دلڤین رەشید:

ڤیان دەخیل، ئەنداما جڤاتا نوونەرێن ئیراقێ‌ بۆ ئەڤرۆ دیار كر، دڤێت پەرلەمانێ‌ ئیراقێ‌ لەزێ‌ ل خواندنا ئێكێ‌ بۆ پڕۆژە یاسایا جینۆسایدا ئێزدیان بكەت و مافێ‌ قوربانیان بهێتەدان.
ناڤهاتیێ‌ گۆت: «مە وەكو پەرلەمانتارێن كورد ل پەرلەمانێ‌ ئیراقێ‌ دەمەكە پڕۆژەیاسایا دانپێدان ب جینۆسایدا ئێزدیان پێشكێشی پەرلەمانی كری، لەو ئەم دخوازین لەز ل خواندنا ئێكێ‌ بۆ پڕۆژەی بهێتە كرن، چونكی ئەو تاوانێن تیرۆرستێن داعشێ‌ ل دژی ئێزدیان ئەنجامداین ل دووڤ پیڤەرێن نیڤدەولەتی تاوانێن دژی مرۆڤاتیێ‌ نە»
گۆتژی: «پێدڤیە حكومەتا ئیراقێ‌ یا پێگیربیت ب دانا مافێن قوربانیان، دیسا یا رژدبیت ل سەر دانپێدانێ‌ ب جینۆسایدا ئێزدیان، چونكی پتر ژ هزار وەلاتیێن بێ‌ گونەه هاتینە كوشتن و چار هزار و 617 كچ و ژن و زلام و زارۆك هاتنە رەڤاندن و هێشتا چارەنڤیسێ‌ پتر ژ دو هزار كەسان یێ‌ دیار نینە، هەتا نوكە ل سەر ئاستێ‌ جیهانێ‌ نێزیكی 20 وەلاتان بادەكا ئێزدیان ب جینۆساید ناساندیە».

رەمەزان زەكەریا:

راگەهاندنا سەرۆكاتیا زانكۆیا ئاكرێ بۆ زانستێن كرداری ئاشكرا كر، ستافەكێ شارەزا و بسپۆر سەردانا زانكۆیا ئاكرێ كر، ل دەستپێكێ لیژنا ناڤبری ژ لایێ پرۆفیسۆر دكتۆر مەنهەل ئیلهام عەبدال، سەرۆكێ زانكۆیا ئاكرێ هاتە پێشوازیكرن، د دووڤ دا روونیشتنەك هاتە ئەنجامدان و بەحس ل ستراتیژیەت و بەرنامێ دروستكرنا پرۆپۆزەلێ ڤەكرنا كۆلیژا زانستێن ئەندازیاریا چاندنێ ل زانكۆیا ئاكرێ هاتە كرن.
د راگەهاندنا سەرۆكاتیا زانكۆیا ئاكرێ دا هاتیە: «ستافەكێ شارەزا و پسپۆر د بیاڤێ‌ زانستێن ئەندازیاریا چاندنێ دا، كو پێكهاتبوون ژ دكتۆرێن زانكۆیێن كوردستانێ ب سەرپەرشتیا رێڤەبەریا دلنیا جۆری ل زانكۆیا ئاكرێ، گەنگەشە ل سەر پێنگاڤێن دەستپێكی بۆ دروستكرنا پرۆپوزەلێ ڤەكرنا كۆلیژا زانستێن ئەندازیاریا چاندنێ ل زانكۆیا ئاكرێ ل دەڤەرا بەردەڕشێ‌ هاتە كرن، كۆلیژ ژ پشكێن (زانستێن تەكنەلۆژیا خوراكی و بەرهەمێن گیانەوەری) دێ‌ پێكهێت». بۆ زانین دەڤەرا بەردەڕەشێ یا بەرنیاس و دەولەمەندە ب گرنگی پێدان و پەرەپێدانێ ب بۆارێ چاندنێ ل دەڤەرێ.

زاخۆ، دلۆڤان هالۆ:

دكتۆر نەجمەددین نێروەیی، مامۆستایێ زانستێن ژینگەهێ ل زانكۆیا زاخۆ بۆ ڕۆژناما ئەڤرۆ دیار كر كو قوتابیێن پشكا زانستێن ژینگەهێ ل زانكۆیا زاخۆ ڕابوون ب ئەنجامدانا چالاكیەكا مەیدانی د ناڤ بازارێ زاخۆ دا، كو ئەو ژی بەلاڤكرنا ڕێنومایێن پاقژڕاگرتنا ژینگەهێ بوون.
مامۆستایێ زانستێن ژینگەهێ ل زانكۆیا زاخۆ، ئاماژە ب وێ چەندێ ژی كر كو ئەڤ چالاكییە پێك هاتبوو ژ بەلاڤكرنا هندەك ڕێنومایێن گرنگ یێن گرێدایی پاقژڕاگرتنا ژینگەهێ و زیانێن ژینگەها پیس ل سەر ساخلەمیا مرۆڤان و ڕێكێن خوە پاراستنێ.

