دهوك، لەزگین جوقی:
جڤاتا روحانیا ئێزدیان نەختێ مەهركرنا كچان كرە 40 گرامێن زێری و ب فەرمی بڕیار ل سەر هاتە دان.
جەهوەر عەلی بەگ، وەكیلێ جڤاتا روحانیا ئێزدیان راگەهاند، نوكە جڤاتا روحانی یا بلند یا ئێزدیان ب فەرمی بڕیار دا نەختێ مەهركرنا كچان 40 گڕامێن زێری بن و گۆت: «بەری نوكە 75 گرامێن زێری بوون، لێ نوكە بوونە 40 گرامێن زێری».
ب، سه‌رجان مەحمود:
بەرپرسەکێ نەتەوەیێن ئێکگرتی دیار کر، دەم یێ هاتی خەلکێ سووریێ بریارێ ل دۆر سیستەمەکێ نوو بۆ وەلاتێ خوە بدەن، وەکو نەتەویێن ئێکگرتی وان پێ باشە خەلکێ سووریێ هەموو پێکڤە بژین و سیستەمێ نوو ژی ببیتە ژێدەرێ چارەسەرکرنا هەموو پرسێن هەی.
فەرحان حەق جێگرێ پەیڤدارێ سکرتێرێ گشتی یێ نەتەوەیێن ئێکگرتی سەبارەت ب رەوشا نها یا ل سووریێ دیار کر، ب سالانە خەلکێ سووریێ شەڕی بۆ ئازادیا خوە دکەن و نها دەلیڤەیەکا دیرۆکی بۆ خەلکێ سووریێ هاتیە پێش، وەکو نەتەوەیێن ئێکگرتی دڤێت هەموو پێکهاتەیێن ل سووریێ د ئاڤاکرنا سیستەمێ نوو یێ وی وەلاتی دا پشکدار بن، هەکە سیستەمێ نوو یێ ل سووریێ نوونەراتیا هەموو خەلکێن سووریێ نەکەت دێ ئالۆزیێن هەی بەردەوام بن و گۆت: (مخابن هندەک کەس جارەکا دی دخوازن سیستەمێ سووریێ یێ ناڤەندی بیت و جارەکا دی دخوازن تنێ پێکهاتەیەک حوکمێ ل هەموو سووریێ بکەت، لێ ئەزموونا چەندین سالێن بۆری ئەو یەک سەلماندیە کو سیستەمەک وەسا ل گەل راستیا سووریێ ناگونجیت و دێ بیتە ئەگەرێ ئاریشێن مەزن بۆ سووریێ).
ناڤهاتی ئەو یەک ژی دیار کر، نها گەلەک کەس بەحسێ سیستەمەکێ فیدرالی بۆ سووریێ دکەن، گەلەک کەس دبێژن سیستەمەک وەسا دێ بۆ سووریێ یا گونجای بیت، وەکو نەتەوەیێن ئێکگرتی ئەم دبێژین دڤێت خەلکێ سووریێ بریارەکا وەسا بدەت، دڤێت خەلکێ سووریێ بریارێ بدەت کا وان سیستەمەک چاوا دڤێت، لێ گرنگە سیستەمێ نوو یێ سووریێ رێزێ ل مافێن هەموو پێکهاتەیێن ل سووریێ بگریت، رێزێ ل مافێن مرۆڤی بگریت و شاشیێن دەستهەلاتا بەرێ دوبارە نەکەت، ئەو یەک ژ بۆ سووریایەک نوو گەلەک یا گرنگە و گۆت: (نوونەرێ تایبەت یێ نەتەوەیێن ئێکگرتی بۆ کاروبارێن سووریێ نها دەست ب بزاڤەکا مەزن یا کری و ل گەل هەموو هێزێن سیاسی یێن ل سووریێ دانوستاندنان دکەت، وەکو نەتەوەیێن ئێکگرتی مە نەڤێت چو شەڕێن نوو ل سووریێ روو بدەن، چونکی پێدڤیا سووریێ ب ئاشتیێ و پێکڤەژیانێ یا هەی، ژ بەر ڤێ یەکێ ژی دڤێت دەستهەلاتا بەروەخت یا سووریێ ژی ب هەموو رەنگەکێ کار بۆ دستوورەکێ نوو بکەت و دڤێت سیستەمێ نوو یێ سووریێ نوونەراتیا هەموو خەلکێ سووریێ بکەت).
