سالح دۆسكی
بهارا جان و دلایە
خوناڤا ل سەر گولایە
ل شەڤا تاری چرایە
یاسەمینا من و هەو
مسكە بێهنا بسكا وێ
شانە ل سەر لێڤا وێ
مینا هێزا لافاوێ
هشیار كر دلێ د خەو
گڕنژین ئاوازە نێ
تابلۆیەك ناوازە نێ
دل پڕ ب داخوازە نێ
تم ب دەرد و ژانە لەو
مەشیان ب ناز و ڕندی
هەژیان هەردو لەوەندی
ئاگر بەردا ڤی گوندی
خۆ دلێ كالان گۆت: تەو.
دلدار محەمەد
ئەڤە پێنجی سال دەربازبوون و ئەو بخۆ كوڕێ وەلاتەكێ بێ ناسنامەیە، خەمداریا بێ بهاییێ ژ چ رۆژێن وی ڤەدەر نابیت و هەمی پەنجەرەیێن ڤێ بازنەیا ژ پاتەیان رەنگ و رەنگ بووی، ناسنامەیێ ژ وی دخوازن، سال گەهشتە سالێ، چ دەرگەهـ نەمان وی ناسنامە ژێ نەخواستی، هێشتا بەرسڤەكێ، ئاماژەیەكێ، مزگینییەكێ قەستا گوهـ و چاڤێن وی نەكرینە، خەلك یێ كێكا سەرسالێ د بڕن و بێ ئۆمێدی ژی لسەر وێ جادەیێ دلێ وی ب وان كول و كەسەران ڤە ل ناڤ پێلێن سرایێ و غاردانا بەرەڤ دەرگەهی و گۆتنێن كرێت یێن دەرگەهڤانان و پال پالانا داخوازكەرێن ناسنامەیێ هەناسەیا وی چاڤێ چكبوونێ ماچیكر و كەلەخێ وی ئێخستە بەر پیێن وی خەلكێ پەریشان و رۆژنامەڤانان د «بەپەلە»یان دا نڤیسی: مرۆڤەكێ بێ ناسنامە گیانێ خۆ ژ دەست دا!
كوڕێ وی یێ مەزن ژبلی خەمێن ژدەستدانا بابێ دناڤ تۆرەبوونێ دا بەرزە بوو، هەكو كاربەدەستێ نەخۆشخانەیا داد گۆمان برین و ب ڤەبری گۆتی:
ـ برا تو ناسناما وی نە ئینی، ئەم نەشێین تەرمێ رەحمەتی رادەست بكەین!
پشتی رۆژێن بەهییێ دەربازبووین و مێڤان ڤەرەڤین، رۆژەكێ د ژۆرا پاشییێ ڤە چاڤێن كوڕی بوونە روبارێن رۆندكان هەكو موبایلا رەحمەتی ڤەكری؛ نامەیەكا رێڤەبەری گەهشتی: برا تو یێ بێ ناسنامە بی؛ دێ نانێ ژیانا تە هێتە بڕین.
دیدار، سالار محەمەد دۆسكی:
4 – 5
نوكە ئەو ئاڤاهی نەمایە ل وێرێ و بوو مەغرەب و برینە دەرێ ژوورەكێ و هندەكێن كولاڤ سور وێرێ بوون و ئێكی ب دەنگەكێ نزم گۆت تو سەرا چ گرتی؟، و دوڤدا گۆتە من پیاو بی و یێ عەرەب ل ئەوی حەیتان ئەوێ ل گەل من ئاخفتی و گۆت ل گەل نە ئاخڤە، و دوڤدا دەرگەه هاتە ڤەكرن و ئەم هاڤێتینە ژوور ڤە و هاڤێتم دیواری دام و تەختی دام ب پێنا و گەلەك قوتام و گۆت ئەگەر تو راستی بێژی دێ چیە مال و هندی قوتام من ئاگەهـ ژ خوە نەبوو، و تو جندی هاتن و برمە وێڤە و هندەك ئاڤ ل من كر و چەند زلەهـ ل مەعدانی دا و ئەم برینە ژوورەكێ بن عەردی ڤە و بتنێ كونەك ل دیواری بوو و دەرگەهـ گرت، و من دیت 16 گەنج یێ تێدا و هەمی داخكرینە و بخێرهاتنا من كر گۆتن تو خەلكێ دهۆكی یان زاخۆ من گۆتێ دهۆك ئێكی گۆت سوباهی دێ تە ئازاد كەن، من گۆتێ بۆچی گۆت ئەوێ دهێتە ڤێرێ ئەو دێ ئازادكەن، قادرێ باكوزی گۆت هندەك پارا بدەف من چ پارە ف من نین من 10 دینار دانە وی و 10 دانە مەعدانی و كەیفەك بوو من چێبوو، و قادرێ باكوزی گۆت دكانا بابێ من یا سەرێ سیكێ و دەنگوباسێ من بگەهینێ و من هزر كر دێ هێمە ئازادكرن، من دیت هندەك زەرفێن پیساتی وێرێ نە و هەر كەسەكێ دەست ئاڤا وی هات دێ زەرڤەكی بەتە وێ ڤە و دەست ئاڤا خوە كەت و هەر چەند رۆژا ئێكێ ئەمنێ دهێت، و بێژیتە ئێكی وەرە ئەوا زەرفا بینە ژ دەرڤە و من هزرێن خوە كرن، بابوو بخودێ هوسا نینە بهێمە ئازادكرن، دیسا من گولێ بوو ژ هندەكا گۆتن بابوو ئەڤ گەنجە خوە ل بەر ئەشكەنجدانێ ناگریتو دەمژمێر 12ی ئەڤ دو هاتن و دەرگەه قوتان و گۆت هوون چەوانن باشن و گۆت مە مێهڤانەكێ عەزیزێ هەی رەمەزان سەدیق خەلیل و هەڤالان گۆتن دێ تە ئازاد كەن، و ئەوا گۆت مزگینی تە مرۆڤێن تە یێ ل هیڤیا تە و دێ تە ئازادكەن، و دێ چیە مالا خوە و من گۆت نەشێم بێمە سەرێ هەوە هەمیان و هەر دو هەڤالێن من ژی هزر دكرن دێ من ئازاكەن ، بەلێ ئەوێن دی هەمی زانن بابەت چیە و دەمێ ژ دەرگەهی دەركەتم من دو كەسێن دی ل بەر دەرگەهی دیت و زەلام بوون، و ب خاولیكەكێ چاڤێن من گرێدان و گۆت هەرە من گوتێ دونیایێ نابین گۆت پێ خوە ب هاڤێژە و تە شولە ژێ نینە، و هەر ئێكێ مللەكێ من گرت و هێرە هاتم و هێرڤە چووم و هەتا من دیت چوومە ژوورەكێ و بخێرهاتنا من كر، و من دیت دو وائیرە ئێخستنە تلێن من و گەلەك شداندن گۆتن عەرەبی زانی من گۆت نەخێر، سووندر خوارن گۆتن ئەگەر راستی بێژی دێ تە ئازاد كەین، و ئەگەر راستی نەبێژی بخودێ تو ژ ئەڤی ئاڤاهی نا دەركەڤی، من سووند خوار و ب سەرێ سەید رەئیسی ئەگەر راستیێ نەبێژم و ئەوا گۆتن شڤێدی چەند پێشمەرگە ل مالا هەوە بوون؟، گۆتن راستیێ بێژە من گۆتێ راستیە ژ نشكەكێ ڤە من دیت چەقێن ژ عەردەكی هات و هەر ژ نینوكێن پێ هەتا سەری هەژیام و كارەب كرم و بلند بووم و دەنگ ژ من نەهات، و من كرە قێری و ب سوندا دانا من و ئاخفتنێن كرێت گۆتن، گۆت شڤێدی سادق گەلناسكی و محەمەد سالح بۆتی مێهڤانێن بابێ تەبوون، و چاڤێن من ڤەكرن و بیست رۆژا هەر شەڤ ب ڤی رەنگی دهاتمە قوتان و ئەشكەنجەدان و ئاخفتنا جەمیل بابوخكی بیرا من بوون، كو ئاخفتنێن خوە نە گوهورم ئەگەر دێ سزایێ سێدارەدانێ هێتە سەرمن، و ئەوا بیست رۆژا گەلەك هاتمە قوتان رۆژەكێ من گۆتە ئەوێن زیندانی ڤە ئەڤرۆ فانێلێن خوە بدەنە فمن و هەمیان دانمن و من كرنە بەر خوە ژ بەر كو دا گەلەك نەئێشم دەمێ سوندا دانە من، و چەوا مێری هاتن و چوونێ دكەن هوسا سپیهێن هاتن و چوونێ دكەن من 16 فانیلە كرنە بەرخوە و دەمژمێر 12 گازی من كر، و دەمێ چوویم ئەوا فانێلە بەر من دیت و ب زمانێ عەرەبی بەحسێ فانێلێ من كر، و ئێك ژوانا گازی ئەفسەرەكی كر، و گۆت وەرە پێش چەند فانێلە كرینە بەر خوە و ئەفسەر هات گۆت تە بۆچی هندە فانێلە كرینێ؟