باشترکرنا فڕێدانا به‌رمایكان پێدڤی ب تێکەلەیەکێ ژ پەروەردە، ژێرخان، هاندان و ڕێسایان هەیە کو ل دیڤ ئاستەنگێن هه‌ر ناوچەیه‌کێ بگونجیت. ل ڤێرە چەند ستراتیژییێن سەرەکی دێ باس كه‌ین:

١- بهێزکرنا هۆشیاری و پەروەردەیا گشتی
هەڵمەتێن کۆمەڵایەتی: بکارئینانا سۆشیال میدیا، تەلەفزۆن و ڕادیۆیان ژ بۆ پەروەردەکرنا خەڵکی سەبارەت ب فڕێدانا به‌رمایكان ب شێوه‌یه‌كێ دروست و زانینا کاریگەریێن وان لسەر ژینگەهێ.
بەرنامەیێن قوتابخانەیان: تێکەڵکرنا پەروەردەیا بڕێڤەبرنا به‌رمایكان ل مەنهەجێ قوتابخانەیاندا، ئه‌وژی ژ بۆ چاندنا هزره‌كا باش و ئه‌رێنی ل ژیه‌کێ بچووکدا ل ده‌ڤ هه‌می قوتابیان.
بەشداریکرنا زانکۆ و ڕێکخراوێن ناحکومی: هه‌ڤبەشیکردن لگەڵ زانکۆ و ڕێکخراوێن ناحکومی یێن ژینگەهی یان پالپشتێن ژینگه‌هی ژ بۆ پێشخستنا پراکتیکێن به‌رمایكێن بەردەوام.

٢- باشترکرنا ژێرخانا کۆمکرنا به‌رمایكان
زێده‌كرنا سەبەتێن گشتی: دانانا سەبەتێن به‌رمایكان یێن ڕەنگاوڕەنگ بۆ به‌رمایكێن گشتی و ڕیسایکلبری و به‌رمایكێن ئۆرگانیک ل هه‌موو باژێر و ده‌ڤه‌ره‌كا پێدڤی.
کۆمکرنا به‌رمایكێن بەردەوام: دڵنیابوون ژ وێ چه‌ندێ کو باژێرڤانی یان كۆمپانیێن پێ رادبن، بارهەڵگر و کارمەندێن پێویست هەنە بۆ کۆمکرنا هه‌ر به‌رمایكه‌كێ ب شێوەیەکێ بەردەوام.
سەنتەرێن ڕیسایکلکرنێ: جهێن پتر یێن ریسكایكلكرنێ ژ بۆ به‌رمایكێن وەکو پلاستیک، کاغەز، شویشە، و به‌رمایكێن ئەلیکترۆنی و یێن دیتر بهێنه‌ دانان.

٣- ناساندنا هاندانێ ژ بۆ فڕێدانا به‌رمایكێن دروست
پاداشتا ڕیسایکلکرنێ: هاندانا بازرگانان و هه‌ر تاکەكێ بهێته‌ كرن ژ بۆ ڕیسایکلکرنێ ب پێشکێشکرنا داشکاندن، کێمکرنا باجێ، یان هاندانه‌كا بچویک یا نەختینەیی.
سیستەمێ دانان و ڤه‌گەڕانا پارەی: سیاسەتا ڤه‌گەڕاندنا گۆژمه‌كێ دیاركری یێ پاره‌ی به‌رامبه‌ر دانانا پلاستیک، شویشە و ئەلەمنیۆم و هه‌ر جۆره‌ك دی ل جهێن تایبه‌ت ژ بۆ مه‌به‌ستا جێبەجێكرنا هاندانا ڕیسایکلکرنێ.
پشتگیری بۆ بازرگانیا دۆستێ ژینگەهێ: پێشکێشکرنا هاریكاری یان دانپێدان بۆ وان بازرگانیێن کو پاکەت و بەستەرێن بەردەوام بکاردئینن یان به‌رمایكان کێم دکەن.