ل ئالیێ دی مەزلوم عەبدی فەرماندارێ گشتی یێ هێزێن سووریا دیموکرات ژی د داخۆیانیەکێ دا پشتەڤانیا خوە بۆ هەلوەستێ نەتەوەیێن ئێکگرتی سەبارەت ب سووریێ دیار کر و راگەهاند، دڤێت هەموو پێکهاتەیێن ل سووریێ بگەهنە مافێن خوە، پێدڤیا سووریێ ب سیستەمەک نوو و و دیموکراتی هەیە کو نوونەراتیا هەموو خەلکێن سووریێ بکەت، دڤێت کورد و هەموو پێکهاتەیێن دی یێن ل سووریێ بگەهنە مافێن خوە، هەلوەستێ نها یێ نەتەوەیێن ئێکگرتی گەلەک گرنگە و دڤێت دەستهەلاتا نوو گرنگیەکا مەزن بدەتە بزاڤێن نەتەوەیێن ئێکگرتی یێن بۆ چارەسەرکرنا ئالۆزیێن نها ل سووریێ.
نوری فرات نڤیسەر و ڤەکۆلەرێ تورکیا دیار دکەت، دانوستاندنێن د ناڤبەرا دەولەتا تورکیا و ئۆجەلانی دا ب تەمامی نهینی نە، شاندێ ئیمرالیێ ژی چو تشتەکێ بۆ رایا گشتی ئاشکرا ناکەت، گەلێ کورد ل تورکیا ژ رەوشا نها دلگرانە، چونکی کەس نزانیت کا چ روو ددەت، ژ بەر ڤێ یەکێ ژی باوەریا کوردان ب پرۆسیسا نها ناهێت و هەکە د پاشەرۆژێ دا ب کریاری هندەک تشت نەهێنە کرن ئەوا نها ب ناڤێ قۆناغا ئاشتیێ دهێتە کرن ناگەهیتە چو ئەنجامەکێ.
ناڤهاتی ئەو یەک ژی دیار کر، ئارمانجا سەرەکی یا تورکیا ژ دەستپێکرنا قۆناغا ئاشتیێ یا ل گەل ئۆجەلانی رۆژئاڤایێ کوردستانێ یە، ناکۆکی ژی ل سەر رۆژئاڤا نە، لێ دیارە بەرپرسێن پەکەکێ یێن ل قەندیلی ل دژی داخوازیێن تورکیا نە، ژ بەر ڤێ یەکێ ژی گەلەک زەحمەتە تورکیا بشێت ب رێیا ئۆجەلانی بگەهیتە ئارمانجا خوە ل رۆژئاڤایێ کوردستانێ.
بەرپرسەکێ وەزارەتا دەرڤە یا ئەلمانیا بۆ مالپەرێ ئاکسیۆس دیار کریە، رۆژا ١٥/١/٢٠٢٤ شاندەکێ ئیرانێ ل گەل نوونەرێن هەر یەک ژ وەلاتێن فرەنسا، ئەلمانیا، بریتانیا و چەند وەلاتێن دی یێن ئۆرۆپی کۆمبووینە و تێدا نوونەرێ ئیرانێ دیار کریە، ئەو بەرهەڤن ل گەل ئەمریکا دەست ب دانوستاندنان بکەن و پرسا بەرنامێ ئەتۆمی یێ ئیرانێ چارەسەر بکەن.
هەمان بەرپرسی ئەو یەک ژی دیار کریە، وان داخوازیا ئیرانێ گەهاندینە نوونەرێ ترامپی، لێ سەرۆکێ نوو یێ ئەمریکا دیار کریە ئەو گرنگیێ نادەتە پێشنیازێن ئیرانێ، چونکی هەتا ئیران داخوازیێن ئەمریکا و وەلاتێن رۆژئاڤایی قەبوول نەکەت و دەست ژ کریارێن خوە یێن بۆ ئالۆزکرنا رەوشا رۆژهەلاتا ناڤین بەرنەدەت ئەو جارێ چو دانوستاندنان ل گەل ئیرانێ ناکەن.
ئەو یەک د دەمەکێ دایە کو بەری چەند رۆژان عەباس عێراقچی وەزیرێ دەرڤە یێ ئیرانێ ژی دیار کربوو ئەو چاڤەرێی بەرسڤا ئەمریکا نە دا ل گەل وی وەلاتی ل دۆر بەرنامێ ئەتۆمی یێ ئیرانێ دانوستاندنان بکەن.