، من گۆتێ ژ بەر كێبلان و پشتا من رزی ژ بەر قوتانێ بەلكی فانێلە هاریكاریا من بكەن و گەلەك نە ئێشم، كرە كەنی و جارەكا دی كارەب كرم و گۆت فانێلا هەمیان بێخە و پاڤێژە ژ دەرڤە و ریسكرم دانامن و من هەواركرە خودێ راوستیان گۆتن كا خودێ بلا تەوارا تە بهێت، من هەواركرە (محەمەد) بۆ خاترا پێغەمبەرێ خودێ بەس من ب قوتن، راوستیان و گازیكرە ئێكی ناڤێ وی محەمەد بوو، گۆت وەرە ڤی گازی تە و ئەوی ژی گەلەك دانا من و من گۆتێ بۆ خاترا سەید رەئیس قەسێن كرێت گۆتنە من و گۆت دا ئەول وەبێژی پێنچ خولەك بووتە بهێنڤەدان، و گۆت كاك رەمەزان بخودێ دێ تە ب قوتانێ كوژین هەما راستیێ بێژە دێ چیە مال، ئەز زانم ئاخفتنێن خوە ب گوهورم دێ من سێدارەدان و گەلەك قوتام و دووف دا هەلرتم و هاڤێتە ژوور ڤە و دەمێ هاڤێتیم گەنجەكی بۆ حالێ من كرە گری دناڤا زیندانێ دا، من گۆتێ نە كە گری مە خوە نە سەرا دزیەكێ یان تشتەكی گرتیمە مادەم سەرا دوزا مللەتێ كوردە یێ سەربلندم وەكی بێژن بەرخێ نێر بۆ كێرێ یە، ئێكی سندی وێرێ بوو گۆت قوربانی تەبم ب دایك و باب ڤە، ئەڤا دی هەر دەمژمێر 12 گازی كر و گۆتن رەمەزان سەدیق خەلیل من گۆتێ بەلێ گۆتن وەرە ب خودانێ شەڤ و رۆژان تو ژ ئەشكەنجەدانێ قورتال بووی، و باوەرناكەم و ب سەید رەیس سویند خار گۆتن تو خلاس و گۆتن نە وەستە هەیە وێ جارێ چاڤێن من نەگرێدان و ئێكسەر هەما برم و برمە ژوورەكا قاتێ دووێ و ئێك وێرێ بوو، گۆت تو (حكمەت نەجمان ئاغا) نیاسی؟، من گۆتێ بەلێ و بابێ چوو بوو خوە هاڤێت بوو ناڤ مالا وی و (حكمەت نەجمان) گۆت بوویێ مام سەدیق دێ بزاڤا كەم بەلێ دڤێت هندەك پارا بدەینێ و بابێ من گۆتێ من كەرەكێ پەزی و تەش و كەوالی هەیە و من ترۆمبێل هەیە و دێ هەمیان فرۆششم بتنێ كوری من بهێتە ئازادكرن، و پشتی (حكمەت نەجمان) سەرەدان كری رۆژا دی گازی بابێ من كر، و گۆت ئەفسەری هزار و 500 دینار دڤێت بەرامبەر ئازادكرنا كورێ تە و بابێ من ژی ناڤ مرۆڤێن خوە گەریا و ئەو پارە كومكرن و رادەستی (حكمەت نەجمان) كر، و ئەوی بۆ ئەفسەری ئینان و ئەوان گۆت ئێك كاك رەمەزان دا رۆا ئێكێ بێژی ئەڤە مرۆڤێ منە و تە هەر راستی ژی نە گۆت و من گۆتێ ما ناڤ پێشمەرگەی دێ چ گەهیتە من من ترۆمبێلا خوە هەیە و ل گەل حوكمەتا خوە مە و ئەوا گۆت هێر ڤە و ێڤە نەبێژە بخودێ ئەڤ جارە تە بگرین ئێكسەر دێ تە سێدارەدەین و گۆت وەرە ئیمزا بكە.
سولین سلێمان:
خانما ئەكتەر (مەروا محەمەد) كو ژ پارێزگەها هەلەبجە یە، د دیدارەكێ دا بۆ رۆژنامەیا ئەڤرۆ گۆت: دژیەكێ بچووكدا من حەزژ كارێ ئەكتەریێ دكر، لەورا دەمێ دەلیڤە چێبووی ئەز چۆمە پەیمانگەها هونەرێن جوان ل سلێمانیێ دا كو ب شێوەیەكێ ئەكادیمی فێری كارێ هونەری ب تایبەت ژی ئەكتەریێ ببم و خۆشحالم كو خەونا من بجه هاتی و ب هەموو كار و بەرهەمێن خوە یا دلخۆش و ئارامم.
