شێخان، بارزان مزووری:

د رێورەسمەكێ دا ب ئامادەبوونا بەپرسێ لقێ‌ 20 یێ‌ پارتی ل شێخان و دەڤەردارێ‌ شێخان و نوونەرێن هەرسێ پێكهاتەیێن ل دەڤەرێ دژین، جڤاتا پێكڤەژیانێ‌ بۆ وان ل شێخان هاتە دامەزراندن.
سالح حەیدەر، بەرپرسێ لقێ‌ 20 یێ‌ پارتی ل شێخان بۆ رۆژناما ئەڤرۆ دیار كر، دامەزراندنا ڤێ جڤاتێ بۆ دەڤەرا شێخان گەلەكا گرنگە، ژ بەركو دەڤەرا شێخان دەڤەرەكا ستراتیژی و گرنگە ل سەرئاستێ ئیراق و كوردستانێ ب گشتی و گۆت: «مە وەكو پارتی ئەڤ بیرۆكە دا حكومەتا هەرێما كوردستانێ، وان ژی بڕیار دا، ئەڤ جڤاتە بهێتە دامەزراندن و برایێن مەسیحی و ئێزدی پێكڤە ڤێ جڤاتێ برێڤە ببەن، داكو براینی و پێكڤەژیان د ناڤ جڤاكی دا زێدەتر لێ بهێت».
سەردار یەحیا، دەڤەردارێ‌ شێخان بۆ رۆژناما ئەڤرۆ دیاركر، دامەزراندنا ڤێ جڤاتێ دەستكەفتەكێ‌ گرنگە، هەموو جیهان دزانیت، پێكڤەژیانا هەرێما كوردستانێ نموونەیەكا جوانە و جوانیا كوردستانێ ئەڤ پێكڤەژیانەیە.

ئاكرێ‌، رەمەزان زەكەریا:

چەند رۆژە ل سنوورێ ناوچەداریا دینارتێ‌ دەنگویێ چۆلكرنا سێ گوندێن دەڤەرێ بەلاڤبووی و ناوچەدارێ دینارتێ‌ ژی دبێژیت: چو راستی بۆ چۆلكرنا وان سێ‌ گوندان نینن.
سەربەست سەبری، ناوچەدارێ دینارتێ‌ پەیامەك ل دۆر چۆلكرنا سێ گوندێن دەڤەرێ بەلاڤكر و تێدا هاتیە: «چەند رۆژە ل سۆشیال میدیایێ پرۆپاگەندەك دهێتە كرن، كو سێ گوندێن دەڤەرا زێبارێ هاتینە چۆلكرن، بۆ ئاگەهداریا هەموویان ل دەستپێكا سەرهلدانا سالا 1991 هەتا نوكە ئەڤ گوندە نەهاتینە ئاڤاكرن، بەلێ ئەڤ گوندە وەرزینە، هاڤینا ب مەرەما ب خودانكرنا تەرش و كەوالی و بەرهەمێ چیایی، گوندی قەستا وان گوندان دكەن».
ناڤبری گۆتژی: «هەر ژ سالا 1991 هەتا نوكە ئەو گوندێن دبێژن هاتینە چۆلكرن، ژ بەر رەوشا ئەمنی نەهاتینە ئاڤەدانكرن و چ راستی بۆ وێ چەندێ نینە كو هاتبنە چۆلكرن، لێ‌ ژ بەر شەڕێ پەكەكێ‌ ل گەل دەولەتا توركیا دەڤەرا زێبارێ ب تەمامی بوویە دەڤەرەكا قەدەغەكری».
ناوچەدارێ دینارتە زێدەتر گۆت: «ئەو چەند كەسێن چووینە گوندێ بیركوكەرێ بۆ خودانكرنا تەرش و كەوالێ‌ خۆ و ل سەر بەرپرسیارەتیا خۆ چووبوون و نوكە زڤڕینەڤە بۆ دەڤەرا نەهلێ، دووبارە ئەم بۆ هەموو لایەكی پشتڕاست دكەین، چو گوندەكێ ئاڤەدان ل دەڤەرێ نەهاتیە چۆلكرن و ئەڤا بەری چەند رۆژان بەلاڤبووی چو راستی بۆ نینە».

دهۆك، هێلین سالم:

كێلیا شەدا ئێك ژ جهێن دیار یێن گەشتیاریە و خەلكەكێ زۆر ژ هەمی دەڤەرێن كوردستانێ و باشوور و ناڤەراستا ئیراقێ سەرەدانا وی جهی دكەن، لێ خەلكی گازندە هەنە و دبێژێن: ئەم ژ پاقژییا وی د رازی نینین و چ حاویێن گلێشی لێ نین.
ئیسماعیل موستەفا، پەیڤدارێ باژێرڤانیا دهۆكێ بۆ رۆژناما ئەڤرۆ خویا كر، كێلیا شەدا بوویە جهەكێ گەشتیاری، ب تایبەت بۆ وان كەسێن كارێ چیاڤانیێ دكەن، تامەكا خوش ژێ دبینن و گۆت: «مە ل بنێ چیای گلێشخانە داناینە، د پلانا باژێرڤانیێ دایە، ل دەمەكێ نێزیك گلێشخانەیێن مەزن یێن گلێشی ل هەمی رێین بو كێلیێ دچن، بهێنە دانان، تابلۆیێن ئاگەهداریان بۆ دیاركرنا رێنمایان و هشیاركرنا وەلاتیان ژی بهێنە دانان، دیسا د پلانا باژێرڤانیێ دایە كشك و تەوالێتان بۆ گەشتیاران بهێنە دانان».
گۆتژی: «ئەم داخوازێ‌ ژ وەلاتیان دكەین، پاقژییا چیای راگرن، چونكی راكرنا بەرمایكان یا ب زحمەتە و ئەو كارمەندێ ب پاقشكرنا وی جهی رادبیت، دبیت ژیانا وی بكەڤیتە د مەترسیێ دا».

