تیما یانەیا بایرن میۆنخ یا ئەلمانی د دیركەكا زێرین دا دبۆرینت پشتی ناسناڤێ‌ 13ێ‌ د 14 وەرزێن بۆریدا ب دەستڤە ئیناینە و گەهاندیە ناسناڤێ‌ خوە یێ‌ 35ێ‌، پشتی ل شەڤا دەربازبووی شیایی ناسناڤێ‌ ئەڤ سالە ژی ل سەر دیرۆكا خوە زێدەبكەت.
ڕاهێنەرێ‌ بایرنێ‌ ڤێنێست كۆمپانی بۆ كەنالێ‌ DAZN یێ‌ ئەلمانی گۆت: دەستڤەئینانا ناسناڤان كارەكێ‌ مەزن و پلانەكا درێژ بۆ دهێتە دانان، هەچیێ‌ مە دناڤ ڕاهێنانان دا بنیت دێ‌ زانیت ئارمانجا مە ناسناڤن، ژبەركو ناسناڤ ژ بەژن و بالا بایرنێ‌ دهێت ئەم كار بۆ دكەین، هێشتا ناسناڤ ب دووماهی نەهاتینە و چاڤێ‌ مە ل چامپیۆنزێ‌ یە ئەوە هیڤییا مەزنتر بۆ مە، دڤێت یاریزانێن مە ئاگەهی ژ خوەهەبن هێشتا شەڕێ‌ ناسناڤان یێن ماین.

قەیس وەیس:

تیما یانەیا زاخۆ خەونا ب دەستڤە ئینانا ناسناڤێ‌ كۆپا كەنداڤی ژ دەست دا پشتی د یارییا پێش دووماهییا قارەمانیێ‌ دا تووشی خوسارەتیێ بوو بەرانبەر یانەیا ئەلشباب یا سعۆدیێ‌ ب لێدانێن پەنەلتییان(3-4) گۆلان، ئەوا یاری ب وەكهەڤییا گۆلەكێ‌ بۆ هەردو تیمان ب دووماهی هاتبوو، د یارییا واندا ئەوا ل وەلاتێ‌ قەتەر هاتییە كرن.
ژلایەكێ‌ دووڤە یانەیا ڕەیان یا قەتەری دگەل یانەیا شەباب دەربازبوونە یارییا فینالێ‌ پشتی ب سەركەڤتی ل سەر یانەیا ئەلقادسیە یا كۆێتی ب دو گۆلێن پاقژ، ئەوا بڕیارە هەردو یانە دێ‌ یارییا فینالێ‌ ل پێنجشەمبییا بهێت ل قەتەر هێتە كرن.
یۆسف خەمبارە
د كۆنگرەیەكێ‌ رۆژنامەڤانی یێ‌ پشتی یاریێ‌ دا یوسف ئەلئالۆسی یاریزانێ‌ یانەیا زاخۆ گۆت: خوسارەتی و ژ دەستدانەكا ب ئێشە، مە هەموو بزاڤكرن نە هێلین چ گۆلان ل سەر مە بكەن، مخابن ب لێدانێن پەنەلتییان ئەم بێ‌ بەهركرین، ئەم باشتر بووین و پتر نێزیكی گۆلا وان بووین، لێ‌ چەنس ژی ئەگەرەكێ‌ دی بوو مە دەرباز نەكەتە فینالێ‌، داخوازا لێبۆرینێ‌ ژ جەماوەرێ‌ یانەیێ‌ دكەم، بۆ من نەخۆشترین رۆژە د ژیانا من دا و گەلەك خەمباربوویمە.
كاروانێ‌ زاخۆ د كۆپایێ‌ دا
تیما یانەیا زاخۆ دەربازبوو قووناغا چارگۆشەیا زێرین پشتی د كۆما ئێكێ‌ دا شیایی ل سەرێ‌ لیستێ‌ بهێت ب كۆمكرنا 13 خالان، ژ چار سەركەڤتن، وەكهەڤی و خوسارەتیەكێ‌، ئەوا یانەیا ئەلقادسیە یا كۆێتی ل ڕێزا دویێ‌ هاتی، عەین یا ئیماراتی ل ڕێزا سێیێ‌ و سترە یا بەحرێنی ل ڕێزا چارێ‌ هاتبوو، د كۆما دویێ‌ دا یانەیا ڕەیان یا قەتەری ل ڕێزا ئێكێ‌ هاتبوو ب12 خالان، شەباب یا سعۆدیێ‌ ل ڕێزا دویێ‌، نەهزە یا عومانی و تەزامن حەزرموت یا یەمەنی ل ڕێزێن سێیێ‌ و چارێ‌ هاتبوون.
شەش یانە بووینە قارەمانێن كەنداڤی
ل دووڤ ئامارێن قارەمانییا كەنداڤی شەش یانەیا شیاینە ناسناڤێ‌ قارەمانیێ‌ ب دەستڤە بینن، ئەوا ئێكەم جار ل سالا 2011 هاتبوو كرن یانەیا ئەلشباب ئەلعرەبی یا ئیمارتی ببوو قارەمانا ئێكەم چاب، ل سالا 2012ێ‌ یانەیا ئەلمەحرەق یا بەحرێنی ناسناڤێ‌ دویێ‌ یێ‌ كۆپایێ‌ بدەستڤە ئینابوو، ل چاپا 2013ێ‌ یا سێیێ‌ یانەیا بەنی یاس یا ئیماراتی بوو قارەمان، ل چاپا چارێ‌ یا سالا 2014 یانەیا ئەلنەسر یا ئیماراتی ناسناڤی ب دەستڤە ئینابوو، ل چاپا پێنجێ‌ یا سالا 2015 ئەلشباب ئەلعرەبی یا ئیماراتی دوبارە ڤەگەڕیا دەستكەڤتێ‌ كۆپایێ‌ و ناسناڤ ب دەستڤە ئینا، پشتی ڤێ‌ قارەمانیێ‌ بۆ ماوەیێ‌ 10 سالان هەڤڕكی هاتنە ڕاگرتن، ل سالا 2024-2025ێ‌ قارەمانی ب شێواز و سیستەمەكێ‌ نوو ڤەگەڕیا، دڤێ‌ قارەمانیێ‌ دا یانەیا دهۆك شیا ئێكەم ناسناڤ بۆ وەلاتێ‌ ئیراقێ‌ و هەرێما كوردستانێ‌ بینیت.
خەلاتێن قارەمانیێ‌ دێ‌ چەوابن؟
ل دووڤ لیستەیا پێشتر ژلایێ‌ فدراسیۆنا فوتبۆلا كەنداڤی بەلاڤكری كو دهەمان وەرزێ‌ بۆری دا بوو، بڕیار هاتیە دان خەلاتێن پشكداران هەتا دگەهیتە خودانێ‌ ناسناڤی دێ‌ بڤی شێوەیی بیت.
قارەمانا كۆپا كەنداڤی دێ‌ سێ‌ ملیۆن دۆلاران وەرگریت.
خودانا رێزا دویێ‌ دێ‌ ئێك ملیۆن دۆلاران وەرگریت.
باشترین یاریزانێ‌ كۆپا دێ‌ 50 هزار دۆلاران وەرگریت.
باشترین گۆلپارێز دێ‌ خەلاتێ‌ 50 هزار دۆلاران وەرگریت.
گۆلكەرێ‌ قارەمانیێ‌ ژی دێ‌ 50 هزار دۆلاران وەرگریت.
هەر یانەكا پشكدار دێ‌ سێ‌ هزار دۆلار بۆ هێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ‌- چارگۆشەیا زێرین- دێ‌ 100 هزار دۆلار بۆ هێنە دان، دیسان ئەو یانەیا گەشتەكێ‌ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ‌ 30 هزار دۆلار بۆ هێنە تەرخانكرن، دیسان بۆ هەر یانەیەكا سەركەفتنێ‌ بینت ژی 30 هزار دۆلار هاتینە دانان.