هەروەسا گۆت: د سالێن بۆری دا وەك ئەكتەر من پشكداری د هژمارە دراما و شانۆگەریان دكریە، ژوانا (گەردەلۆل، وەسیەت نامە، نامەكانی ئەشرەف، حاجی ئاغا) و گەلەكێن دی و هەردەم ئەز دبێژم (شانۆ ب بابێ هونەری) دهێتە نیاسین، چنكو ئەكتەر ب شێوەیەكێ زیندی ل گەل جەماوەری یە، بۆ زانین كاركرن ل سەر ستێجێ، مەرەما من ل دەمێ نیشادانا شانۆگەریێ گەلەك ب زەحمەترە وەكی ل بەرامبەر كامیرەیێ د راوەستێت، هەروەسا ب مخابنی ڤە دێ بێژم ئەڤە دەمەكە من پشكداری د چو فلم و درامایێن نوو دا نەكریە و هیڤیا من ئەوە جارەكا دی ئەز ب دیتنا بینەران شادببم.
دلۆڤان هالۆ:
سترانبێژ (سیابەند زاخۆیی) د دیدارەكێ دا بۆ رۆژنامەیا ئەڤرۆ دیاركر كو دەمەكە ئەو مژوولی تۆماركرنا سرودەكا ئاینی یە و دێ د هەیڤا رەمەزانا پیرۆزدا بەلاڤكەت، پشتی وێ سرودێ ژی هندەك ستران و كلیپێن نوو دڕێ دا هەنە و د بەرنامەیێ وی دایە وانژی تۆماربكەت.
سیابەندی گۆت: پەیڤێن سرودا ئاینی یێن (دلۆڤان سەعید) ن، ئاوازا وێ ژی بیانیە، هیڤیا من ئەوە ئەز بشێم دەرحەقی وێ سرودێ دەركەڤم و بكەمە دیاری دوێ هەیڤا پیرۆز دا، بۆ زانیین دووماهی كلیپا من ل سالا بۆری ب ناڤێ (ئێدی بەسە) كو ژ پەیڤ و ئاوازێن منن بوو، هەروەسا هەتا نوكە من ئەلبۆمەكا سترانان و (17) كلیپ بەلاڤكرینە و ل سالا 2014 ئەز ب ڤیدیۆ كلیپا ( برن دەلالامن) كو ژ پەیڤێن (ئازاد مستەفا) بوون ئەز گەلەك بەرنیاس بووم.
بێوار حەمدی:
مەدیاكار (جەمیلا حازم) كو نوكە وەكو بەرپرسا پشكا ئەرشیفی ل كەنالێ سەما كاردكەت، د دیدارەكێ دا بۆ رۆژنامەیا ئەڤرۆ گۆت: من كەنالێ سەما هەلبژارت كو یا تایبەتە ب ئێزدیان ڤە و من دڤێت دڤێت دیرۆك و ناسنامەیا ئێزدیان ب پارێزم و ئەز بڤێ چەندێ یا دلخۆشم.
هەروەسا گۆت: بەرپرسایەتیا پشكا ئەرشیفی بۆ من كار و ئەركەكێ خۆشە و ئەز ب دەستێن خوە وێ دیرۆكێ ئەرشیف دكەم، هەروەسـا ڤەكۆلینان ژی گۆڤارا لالش دنڤیسم و پتریا وان گرێدای گۆتنێن كەڤنارن، لێ من ل بەرە جهێ خوە یێ كاری ب گۆهۆڕم، ژبەركو من د گەلەك بۆارێن رۆژنامەڤانی دا كاركریە، بەلێ كارێ ئەرشیفی و ڤەكۆلینان گەلەك ب دلێ منە و نڤیسین ژی دەروونێ من ئارام دكەت.
دوهی چارشەمبی 5/2/2025، نێچیرڤان بارزانی، سەرۆكێ هەرێما كوردستانێ د كومبوونەكێدا ل گەل محەمەد ئەلحەسان، نوونەرێ تایبەتێ سكرتێرێ گشتی نەتەوەیێن ئێكگرتی ل ئیراقێ، رەوشا ئیراقێ و هەرێما كوردستانێ ووارێن هاریكارییا د ناڤبەرا نەتەوەیێن ئێكگرتی و ئیراقێ و هەرێما كوردستانێ گەنگەشەكر.
