دلۆڤان هالۆ:

جۆتیار خدر سندی بەربژارێ ژمارە 19 ل سەر لیستا 275 یا پارتی دیمۆكراتی كوردستان ل بازنەیا دهۆكێ ل ئیدارا سەربخوە یا زاخۆ بۆ ڕۆژناما ئەڤرۆ دیاركر، ئەگەر ئەز ل هەلبژارتنێن پەرلەمانێ ئیراقێ دەرچووم و بوومە پەڕلەمانتار، دێ بەرەڤانیكەرێ مافێ خەلكێ خوە بم و دێ بمە ئەو كەسە كو بشێت بەرنامە و دیدا پارتی ل پەرلەمانێ ئیراقێ بجهبینیت.

جۆتیار خدر سندی د دیدارەكێدا ل گەل رۆژناما ئەڤرۆ دیار كر، ژ بۆ وێ چەندێ بشێم مافێ گەلێ خوە ب دەستڤەبینم ژبلی شەڕێ دەستووری و یاسایی ل پەرلەمانی بۆ دەسەكەفتێن هەرێما كوردستانێ بكەم، ئەز باوەرم پشتی مە تەماشەی وان پەرلەمانتارێن باشوور و ناڤەراستا ئیراقێ كری، دڤێت ئەم شەڕێ تاكەكەسی ژی ل گەل وان بكەین و باوەریێ بۆ وان چێكەین كو ئەڤا هوون بۆ خەلكێ خۆ ڤەدگێڕن دژی هەرێما كورستانێ چ ڕاستی بۆ نینە، بۆ وان دیار بكەین كو دژایەتیا وان ب تنێ چاڤ پێ نە ڕابوونە ل خزمەتگۆزاری و پێشكەفتنا هەرێما كوردستانێ.
ناڤهاتی ئاماژە ب وێ چەندێ ژی كر، ب دیتنا من ئەڤ جارە پارتی دێ بیتە حزبا ئێكێ ل سەرانسەری ئیراقێ كو دێ شێت ڕێژا دەنگێن خوە بلند بكەت و هژمارا كورسیێن خوە زێدەت بكەت، ئەڤە ژی بۆ وێ چەندێ دزڤریت كو پارتی خەمخورێ ڤی مللەتییە، پارتی د بەرژەوەندیا هەموو كەس و نەتەوە و ئاینەكی دانە، ئانكو پارتی حزبەكا گشتگیرە و خوە ب خودانێ هەموو خەلكێ كوردستانێ دزانیت، هەر كەس و لایەنەكێ هیڤیا خوە ل سەر لاوازبوونا پارتی دانابیت ل دووماهیێ ئەنجامێ خوە یێ وەرگرتی كو دەرنەچوویە د ڤێ تاقیكرنێ دا.
خویاژی كر، پێشتر ببوو كەلتوورەك كو هەر حزبەكا ل هەرێما كوردستانێ ڤیابا دەنگێن خوە بلند بكەت و پێش بكەڤیت و چ بەرنامە نەبوون، ب تنێ بەرنامێ وان دژایەتیا پارتی بوو، ئەو كەلتوورە د ناڤ وان دا لاواز بوو، ل ئیراقێ ژی هەر حزبەكا شۆفێنی بڤێت دەنگێن خوە بلند بكەت، دژایەتیا هەرێما كوردستانێ دكەت ب تایبەت یا پارتی، لەوڕا ئێدی پارتی یا ژ چارچووڤێ نافخۆیی دەركەتی و د نوكەدا حزبەكا گەلەك مەزنە ل سەر ئاستێ ڕۆژهەلاتا ناڤین و جیهانێ.
گۆت ژی:»ل سالا 1991 هەتا 202٤ هەموو حزب و لایەنێن دی بەربژار ل زاخۆ هەبوون، لێ ئەڤ جارە وان چ بەربژار ل زاخۆ نینن، چونكی ئەڤان حزبان د خوەڕا نە دیتیە كادرەكێ خوە بینن ل ڤی باژێڕی دەستنیشان بكەن، لەوما دبێژمە خەلكێ شەرەفمەندێ زاخۆ كو بزانن وان بۆ بدستڤەئینانا دەنگان و سەردابرنا خەلكێ خوە ل ڤێرێ بەربژار هەبوون، خەلكێ زاخۆ چاڤەڕێ 11/١١یە كو بەرسڤەكا دژوار یا ڤان لایەنان بدەت، ژ بەركو ئەگەر وان حزبان باوەری ب كەسەكێ خەلكێ زاخۆ نەبوو كو كادرەكێ خوە ل زاخۆ بەربژار بكەن، و ئەز باوەرناكەم ئێدی خەلكێ زاخۆ ژی باوەریێ بدەنە وان».
جوتیار سندی زێدەتر ژی گۆت:»ئەز گەنجەكم من خوە پێگەهاندیە، د بوارێ یاسایێ دا من شارەزای هەیە، ئەڤە دەهـ سالن ئەز ڕێڤەبەرێ كار و ڕاهێنانێن پیشەیی مە ل زاخۆ، مە ب سەدان گەنج د بوارێ پیشەیی دا پێگەهاندینە، هیڤیدارم من شیابیت شوون تبلێن خوە د خزمەتا گەنجان دا دیار كربیت، پێشتر ژی ئەز بەرپرسێ لقێ زاخۆ یێ ئێكەتیا قوتابیێن كوردستانێ بوویمە، ئەڤان كار و خزمەتێن من وەكریە كو ب شانازی ڤە ئەز ببم ئێك ژ بەربژارێن پارتی دیمۆكراتی كوردستان، سۆزێ ددەمە خەلكێ خوە كو ل ئاست وێ باوەریا وان بم، هەر دیسان سۆزێ ددەمە سەركردایەتیا خوە یا پارتی كو ئەز ل ئاست وێ باوەریێ بم یان وان دایە من كو ژ خەلكێ خوە دوور نەكەڤم و بەردەوام دناڤ وان دابم «.

