ب بەرهەڤبوونا سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستا دهۆكێ یا پارتی و بەرپرسێن لقێن ئێك و هەشت و نەهـ و 18 و 20 یێن پارتی و هەر 22 بەربژارێن پارتی ل سنوورێ پارێزگەها دهۆكێ و ئیدارەیا سەربخوەیا زاخۆ، ل رۆژا پێنجشەمبی 9/10/2025 ب شێوەیەكێ فەرمی بانگەشەیا هەلبژارتنێن جڤاتا نوونەرێن ئیراقێ ل پارێزگەها دهۆكێ و ئیدارەیا سەربخوە زاخۆ دەستپێكر.
سەربەست لەزگین د رێوڕەسمان دا پەیڤەك پێشكێشكر و تێدا گوت: «ب رەنج و هیممەتا هەڤالێن مە ل لقێن ئێك، هەشت، نەه، 18 و 20 ئەڤرۆ رۆژا نەهێ ئۆكتۆبەرێ ل تاخێ سەرهلدان ل باژێرێ دهۆكێ ئەم بانگەشەیا هەلبژارتنان رادگەهینین. هەر ژ نوكە دبێژین دیسان مە و خەلكێ مەیێ سەربلند ژڤانە ل گەل سەركەفتنەكا دی یا دیرۆكی ل رۆژا 11/11/2025».
گوتژی: «هەر كەسەك دزانیت پارتییا مە یا بەرنیاسە ب پارتییا رێبازا بارزانیێ نەمر پارتییا دیرۆك و شۆرش و پێشمەرگەی، پارتییا شەهیدان، داڕێژەرا پلانا سەرهلدانا 1991، ئەندازیارا دیموكراسییەتێ، دامەزرێنەرا پەرلەمان و حوكمەتا هەرێما كوردستانێ، پارتییا ئاڤەدانكرنێ و بەرگریكارا سەرسەختا ماف و خوەشگوزەرانییا كوردستانییان، پارتییا كریاران و پاراستنا دەستكەفتان، پارتییا بدەستڤەئینانا مافێن گەلێ كوردستانێ ب رێیا داكۆكیكرنێ ل بجهینانا دەستوورێ ئیراقێ».
ئاماژەكر ژی: «ئەم گەلەك دخوونین و كوور هزر دكەین و ل گۆر ئیرادەیا نەتەوەیی و نیشتمانی و دادوەرییا جڤاكی و خوەشگوزەرانی بیردانكا جڤاكا كوردی دكەینە بناغەیێ داڕێشتنا بەرنامەیێن خوە، كێم ئاخڤتن و گەلەك خزمەتكرن دروشمێ مەیێ سەرەكییە، باوەرییا مە ئەوە كو دڤێت كریارێن مە ببنە شوناسنامە و خزمەت، سەركەفتنێن مە بۆ وەلاتییان ببنە پیڤەرێ چارەنڤیسێ مە، ئەم خوە ب خزمەتكارێن راستەقینەیێن كوردستانێ دزانین ئەو كوردستانا ب خوونا شەهیدان و زەندكێن پێشمەرگەیان و هوشمەندییا رێكخستێن نهێنی و خەبات و رەنجا زیندانیێن سیاسی و بەرخوەدانا گەلێ كوردستانێ یێن بەری و پشتی سەرهلدانێ هاتیە ئازادكرن و ئاڤەدانكرن، ئاخا كوردستانێ روندكێن دایكێن مە و ب خوەها باب و باپیرێن مە هاتیە ئازادكرن ژ بەر هندێ ژی ئاخ و ئازادی و خوەسەری دەستكەفتێن گەلێ مەنە و بۆ مە وەك پارتی دیموكراتی كوردستان گەلەك و گەلەك د پیرۆزن».
