قەیس وەیس:

ب دووماهی هاتنا یاریێن گەرا30ێ‌ ژ خولا ستێرێن ئیراقێ‌ یا فوتبۆلێ‌، ئەنجامێن یانەیێن كوردستانێ‌ دناڤبەرا سەركەڤتن، خوسارەتی و وەكهەڤی و ژلایەكێ‌ دووڤە نەڕازیبوونا پشتەڤانێن چەند یانەیان ل سەر لاوازییا ئەنجامان دا بووینە.
دهۆك یا د زوونا ئەنجامێن لاواز دا
تیما یانەیا دهۆك ئەوا بۆ یارییا چوارێ‌ یە ل دووڤ ئێك نە شیایە دلێ‌ جەماوەرێ‌ خوە خۆشبكەت، پشتی د ڤێ‌ گەڕی دا دو خال بەرانبەر مێڤانا خوە ئەلغراف ژدەستدایین، پشتی ب گۆلەكێ‌ دگەل وەكهەڤبووی، ئەڤ ئەنجامە نەچاركریە كو بەردەوام پاشڤە بچیت كو د نوكە دا ڕێزا 12ێ‌ دهێت ب كۆمكرنا 38 خالان، ژ 10 سەركەڤتن، هەشت وەكهەڤی، 12 خوسارەتی هەنە، یاریزانێن وێ‌ 31 گۆل تۆماركرینە لێ‌ 33 گۆل ل سەر هاتینە تۆماركرن.
ڕاهێنەر بێ‌ چەنسیا تیمێ‌ دكەتە ئەگەر
د پرێسكۆنفرانسەكێ‌ رۆژنامەڤانی دا ئەحمەد خەلەف گۆت: یاریزانێن مە د ناڤا یاریگەهێ‌ دا هەموو بزاڤان كەن بۆ تۆماركرنا گۆلێ‌ و پتر نێزیكی گۆلا بەرانبەر بووینە، لێ‌ بێ‌ چەنسییا تیمێ‌ د تۆماركرنا گۆلان دا بوویە ئەگەر ئەڤە چار یارییە ژ سەركەڤتنان دووركەڤتینە، هێشتا یاری ماینە و من باوەری ب شیانێن یاریزانێن خوە هەیە، بتنێ‌ پێدڤی ب سەركەڤتنەكێ‌ نە ژبۆ ڤەگەریانا تیمێ‌ بۆ ئاست و ئەنجامێن سەركەڤتی و بەردەوامبن.
زاخۆ برینێن كۆپا كەنداڤی دەركرن
ژلایێ‌ خوەڤە تیما یانەیا زاخۆ سەركەڤتنەكا گرنگ و یا مەعنەوی و دەرۆنی ئینا پشتی بەرانبەر مێڤانا خوە یانەیا كارەبا ب دو گۆلان بەرانبەر گۆلەكێ‌ سەركەڤتی، ئەڤێ‌ ئەنجامی تیما زاخۆ ل ڕێزا حەفتێ‌ مۆكمتر لێكرن ب 50 خالان ژ 14 سەركەڤتن، هەشت وەكهەڤی و حەفت خوسارەتیان، 26 گۆل ڤەڕێژا گۆلێن یاریزانێن زاخۆیە دبەرانبەردا 38 گۆل ل سەر بووینە.
ڕاهێنەرێ‌ زاخۆ سەركەڤتنێ‌ ب پێنگاڤەكا باش دانیت
د كۆنگرەیێ‌ رۆژنامەڤانی دا ئەیۆب ئۆدیشۆ ڕاهێنەرێ‌ یانەیا زاخۆ گۆت: سەركەڤتنەكا گرنگ بوو بۆ تیمێ‌ پێخەمەت ڤەگەڕاندنا مۆرالا یاریزانان و ئارامكرنا دەرۆنێ‌ وان پشتی كۆپا كەنداڤی، سەرباری وەستانێ‌ ژ قەتەر بۆ توركیا و دووڤدا بۆ زاخۆ د دەمەكێ‌ كێم دا لێ‌ یاریزانان یا د ل سەر پێدڤی ئەنجامدا ئەوژی دەستڤەئینانا سێ‌ خالان، د ڤێ‌ یاریێ‌ دا چار یاریزانێن مە ژبەر كارتێن زەر و هنگاڤتنان یاری نە دكر لێ‌ ئەوا مە دڤیایی سێ‌ خالێن دی مە بدەستڤەئینان.
