رەمەزان زەكەریا

شیلان سەعید ئەحمەد گۆران، بەربژارا ژمارە 17 ل سەر لیستا 275 یا پارتی دیار كر، پارتی دیموكراتی كوردستان بەردەوام بۆ جێبەجێكرنا داخوازیێن جەماوەرێ گەلێ كوردستانێ د سەنگەران دا بوویە، هەكە من باوەریا جەماوەری ب دەستڤەئینا، من بەرنامەیەكێ چەند خالی دارشتیە و دێ ب رژدی كار ل سەر كەم كو ل دەمێ گرنگ و پێدڤی دا جێبەجێ بكەم و خزمەتا خەلكێ كوردستانێ پێ بكەین.

شیلان سەعید ئەحمەد گۆران، بەربژارا ژمارە 17 ل سەر لیستا 275 یا پارتی دیموكراتی كوردستان ل بازنەیێ دهۆك بۆ رۆژنامەیا ئەڤرۆ گۆت: كارێ سەرەكیێ پەرلەمانی چاڤدێری و دەرئێخستنا یاسایانە، بەلێ ب رێكا پەیوەندیان د شیاندایە كارێن باش بهێنە كرن بۆ خەلكێ كوردستانێ ل بوارێ یاسایی و ساخلەمیێ و نەتەوەیی و سێكتەرێ ساخلەمیێ و ئاڤەدانیێ و پەروەردەیی و جڤاكی، هەر پارتی بوویە بۆ پارێزگاری ل مافێن گەلێ كوردستانێ كریە، دێ بزاڤێ كەم هەكە من باوەریا جەماوەری ب دەستڤەئینا ئۆفیسەكێ ل دەڤەرێ دانم بۆ گوهداریكرنا گازندەیێن وەلاتیان و جێبەجێكرنا وان.
ناڤبری گۆت ژی: پێدڤی بوو بەری چەند سالان پەرلەمانتاران ل ناڤ جڤاتا نوونەرێن ئیراقێ ئاریشێن دناڤبەرا حۆكمەتا كوردستانێ و ئیراقێ هاتبانە چارەسەركرن، بەلێ ژ ئەنجامێ تێكنەگەهشتنێ نەهاتینە چارەسەركرن، بەلێ بۆ ڤێ خولێ پێدڤیە میكانیزمێ چارەسەركرنێ بهێتە گۆهۆرین و ئەقلیەت بهێتە گۆهۆرین بۆ چارەسەركرنێ.
ناڤهاتیێ ئاشكراكر : سوپاسیا جەنابێ سەرۆك بارزانی دكەم كو باوەری دایە من ببیمە بەربژار بۆ جڤاتا نونەرێن ئیراقێ ب هیڤیا وێ چەندێ باوەریا جەماوەری ب دەستڤە بینم بۆ وێ چەندێ باشترین خزمەت پێشكەشی خەلكێ كوردستانێ بكەم و ببمە نونەرەكا راست و دروست ب هەمووان كار بكەم بۆ هەموو كوردستانێ تایبەت دەڤەرا گۆرانەتیێ وەك پێدڤی خزمەت بۆ نەهاتیە كرن دێ كار كەم بۆ وێ چەندێ باشترین خزمەتێ پێشكەشی دەڤەرێ بكەین ، ئەم تشتەكێ نابێژین كو نەشێین جێبەجێبكەین ، هەر كارەكێ مەبەحس كربیت مە پێشتر ئەنجامدایە پاش مە گۆتیە مە ئەڤ كارە كریە ، دێ كاركەین بۆ هەموو گەنجێن دەڤەرا بەهدینان بێ جوداهی.