ب دووماهی هاتنا یاریێن گەڕا 16ێ ژ هەڤڕكیێن خولا ستێرێن ئیراقێ یا فوتبۆلێ، هەر سێ یانەیێن كوردستانی دهۆك، زاخۆ و نەورۆز ب ئەنجامێ وەكهەڤی ژ بەسرا و بەغدا ڤەگەڕیانە هەرێمێ و یانەیا هەولێر سێ خال بۆ جەماوەرێ خوە كرنە دیاری، د هەڤڕكیێن واندا ئەوێن ل پێنج شەمبی و ئەینییا بۆری هاتینە كرن.
دهۆك ژ خوسارەتیێ قورتالبوو
تیما فوتبۆلا یانەیا دهۆك خالەكا گرنگ ژ خودانێن ئەردی یانەیا مینا یا بەسرایی وەربگریت پشتی شیایی د خولەكا كۆژەك دا گۆلا وەكهەڤیێ بینت، د یارییا واندا ئەوا ل ئەینییا بۆری ل یاریگەها ئەلفەیحا هاتیە كرن، خودانێن ئەردی یا پێشكەفتی بوو هەتا خولەكا 90+5 لێ هێرشبەرێ نوو یێ دهۆكێ و پێكگۆڕ ئیبراهیم غازی شیایی ب سەری گۆلا وەكهەڤیێ بۆ تیما خوە بینت و ژ خوسارەتیێ قورتالبكەت، ئەڤ ئەنجامە تیما دهۆكێ بۆ بوو ئەگەر ژ رێزبەندیا پێنجێ پاشڤە بچیتە رێزا شەشێ ب كۆمكرن 28 خالان یا سەرجەمێ هەشت سەركەفتن، چار وەكهەڤییانە و چار خوسارەتی هەنە، یارییا بهێت یا تیما دهۆكێ چاڤەڕێ دهێتە كرن دێ مێڤاندارییا یانەیا ئەلگەرمە یا باژێرێ ئەنباری كەت ئەوا دێ ل دەمژمێر 7:30 شەڤ هێتە كرن.
راهێنەر ئەنجامێ یاریێ ب باشی هەلسەنگاند
د كۆنگرەیێ رۆژنامەڤانی یێ پشتی یاریێ دا ڕاهێنەرێ تیما یانەیا دهۆك مەسعۆد میرال دەستخوەشیا یاریزانێن خوە كر كو هەتا دووماهی چركە بێ ئۆمێد نەبووینە و شیان ئەنجامێ یاریێ ژ خوسارەتیێ بكەنە وەكهەڤییەكا باش و گۆت: ئەوا پشتی یاریێ روودایی ژلایێ جەماوەرێ مینا ڤە جهێ قەبوولكرنێ نینە و یا مەترسیدارە و دوور نەبوو وەكو یا یارییا بەرانبەر كەربەلا هاتبا روودان، ژلایێ هونەری ڤە تیما مینا ژ مە باشتر بوون و یا بهێز بوو، دیسان ئەڤە چەندین یارییە دناڤ ئەردێ خوە دا خوسارەت نەبوویە، سۆپاسییا جەماوەرێ خوە یێ دلسۆز دكەین ل هەموو یارییان دگەل مە دانە، ئەم سۆزێ ددەین بۆ یاریێن بهێت باشتر و ب هێزتر پێخەمەت سەركەفتنان.