د كومبوونێدا دوپاتی ل سەر گرنگییا پاراستنا سەقامگیرییا سیاسی ل ئیراقێ هاتە كرن، بۆ ڤێ مەبەستێ ژی، ب هێزكرنا هاریكاریێ د ناڤبەرا هەولێرێ و بەغدایێ و چارەسەركرنا كێشەیێن دناڤبەرا هەردو ئالییاندا ب دانوستاندنێ و تێكگەهشتنێ ب پێدڤی هاتە زانین، هەروەسا ل دۆر دانوستاندنێن ئالیێن سەركەفتی د هەلبژارتنێن پەرلەمانێ كوردستانێدا، بیر و بۆچوون هاتنە لێكگوهارتن و هەردو ئالی د هەڤڕابوون ل سەر پێدڤییا بلەزكرنێ د پێكئینانا كابینەیا نوو یا حوكمەتا هەرێما كوردستانێدا.
د تەوەرەكێ دی یێ كومبوونێدا، باس ل رۆلێ نەتەوەیێن ئێكگرتی و رێكخراوێن مرۆڤایەتی و رەوشا ئاوارە و پەرنابەران ل هەرێما كوردستانێ هاتە كرن، سەبارەت وێ چەندێ، داكوكی ل سەر بەردەوامییا پشتەڤانییا نەتەوەیێن ئێكگرتی بۆ ئیراقێ و هەرێما كوردستانێ د وارێن جودا دا و هاریكاری و هەماهەنگییا بەردەوام د ناڤبەرا واندا هاتە كرن.
نێچیرڤان بارزانی، سەرۆكێ هەرێما كوردستانێ ل گەل جەنەرال كیڤن لیهی، فەرماندەیێ هێزێن هەڤپەیمانییا نێڤدەولەتی ل ئیراقێ و سووریێ كۆمبوو. هەردو ئالییان دەستبكاربوونا هەردو فیرقەیێن سێ و چار یێن پێشمەرگەی ل بن سیبەرا وەزارەتا كاروبارێن پێشمەرگەی ب گرنگ هەژمارت.
سەرۆكایەتییا هەرێما كوردستانێ د بەیاننامەیەكێدا راگەهاند» د كۆمبوونەكێدا رەوشا ئەمنییا ئیراقێ و سووریێ، لڤێن و گەفێن رێكخراوا داعش یا تیرۆرستی ل سەر ئارامی و سەقامگیرییا دەڤەرێ، هاتە گەنگەشەكرن. هەردو ئالییان دوپاتی ل گرنگییا هاریكارییا هەڤپشك یا ئیراقێ و هەرێما كوردستانێ ل گەل هەڤپەیمانییا نێڤدەولەتی بۆ بەهنگاربوونا تیرۆرێ و مەترسیێن داعشێ كر».
ب گۆڕەی وێ بەیاننامەیێ «د كۆمبوونێدا دوماهی پێنگاڤێن پڕۆسەیا چاكسازیێ ل وەزارەتا كاروبارێن پێشمەرگەی و ئێكگرتنا پێشمەرگەی هاتە كرن».
رەوشا رۆژهەلات ناڤین و گوهۆڕینێن سووریێ و كاریگەرییا وان ل سەر دەڤەرێ، تەوەرەكێ دی یێ كۆمبوونا سەرۆكێ هەرێما كوردستانێ و فەرماندەیێ هەڤپەیمانییا نێڤدەولەتی ل ئیراقێ و سووریێ بوو.
دوهی چارشەمبی 5/2/2025 مەسرور بارزانی، سەرۆكێ حوكمەتا هەرێما كوردستانێ مەزنترین پێشانگەها نێڤدەولەتییا ساخلەمی ل هەولێرێ ڤەكر.
سەرۆكێ حوكمەتا هەرێمێ ل پێگەهێ خوە ل تۆرا جڤاكییا ئێكس بەلاڤكر» ل هەولێرێ من پێشانگەها (MEDICO) ڤەكر كو مەزنترین پێشانگەها نێڤدەولەتییا ساخلەمیێیە ل ئیراقێ و كوردستانێ و زێدەتر ژ 150 كۆمپانییان پشكداری تێدا كریە».
سەرۆكێ حوكمەتا هەرێمێ دوپاتی ل وێ چەندێ كر» خزمەتكرنا كەرتێ ساخلەمیێ ئەركێ بەراهیێ و هەڤپشكییا كەرتێ تایبەت و گشتی دێ دەلیڤەیێن زێدەتر بۆ هەڤوەلاتییان پەیدا دكەت».
نيشاندان