گۆت ژی: درۆشمێن پارتی دێ كارنامەیا چوار سالێن داهاتی بیت بۆ هەموو لایەنێن ئیراقێ بۆ جێبەجێكرنا ئەرك و كارێن خوە دێ ل سەر بنەمایێن هەڤشكی و هەڤسەنگی و لهەڤكرن كار كەین كو درۆشمێن پارتی بۆ خزمەتێ هاتینە دانان و گۆت: ئەوا حۆكمەتا ئیراقێ بەرامبەر مووچەخۆرێن هەرێما كوردستانێ دكەت، جهێ داخێ یە و پێدڤیە ئەقلیەتا كاركرنێ بهێتە گۆهرین و نابیت چی دیكە پرسا مووچە و بۆدجەی بهێتە سیاسی كرن و پێدڤیە ل گۆر دەستووری مامەلە بهێتە كرن و ئاریشێن مووچەی بهێنە چارەسەركرن.
شیلان سەعید ئەحمەد گۆران ل سالا 1984 ل بەردەڕەش ژ دایكبوویە، خواندنا بنەرەتی ل بەردەڕەش ب دووماهی ئیناینە و زانكۆ ل مووسل، مامۆستا بوویە ل ئاكرێ و پاش هاتیە ڤەگۆهاستن بۆ هەولێرێ و ل بوارێ رێكخراوێن جڤاكێ سڤیل كاركریە، نوكە ل فەرمانگەها پەیوەندیێن دەرڤە كاردكەت و ژ بنەمالەكا كورد پەروەر مەزن بوویە، باوەرناما یاسا هەیە ژبلی چەندین باوەرنامێن نێڤدەولەتی و سوپاسنامەیا سەرۆكێ هەرێمێ و چەندین سوپاسنامەیێن دی وەرگرتینە ژبەر كارو چالاكیێن ئەنجامدای، زمانێن كوردی و عەرەبی و ئینگلیزی دزانیت.

دیدار، سالار محەمەد دۆسكی:

2- 3

گۆتژی: ل سالا 1974 دەمێ‌ من پەیوەندی ب پێشمەرگەی كری (عەلیێ‌ خەلیل) ل دەڤەرا (گەلالە) بوو، پرسیار ژ من كر كو جەنابێ‌ (ئدریس و مەسعود) نیاسی؟ من گۆتێ‌ ژ نێزیك نانیاسم وی برمە دەف هەر دوكان و دا مەنیاسین وی دەمی سەرۆكی گەلەك رێز ل من گرت ژ بەر رۆلێ‌ بابێ‌ من ل بارزان ل سالێت پێنجییان، وی دەمی (ئامر سری بووم) ل بەتلیۆنا ئێكا (زۆزك) پشتی بورنیا حەفت هەیڤان، من پشكداری خولەكا مووشەكێن سام حەفت كر، و هاتمە وەرگرتن و (21) رۆژان پشكداربووم، و دەمێ‌ هاتیمە سەر مووشەكا ئێكسەر ب جەنابێ‌ (ئدریس بارزانی) ڤە هاتمە گرێدان، دویڤدا ئێكسەر ب جەنابێ‌ (مەسعود بازرانی) ڤە هاتمە گرێدان، دویڤدا بوومە (ئامر سری) ل بەتلیۆنا قەندیل و دەف (غازی عەزیز میرزا) و (زەعیم عەلی) هاریكارێ‌ وی بووم.