تیما دهۆكێ خوانا نەهـ یاریزانێن پشكداری د تۆماركرنا 21 گۆلان دا هەیە بڤی ڕەنگی، پاشەنگ عەبدوللا شەش گۆل، پیتەر گۆرگیس پێنج گۆل، هەر ئێك ژ كەریم دەرویش و شەرقی ئەلبەحری دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، كێلبرت كۆمسۆن، مارلۆن دۆسانتۆس و ئیبراهیم غازی گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر
زاخۆییان دیاری قەبوول نەكر
تیما یانەیا زاخۆ دۆبارە دیارییا ئەنجامێن چەند یارییان قەبۆلنەكر ژبۆ پێشڤە بەر ب سەرێ لیستێ پشتی ب گۆلەكێ بەرانبەر خودانێن ئەردی یانەیا نەفت میسان وەكهەڤ بووی د یارییا واندا ئەوا ل ئەینییا بۆری یاریگەها نەفت میسان هاتیە كرن، گۆلا وەكهەڤیێ یا كوڕێن خابووری د خولەكا 85 دا هاتە تۆماركرن ب لێدانا پەنەلتیێ ئەوا ژلایێ كاپتنێ وێ ئەمجەد عتوانی ڤە ب سەركەفتیانە تۆرا نەفتا میسان هەژاندی، هەرچەندە زاخۆیان گەرماتییا پێشڤەچوونێ بۆ سەرێ لیستێ ژ دەست دا ژ رێزا سێ پاشڤەچوو رێزا چارێ ب كۆمكرنا 29 خالان ژ هەشت سەركەفتن، پێنج وەكهەڤی دگەل دا سێ خوسارەتی هەنە، یارییا بهێت یا زاخۆییا دێ ل رۆژا پێنج شەمبی دەمژمێر پێنجێ ئێڤاری مێڤاندارییا یانەیا نەجەف كەن.
تەلال ئەلبلۆشی: ل سەر هەڤڕكیێ نا ڕاوەستیێن
د كۆنگرەیێ پشتی ب دووماهی هاتنا یاریێ دا راهێنەرێ یانەیا زاخۆ نەلال ئەلبلۆشی وەكهەڤی ب ئەنجامەكێ سرۆشتی دانا و گۆت: د نیڤا ئێكێ دا ئەم گەلەك باشتر بووین و مە كۆمەكا دەلیڤەیێن گۆلكرنێ ژ دەستدان، د نیڤا دویێ دا نەفت میسان سەقایێ یاریێ گوهۆڕات، هەرچەندە ئەوان گۆلەك كر لێ هەرزوو ئەم شیاین ڤەگەڕینە دناڤ هەڤڕكیێ دا، هەكە ئەم ب سەركەفت باین دا زێدەتر نێزیكی سەرێ لیستێ بین، لەوما ژی ئەم ل سەر هەڤڕكیێ نا ڕاوەستیین و رژدین بۆ ئەنجامێن باشتر و سەركەفتنان.
گۆلكەرێن زاخۆ كینە؟
پشتی تۆماركرنا گۆلێن ڤێ گەڕێ هەردو ستێرێن یانەیا زاخۆ یێ بەرازیلی گۆستاڤۆ هێنریك نەهـ گۆل و یاریزانێ هەلبژارتیێ ئیراقێ ئەمجەد عتوان ب تۆماركرنا نەهـ گۆلان ل رێزێن ئێكێ و دویێ ل سەر لیستا گۆلكەرێن تیما خوە دهێن، دیسان هەر ئێك، ناسر محەمەدو چار گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز گۆلەك تۆماركرینە.
هەولێرێ جەماوەرێ خوە كەیفخوەشكر
تیما یانەیا هەولێرێ سەركەفتنەكا باش ل سەر مێڤانا خوە یانەیا كەربەلا ئینا ب سێ گۆلان بەرانبەر گۆلەكێ و پێشڤەچوونەكا باش د ڕێزبەندییا خولێ دا هات، گۆلێن كەلهە و منارە ژلایێ یاریزانێن وێ ئوسامە جەبار، یوسف بن سودە و شێركۆ كەریم، ڤێ سەركەفتنێ هەولێر ژ رێزا نەهێ پلا خوە بوو رێزا حەفتێ بلندكر ب كۆمكرنا 25 خالان ژ حەفت سەركەفتن، چار وەكهەڤی و پێنج خوسارەتی هەنە، یارییا بهێت یا هەولێرییان دێ ل رۆژا سێ شەمبی دەمژمێر 2:30 پشتی نیڤرۆ ل پایتەختێ ئیراقێ بەغدا بەرانبەر یانەیا نەفت بیت.
نەورۆزێ مفا ژ دەمێ زێدەكری وەرگرت
تیما تیما یانەیا نەورۆز وەكهەڤییەكا گرنگ بەرانبەرا یانەیا شورتە یا بەغدا ئینا پشتی ل یاریگەها شەعب شیایی وەكهەڤیێ بینت ب دو گۆلان و مفایی ژ دەمێ زێدەكری وەربگریت دەمێ یاریزانێ وێ چانۆچ د خولەكا 90+3 گۆلا دویێ بۆ تیما خوە بینت، ڤێ ئەنجامی ئێك رێز پێشڤە هات بۆ رێزا 15ێ ب كۆمكرنا 19 خالان، یارییا بهێت یا دێ مێڤاندارییا ئەلقاسم كەت ل دەمژمێر دو یێ پشتی نیڤرۆ.