پتر گوت: «ئەم یێ بانگەشەیا خوە رادگەهینین ل دەمەكێ كو ئەم باس هەست ب وان ئێش و ئازاران دكەین ئەوێن مللەتێ مە تێدا دەباز دبیت ئەو ئێش و ئازارێن كو ب رەنگەكێ رێكخستی ئەڤە 100 سالن د ڤی وەلاتیدا دگەل مەدا د بەردەوامن، جاران ترس و برس بوون، لێ پشتی بێهیڤی بووین كو ئێدی نەشێن مە بترسینن، نوكە دەست دایە چەكێ برسیكرنا مللەتێ مە، ل دەمەكی نە ژ ترسا یێن بەری وان و نە ژ برسا وان نەشیایە ئیرادەیا مللەتێ مە بشكێنن چونكە ئیرادەیا مللەتێ مە هێزەكا پیلایییە ژ بیردانكا جڤاكا كوردستانێ ژدایكبوویە و ب رێبازا بارزانیێ نەمر هاتیە داڕێشتن و ب سەرۆكاتییا رێبەرێ مللەتێ كوردستانێ سەرۆك مەسعود بارزانی دهێتە بحهئینان».
سەربەست لەزگین گوتژی: «بڕیاربوو ئیراقا نوو ل سەر بنەمایێ هەڤپشكی و هەسەنگی و لهەڤكرنی بهێتە دامەزراندن داكو بشێین ئەو باوەرییا ب سەدان سالان هاتیە شكاندن بۆ هەموو پێكهاتەیێن ئایینی و نەتەوەیی و سیاسی ئیراقێ و وەلاتەكێ پێكڤەژیانا ئۆلی و سیاسی دروست بكەین بەلێ مخابن هەتا نوكە ئەڤ بنەمایە ل بەرچاڤ نەهاتیە وەرگرتن، قانوونا هەلبژراتنان ل ئیراقێ هاتیە بكارئینان وەك كارتەكا سیاسی ود بەرژەوەندا هندەك ئالیێن دیاركریدا هاتیە داڕێشتن و ئەڤ قانوونە ب خوە ئێك ژ ئەگەرێن سەرەكی یێن تێكدانا ڤان بنەمایانە».
پتر گۆت: «ئەڤرۆ ئەم داخوازێ ژ هەموو ئالیێن سیاسی دكەین كو بزڤرنە سەر بنەمایێن سەرەكی یێن ئیراقا نوو ل سەر دروستبووی كو دەستوورێ ئیراقێ تێدا بناغەیێ هەر قانوونەكێ بیت وەرن دا هەڤپشكی و هەڤسەنگی و ل هەڤكرنێ بكەینە رێبازا بڕێڤەبرنا ڤی وەلاتی و ب ئاشكرا دبێژین هەكە ئەڤ پرەنسیبە نەهێنە پەیڕەوكرن و ل بەرچاڤ نەهێنە وەرگرتن، دەستهەلاتا ئەڤرۆ یا بەغدا دێ بەرپرسیار بیت ژ هەر چارەنڤیسەكێ دهێتە د رێیا ڤی وەلاتیدا كو دوور نینە ببیتە ئەگەرێ ژناڤچوونا سیستەمێ سیاسیێ ڤی وەلاتی».
هێشتا گۆت: «ب دەستڤەئینانا ماف و دەستكەفتان ل وەلاتەكێ وەك ئیراقێ كارەكێ ب ساناهی نینە چونكە هەتا ئەڤرۆ ژی ئەو مەژیێ حوكمڕانیێ ل ئیراقێ دكەت نەهاتیە گوهۆڕین تنێ سەر و چاڤ نەبن ژ بەر وێ چەندێ ئەم دبێژین ئەڤ شەڕە ب زلهێزەكا سیاسی یا وەكو پارتی نەبیت و ب سەرۆكەكێ خودان حیكمەت و ئەزموون نەبیت وەك سەرۆك مەسعود بارزانی نەبیت ب كەسەكێ دی ناهێتە كرن».
دیاركر ژی، پارتی بۆ چو بانگەشەیێن خوە هەست و سۆزێن خەلكێ خوە كار ناكەت چونكە پارتی و مللەت ژئێك ناهێنە جوداكرن.
هەروەسا گۆت: «داخوازێ ژ ئەندام و كادر و لایەنگرێن پارتی دیموكراتی كوردستان دكەم وەك هەر جار د ئاستەكێ گەلەك بلند كو د گەل ئەخلاق و دیرۆكا پارتی و قوربانیێن مە بگونجیت رەفتار و سەرەدەریێ ل گەل هەوا هەلبژارتنان بكەن و بانگەشەیەكا ئارام و شارستانی ئەنجام بدەن و رێزێ ل هەموو بیروباوەرێن جودا بگرن ول گۆڕەی قانوون و رێنمایێن كۆمسیۆنێ سەرەدەریێ بكەن».