دهۆك، لەزگین جۆقی:

رێڤەبەرێ شوونوار و كەلەپوورێن پارێزگەها دهۆكێ بۆ ئەڤرۆ دیار كر، هندەك كەس ل دووڤ هندەك هزرێن نەدروست دچن جهێن شونواران یان گۆڕێن مریان ڤەدكۆلن و دبێژیت: چەندین ساڵن كارێ شوونواران دكەین، لێ‌ مە چ جاران زێر نەدیتینە و مەرەما وان كەسان تێكدانا جهێن شونوارینە.
د. بێكەس بریفكانی، رێڤەبەرێ شوونوار و كەلەپوورێن پارێزگەها دهۆكێ گۆت: «ئەم رێكارێن یاسایی بەرامبەر وان كەسان وەردگرین، یێن جهێن شوونواری تێكددەن، مە بەری چەند رۆژان پێنج كەس ل دەڤەرا ئەترووشێ‌ و پێنج كەس ژی ل دەڤەرا ئاكرێ هاتنە ژ بەر تێكدانا وان جهان دەستەسەركرینە».
گۆتژی: «بەری نوكە ژی هندەك كەسان بازرگانی ب پارچەیێن شوونواران كریە و هەمی هاتینە دەستەسەركرن و سزادان».

زاخۆ، دلۆڤان هالۆ:

بۆ ئێكەم جار ل ئیدارەیا سەربخوە یا زاخۆ بازاڕێ كێم دەرامەتان هاتە ڤەكرن، كو ژ 200 دكانان پێك دهێت، دكان ژ لایێ باژێڕڤانیا زاخۆ ڤە هاتینە ئاڤاكرن و كرێ ژ خودانێن وان ناهێتە وەرگرتن.
خالد عەبدوللا، خودانێ دكانەكا ڤی بازاڕییە بۆ ڕۆژناما ئەڤرۆ دیار كر كو دكانێن ڤی بازاڕی بۆ وان كەسانە یێن، بەری نوكە وەكو مە تشتێن خوە ل سەر عەرەبانە و شۆستەیان د فرۆتن و گۆت: «پشتی فرۆتنا تشتان ل سەر عەرەبانە و شۆستەیێن بازاڕی ل مە هاتیە قەدەغە كرن، ل شوونا وێ ئەڤ بازاڕە بۆ مە هاتە ڤەكرن جهێ دلخوەشیا مەیە».
گۆتژی: «ڤەكرنا ڤی بازاڕی بارسڤكییە بۆ هەژار و كێم دەرامەتێن دەڤەرێ، چونكی بهایێ تشتێن مە گەلەكێ‌ ئەرزانە و هەمی پێدڤیێن وەلاتیان ل ڤی بازاڕی دهێنە فرۆتن».

هەولێر، قائید میرۆ:

بڕیارە ڤێ حەفتیێ دووماهی لیستا ناڤێن فەرمانبەر و خانەنشینان بۆ وەرگرتنا پارچەیێن ئەردی بۆ سەرۆكایەتیا جڤاتا وەزیران بهێنە بلندكرن و پشتی پەسەندكرنێ ژی دێ پارچەیێن ئەردی ل سەر هێنە بەلاڤكرن.
سەربەست مەولود، سەرپەرشتێ تیما هووربینیێ بۆ ناڤێن فەرمانبەران بۆ رۆژناما ئەڤرۆ گۆت: «نوكە ئەم یێ بەرهەڤیان دكەین، لیستەكا دی یا ناڤێن فەرمانبەر و خانەنشینان بدەینە سەرۆكایەتیا جڤاتا وەزیران، داكو ژ لایێ وانڤە بهێتە پەسەندكرن و پشتی دهێنە ڤەگەڕاندن بۆ وەزارەتا باژێڕڤانی و گەشتوگوزارێ، ئەو فەرمانبەر و خانەنشین ل سنوورێ ئەو لێ ئاكنجی پارچەیێن ئەردی وەرگرن».
سەربەست مەولود گۆتژی: «لیستا ڤێجارێ نێزیكی 150 هزار ناڤێن فەرمانبەر و خانەنشینان تێدانە، ئەز باوەرم ڤێ حەفتیێ لیستە بۆ سەرۆكایەتیا جڤاتا وەزیران دێ هێتە هنارتن و ئەڤە دبیتە دووماهی لیستا ناڤێن فەرمانبەران بۆ وەرگرتنا پارچەیێن ئەردی