عەلی حاجی:
چاڤه‌ڕێ دهێته كرن ئه‌ڤرۆ ل ده‌مژمێر پێنجێ ئێڤاری تیما یانه‌یا زاخۆ یارییه‌كا گرنگ و چاره‌نڤیس به‌رانبه‌ر هه‌ڤڕكا خوه یانه‌یا دیجله ئه‌لجامعه بكه‌ت د یارییه‌كا ئاگرین دا، ئه‌وا دێ ل هۆلا گرتییا بنگه‌هێ وه‌رزش و لاوان ل باژێرێ زاخۆ هێته كرن.
د رێزبه‌ندیا گشتی دا دگه‌ل خالێن لاوان كوڕێن خابووری ل رێزا پێنجێ دهێن و خودانێن 27 خالانه ژ 10سه‌ركه‌فتن و حه‌فت خوساره‌تیان، ژلایێ خوه‌ڤه تیما مێڤان رێزا دویێ دهێت ب كۆمكرنا 30 خالان، یارییا ئه‌ڤرۆ دێ چاره‌نڤیسێ زاخۆییان بۆ چارگۆشه‌یا زێرین دیاركه‌ت.
ل دۆر ڤێ یاریێ عەبدولستار عەلی سه‌رپه‌رشتێ تیما زاخۆ بۆ رۆژنامه‌یا ئه‌ڤرۆ گۆت: هه‌رچه‌نده یارییا ئه‌ڤرۆ گه‌له‌ك یا ب هێزه و گرنگه و د نوكه دا ل سه‌ر ئاستێ پێشكه‌فتیان بێ زێده‌كرنا خالێن لاوان رێزا چارێ نه د رێزبەندیا خولێ دا ئه‌ڤ یارییه بۆ مه د گرنگن و دڤێت سه‌ركه‌فتنان بینن ژبۆ مسۆگه‌ركرنا رێزا چارێ و ده‌ربازبوون بۆ چارگۆشه‌یا زێرین.
ناڤبری گۆت ژی: به‌رهه‌ڤیێن مه د به‌رده‌وامبن وگه‌شبینن ب پشته‌ڤانییا جه‌ماوه‌رێ خوه د ناڤ یاریگه‌هێ دا بشێن به‌رده‌وامیێ بده‌ینه سه‌ركه‌فتنان، هه‌موو یاریزان ڕژدن و گه‌شبینن ب گه‌هینه ئارمانجا خوه.
شاهۆ فەرید:
د داخویانیەكێ راهێنەرێ تیما یانەیا سێمێلێ ئاشتی موستەفا بۆ رۆژنامەیا ئەڤرۆ دیاركر: ئەو سۆزێن ب كارگێریێ هاتینە دان بجهئینان، هەر چەندە بەری دەستپێكرنا خولێ تیما مە دا خوە ڤەكێشیت لێ دووبارە سوز دانێ پالپشتیا داریی لی بكەن و تا نوكە چ دیارنیە یاریزانان مووچەیەك وەرگرتیە، راستە مە بەرهەڤی دەمەكێ گونجایی ئەنجامدەن لێ نەشیایین جهێن كێماسی زوو چارەسەربكەین، پێشەكارەكێ خوە دەست ژێ بەردا ژبەركو ئاستێ مە ڤیایی پێشكێشنەكر، ئەو یاریزانێ ئەرەب ژیی تووشی هنگاڤتنێ بوو و ئاستێ پێدڤی یاریا بوریی نیشاندا هێشتا تەمامی چارەسەرنەبوویە.
ئاشتی گۆت ژی: یاریا بوری دگەل هەلۆ یاریزانا بایكوت كربوو لێ من و ستافێ خوە یێ راهێنانێ یاریزان رازیكری كربوون بۆ یانێ، پشتی ڤەگەریاین دیاربوو پارەیێ بەردەست نینە مووچەیێن وان بدەن، ئەگەر پالپشتیا دارایی مە نە هێتەكرن دێ ئاستێ مە لاوازتر لێهێت و رێزبەندیا نوكە پتر دابەزیت و پلەیا دو، بریارە چەند رۆژێن بهێن چەندین یاریزان بهێنە دوورئێخست و داخوازن دەستبەرداری وان بین ژبەر نەدانا مووچەی.