شێرزاد محەمەد سالح جبرائیل ئەو ژی ئاشكراكر كو بابێ‌ وی محەمەد سالح ل دەسپێكا سالا 1942 دناڤ رێكخستیێن حزبا هیوا ل باژێرێ‌ مویسل ل گەل سەیدا صالح یوسفی هاتبوو رێكخستن، وی دەمی گەلەك هەڤالێن ئێك بوون و هەر هەمان سال بابێ‌ من ژ بەر هەلویستێن ویێن نەتەوەیی هاتبوو زیندانكرن، و دەمێ‌ من ژی پەیوەندی ب پێشمەرگەی كری چوومە دەف سالح یوسفی وەك مامەكی من دەف خوە دانا و مرۆڤەكێ‌ گەلەك شارەزا و رەوشەنبیر بوو، جارەكێ‌ دەمێ‌ ل شۆرشێ‌ هندەك مووشەك بوومە هاتبوون ئەو مووشەك دژی تانك ودەبابا بوون، و چوونە دەبابا و ئەز ژ سەنگەرێن شەری دزڤریم و سالح یوسفی گۆتە من مام سەنگەرێن شەری چەوانە من ژی بەرسڤا وی دا و من گۆتێ‌ هندەك مووشەك بوومە هاتینە ل دەبابێ‌ دگەڕیت و گۆت مام ئەو مووشەك دێ‌ مە ژناف بەن، و من گۆتی چەوا گۆت ژ ئیراقێ‌ ناترسم بەلێ‌ ئەم ژ ئیرانێ‌ دترسین ئەو دێ‌ مە فرۆشیت و ئەم چەند ب هێز كەفین دێ‌ ئیراق زووتر بوومە تەنازولێ‌ كەت، و ئەڤ گۆتنە ل پەرتووكا وی دا هاتینە بەحسكرن.
لیوا شێرزاد محەمەد سالح ملا جبرائیل گۆت: ملا مستەفا بارزانی سەركردەكێ‌ نەتەوەیێ‌ كوردێ‌ مەزن بوو، و دەمێ‌ حوكمەتا ئیراقێ‌ ل سالا 1970 نەچار كری كو بهێتە دانوستاندنا و رێككەفتنا 11ی ئادارێ‌ هاتیە ئەنجامدان ئەوا ل سالا 1970 دناڤبەرا شۆرشێ‌ و حوكمەتا كوردی دا، جورە حوكم زاتیەك بۆ مللەتێ‌ كورد ب دەست ڤە ئینای، كەسایەتیا وی بۆ جورە كارێزمایەك مللەتێ‌ كورد بگشتی و هەر كوردەكی ل هەر چار پارچێن كوردستانێ‌ هزرەكا مەزن بۆ دكر، وەك چرایەكی و مینبەرەكێ‌ بوو بۆ مللەتێ‌ كورد، و ئێدی خەلكی بەرێ‌ خوە دایێ‌ و هەمان دەم چوونا خەلكی بۆ ناڤ شۆرشێ‌ بۆ پەروەردەكرنا هەر تاكە كەسەكی ڤەدگەریت و دیسا روحا كوردینیێ‌ یا وی دەمی گەلەك ژ ڤێگاڤێ‌ بهێز تربوو، و هەتا ڤیان ژی گەلەك بهێزتربوو و مخابن نوكە ئەو ڤیان و روحیەت نەمایە، دژیانا خوە دا من دو جاران ملا مستەفا بارزانی دیتی یە و دەمێ‌ هاتیمە چیایێ‌ هندرین من هزر كر، من گۆت ئەگەر ئەم مەزن بین و مە پەیوەندی كر خەلك دێ‌ پرسیار ژ مەكەن و بێژن تە ملا مستەفا بارزانی دیت بوو؟ ئەڤ پرسیارە من ژ گیانێ‌ خوە دكر و پاش دەلیڤە بوو من هات جارەكێ‌ من ل كوردستانێ‌ و جارەكێ‌ ل نەغەدە ل ئیرانێ‌ من دیت، جارا دووێ‌ دەمێ‌ ل نەغەدە من دیتی ئەو دیمەن ل هزرا من دا مایە و ئیبراهیم ئەحمەد و سامی عەبدولرەحمان و حەبیب كەریم خودێ‌ ژ رازی بیت درونشتی بوون، و چەند كەسەكێن دی ژی رونشتی بوون و بیرا من نەماینە و ئێك ل گەل من بوو سالار سالح پێداوی بابێ‌ سالار