگرافەر ئیلهام محەمەد یوسف كر و پرسا ساخلەمیا وی كر و سەحكرە وان وێنەیێن ب كامێرایا خودێ ژێ رازی محەمەد یوسفی بابێ وی هاتینە گرتن و هەتا نوكە هاتینە پاراستن.
دیسا هەر دوهی 6/7/2026 ل ئاكرێ د. سالار عوسمان، بەرپرسێ پشكا رەوشەنبیری و راگەهاندنا پارتی ب هەڤالینا هەژمارەكا ئەندامێن پشكێ، سەرەدانا سترانبێژ محەمەد تەها ئاكرەیی كر و باس ل ڕەوشا هونەری ل ئاكرێ و دەڤەرێ هاتە كرن و پشتەڤانیا پشكا رەوشەنبیری و راگەهاندنێ بۆ هەر پێنگاڤەكێ دوپاتكر كو د خزمەتا گشتی دا بیت.
نيشاندان