لەزگین جوقی

بەربژارەكێ پارتی ل بازنێ نەینەوا راگەهاند، ل پارێزگەها نەینەوا گەلەك ژ خەلكێ عەرەب دێ دەنگێ خۆ دەنە لیستا 275 یا پارتی دیموكراتی كوردستان و گۆت: دەمێ پارتی بانگەشەیا هەلبژاتنان ل نەینەوا كری جەماوەرەكێ مەزن بەرهەڤ بوون، ئەڤە وێ دگەهینت خەلكێ نەینەوا و شنگالێ و هەمی دەڤەران چاڤەرێ پارتی نە بۆ خزمەتكرنێ.

ئیبراهیم لالو برو، بەربژارێ ژمارە 7 لسەر لیستا 275 یا پارتی دیموكراتی كوردستان ل بازنێ نەینەوا بۆ رۆژنامەیا ئەڤرۆ گۆت: هەمی خەلكێ نەینەوا دناڤ لیستا 275 لیستا سەرۆك بارزانی دا هەیە، لیستا سەرۆك بارزانی دێ گەلەك دەنگێن عەرەبان دەستخۆڤە ئینیت، ژ بەر كۆ پارتی خزمەتا هەمی خەلكێ نەینەوا دكەت و هەر جهەكێ پارتی تێدا هەبیت ئارامی و ئاڤەدانی هەیە، ژبەر هندی گەلەك ژ خەلكێ نەینەوا دێ دەنگێ خۆ دەنە لیستا پارتی.
ناڤبری گۆت: هەر جهێ پارتی لێ بیت چارەسەری ل وێرێ هەیە، پارتی خودان دەستكەفتێن مەزنە هەر ژ دامەزراندنا پارتی كار بۆ خزمەتكرنا خەلكی هاتیە كرن و پارتی شیانێن چارەسەریا ئاریشەیان دگەل عیراقێ هەیە، هەردەم پارتی ئاریشا بۆ بەرژەوەندیا خەلكێ كوردستانێ چارەسەر دكەت كو دەمێ پارتی ل شنگالێ ئارامیێ و ئاڤەدانی هەبوو، لێ نوكە ئارامی و ئاڤەدانی نینە خەلكێ مە شنگال نەشێن ڤەگەرن ئەم دێ كار كەین خەلكێ مە ب سەرفرازی ڤەگەرنە شنگالێ نەینەوا و هەمی دەڤەران.

دیدار، سالار محەمەد دۆسكی:

3- 3

لیوایێ‌ خانەنشین كری و پێشمەرگەیێ‌ شۆڕشا ئیلۆنێ‌ شێرزاد محەمەد سالح ملا جبرائیل دهێتە هەژمارتن ژ كەساتیێن بەرنیاس و خودان خزمەت دبیاڤێن جودا دا، تایبەت د بیاڤێ‌ لەشكری و پێشمەرگایەتیێ‌ دا، لیوایێ‌ خانەنشین كری دیدارەكا تایبەت دا بۆ رۆژنامەیا ئەڤرۆ بەحسێ‌ چەندین وێزگەهێن ژیانا خوە دكەت.
شێرزاد محەمەد سالح ملا جبرائیل ئەو ژی گۆت: پشتی ماوەكی مایمە ل ئیرانێ‌ گڤاشتنێن ل سەر دایكا من زڤریمە ئیراقێ‌ و دەمێ‌ هاتیم و هەمان دەم ناڤێ‌ من وەك پەنابەر ل ئەمریكا دەركەفت بوو، و پشتی زڤریمە ئیراقێ‌ حوكمەتا بەعس شەش سالان نەفیكرمە باژێرێ‌ كەربەلا، و دوڤدا دەرفەت ب مەهاتەدان ئەم بزڤرینە ڤە و قەدەغە بوو ئەم ژ وەزیفێ‌ دەركەفین و وەزیفا مەدەنی یا سەپاندی بوو، ل دهۆكێ‌ فەرمانگەهێن بازرگانی بوو و من دەست ژ كاركێشانا خوە پێشكێش كر و دەركەفتم، پارێزگەرێ‌ دهۆك یێ‌ وی سەردەمی نامق سورجی گازی من كر و گۆت نابیت دەست ژ كاركێشانێ‌ پێشكێش بكەی، و گەلەك ما ب من ڤە كو بزڤرم و گۆت دێ‌ پارچەكا ئەدری و خانی دەینە تە من گۆتێ‌ من نەڤێت بزڤرم، ئێكسەر پەیوەندی ب رێڤەبەرێ‌ ئەمنا دهۆك كر و گۆتێ‌ شێرزاد نەڤێت بزڤریت و هەمان دەم من دوكانەك بۆ دروستكرن كو تێدا كارەكێ‌ ئازاد بكەم، و رێڤەبەرێ‌ ئەمنێ‌ داخوازكرم و گۆت تو ب بریارا جڤاتا سەورێ‌ هاتیە دامەزراندن و نابت دەركەڤی دڤێت ب وێ‌ بریارێ‌ بیت وی دەمی حسێن جندی خودێ‌ ژێ‌ رازیبت رێڤەبەرێ‌ ئاگر ڤەمراندنێ‌ بوو، و رێڤەبەریەكا نور مال بوو و مەدەنی بوو و گۆت تەدڤێت بزڤەر فەرمانگەها خوە تەدڤێت تەداناینە رێڤەبەریا فەرمانگەها ئاگرڤەمراندنێ‌، و نەچاركرم چووم بوومە رێڤەبەرێ‌ ئاگر ڤەمراندنێ‌ ل دهۆكێ‌ سالا 1983 و پشتی بورینا سالەكێ‌ ئاگر ڤەمراندن بۆ هێزا ناڤخوە، ئانكو بوونە پولیس و سال و نیڤەكا مام و دەركەفتم و نەبوومە بەعسی ئەوێن من نیاسن زانن و چ جاران نەبوویمە بەعسی، دوڤدا چوومە مەسیف و سایلویێ‌ ل دووماهیێ‌ ئێكێ‌ مرۆڤێ‌ مە ئەمیندارەكێ‌ گشتی بوو و شیا بریارا جڤاتا سەورێ‌ بوومن بینت و رازیبوون ل سەر دەست ژ كاركێشانا من.
شێرزاد محەمەد سالح ملا جبرائیل ئەو ژی گۆت: پشتی سەرهلدانا پیرۆز ل گەل شێخ مەئموون نور محەمەد بریفكانی مە رێكخراوا (k.r.o) دروستكر و سالەكێ‌ ل گەل دا بووم مە گوند ئاڤا دكرن، و رێكێن گوندان ڤەدكرن، و دوڤدا كاك نێچیرڤان بارزانی گۆتە من بێژە شێخ مەئموونی بهێت مە كریە وەزیر وی دەمی شێخ مەئموون نەدڤیا وی دەمی رێكخرامە گەلەك یا بهێز بوو، وی دەمی ب ملیونەها دیناران بۆ ڤێ‌ رێكخراوێ‌ ژ دەرڤە دهاتن و پشتی شێخ مەئموون بوویە وەزیر، ئەڤێ‌ رێكخراوێ‌ چەقێن خوە ل سلێمانیێ‌ و هەولێر و دهۆك و هەمی باژێرێن كوردستانێ‌ هەبوون و بارەگایێ‌ سەرەكی ل باژێرێ‌ زاخو بوو و ل دووماهی یا 1992 ل جهێ‌ شێخ مەئمنون بوومە بەرپرسێ‌ رێكخراوا (k.r.o) هەتا دووماهی یا سالا 1995 من خوە ڤەكێشا، دووبارە شێخ مەئمون زڤری