ناڤهاتی گۆت ژیی: مخابنی ڤە پلانا مە هەموو هاتە شێلاندن ژلایێ وان سوزیێن كارگێریا یانەیا سێمێلێ هاتینەدان، ئەڤ هەشت یاریێن مایین ژی دێ بۆ مە گەلەك زەحمەتبن، پالپشتی نەبیت خەونا جەماوەرێ سێمێلێ بجهناهێت و دەرباز نابیتە پلەیا نایاب، یانەیێن دی باشی خوە بەرهەڤكرینە، هندەك یانەیان خودان پشتەڤانن و هەتا پازدە یاریزانێن ژی ئیناینە بۆ باشكرنا تیمێن خوە.
رەمەزان زەكەریا
د داخویانیەكێ دا سەرۆكێ یانەیا ئاكرێ یا وەرزشی ئاشكراكر هەتا نوكە چو بڕیارێن فەرمی نە داینە ژبۆ پشكداریێ بۆ وەرزێ نوو یا خولا پلا سێیێ یا ئیراقێ ژ كۆما پارێزگەها دهۆكێ و ئەو بەردەوامن ل سەر هێزكرنا تیما خوە پێخەمەت پاراستنا ناسناڤێ كوردستانێ.
زێدەتر سەلاح ئیبراهیم بۆ ئەڤرۆ گۆت: د چارچووڤێ ب هێزكرنا پێكهاتەیا یانەیێ دا دووماهی پێنگاڤا مە گرێبەستا یاریزانێ پیشەگەرێ غانی یێ كو ل هێلاهێرشبەریێ یاریێ دگەل حوزاف عەلی بۆ قۆناغا دویێ خولا پلا نایابا كوردستانێ هاتە ئیمزاكرن، ئەڤ یاریزانە شارەزاهییەكا باش یا هەیی و خودان شیانە پێشتر یاری بۆ یانەیێن هەر ئێك ژگۆلد ستار و درێم سیێن خولا پلا نایابا ئۆغەندایێ كرینە.
ل دۆر دەنگۆیێ پشكدارییا تیما وان یا فوتبۆلێ وان د خولا پلا سێ یا ئیراقێ دا ناڤهاتی گۆت: هیشتا مە چ بڕیار نە داینە كو دێ پشكدار بین یان نە و بابەت نە هاتییە ئێكلا كرن ژبەركو هەردەمێ مە بڕیارا پشكداریێ دا ئەم دێ پێدڤی ب كۆمەكا یاریزانێن نوو باشترین شێوە رێزێن تیمێ بەرهەڤ بكەین و بشێین د چارچووڤەیێ ڤاڤارتنان ب سەربكەڤین و دەربازبوونا خوە مسۆگەر بكەن نەك بتنێ پشكداربین، ئەگەرێ ئەم نەشیاین پشكدار بیت دێ بوهانا نەبوونا ئابووریەكێ پێدڤی ل بەردەستێ كارگێریێ دا چونكی هەر خولەكا تیم پشكدار بیت دڤێت كۆژمەكێ مەزن یێ پارەی بۆ تیمێ بهێتە خەرج كرن.
بۆ زانین د نوكە دا تیما یانەیا ئاكرێ پشكدار د خولا پلا نایابا كوردستانێ دا، ژ 13 یارییان رێزا پێنجێ د هێت ب 22 خالان ئەوا یانەیان شێروانە سەرێ لیستێ دهێت ژ 14 یارییان ب30 خالان و یانەیێن پێشمەرگەیا هەولێرب 26 خال، ڕزگاری ب25 خال و زاخۆ ب 24 خال رێزێن دویێ هەتا چارێ ل دووڤ ئێك دهێن.
وەرگێڕان: عارف حیتۆ
١- شیڤەک
ل دەمێ شیڤێ.. چوومە دەف وان
کێلیکەکێ ل من نێڕین و
کەسێ ژ وان بەرسڤا ئێڤاری باشییا من نەدا!