دهۆك، لەزگین جوقی:

ڕێكخراوا كوردستان بۆ پاراستنا مافێن گیانەوەران ل كوردستانێ راگەهاند، نابیت سەیێن بەردایی بهێنە كوشتن و پێدڤیە ب هندەك رێكان ئاریشا زێدەبوونا وان بهێتە چارەسەركرن.
د. سلێمان تەمەر، بەرپرسێ ڕێكخراوا كوردستان بۆ پاراستنا مافێن گیانەوەران ل كوردستانێ بۆ رۆژناما ئەڤرۆ گۆت: «ئەم دژی كوشتنا سەیێن بەردایینە و دڤێت هندەك ڕێیێن دی بۆ كێمكرنا ڤان سەیان بهێنە دیتن، ژ وانا ژی خەساندنا وان رێكەكا گەلەكا گونجایە، ژ بەركو هەكە سەیەكێ نێر و ئێكێ‌ مێ هەبن، د شەش سالان دا دێ بنە پتر ژ 67 هزار سەیێن بەردایی».

شێخان، بارزان مزووری:

سەردار یەحیا، دەڤەردارێ‌ شێخان بۆ رۆژناما ئەڤرۆ دیار كر، پڕۆژەیێ جۆتسایدێ سەرەكی شێخان بۆ لالشێ‌ ب رێژەیا 20% كار ل سەر هاتیە كرن و ژ لایێ‌ رێڤەبەریا سەخبێریا رێك و پران ل پارێزگەها دهۆكێ‌ ڤە سەرپەرشتی ل سەر دهێتە كرن.
ناڤبری گۆت: «پڕۆژە ب گوژمێ 28 ملیار دیناران و ب درێژاهیا هەشت كیلۆمەتر 200 مەتران دهێتە بجهئینان و دەمێ‌ پڕۆژەی 400 رۆژن، لێ‌ رەنگە بەری دەمێ‌ خۆ ب دووماهی بهێت».
نازم زبێر كو شۆفێرە بۆ رۆژناڤا ئەڤرۆ دیار كر، كابینەیا نەهێ گرنگیەكا مەزن دایە رێكێن شێخان و گۆت: «ئەم دخوازین كابینەیێن بهێن ژی شێخان پشتگوهـ نەهاڤێژن».

سندس سالح سلێڤانەیی:

رێڤەبەریا كارەبا قەزا ئامێدی ب هەوەكا بڕینا كارەبا گشتی ژ هژمارەكا دوكان وجهێن گشتی رابوویە، ب تایبەت ئەوێن قەرێن كارەبێ ل سەرهەین و ڤێ چەندێ دلگرانی ل دەف خودانێن وان پەیداكریە و رێڤەبەرێ كارەبێ ل وێ قەزایێ ژی دبێژیت: ئەڤە بڕیارە و دڤێت بهێتە بجهئینان.

بشار ئامێدی، دوكاندارەكە ل سەنتەرێ وێ قەزایێ دبێژیت: بەری چەند رۆژان كارەبا مە هاتیە بڕین ب بەهانەیا وێ چەندێ كو قەرێن كارەبێ ل سەر دوكانێ هەنە، راستە ئەو چەندە هەیە و قەر ل دەف گەلەك كەسان هەنە، پتریا وان ژی یێن سەردەمێ كۆرۆنایێ نە كو ل وی دەمی دۆكان هەموو دگرتی بوون و رێڤەبەریا كارەبێ ئەو چەندە ل بەرچاڤ نەوەرگرتن.
ئەمین، دوكاندارەكێ دی یە ئەو ژی دبێژیت: راستە قەرێن كارەبێ ل سەر مەهەنە، لێ یا رەوا نینە كارەبێ ژمە ببڕن، چونكو ئەو ب خوە یا كێمە و ب رۆژێ هەموویێ دو دەمژمێران كارەبێ نادەنە، لەورا رەفتارا وان جهێ دلگرانیێ یە.
ئارام جەلال، رێڤەبەرێ بەلاڤكرنا كارەبا ئامێدیێ دەربارەی بڕینا كارەبێ ژوان دوكان و جهان دبێژیت: ئەڤە رێنمانە و ژ وەزارەتێ بۆ مە یێن هاتین و هەر جهەكێ قەرێن كارەبێ ل سەر بن دێ هێتە بڕین، بۆ زانین ئەڤە ب تنێ‌ ل ئامێدیی یە، بەلكو ل سنۆرێ هەموو قەزا و ناحیێن ب سەر سنۆرێ پارێزگەها دهۆكێ ڤە هەین ئەڤ چەندە دهێتە كرن و بەری نوكە خودانێن وان هاتبوونە ئاگەهداركرن كو پێدڤیە قەرێن خوە بدەن، لەورا ئەم نەشیێن ڤێ بڕیارێ بجه نە ئینین و دڤێت وەكو خوە بجه بهێت.