رێڤەبەرەكێ‌ چاندنێ‌ بوو، دو چادر ل بەر مالا وی هەبوون ل وی باژێری و ئەم چووینە چادرەكێ‌ ڤە ئەو ژ چادرا دی هاتەڤە سالا 1975 عەقیدەكێ‌ رونشتی بوو دگۆتنێ‌ عەقید نوری كەلە شێر وی عەقیدی گۆت جەنابێ‌ ملا مستەفا بارزانی مە ڤیانا تە ب دەرفەت دیت و مە شاشی كرن، و لەوما ئەم شكەستین و ملا مستەفا بارزانی گۆت تەحدییا مەزنترین سەركردێن جیهانێ‌ دكەم، ئەڤ رێككەفتنا دناڤبەرا ئیران و ئیراقێ‌ دا ل سەر كاغەزێ‌ یە و ناهێتە بجهئینان، و دێ‌ شەرەك دناڤبەرا هەر دو وەلاتان دا دروست بیت و دێ‌ خوین رێتن كەڤیتە چوكا و ئەو بوو شەڕێ‌ ئیراق و ئیرانێ‌ هەشت سالان روودا، ڤی كەسایەتی دیتنەكا جودا هەبوو بۆ پاشەرۆژێ‌ و دزانی دێ‌ چ چێ‌ بیت هێشتا چ نەبووی، مخابنی ڤە گەلەك ژ ئەوا سەركردێن رونشتی پشتی شەكەستنا شۆرشێ‌ گۆتن ئاش بەتال وێ‌ روینشتنێ‌ دا یێ‌ بەرهەڤ بووم و چەندین سەركردە دروینشتی بوون.
شێرزاد محەمەد سالح ملا جبرائیل، بەحسێ‌ زولم و زوری یا حوكمەتا بەعس كر ل سەر وەلاتیان گۆت: ئەو ئەردێ‌ دكەڤیتە بن ئاڤاهیێ‌ ئەمنا بەعسیا ئەردێ‌ ملا جبرائیلی بوو ژێ‌ هاتە ستاندن، باپیرێ‌ مە یێ‌ دەولەمەند بوو و گەلەك ئەرد هەبوو ل ناڤ دهۆكێ‌ جهێ‌ ئوتێلا ژیان، ئەردێ‌ مە بوو 30 هزار مەتر بوون و مولكێ‌ مەبوو ل سالا 1975ێ‌ عەبدوللا رێڤەبەرێ‌ باژێرڤانیێ‌ بوو و ئەو ئەرد ژ مە ستاند ب بهانا وێ‌ چەندێ‌ دێ‌ ئوتێلەكێ‌ دروست كەین و بێ‌ بەرامبەر و مە چ ژێ‌ نە وەرگرت، بن نەخوشخانا جمهوری و هەتا گورستانا مەسیحییا و ێڤەتر هەتا رویباری و سەرێ‌ گری ژی ەی دەمی حوكمەتا بەعس خاینەك دروستكر بوو بەرامبەر نەخوشخانا جمهوری و دگۆتن ئەگەر وەزیرەك بهێـتە دهۆكێ‌ دێ‌ ل ڤێرە نێشتەجێ‌ بیت و پشتی نەماین و پشتی سەرهلدانێ‌ ئەو جه بۆ بارەگایێ‌ نێچیرڤان بارزانی وی دەمی من پەیوەندی ل گەل هەبوون و نێزیك بووم و جارەكێ‌ ب سوحبەت من گۆتە نێچیرڤان بارزانی ئەڤە ئەردێ‌ مەبوو بەعسیا ژ مە ستاند بوو، وەك كورد هاتن و توژی قەرەبوویا ئەردی بدەمە كرە كەنی و ئەڤە وەك سوحبەت هاتەكرن، دهوكیێن كەڤن دزانن ملا جبرائیل مولكەكێ‌ گەلەك مەزن هەبوو، و ژ جهێن بەرنیاس ئاشێ‌ ملا جبرائیلی، تاخێ‌ شەهیدان ئەو ئەرد هەمیێ‌ ملا جبرائیل بوو، ل سالا 1970 دەمێ‌ باژێرڤانیێ‌ بەهرا خوە راكری بابێ‌ من گۆتێ‌ ئەڤ ئەردە بلا بۆ شەهیدێن پێشمەرگەی بیت، چونكە دەست پێشخەرییا بابێ‌ من بوو گۆتێ‌ تە بەهرا خوە دا چونكە ئەوی ئەرد دا شەهیدان و ئەو جه هەتا نوكە بەرنیاس بوویە، ب تاخێ‌ شەهیدان 10 دوونەم بوو، ئەردێ‌ ئوتێلا ژیان بتنێ‌ 12 دونەم و نیف بوو.