هەولێر ب خالەكێ‌ ڤەگەڕیا
ژلایێ‌ خوەڤە تیما یانەیا هەولێر ب خالە ژ بەغدا پایتەختێ‌ ئیراقێ‌ ڤەگەریا پشتی دگەل خودانا سەرێ‌ لیستێ‌ یانەیا جەوییە ب گۆلەكێ‌ وەكهەڤبووین، ئەڤ ئەنجامە یێ‌ خراب نەبوو بۆ هەولێریان و شیان ڕێزا خوە بپارێزین و گەشبینی بۆ هەڤڕكییا پێشەنگیێ بكەن، بڤێ چەندێ‌ خالێن هەولێرییان مانە 60 خال و جهێ‌ خوە ل ڕێزا سێیێ‌ پاراست.
هەولێر گۆتگۆتێن خوسارەتبوونێ‌ ڕەد دكەن
یانەیا هەولێر ئەو دەنگۆیێ هەبوونا بڕیارەكا خوسارەتبوونا تیما وان بەرانبەر جەوییە ڕەددكەن ئەوا هاتیە بەلاڤكرن كو ژبەر نە پێگیرییا وان ب ڕێنمایێن خولێ‌ ب 3-چنە ب خوسارتی هاتە هژمارتن، لدووڤ ڕاپۆرتا فدراسیۆنا فوتبۆلا ئیراقێ‌، یانەیا هەولێر یاریزانێ‌ خوە یێ‌ قەدەغەكری بۆ یارییا ئەڤرۆ ئەحمەد زیرۆ پشكداری یاریێ كربوو، ئەڤچەندە ژی بەرۆڤاژی ڕێنمایانە و ب 3-چنە هاتە هژمارتن خوسارەت، لێ‌ یانەیا هەولێر جەماوەرێ‌ خوە پشتراست دكەت هیچ سەرپێچییەك نە كرییە و پشكدارییا ئەحمەد زێرو یاسایی یە.
نەورۆز پێنگاڤەكا دی پێشڤە هات
تیما یانەیا نەورۆز پێنگاڤەكا د ڕێزبەندییا خولێ‌ دا پێشڤە هات پشتی دگەل یانەیا تەلەبە ب گۆلەكێ‌ وەگهەڤبووی، نەورۆز ژ ڕێزا 10ێ‌ پێشڤە هاتە ڕێزا نەهێ‌ ب كۆمكرنا 43 خالان ژ13 سەركەڤتن، چار وەكهەڤی دبەرانبەردا 13 خوسارەتی هەنە.
ڕاهێنەرێ‌ نەورۆز ڕازییە
د پرێسكونفرانس دا وەلی كەریم ڕاهێنەرێ‌ یانەیا نەورۆز ڕازیبوونا خوە ل سەر ئەنجامێ‌ یارییا ڤێ‌ حەفتیێ‌ بەرانبەر تەلەبە دا دیار كرن و گۆت: ئاستەكێ‌ هەڤسەنگ بوو دناڤبەرا هەردو تیمان دا، هەرچەندە گۆلا پێشكەڤتنێ‌ مە ئینابوو لێ‌ ئەو گۆلا پەنەلتیێ‌ و وەكهەڤیێ كارتیكرن ل سەر مە كر، وەرزێ‌ ئەڤ سالە مە شیانێن ڕێزێن پێشیێ‌ نەبووینە، لێ‌ ئەم شەڕی مانا خوە دكەین و هەتا نوكە ئەم یێ ل سەر هێلەكا باش دچین.
هەلوەستێ‌ گشتی بەری دەستپێكرنا هەڤڕكیێن گەڕا 31ێ‌.