رەمەزان زەكەریا:

د داخۆیانیەكێ دا پەیڤدارێ فدراسیۆنا فوتبۆلا كوردستانێ ئاشكرا كر هەتا نوكە ژی هیچ بڕیارەك ل سەر خولا فوتسالا كچان بۆ وەرزێ‌ نوو نە هاتیە دان و ئەوا دهێتە گۆتن دوور ژ ڕاستیێ‌، لێ‌ دێ‌ كۆمبوون هەبن پشتی ب دووماهی هاتنا خولێ‌ و بڕیار ژی هێنە دان.
زێدەتر دارەوان حەمە سەعید بۆ رۆژنامەیا ئەڤرۆ گۆت: ب دووماهی هاتنا هەردو خولێن پلا نایاب و ئێك فدراسیۆنا فوتبۆلا كوردستانێ دێ‌ ل دووڤ كۆمبوونێن خوە یێن ئاسایی گەنگەشێ‌ ل سەر هژمارەكا بابەتان كەت ژ وانا خولا پلا دویێ‌ و خولا فوتسالا كچان، پێنەڤێت بۆ ڕێكخستنا هەر چالاكییەكێ‌ فدراسیۆن پێدڤی ب پشتەڤانییا دارایی نە، لێ‌ یا گرنگتر د نوكە دا كاودانێن دەڤەرێ‌ ئەو شەڕێ‌ دناڤبەرا ئەمریكا-ئیسرائیل و ئیرانێ‌ د باش نینن و كارتیكرنا نەرێنی ل سەر هەرێما كوردستانێ‌ دكەت، سەرباری ئەم هیچ شێوەیەكی پشكەك نینن ژ ڤی شەڕی، لەوما ژی بۆ مە سلامەتییا یاریزانان و شاندێن یانەیان گرنگترە ژ ئەنجامدانا هەر چالاكییەكێ‌.
ناڤبری ئەوچەندە ژی گۆت: دەربارەی چارەنڤیسێ خولا فۆتسالا كچان، بڕیاردان ل سەر قارەمانیا فۆتسالا كچان گرێدایە ب وان كۆمبوونێن كو دێ پشتی ب دووماهی هاتنا خولێن نایاب و پلە ئێك هێنە ئەنجامدان لەورا هەتا نوكە چ بڕیارەكا فەرمی دەربارەی دیاركرنا ئەوێ‌ خولێ‌ نە هاتیە دان.
هەژی گۆتنێ‌ یە ل وەرزێ‌ بۆری تیما یانەیا ئافرەتێن دهۆكێ‌ ناسناڤێ‌ خولا فوتسالا كچان ب دەستخوەڤە ئینابوو كو دبیتە جارا سێیێ‌ د دیرۆكا خوە دا.