دیدار، سالار محەمەد دۆسكی:

1- 3

لیوا شێرزاد محەمەد سالح گۆت: مەلا جبرائیل بتنێ‌ (كورەك و كچەك) هەبوون، بابێ‌ من محەمەد سالح ل سالا (1949) كولیژا مافپەروەری ل بەغدا تەمامكر، و هەمان سال بۆ سەرۆكێ‌ باژێرڤانیا دهۆكێ‌، پشتی بورینا سالەكێ‌ سەعید قەزاز وەزیرێ‌ ناڤخوەیێ‌ ئیراقێ‌، محەمەد سالح ملا جبرائیل كرە رێڤەبەرێ‌ (ناحیا بارزان) ل دەسپێكێ‌ بابێ‌ نەدڤیا ب بیتە رێڤەبەرێ‌ ناحیێ‌ ژ بەر بابێ‌ خوە بەلێ‌ ئاخفتنەك هەبوو دگۆت (فەرمو ئەز خائینم یان تو خائینی ئەزێ‌ و ئەزێ‌ خاكێ‌ تە رادەستی تە دكەم و تویێ‌ رەت دكەی) ژبەر ڤێ‌ رستێ‌ رازیبوو چوو بۆ رێڤەبەرێ‌ (ناحیا بارزان) و سێ‌ سالان وەك رێڤەبەرێ‌ ناحیێ‌ ما ل دەڤەرێ‌ و رۆلەكێ‌ باش دناڤ هوزێن دەڤەرێ‌ دا هەبوو، و ئەو هوزێن تەعدا ل دەڤەرا بارزان دكرن، بابێ‌ من شیا رۆلەكی ب گێریت و زێدەتر ئارامی ل دەڤەرێ‌ بهێتە چەسپاندن، وی دەمی خەلكێ‌ دەڤەرێ‌ گەلەك حەز بابێ‌ من دكر، و هەتا ب (تابع) ئانكو سەر ب ملا مستەفا بارزانی ڤە دهاتە نیاسین، وی دەمی خودێ‌ ژێ‌ رازی ل ئێكەتیا سوڤیێت بوو، دوڤدا هاتە ڤەگوهاستن بۆ شەرانش ئەڤە ل سالا 1956 بوو، و دوڤدا سەعید قەزا ڕەوانەی خولەكێ‌ كر دا ب بیتە قائیمقام وی دەمی ل گەل (رەشید عارف، محەمەد ئەمین) وی دەمی ل بەغدا بوون، و گۆتن دێ‌ چین سەرا جەمیل بالێتەی دەین وی دەمی ئەسانسور هەبوون ل دەرڤە و هەرسێ‌ سواری ئەسانسورێ‌ بوون، و ل قاتێ‌ حەفتێ‌ ئاسانسور قەتیا و ل قاتێ‌ حەفتێ‌ ژووردا هات ب ئەردی كەفت و گەلەك زحمەت ڤێ‌ كەفت و گەلەك نەخوش بوو و كارتێكرن ل سەر ساخلەمی یا وی هاتە كرن، وئەڤە بۆ ئەگەر دەست ژ كارێ‌ سیاسی بەردەت و سال بۆ سالێ‌ ڕەوشا وی یا ساخلەمی ل كێمیێ‌ دا و سال نەبوو ئەم نەبەینە نەخوشخانێ‌ و دەمەكێ‌ د نەخوشخانێ‌ دا بمینیت و چارەسەری بۆ دهاتەكرن، بابێ‌ من ئەگەرەكێ‌ سەرەكی بوو روحا كوردینیێ‌ دناڤ مالا مە دا سەر هەلدەت بابێ‌ منێ‌ رەحمەتی چالاكیێن سیاسیێن باش هبوون، و چوونا من بۆ ناڤ پێشمەرگاتیێ‌ هەر كارتێكرنا بابێ‌ من