د. عەلی تەتەر، پارێزگارێ دهۆكێ دوهی 27/1/2025 ب گوژمێ نەه ملیار و 970 ملیۆن و 268 هزار دیناران چەندین پڕۆژەیێن خزمەتگوزاری بۆ دەڤەرداریێن شێخان و ئامێدیێ و سێمێلێ و چەندین گوند و دەڤەر و كۆمەلگەهێن سەر ب وان دەڤەرداری و ناوچەداریان ڤە ڕەوانەی قووناغا بجـهئینانێ كرن.
ئەو پڕۆژەیێن دوهی پارێزگاری رەوانەی قووناغا بجهئینانێ‌ كرین پێك دهێن ژ:
ـ پڕۆژەیێن چێكرن و قێركرن و سەخبێركرن و تەمامكرنا چەندین جاددەیان ل گەل چێكرنا ڕێكێن گۆڕستانان، پڕۆژەیێن سەخبێركرن و ڕۆناهیكرنا چەندین جاددە و ئاڤاهیان، دابینكرنا كەلوپەل و كەرستەیێن رۆناهیێ، گوهۆڕینا هێلێن كارەبێ، دابینكرن و سەخبێركرنا هێلێن كارەبێ ل سەر فیدەرێن جوداجودا، دابینكرنا گوهۆڕكا بۆ بارسفككرنا گوهۆرێن كارەبێ، گەهاندنا هێلێن كارەبا باردەوام، پڕۆژەیێن گوهارتن و چێكرنا تۆرێن ئاڤا ڤەخوارنێ، دروستكرنا ئاڤاهیێن خزمەتگوزاری و دانانا گوهۆڕكا و گەهاندنا هێلن كارەبێ بۆ بەنداڤان.
ئەڤە د دەمەكی دایە كو ل حەفتیێن بۆری و د چارچوڤێ بەرنامێ بەردەوام یێ ئاڤەدانیێ دا، پارێزگارێ دهۆكێ ب گوژمێن جودا جودا چەندین پڕۆژەیێن دی یێن خزمەتگوزاری بۆ سەرجەم دەڤەرداری و ناوچەداری و كۆمەلگەهـێن سنوورێ پارێزگەها دهۆكێ ڕەوانەی قووناغێن بجهـئینانێ كربوون.

د. عەلی تەتەر، پارێزگارێ دهۆكێ دوهی 27/1/2025 ب گوژمێ نەه ملیار و 970 ملیۆن و 268 هزار دیناران چەندین پڕۆژەیێن خزمەتگوزاری بۆ دەڤەرداریێن شێخان و ئامێدیێ و سێمێلێ و چەندین گوند و دەڤەر و كۆمەلگەهێن سەر ب وان دەڤەرداری و ناوچەداریان ڤە ڕەوانەی قووناغا بجـهئینانێ كرن.
ئەو پڕۆژەیێن دوهی پارێزگاری رەوانەی قووناغا بجهئینانێ‌ كرین پێك دهێن ژ:
ـ پڕۆژەیێن چێكرن و قێركرن و سەخبێركرن و تەمامكرنا چەندین جاددەیان ل گەل چێكرنا ڕێكێن گۆڕستانان، پڕۆژەیێن سەخبێركرن و ڕۆناهیكرنا چەندین جاددە و ئاڤاهیان، دابینكرنا كەلوپەل و كەرستەیێن رۆناهیێ، گوهۆڕینا هێلێن كارەبێ، دابینكرن و سەخبێركرنا هێلێن كارەبێ ل سەر فیدەرێن جوداجودا، دابینكرنا گوهۆڕكا بۆ بارسفككرنا گوهۆرێن كارەبێ، گەهاندنا هێلێن كارەبا باردەوام، پڕۆژەیێن گوهارتن و چێكرنا تۆرێن ئاڤا ڤەخوارنێ، دروستكرنا ئاڤاهیێن خزمەتگوزاری و دانانا گوهۆڕكا و گەهاندنا هێلن كارەبێ بۆ بەنداڤان.
ئەڤە د دەمەكی دایە كو ل حەفتیێن بۆری و د چارچوڤێ بەرنامێ بەردەوام یێ ئاڤەدانیێ دا، پارێزگارێ دهۆكێ ب گوژمێن جودا جودا چەندین پڕۆژەیێن دی یێن خزمەتگوزاری بۆ سەرجەم دەڤەرداری و ناوچەداری و كۆمەلگەهـێن سنوورێ پارێزگەها دهۆكێ ڕەوانەی قووناغێن بجهـئینانێ كربوون.