٤- جێبەجێکرنا ڕێسایێن بڕێڤەبرنا به‌رمایكان
سزادانا فڕێدانا نایاسایی: جێبەجێکرنا سزایه‌ك توند ژ بۆ فڕێدانا به‌رمایكان ب رێكه‌كا نه‌دروست و نه‌یاسایی.
بەرپرسیاریا بازرگانی: داخۆاز ژ مارکێت و بەرهەمهێنەران بکه‌ن کو پاکەت و بەستەرێن پلاستیکی کێم بکەن و بەشداری ل بەرنامەیێن ڕیسایکلکرنێ دا بکەن.
ڕێسایێن به‌رمایكێن بیناسازی: دڵنیابوون ژ وێ چه‌ندێ کۆمپانیایێن بیناسازی ب شێوەیەکێ دروست به‌رمایكان فڕێددەن و ناهاڤێژنه‌ جهێن دی و ب تایبه‌ت جهێن ڤه‌كری.

٥- پێشخستنا بەشداریکرنا کۆمەڵگه‌هان
پاقژکرنا هه‌ر گەڕەک و ناوچه‌یه‌كێ: ڕێکخستنا هەڵمەتێن پاقژکرنا بەردەوام ل هه‌ر گه‌ره‌ك، باژێر و ناوچەیه‌كا گوندنشین، ئه‌وژی ژ بۆ هاندانا بەشداریکرنا ناڤخۆیی و ئه‌ڤ چه‌نده‌ ببیته‌ دیارده‌ و نه‌ریته‌كێ به‌رده‌وام.
بەشداریکرنا خۆبەخش و ڕێکخراوێن ناحکومی: هه‌ڤبەشی لگەڵ گروپێن ژینگەهی ژ بۆ به‌ڵاڤکرنا هۆشیاریێ و گرتنەبەرا هه‌ر هنگاڤه‌كێ باش لسەر پرسێن به‌رمایكان.
هاندانا بازرگانیێن ناڤخۆیی ژ بۆ بەشداریکرنێ: کارکرن لگەڵ خارنگه‌ و بازاڕان ژ بۆ کێمکرنا ب فیڕۆدانا خۆارنێ و بەرەڤپێشبرنا کۆمپۆستکرنێ.

٦- هاریکاریا حکومەت و کەرتێ تایبەت
هه‌ڤبەشیا گشتی و تایبەت: هاندانا کۆمپانیێن تایبەت ژ بۆ وەبەرهێنانێ ل کارگەیێن ڕیسایکلکرنا به‌رمایكان.
دەستپێشخەریێن به‌رمایكان ژ بۆ وزەی: ڤه‌کۆڵین ل گۆهڕینیا به‌رمایكێن ئۆرگانیک ژ بۆ بایۆگازێ یان کارەبێ د به‌رده‌وام بن.
یاسادانان بۆ پاقژکرنا بەردەوام: جێبەجێکرنا سیاسەتان ژ بۆ کێمکرنا به‌رمایكێن پلاستیک و هاندانا پێكگۆهۆركێن زیندی.
ل دوماهیێ، ب پەروەردەکرنا کولتورێ بەرپرسیاره‌تی و بەردەوامیێ، فڕێدانا به‌رمایكان ب شێوه‌یه‌ك دروست دشێت ببیتە بنیات، کو دبیتە ئه‌گه‌رێ ژینگەهه‌ک ساخله‌متر و باشترکرنا کوالیتیا ژیانێ ژ بۆ نها و نەڤیێن داهاتی.