بوو، سالا 1956 سەعید قەزاز بابێ‌ من ڕەوانەی لەندن كر ب مەرەما چارەسەریی و دەست و پێ‌ ل گەل فقراتێن وی هەمی شكەست بوون، و هەر هەمیان دگۆتن نازڤریتە ڤە و خودێ‌ زڤراندن و پشتی ڤەگەریانێ‌ بۆ رێڤەبەرێ‌ ناحی ل دەڤەرێن (سەرسنگ، شەرانش، ئاسهێ‌، داقوق، ئاكخجەنەر، چەمچەمال ئالتونكپری) ل گەل دەسپێكرنا شورەشا ئەیلولێ‌ بابێ‌ من نەفیكرە (نەجف، ناسریە، حلە) بابێ‌ من هاتە ڤەگوهاستن بۆ دهۆكێ‌، ل گەل دەسپێكرنا شۆڕشا ئیلۆنێ‌ ل سالا 1961 ئێكسەر بابێ‌ من هاتە ڤەگوهاستن بۆ باشورێ‌ ئیراقێ‌، چونكە ل دەسپێكا سالێن چلان و دەمێ‌ قوتابی بابێ‌ من ئەندامێ‌ رێكخستنا پارتا هیوا بوو، و پەیوەندی ل گەل (سالح یوسفی) هەبوون، و پشتی هەلوەشیا پارتا هیوا هەر هەمیان پەیوەندی ب پارتی دیموكراتی كوردستان كر، و ل باشورێ‌ ئیراقێ‌ ئاكنجی بوو هەتا سالا 1970 و هەمان دەم یێ‌ نەخوش بوو ژی و پشتی رێككەفتا 11ی ئادارێ‌ ل سالا 1970 هاتە ڤەگوهاستن و هاتە باژێرێ‌ دهۆكێ‌ وەك شیرەتكارێ‌ قانوونی ل رێڤەبەریا چاندنێ‌، و دوڤدا پشتی 33 سالێن خزمەتێ‌ هاتە خانەنشینكرن و ساخلەمی یا وی باشتر بوو لێ‌ ئەڤان سالێن دووماهیێ‌ توشی نەخوشیەكێ‌ بوو بۆ ئەگەر رێككەفتی 28/2/1983 چوو بەر دلوڤانیا خودێ‌.
شێرزاد محەمەد سالح جبرائیل بەحسێ‌ پەیوەندیێن خوە ل گەل شۆڕەشا ئیلۆنێ‌ دكەت، گۆت مە دەستیردانێن دەوری هەبوون و ئەو دەستیردان سێ‌ رۆژ بوون و هاتبوو مە راسپاردكن بۆ خولەكا لەشكری و ئەو خول 45 رۆژ بوون، و بیرا من ناهێت هەر ئێكێ‌ وحدا مە ئاگەهداركرم كو نڤیسار هاتینە فرقێ‌ و دەستیردان دهێنە قەدەغەكرن، چونكە بارەگایێ‌ لیوایێ‌ وی دەمی نەقیب روكن ئازاد فەتاح لێ‌ بوو كورد بوو و نوكە فەریق ڕوكنە ل هەولێرێ‌، و من سلاڤكرێ‌ ومن گۆتێ‌ داخوازا دەستیردانێ‌ دكەم چونكە دەنگویێ‌ ڕاوستاندنا دەستیردانان هەیە، ئێكسەر گۆت شێرزاد پەیوەندی دەكەی و ئەز وی نانیاسم و من گۆت بەلێ‌ پەیوەندی دەكەم، ئێكسەر كاغەزا دەستیردانا ئینا دەر و ئیمزا كر، و ڕادەستی من كر، و پشتی دەركەتیم ژ ژوورا وی و هاتمە دەرڤە ئامر فەوجێ‌ دووێ‌ رائید روكن نەی شێروان فوئاد بوو گۆت ها كورێ‌ گەنج توویێ‌ بلەزی، گۆت دێ‌ پەیوەندیێ‌ ب مەنسوری كەی؟ بەری من ب حەفتیەكێ‌ مەنسوری پەیوەندی ب شۆرشێ‌ كربوو، و من گۆت بەلێ‌ دێ‌ پەیوەندیێ‌ كەم و پشتی دەستیردان من وەرگرتی گەهشتمە بەغدا و پەشێمان بووم، ژ ئەڤان گۆتنا و من هزرا خوە كر ئەڤە ئەفسەرێن پلە بلندن لەشكرینە چەوا من گۆتێ‌ دێ‌ پەیوەندیێ‌ ب شۆرشێ‌ كەم، و ئەو نەی شێروان برایێ‌ ناریمانی بوو، ئەوێ‌ ل گەل لەیلا قاسم هاتیە سێدارەدان و گەلەك ترسیام چەوا من گۆتیە ئەفسەرا دێ‌ چم پەیوەندیێ‌ ب شۆرشێ‌ كەم، ل رێكەفتی3 /3 ل گەل دكتور فەریدێ‌ محەمەد عەلیێ‌ حەجی عەمەری ل گەل خودێ‌ ژێ‌ رازی مولازم محەمەد سەعید مارونیسی ئەم گەهشتنە زالگەها دهۆكێ‌ هەتا رادەكی دەروونێ‌ من ئارام بوو، و چووینە ئامێدیێ‌ و ب پیا مە دەوارەك بخوە گرت و ئەم پیا چووینە بارزان و مەترۆمبێلەك گرت و مە پەیوەندی ب شۆرشا ئیلۆنێ‌ كر، وەك پێشتر من ئاماژە پێكری پشتی گەهشتیمە ناوپردان د ناڤ جەرگێ‌ شۆرشێ‌ دا چووم هەر دو ئەفسەرێن من گۆتیێ‌ بەرا من گەهشتینە شۆرشێ‌، و چووم من گۆتێ‌ خودێ‌ ژ ناریمانێ‌ برایێ‌ تە رازیبت گۆت هەمی كوردەكێ‌ دلسوز ناریمانە، و دوڤدا ل شۆرشێ‌ بوو مە ئامر سری و وی دەمی چوار بەتلیۆنێن لەشكری هاتنە دروستكرن، و ژ بەتلیۆنێن ڤێگاڤێ‌ باشتربووینە چونكە رێكخستەكا باش هەبوو و گەلەك ئەفسەر و پلە بلندێن لەشكری ژ بەغدا یێن ئەكادیمی لەشكرێ‌ ئیراقێ‌ هێلان و قەستا ناڤا شۆرشێ‌ كربوون، سەلیم پێداوی خودێ‌ ژێ‌ رازی بیت ئەفسەرەكێ‌ گەلەك زیرەك و چالاك بوو، ملازم ئەول یونس روژبەیانی ئامر بەتلیۆن بوو، حەسەن بارزانی نەقیب بوو و ئامر بەتلیۆنەك بوو، دێوالی برایێ‌ عەبدولوهاب ئەترووشی ئەو ژی ئەفسەر بوو و ئامر بەتلیۆنەك بوو، غازی عەزیز میرزا برازایێ‌ عەبدولوهاب ئەترووشی یە ئەوێ‌ ڤێ‌ دووماهیێ‌ وەغەركری ئەو ژی ل وێرێ‌ بوو و هەمی ئەفسەر بوون، و هەر ژ جندی بگرە و ئەفسەر و رائید و هەتا سەردا هەر هەمی لەشكر بوون.