دەست زڤڕینە کەفچکێن بچووک ل سەر سێنیکان
***
من هێڤدا ئامانێ خوارنێ و
کرە هەوار: هوون نەماینۆ.. خوینا منە
ئەڤە خوینا منە.. ئاگەهدار بن
لێ وان چ پویتە پێ نەکر
دەستێن وان هەر ب کەفچکێن بچووکڤە د مژوولبوون
ئو لێڤان ژی هەر خوین دئالیست!
***
شعر: ئەمەل دنقل
من القصائد المتفرقە. اڵاعمال الکاملە، دار الشروق، گ٢- ٢٠١٢؛ ص٤٢٧.
٢- ژ وە دوور دکەڤم، دا وە بنیاسم
ئەز شاعرم..
لێ من کۆمەک برادەرێن دۆست ل پشتا بازاڕی هەنە
ب شەڤێ شەڤبێرییا دگەل دکەم و ئەز ڤەخوارنێ،
بۆ وان تێ دکەم، بۆ من تێ دکەن
هەکو من دبینن سوحبەتێن هەڤالینیێ درێژ دبن و
مە ژبیرڤە دبەن
وەلێ هەکو شەڤبێرییا وە ڤەدڕەڤیت و ستێرا ڤێ ڕۆژهەلاتێ
ل مالا خوە یا ل ئاسمانێ شین، غەوارە دبیت، دێ ڤەگەڕیێم
دێ د تاریستانا شەڤێدا بەرەف مالا خوە ڤەگەڕیێم
دا ل ئاسمانێن خوە بڕازیم
ب تنێ بڕازێم… ل ئاسمانێن خوە و
خەونان.. ب ڤەگەڕا ب دەف وەڤە ببینم
یێ سەربەست و تژی تژی ژ ئاواز و هۆزانێن خوە
….
ژ وە دوور دکەڤم دا وە بنیاسم
***
شعر: صلاح عبدالصبور
من دیوان أقول لکم. الاعمال الكاملە، گ١- ١٩٧٢؛ ص؛ ١٨٣- ١٨٤.
٣- نە چ کەسەک
من خوە دیت یێ ب لەشێ ڕویس
ل جاددەیێ دەرباز دبم
ژ شەرما عەورەتێ چاڤێن خوە دگرم
پاشی ڤەدکەم، ل هیڤیا ئاوڕەک سەرپێ،
ژ کەسەکی… ب هەڤسۆزی ل من بنێڕیت
لێ من نەدیت!
***
ئەڤجا… ئەگەر- خودێ نەکەت- شێت ببم و
ل سەرێ ڕێکان، ڕویس و بێشەرم بکەمە گری
کەسەک نەبیت، کنجڕەکی ب سەر من دادەت
***
یان ژی… ئەگەر- خودێ نەکەت- بهێمە گرتن
پاشی زڤڕیمەڤە برسی و ژ خوە نەگرم، خازۆکیێ بکەم
کەسەک نەبیت، پیچەک برسا من ڤەگریت
ئەڤ قەرەبالغییا هەنێ… نە چ کەسە!
***
شعر: احمد عبدالمعطی حجازی
من دیوان لم یبق الا الاعتراف. الاعمال الکاملە؛ ص٣٨١-٣٨٢.
بەهزاد بەهرام
ئەگەر ژ دیمەنێ
كەفتنا پەرمیجكێن بەفرێ
ژ دیمەنێ
ڤەبوون و بشكوڕینا بشكۆژێن گولێ
ژ دیمەنێ
بارینا دلۆپ دلۆپێن بارانێ
ژ دیمەنێ
هەلاتن و ئاڤابوونا رۆژێ
ژ دیمەنێ
هاتنە خارا سیلاڤا ئاڤێ
ژ دیمەنێ
هژیانا سەرەگولێن گەنمی
ژ دیمەنێ
وەریانا بەلگێن دارێ
جوانتر و نازكتر هەبا..!
لتە ئەڤیندار نەدبووم
لەورا دەمسالێ
هزار و ئێك ناسناڤ
من لتە ناڤكرنە
شەكرە بەفرینی.. ئەز ژی رەنیا تە
دلبارینی.. ئەز بارانا تە
رۆژینی.. ئەز ئاڤابوون و شەڤا تە
سیلاڤی.. ئەز دەنگ و بەژنا تە
سوورگولی.. ئەز گولدان و باخچەڤانێ تە
پاییزی.. ئەز رەنگ و هرو بایێ تە
تو یا منی و ئەز ژی هەر بۆ تە.
نيشاندان