رێكخراوێ‌ ڤە وی ماوەی دا نەبوو وەزیری، و دوڤدا هاتە داخوازكرن ڤە و بوو وەزیر ل حوكمەتا هەرێما كوردستانێ‌، و دوڤدا حوكمەتا هەرێما كوردستانێ‌ كارا بوو و ئێدی چ رێكخراوێن بیانی نەهاتن ل گەل (k.r.o) كار بكەن، و ماوەكی مامە بێ‌ كار و ل گەل شاندێن بیانی ئەمریكی، برییتانی، سوید و بیانی چووینە دەف سەرۆك مەسعود بارزانی و هەتا ئەم چووینە دەف مام جەلال ژی خودێ‌ ژێ‌ رازیبت، و دوڤدا من مافێ‌ پەنابەریێ‌ ل بالیوزخانێ‌ ل ئەنقرە وەرگرت و 12 سالان مامە ل دەرڤە، و دوڤدا زڤریم بەلێ‌ زارۆكێن من مان ژ بەر خواندنێ‌ و پشتی دەرچووین و زڤرینە كوردستانێ‌.
گۆتژی: جارەكێ‌ ئەم لەندەن بووین ئەم ل مالا عیس محەمەد سالح بووین دبێژنێ‌ عیسایێ‌ حەوایێ‌ و بنەمالەكا بەرنیاسا دهۆكێ‌ نە، محەمەد حەسەن بالێتە و محەمەد حەسەن بالێتەی ژی هاتوو مالا عیس مێهڤان بوو ئەو، كورێ‌ وی دكتور شێرزاد ژی وێرێ‌ بوو ئەڤە ژ زار دەڤێ‌ وی گۆت كاودانێن داریێن بابێ‌ تە دباش بوو و دەمانجك هەبوو و كەسەكێ‌ نەبوو و خوپشاندان دروست بوو و عومەر ژ بابێ‌ تە خواست دەمانجا خوە بدەتەڤێ‌ و چوو ناڤ خوپیشاندانێ‌ و گولە هاڤێتن و قوتابیان گۆتن عومەر وەكی دەبابێ‌ چوو و گولە هاڤێتن و ناڤێ‌ وی بوو عومەر دەبابە و ب دەمانجا بابێ‌ من ئەڤ ناڤە هاتە سەر و محەمەد حەسەن بالێتەی و باب من قوتابی بوون ل گەل ئێك هەرژ قوناغا سەرەتایی و هەتا كولیژ ب دوماهی ئینای.
ل سالا 1998 لەندەن ئیبراهیم ئەحمەد ئێك ژ ئەوا سەركردێن وی دەمی ل وێ‌ جڤاتێ‌ رونشتی بوو لەندەن ل جڤاتەكێ‌ یێ‌ بەرهەڤ بووم گۆت سالا 1975 ئاش بەتالی دروست بوو، و من ژی گۆتێ‌ یێ‌ حازربووم دەمێ‌ تە فلان رۆژێ‌ لبن چادرا ملا مستەفا بارزانی گۆتی پشتەڤانیێ‌ ل گوتنێن ملا مستەفا بارزانی دكەم كو شەر بهێتە ڕاوستاندن، دا قڕكرنا مللەتێ‌ كورد دروست نەبیت و نوكە دبێژی ئاش بەتال گەلەك محرج بوو، و هەر ل لەندەن گۆت مخابنی ڤە هەستێ‌ كوردینیێ‌ ل دەڤەرا بەهدینان یێ‌ كێمە و من گۆتێ‌ مخابنی ڤە بلا تە گۆتبا روحا كوردینیێ‌ زووتر هاتیە سلێمانیێ‌ بەلێ‌ ئەڤا تو دبێژی ئەو قوربانی و شەهیدێن دەڤەرا بەهدینان داین و ئەو گوندێن وێ‌ دەڤەرێ‌ هاتینە وێرانكرن و كاڤلكرن و سوتن چەوا بوو؟، دەمێ‌ بەحسێ‌ عەشیرەتگێریێ‌ ژی كری من گۆتێ‌ قازی محەمەد ما ژ چ عەشیرەت بوو ژ عەشیرەتەكا ئاینی هات و كرە نەتەوەیی و شێخ مەحمودێ‌ حەفید هەر ژ خێزانەكا ئاینی بوو و كرە نەتەوەیی و ملا مستەفا بارزانی ژ خێزانەكا ئاین پەروەر بوو و برایێ‌ وی شێخ عەبدولسەلام و كرە كێشەكا نەتەوەیی و سەركەفتن و ملا مستەفا بارزانی بۆ مللەتێ‌ كورد مێژوویە ، پشتی ئەم دەركەفتن ئیبراهیم ئەحمەد گۆت بوو هەڤالەكێ‌ من ئەڤە كی بوو؟ گۆتێ‌ ئەفسەرەكێ‌ خەلكێ‌ بەهدینان نە.
ل دووماهیێ‌ شێرزاد محەمەد سالح ئەو ژی گۆت: پشتی خزمەتا پێشمەرگاتیێ‌ یا چەندین سالان و پشتی سەرهلدانێ‌ دووبارە زڤریممە سەر خزمەتا خوە ب پلا لیوا هاتمە خانەنشینكرن.