قەیس وەیس:

د داخویانیەكێ‌ دا زافر عەبدولئەمیر سەرۆكێ‌ فدراسیۆنا یارییا شەترەنجا ئیراقێ‌ كەیفخوەشیا خوە دیار كر ب ڤەگەڕیانا پارێزگەها دهۆكێ‌ بۆ مێڤاندارییا قارەمانیێن ئیراێ‌ و سۆپاسییا پارێزگار و لژنەیا ئۆلمپییا دهۆكێ‌ كر ب هەڤكاری و پشتەڤانییا وان.
زێدەتر ناڤهاتی بۆ ئەڤرۆ گۆت: قارەمانییا شەترەنجێ‌ ل سەر ئاستێ‌ یاریزانێن تاك بۆ یانەیێن ئیراقێ‌ یێ تازەپێگەهشتییان و پشكۆژان یێن كوڕ و كچان ل پارێزگەها دهۆكێ‌ دێ‌ هەتا 10ێ‌ ڤێ‌ مەهێ‌ بەردەوام بیت، بەری هەر تشتەكی دڤێت سۆپاسییا پارێزگارێ‌ دهۆكێ‌ د. عەلی تەتەر كو ب چاڤدێرییا وی یە و دیسان د. ئەحمەد قاسم سەرۆكێ‌ لژنەیا ئۆلمپییا دهۆكێ‌ هەڤكار و هاریكار بوویە ئەڤ قارەمانییە دوباری ڤەگەڕیتە دهۆكێ‌ پشتی ڤەقەتیانەكا درێژ و دووركەڤتن ژ چالاكییان، پێخوەشحالین كو زێدەتری 150 یاریزان ژ پرانییا دەڤەرێن ئیراقێ‌ پشكدارن ئەڤە ژی ڕامانا وێ‌ ددەت كو ئەڤێ‌ یاریێ گرنگییەكا تایبەت هەیە تایبەت ل سەر ئاستێ ژیێن بچووك.
ژلایەكێ‌ دووڤە نەهلا ئەحمەد ئەنداما لژنەیا قارەمانیێ گۆت: مێڤانداریكرنا پارێزگەها دهۆكێ‌ بۆ قارەمانییا شەترەنجێ‌ ل سەر ئاستێ‌ ئیراقێ‌ بەلگەیە ب هەبوونا خالێن سەركەڤتنا كاروانێ‌ قارەمانیێ و ئەڤە ژی وێ‌ چەندێ‌ دیاركەت ب هەبوونا ژێرخانەیا وەرزشی و پشتەڤانییا حكومەتا هەرێما كوردستانێ‌ و پارێزگارێ‌ دهۆكێ‌ بۆ وەرزشێ‌ و هەر قارەمانییەكێ‌ دیسان رۆلێ‌ لژنەیا ئۆلمپییا دهۆكێ‌ هەردەم بەرزبوویە ژبۆ كاروانَێ‌ سەركەڤتی و ڕێكخستنەكا ژ هەژی بۆ هەر قارەمانییەكێ‌، ب هیڤییا وێ‌ یەكێ‌ ئەم قارەمانێن دهۆكییا دڤێ‌ روودانا وەرزشی بینن.

شاهۆ فەرید:

د داخویانییەکا تایبەت دا کوڕێ پارێزگەها دهۆکێ و کولپارێزێ بەرێ یانەیا ئەلگەرمە دلۆڤان مەهدی بۆ رۆژنامەیا ئەڤرۆ دیارکر ئەگەرێ چوونا وی بۆ یانەیا دیالا ئەوە کۆ یاریێ ب شێوەیێ سەرەکی بکەت وگۆت: پشتی بۆرینا وەرزەکێ ل گەل یانەیا ئەلگەرمە کێم پشکداری من هەبووینە، ئەڤە ژی بۆ ئەگەرێ هندێ گرێبەستا خوە ل گەل یانەیا ناڤبری نوو نەکەم.
زێدەتر ناڤهاتی گۆت ژی: ئوفەر ژ گەلەک یانەیان بوو من هاتن بەلێ من یانەیا دیالا ژێگرت، گرێبەستا من بۆ ماوەیێ سالەکێ یە، هیڤیا وێ چەندێ بشێیم ئاست و کلینشێتان تۆماربکەم، وەرزێ بوری یانەیا دیالا ئاستەکێ باش نیشاندایە و هژمارەکا زەحمەت ناڤا خولا ستێرین ئیراقێ دا بوو.