تایبەتمەندەكێ‌‌ بێهۆشكرنێ‌‌ دیاردكەت دەمێ‌‌ نەخۆش دهێت ب تایبەتی ژی ئەگەر پێدڤی ب بێهۆشكرنێ‌ بیت بو هەر جورە نشتەرگەریەكێ‌، بەری دانا پەنجێ‌‌ نەخۆش دهێتە دیتن و پشكنینكرن ژلایێ‌ تایبەتمەندێ‌ بێهۆشكرنێ‌ ڤە، هەكە كێماسەك هەبیت ئەم نشتەرگەرییێ‌ بو نەخۆشی ناكەین و پێدڤیە هەموو نەخۆشیێن وی دكۆنترولكری بن پاشی پەنج دهێتە دانان.
د. مێڤان جەمیل، تایبەتمەندێ‌‌ بێهۆشكرنێ‌‌ دیاركر كو ل دووڤ ئەنجامێ‌‌ پشكنینان و حالەتێ‌ نەخۆشی ئەم كاردكەین، چونكو چەند جۆرێن پەنجێ‌‌ هەنە، بو نمونە پەنجكرنا (گشتیی، نیڤپەنج پەنجكرنا خوجهی، پەنجكرنا دەمارێن هەستكرنێ‌) و دەستنیشانكرنا ڤان جورە پەنجا ل دووڤ حالەتێ‌ نەخۆشی و جورێ‌ نشتەرگەریێ‌ دهێتەكرن، و گۆت: پشتی پشكنینێن نەخۆشی دهێنە دیتن ژلایێ‌ نۆشدارێ‌ تایبەتمەندێ‌ بێهۆشكرنێ‌ ڤە، دگەل دیتنا پشكنینێن وی، ئەگەر دیاربوو نەخۆشی نەخۆشیەكا دەگمەن یان دومدرێژ هەبیت، و چارەسەریا خوە دروست نەكربیت یان ئەگەر پشكننێن وی تشتەكێ‌ نەیێ‌ نورمال دیار بوو، تایبەت بو وان نشتەرگەریێن سار، پێدڤیە نشتەرگەریا نەخۆشی بهێتە پاشئێخستن ب مەرەما هندێ‌ بهێتە دیتن ژلایێ‌ نۆشدارێ‌ تایبەتمەند ڤە ل دووڤ حالەتێ‌ نەخۆشی، ژ پێخەمەت كۆنترۆلكرن و چارەسەركرنا حالەتێ‌ نەخۆشی، وگوتژی: گەلەك نەخۆش هەنە هندەك جورێن چارەسەریا بو هندەك نەخۆشیێن دی وەردگرن، وەك نەخۆشیێن (دەروونی و دلی و بهێنتەنگیێ‌ و گۆلچیسكا) هتد .. پێدڤیە هندەك ژوان جورێن چارەسەریا دەمەكی بەری نشتەرگەریێ‌ بهێنە راوەستاندن، و هندەك تا رۆژا نشتەرگەریێ‌ د بەردەوام بن، هەروەسا ئەو نەخۆشێن گەلەك جگارا دكێشن پێدڤیە بو ماوەیەكی بەری نشتەرگەریێ‌ ب راوەستینن.
د.مێڤان جمیل، ئاشكرا كر كو نشتەرگەری د ژێكجۆدانە، هندەك نشتەرگەری پێدڤیە بلەز بهێنەكرن، چونكو مەترسی ل سەر ژیانا نەخۆشی هەیە و ئەگەر زوو نەهێتەكرن رەنگە ژیانا خوە ژ دەست بدەت، بو نمونە نەخۆشەكێ‌ تووشی روودانەكێ‌ ببیت و خۆینبەربوونەكا مەزن بو دروستببیت، بوو ڤان جورێن نشتەرگەریا وەك نۆشدار نەشێن خوە بگرن هەتا پشكنینێن وی ب دەركەڤن یان نەخۆشیەكا دومدرێژ نەهاتبیتە كۆنترولكرن، و ئەو دەم نینە و دێ‌ هێتە نشتەرگەریكرن، جورەكێ‌ دی یێن نشتەرگەریا هەیە كو راستە نەخۆش پێدڤیە بەلێ‌ نشتەرگەریەكا بلەز نینە، ئەف جورێن نشتەرگەریا دانێ‌ سپێدێ‌ ل هەموو نەخۆشخانا ل دووف تایبەتمەندیا خوە دكەن، بوو ڤان جورە نشتەرگەریان ئەگەر كێماسیەك د پشكنینا دا هەبیت، یان حالەتێ‌ نەخۆشی یێ‌ هاریكارنەبیت بو دانا پەنجێ‌ ژبەر هەر ئەگەرەكی، پێدڤیە ئەف نشتەرگەریە بهێتە پاشئێخستن.