1- جەوییە 70 خال.
2- شورتە 63 خال.
3- هەولێر 60 خال.
4- تەلەبە 58 خال.
5- زەورا 57 خال.
6- ئەلگەرمە 52 خال.
7- زاخۆ 50 خال، كێمتریا یارییەكێ‌.
8- كەرخ 46 خال.
9- نەورۆز 43 خال.
10- دیالا 42 خال.
11- نەفت 38 خال.
12- دهۆك 38 خال.
13- ئەلغراف 37 خال.
14- مووسل 37 خال.
15- مینا 29 خال، كێمتریا یارییەكێ‌.
16- نەفت میسان 29 خال.
17- ئەمانەت بەغدا 28 خال.
18- كارەبا 27 خال.
19- نەجەف 15 خال.
20- ئەلقاسم دو خال.
هێرشبەرێ‌ هەولێرێ سەڕ لیستا گۆلكەرانە
پشتی بۆرینا 30 یارییان ژ خولا ستێرێن ئیراقێ‌، ستێرێ‌ یانەیا هەولێرێ‌ و هێرشبەرێ‌ ئۆزپاكستانی شیرزۆد تیمۆرف خودانێ‌ 23 گۆلانە، پیتەر گۆرگیس ستێرا یانەیا دهۆكێ‌ ژی د ناڤا ڕێزبەندیەكا باش دایە، لیستەیا دەهـ گۆلكەرێن پێشیێ‌ بڤی ڕەنگی نە.
1- شیرزۆد تیمۆرف، 23 گۆل یانەیا هەولێر.
2- لیۆنێل ئیتبا، 17 گۆل، یانەیا شورتە.
3- فیدیلیس كۆكۆ، 16 گۆل، یانەیا ئەلغراف.
4- عەلا ئەلدالی، 14 گۆل، یانەیا مووسل.
5- پیتەر گۆرگیس، 13 گۆل، یانەیا دهۆك.
6- یونس حەمۆد، 11 گۆل، یانەیا كەرخ.
7- مەحمۆد ئەلمۆاس، 10 گۆل، یانەیا شورتە.
8- حەسەن عەبدولكریم، 10 گۆل، یانەیا زەورا.
9- محەمەد جواد، 10 گۆل، یانەیا جەویە.
10- عیسام عەبدوللا، 10، یانەیا جەوییە.
ئەڤرۆ دێ‌ یاری دەستپێكەن
بڕیارە ئەڤرۆ دەست ب هەڤڕكیێن گەڕا 31ێ‌ ژ خولا ستێرێن ئیراقێ‌ ب ئەنجامدانا چار یارییا بڤی شێوەیی بهێنە كرن.
نەفت میسان- شورتە، یاریگەها میسان، ل دەمژمێر پێنجێ‌ ئێڤاری
ئەلقاسم- ئەگەرمە، یاریگەها نەجەف، دەمژمێر پێنجێ‌ ئێڤاری.
ئەمانەت بەغدا- زەورا، یاریگەها كەرخ، دەمژمێر 7:30 شەڤ.
دیالا- مووسل، یاریگەها دیالا، دەمژمێر 7:30 شەڤ.
سوبەهی دوشەمبی.
كارەبا- كەرخ- یاریگەها زەورا، دەمژمێر پێنجێ‌ ئێڤاری.
نەفت- زاخۆ، یاریگەها كەرخ، دەمژمێر پێنجێ‌ ئێڤاری.
نەجەف- دهۆك، یاریگەها نەجەف، دەمژمێر 7:30 شەڤ.
نەورۆز- جەویە، یاریگەها نەورۆز، دەمژمێر پێنجێ‌ ئێڤاری.
تەلەبە- هەولێر، یاریگەها ئەلمەدینە، دەمژمێر 7:30 شەڤ.
سێشەمبییا بهێت یانەیا ئەلغراف دێ‌ یانەیا مینا ل دەمژمێر پێنجێ‌ ئێڤاری مێڤان كەت.