پشتی ب فەرمی هاتیە ڕاگەهاندن ستێرێ‌ هێلا ناڤین یێ هەلبژارتیێ فرەنسا ئۆریلیان چوامینیگی دێ‌ دووركەڤیت ژ یاریگەهێ‌ و یارییا بهێت بەرانبەر هەلبژارتیێ مەغرب ناكەت، ڕاهێنەرێ‌ فرەنسا دیدی دیشامب نەچاریە پلانێن خوە ب گوهۆڕیت شێوازێ‌ یارییا پشت بەست ل سەر كری بۆ شێوازەكێ‌ دی بدانیت بەری دیدارا بهێت یا رۆژا پێنچ شەمبی، رۆژنامەیا لیكیب یا فرەنسی دیاركر چوامینگی تووشی هنگاڤتنا ڕانێ‌ پێ خوە بوویە، بۆ یارییا بهێت بەرانبەر مەغرب یێ‌ بەرهەڤ نابیت، لێ‌ دێ‌ ناڤێ‌ وی دناڤا پێكهاتیێ تیمێ‌ دا بیت، ب ئەگەرەكێ‌ مەزن ڕاهێنەر نەشێت پشبەستنێ‌ وەكو یاریزانێ‌ سەرەكی ل سەر بكەت، لێ‌ دوورنینە ژی یا دروست بۆ بەرهەڤییا وی نە هێتە بەلاڤكرن.

د یارییا ئنگلتەرا و مەكسیك دا ژ قووناغا 16ێ‌ یا مۆندیالێ‌ ئێك ژ سەیرترین روودانێن دیرۆكی د یارییا فوتبۆلێ‌ دا پەیدابوو، ئەوژی یاریزانێ‌ ئنگلتەرا جۆردن هندرسۆن یەدەكێ‌ تیمێ‌ بوو ئێك خولەك ژی یاری نەكربوو، لێ‌ كارەتەكا زەر وەرگرت پشتی نەڕازیبوون ل سەر بڕیارەكا دادڤانی دایی، هەروەسان تووشی هنگاڤتنێ‌ بوو پشتی یاری ب دووماهی هاتی ب سەركەڤتنا ئەنگلتەرا دگەل یاریزانان ئاهنگا سەركەڤتنێ‌ گێڕا ژ نشكەكێ‌ ڤە دناڤبەرا بۆردێن ڕیكلاما دكەڤیت و دەستێ‌ وی تووشی هنگاڤتنەكا مەترسی دبیت ل دەست و مللێن خوە كو بوو ئەگەر كادرێ‌ چارەسەریێ بۆ نەخۆشخانێ‌ ڕەوانەبكەت.

هەلبژارتیێ بەرازیل بەردەوامە ل سەر دەستدانا ناسناڤێ مۆندیالا جیهانی ئەوا دووماهی جار ل مۆندیالا 2002ێ‌ ب دەستڤەئینایی كو دبنە پێنچ ناسناڤ پێشتر ئینایین، لێ‌ د شەش مۆندیالێن بۆری دا پێنچ ڕاهێنەران سەرپەرشتیا بەرازیل كرییە و دەستڤالان ژ مۆندیالێ‌ ڤەگەڕیاینە، ل 2006ێ‌ دقووناغا چارێك دووماهیێ دا بەرانبەر فرەنسا دەركەڤت بوو، د مۆندیالا 2010ێ‌ دا د هەمان قووناغ دا بەرانبەر هۆلەندا دەركەڤتبوو، ل مۆندالا 2014ێ‌ پێش دووماهیێ بەرانبەر ئەمانییا دەركەڤت بوو، ل مۆندیالا 2018ێ‌ دقووناغا چارێك دووماهیێ بەرانبەر بەلجیكا دەركەڤت بوو، ل مۆندیالا 2022ێ‌ د هەمان قوونا غدا بەرانبەر كرواتیا تووشی خوسارەتیێ بوو و دەركەڤت، دڤێ‌ مۆندیالێ‌ دا بەرانبەر نەرویج ژ قووناغا 16ێ‌ دا دەركەڤت.

ئەرجەنتین- مسر
چاڤەڕێ‌ دهێتە كرن ئەڤرۆ ل دەمژمێر حەفتی شەڤ یاریگەها مێرسێدس ل ئەتلانتایا ئەمریكا هەلبژارتیێ ئەرجەنتین هەلگرا مۆندیالا بۆری دێ‌ بەرانبەر هەلبژارتیێ مسرێ‌ شەڕی بۆ دەستڤە ئینانا پلێتا دەربازبوون بۆ قووناغا چارێك دووماهیێ، هەلبژارتیێ فیرعەونیان بۆ جارا ئێكێ‌ یە دەربازبوویە ڤێ‌ قووناغێ‌ پشتی ب لێدانێن پەنەلتییان سەركەڤتی ل سەر ئوسترالیا، ژلایێ خوەڤە هەلبژارتیێ سەماكەرێن تانگۆ ب زەحمەت دەربازبوو ڤێ‌ قووناغێ‌ پشتی 3-2 گۆلان سەركەڤتی ل سەر كاپ ڤێردی، ئەرجەنتین ب سەركێشا مێسی و مسر ب سەركێشیا محەمەد سەلاح دێ‌ یارییەكا ئاگرین بیت.
سویسرا- كۆلۆمپیا
یارییا دویێ یا ئەڤرۆ و دووماهی پلێتا دەربازبوون بۆ قووناغا چارێك دووماهیێ هەلبژارتیێ سویسرا دێ‌ بەرانبەر هەلبژارتیێ كۆلۆمپییا شەڕی بۆ دەربازبوونێ‌ كەن ئەوا دێ‌ ل دەمژمێر 11شەڤ ل یاریگەها بی سی پلێس ل كەنەدا هێتە كرن، سەركەڤتیێ ڤێ‌ یاریێ دێ‌ بەرانبەر سەركەڤتیێ مسر و ئەرجەنتین بیت، سویسرا ب مۆرالەكا بلند و پشت بەستن ب ستێرێ‌ خوە یێ‌ گەنج یۆهان مانزامبی هێتە دناڤ یاریگەهێ‌ دا، كۆلۆمپییا ب سەركێشییا ستێرێ‌ خوە لویس دییاز دێ‌ بزاڤێ‌ كەت بگەهیتە ئارمانجا خوە یا دەربازبوونێ‌.