سەربەست لەزگین، ئەندامێ مەكتەبا سیاسی یا پارتی و بەرپرسێ مەكتەبا رێكخستنا پارێزگەها دهۆكێ ب هەڤالینیا سالح حەیدەر، بەرپرسێ لقێ بیست یێ پارتی و شاندەكێ مەكتەبێ سەرەدانا میر حازم تەحسین بەگ، میرێ ئێزدیان ل پەرسگەهـا لالشێ كر.
د سەرەدانێ دا سەربەست لەزگین جەژنا جەمایێ ل میری و ل هەموو خوشك برایێن ئێزدی پیرۆز كر و هیڤی خواست، كو گشت رۆژێن وانا جەژن و كەیف و خوشی بن.
بەرپرسێ مەكتەبا رێكخستنا پارێزگەها دهۆكێ دوپاتكر كو ئێزدی پێكهاتەیەكا ڕەسەنا كوردستانێ‌ نە و رۆلەكێ گرنگ و كاریگەر د ئاڤاكرن و پێشڤەبرنا كوردستانێ دا هەبوویە، لەوما پێدڤیە د خەم و خۆشیێن وانا دا هەڤپشك بین.

هەولێر، قائید میرۆ:

پەرلەمانتارەكێ پارتی ل پەرلەمانێ ئیراقێ ئاشكراكر، هەموو مووچەیێن ئەڤ سالە یێن فەرمانبەرێن هەرێما كوردستانێ دێ هێنە بەلاڤكرن و دبێژیت: لیژنەیەك ل دۆر داهاتێ ناڤخۆیی ژی د ناڤبەرا هەرێم و بەغدایی دا هاتیە پێكئینان.
شوان كەلاری، پەرلەمانتارێ فراكسیۆنا پارتی ل پەرلەمانێ ئیراقێ بۆ رۆژناما ئەڤرۆ دیاركر، هەموو مووچەیێن فەرمانبەران یێن ئەڤ سالە دێ هێنە بەلاڤكرن و گۆت: «ئاریشە ل سەر هنارتنا مووچەی نینە، چونكی نەفتا هەرێما كوردستانێ بۆ دەرڤە هاتیە هنارتن و داهاتێ ناڤخۆیی ژی نابیتە ئاستەنگ ل هەمبەر هنارتنا مووچەیێ فەرمانبەرێن هەرێمێ، ئاستەنگێن مەزن نەماینە و چو بەهانەیەك بۆ گیرۆكرنا مووچەی نەمایە».
شوان كەلاری گۆتژی: «لیژنەیەكا قانوونی بۆ چارەسەركرنا بابەتێ داهاتێ ناڤخۆ د ناڤبەرا هەرێم و بەغدایێ‌ دا هاتیە پێكئینان، هەروەسا راپۆرتا جڤاتا دەولەتێ ژی سەدێ سەد د بەرژەوەندیا هەرێما كوردستانێ دایە، لەوڕا ژی پشتی هنارتنا نەفتێ بۆ دەرڤە هەموو ئاریشە دێ هێنە چارەسەركرن، ژ بەركو نەفت بابەتێ سەرەكی بوویە د ناڤبەرا هەرێم و بەغدایێ‌ و ئەو ژی هاتیە چارەسەركرن».

هێلین سالم:

بەرپرسێ‌ بەشێ‌ رەوشەنبیری و راگەهاندنا پارتی دیاركر كو وان بەرهەڤیەكا باش بۆ ئەنجامدانا هەوا هەلبژارتنان كریە ب شێوەیەكێ‌ دروست و ساخلەمیانە و دبێژیت: ل دووڤ رێنمایێن سەرۆك بارزانی دێ‌ بزاڤێ‌ كەین، ب شێوەیەكێ‌ مەدەنی و پارتیانە كار بۆ سەرئێخستنا لیستا پارتی یا هەژمارە (275) كەین.
د. سالار عوسمان، بەرپرسێ‌ بەشێ‌ رەوشەنبیری و راگەهاندنا پارتی بۆ رۆژنامەیا ئەڤرۆ گۆت: «ئەم وەكو راگەهاندنا پارتی دیموكراتی كوردستان، پەیام و ئارمانج و درووشم و بەرنامە و دیتنێن پارتی دێ‌ كەینە بنەما بۆ هەوا هەلبژارتنێن جڤاتا نوونەرێن ئیراقێ‌، ژ بەر گرنگیا رۆلێ‌ كوردان و پێگەهێ‌ وان د ئیراقێ‌ دا، مە ب هەموو سازیێن خوە ڤە بەرهەڤیەكا باش كریە و هیڤیا من ئەوە ئەڤ هەلبژارتنە ب ئاشتی و ئارامی و دوور ژ هەر سەختەكاریەكێ‌ بهێنە ئەنجامدان».
گۆتژی: «سەرۆك بارزانی بەردەوام ئەم هایداركرینە، كو پێدڤیە بانگەشەیا پارتی بانگەشەیەكا مەدەنیانە و ئارام بیت، لەورا دێ‌ هەموو بزاڤێن خوە بۆ سەرئێخستن و ب رێڤەچوونا وان هەلبژارتنان ب رەنگەكێ‌ ئارام و مەدەنیانە و كوردستانیانە و پارتیانە ل ژێر درووشمێ‌ (هەڤپشكی، هەڤسەنگی، ل هەڤكرن) ب رێڤە بەین، چنكو مە باوەریەكا باش ب پرەنسیپان هەیە و دێ‌ شیێن بینە نموونەیەكا باش بۆ ریكلامكرنێ‌ بۆ سەرئێخستا هەموو بەربژارێن لیستا پارتی».

لەزگین جوقی

رێڤەبەرێ كەمپا خانكێ سەر ب قەزا سێمێلێ راگەهاند، دوو هزار و 140 خێزان دناڤ كەمپا خانكێ دا ماینە، بەری نوكە هەتا 400 خێزانێن ئاوارە ڤەگەریانە شنگالێ ژ وانا ژی هەتا 300 خێزانان دووبارە ژ شنگالێ ئاوارە بووینە و قەستا ناحیا خانكێ سەر ب قەزا سێمێلێ كریە و دووبارە دناڤ كەمپاندا هاتنە ئاكنجیكرن.

پیر عەلو، رێڤەبەرێ كەمپا خانكێ گۆت: ب هیڤیا حۆكمەتا ئیراقێ‌ ڤە، رەوشا ئاواران دناڤ كەمپاندا یا باش نینە و باش ژی نابیت، ژبەركۆ حۆكمەتا ئیراقێ‌ هەڤكاری و پشتەڤانیا ئاواران ناكەت، نوكە حۆكمەتا هەرێما كوردستانێ و دەزگەهێ خێرخوازیێ بارزانی هەڤكاری و پشتەڤانیا ئاواران دكەن، خزمەتگوزاریێن وەك ساخلەمی و پەروەردە و ئاڤ و كەهرەب و باژێرڤانی ژلایێ حۆكمەتا هەرێما كوردستانێ بۆ ئاواران دهێنە دابینكرن.
تەكەز ژی كر، ئەڤ سالە هەتا نوكە كۆ ئەم گەهشتینە هەیڤا 10 تنێ ئێك جار ئاهێن خوارنێ بۆ ئاواران هاتینە دابینكرن هەتا حۆكمەتا ئیراقێ‌ بەهرا ئاواران ژ ئاهێن خوارنێ ژی نادەت كۆ پێدڤیە حۆكمەتا ئیراقێ‌ هەڤكاری و پشتەڤانیا ئاواران بكەت.
پیر عەلو، رێڤەبەرێ كەمپا خانكێ زێدەتر گوت: ئاوارێن ڤەگەریاینە شنگالێ بەردەوام ئاڤا ڤەخوارنێ دكرن و خەلكی شیان نینە ئاڤا ڤەخوارنێ بكرن ژ نەچاری خەلكێ شنگالێ دووبارە مالێن خۆ بجهـ دهێلن و قەستا ناڤ كەمپان دكەن.