رەمەزان زەكەریا:

ل چیایێ گوندێ شەهێ ل دەڤەرا نەهلێ ل سنوورێ ناوچەداریا دینارتە ژ ئەگەرێ بۆردومانا فڕۆكەیێن شەڕكەرێن توركیا دو وەلاتی شەهیدبوون و هەڤژینێن ئێكن.
دو وەلاتیێن ئاكنجیێن گوندێ بامشمش ل چیایێ گوندێ شەهێ ل دەڤەرا نەهلێ ل سنوورێ ناوچەداریا دینارتە ژ ئەگەرێ بۆردومانا فڕۆكەیێن شەڕكەرێن توركیا شەهیدبوون.
ئەو دو وەلاتیێن شەهیدبووین ب مەرەما كاركرنێ چووبوونە چیای، لێ‌ فڕۆكەیێن توركیا بۆردومان كرن و شەهیدبوون، كو هەڤژینن، ژییێ زەلامی 57 سالن و ژییێ ژنكێ‌ ژی 48 سالن.

زاخۆ، دلۆڤان هالۆ:

دكتۆر نزار عسمەت، ڕێڤەبەرێ پەیوەندیێن نێڤدەولەتی ل زانكۆیا زاخۆ بۆ ڕۆژناما ئەڤرۆ دیار كر كو بۆ دەمێ دو سالان پتر ژ 100 قوتابیێن كێم دەرامەت یێن پۆلێن حەفتێ و هەشتێ یێن سەر ب پەروەردا زاخۆڤە، بێ بەرامبەر دێ وانێن تایبەت ب فێربوونا زمانێ ئینگلیزی ڤە وەرگرن.
دكتۆر نزاری گۆت: «زێدەباری وانەیان، چەندین چالاكیێن كارامەییا كەسی و پەروەردەیی و كارامەیا تەكنۆلۆژی و ئاشنابوونا زێدەتر ب كارێ خۆبەخشییێ و گەشتێن زانستی بۆ دەوروبەر و ژ دەرڤەی زاخۆ بۆ وان دێ هێنە ئەنجامدان».
گۆتژی: «ئەڤ پڕۆژە ب نوونەرایەتیا قونسلخانا گشتی یا ئەمریكا ل هەرێما كوردستانێ، ژ لایێ رێكخراوا ئەمیدست ڤە ل زانكۆیا زاخۆ دێ هێتە ئەنجامدان».

ئامێدیێ، مەحمود نهێلی:

ژ ئەنجامێ بۆردومانا فڕۆكەیێن لەشكرێ توركیا بۆ سەر دەڤەرێ، ئاڤا سێ گوندێن سنوورێ ناوچەدارییا دێرەلۆكێ‌ ژ كاركەفتیە و نێزیكی 100مالان ماینە بێ ئاڤ.
رەشید سەلمان، خەلكێ گوندێ گەلەكا بۆ ئەڤرۆ دیار كر، ئەڤە هەیاما چەند رۆژانە ئاڤا گوندێ وان ل سەرۆكانیێ هاتیە بڕین و ئاڤ ناگەهیتە وانا و گۆت: «ژ ئەنجامێ بۆردومانا فڕۆكەیێن لەشكرێ توركیا ئاڤا گوندێ گەلەكا و مەهیدێ و هاریكا ژ كار كەفتیە، ئەم داخوازێ‌ دكەین ئاریشەیا مە بهیتە چارەسەكرن و ئاڤ بگەهیتە گوندێن مە».
شڤان مەسعود، بەرپرسێ بنگەهێ سەخبێریا ئاڤا دێرەلۆكێ بۆ رۆژناما ئەڤرۆ دیار كر، ئەڤە حەفتیەكە بۆڕیێن ئاڤێ دگەهیننە سێ گوندێن ناوچەدارییا دێرەلۆكێ‌ ژ ئەگەرێ‌ بۆردومانا فڕۆكەیێن لەشكرێ توركیا ژ كاركەفتینە و گۆت: «فڕۆكەیێن توركیا ئەو دەڤەرە بۆردومانكریە و دیارە كارتێكرن ل بۆر یێن ئاڤێ بوویە و ئاڤ ل سەر وان گوندان هاتیە بڕین، بەری نێزیكی هەیڤەكی ژی ئەڤ بۆر یێن ئاڤێ كەفتبوونە بەر بۆردومانا فڕۆكەیێن توركیا و ژ كار كەفتبوون، لێ تیمێن مە ب هاریكاریا خەلكێ وان گوندان سەخبێركربوون».
گۆتژی: «هەتا ئاریشەیا وان چارە دبیت ب رێیا تانكەران دێ‌ ئاڤ بۆ وان هێتە دابینكرن، هەردەمێ رەوشا ئەمنی ئارامبوو، دێ تیمێن خوە فرێكەینە وی جهی و وان بۆڕییان سەخبێر كەین».

هەولێر، قائید میرۆ:

سەرۆكێ لیژنا قانوونی ل پەرلەمانێ ئیراقێ ئاشكراكر، قانوونا ڤەگەڕاندنا ئەردێ‌ جۆتیارێن كورد د دەمێ مەهەكێ‌ دا دێ هێتە بجهئینان و ئەردێ جۆتیاران ل گورەی قانوونێ دێ هێتە ڤەگەڕاندن.
رێبوار هادی، سەرۆكێ لیژنا قانوونی ل پەرلەمانێ ئیراقێ بۆ رۆژناما ئەڤرۆ دیاركر، پشتی پەسەندكرنا قانوونا ڤەگەڕاندنا ئەردێ‌ جۆتیارێن كورد و توركمان ل حەفتیا بۆری، بڕیارە د دەمێ مەهەكێ‌ دا قانوون بچیتە د بیاڤێ بجهئینانێ‌ دا و ئەردێ جۆتیاران بۆ خودانێن وان یێن رەسەن دێ‌ هێتە ڤەگەڕاندن و گۆت: «ئەڤە پێنجی سالە ئەو ئەردە هاتینە داگیركرن، جۆتیارێن كورد ماف نەبوو زەڤیێن خۆ بكاربینن، هەروەسا پشتی پرۆسا ئازادیا ئیراقێ ژی عەرەبێن هاوردە دەست ژ زەڤیێن جۆتیارێن كورد بەرنەدا، بەلێ ژ نوكە پێڤە دێ بۆ كوردێن دەڤەرێ ڤەگەڕن».
گۆتژی: «دەركرنا قانوونا هەلوەشاندنا بڕیارێن سەردەمێ شۆڕەشا بەعس، ئێكە ژ پێنگاڤێن گرنگ بۆ ڤەگەڕاندنا ئەردێ جۆتیارێن كورد ل دەڤەرێن كوردستانی یێن دەرڤەی ئیدارەیا حوكمەتا هەرێما كوردستانێ، دڤێت ل گورەی قانوونێ عەرەبێن هاوردە‌ دەستان ژ زەڤیێن كوردان بەردەن، بەروڤاژی پێڕابوونێن قانوونی هەمبەر دێ هێنە وەرگرتن».