ب تۆماركرنا دو گۆلان ل سەر بەرازیل ستێرێ‌ هەلبژارتیێ نەرویج ئیرلینگ هالاند گۆلێن خوە دناڤا مۆندیالێ‌ دا گەهاندنە حەفت گۆلان و ببیتە هەڤڕكێ هەر ئێك ژ ستێرێ‌ ئەرجەنتینی لیۆنێل مێسی و یێ‌ فرەنسی كێلیان مباپی ئەوێن هەر ئێك ژ وانا حەفت گۆل هەین، هەروەسان ل سەر ئاستێ‌ وەلاتێ‌ خوە د 14 یارییان دا 21 گۆلان تۆماربكەت ژ وانا 16 گۆل د ڤاڤارتنێن ئۆرۆپا بۆ مۆندیالێ‌ كو بیتە ڕیكۆردەكا پیڤایی دگەل هەلبژارتیێ نەرویج و ب گشتی ل سەرجەمێ‌ 54 یارییان ب درێسێ‌ نەرویجێ‌ 62 گۆل تۆماركرینە، ئەڤ ئامارە دلخۆشكەرێن بۆ یاریزانەكێ‌ 26 سالی كو هێشتا ڕێكا ڤەكرییە بۆ تۆماركرنا زێدەتر گۆلان.

د دیدارەكا رۆژنامەڤانی دا نەیمار جۆنیۆر ستێرێ‌ هەلبژارتیێ بەرازیل ب فەرمی كاروانێ‌ خوە یێ‌ فوتبۆلێ‌ ل یاریگەهێن نێڤدەولەتی ب دووماهی ئینا و گۆت: مە گەلەك بزاڤ دكرن ئەم سەركەڤتنێ‌ بینن لێ‌ هەلبژارتیێ نەرویج دزانی دێ‌ چەوا هێرشێن مە ڕاوەستینیت، دەستپێكا كاروانێ‌ من لڤێ‌ یاریگەهێ‌ بوو میت لایڤ و ئەڤرۆ ژی مە د هەمان یاریگەهـ دا كاروانێ‌ خوە ب دووماهی ئینا، ئەڤە ژیانە و هەر پێنگاڤەكێ‌ دووماهییا خوە هەیە، دەركەڤتنەكا ب ژانە و پێ‌ نەخۆش بووم، نەیمار ێ‌ 34 سالی د ژیێ 16 سالی دا دەست ب كاروانێ‌ خوە دگەل هەلبژارتیێ بەرازیل كربوو، 130 یارییان پشكداری كرییە، 80 گۆل تۆماركرینە و 59 گۆل چێكرینە.

د وەرزێ‌ بۆری دا ستێرێ‌ هەلبژارتیێ ئنگلتەرا جۆد بیلینگهام ل گەل ڕیال مەدرید یا ئسپانی تووشی ڕەخنەیێن دژوار بوو ژبەر ئاستێ‌ وی نە باش گەهشتبوو وێ‌ ڕادەیی پشتەڤانان داخوازا دوورئێخستنا وی كربوو، لێ‌ پشتی دگەل هەلبژارتیێ خوە د مۆندیالێ‌ دا پشكداربوویی د نوكە دا بوویە ئێك ژ قورتالكەرێن وەلاتێ‌ خوە و سەركێشا هەلبژارتیێ ئنگلتەرا دكەت، ل دووڤ ئاماران كاریگەرترین یاریزانێ‌ ئنگلتەرایە پشتی یارییا شەڤا دەربازبوو بەرانبەر هەلبژارتیێ مەكسیك خودانێن ئەردی و سەركەڤتین ب3-2 گۆلان و تیما وەلاتێ‌ خوە بەر قووناغا هەشتێ‌ برین شیایە هەتا نوكە چار گۆلان تۆماربكەن و پێنچ ئەسێست هەبن ژوانا ئێك ببیتە گۆل، پەیچێ‌ سۆفا سكۆر یێ‌ جیهانی ڕێژەیا نەهـ ژ دەهێ‌ بۆ دانایە.