زەردەشت
ئەحمەدێ خانی (1650-1707 ز.) دامەزرێنەرێ ھزرا نەتەوەیی ل ناڤ كوردان، تنێ چامەبێژ و بەیتنڤیس نەبوو. خانی پەروەردەكار و ھزرڤان و بیرمەندەكێ وەختێ خوە بوو، لێ مخابنی، وەكو وی ب خوە باسێ سەردەمێ خوەكری كو؛ زانین و زانا بێقەدر و بێنرخ بوون، ئەوێ قەدرنەزانینێ ژ وی ژی گرت و نێزیكی سێسەد سالان د پرتووكێن خوە دا، قەڕساندی ما، تاكو سەردەمێ دەولەتێن نەتەوەیی ھاتیە ڤەژیاندن.
خانی د ئامۆژگاریان دا دبێژت:
ھەرچی كو ژ دونیایێ بەرداشتە دامەن بوو
بێ شوبھە د نێڤ عامێ ئەفراشتە گەردەن بوو
شرۆڤەیا پەیڤان:
بەرداشتە: بلند، راكری.
دامەن: دەھمەن، دەلینگ.
بێ شوبھە: بێ گومان.
عام: خەلك.
ئەفراشتە: ئەڤراز، بلند.
گەردەن: ستۆ، پێشیا ستۆی.
ل ڤێرە بۆ سەری و ستۆی پێكڤە ھاتیە- ئەفراشتە گەردەن دێ بتە سەربلند)).
خانی دفەرمووت: ھەركەسێ دەھمەنا وی ب ئەردی ڕا نەھێت، ئانكو خوە ژ سامان و خوەشیێن دنیایێ بلندتر دیتی و دەھمەنا وی ب دنیاداریێ پیس نەبووی، بێ گومان دێ د ناڤ خەلكی دا، سەربلند بت.
گرێدانا سەربلندیێ ب زاھدیێ ڤە، ھزرەكا سۆفیانەیە كو فەرە مرۆڤ ژ دنیایێ و خوەشیێن وێ بلندتر بت، داكو جانێ مرۆڤی پاك بمینت و تێكەلی قڕێژا دنیایێ نەبت و پاشی ھند تشتێن گێتیكی پێڤە بمینن، و نە ھەژی دیوانا خودایی بت.
– گەر تە بڤێت د ناڤ جڤاكێ دا سەربلند بی، دەھمەنا خوە ھلدە، داكو چو ژ دنیایێ نەمینتە پێڤە.
نيشاندان