هەولێر، قائید میرۆ:

نەقیبێ سەندیكا رۆژنامەڤانێن كوردستانێ ئاشكرا كر، ئەو د دەمەكی دا سالڤەگەڕا رۆژنامەڤانیا كوردی دكەن، كو كوردستان و دەڤەر د رەوشەكا ئالۆز دا دەرباز دبیت و دبێژیت: رۆژنامەڤانیا كوردی پێشكەفتنێن بەرچاڤ ب خۆڤە دیتینە و نوكە میدیا ل كوردستانێ د دەركرنا بڕیارێن سیاسی دا یا پشكدارە.
حاكم ئازاد حەمەدەمین، نەقیبێ سەندیكا رۆژنامەڤانێن كوردستانێ بۆ رۆژناما ئەڤرۆ دیاركر، ئەڤرۆ 128 سال لسەر دەرچوونا ئێكەم رۆژناما كوردی دەرباز دبن و گۆت: «رۆژنامەڤانیا كوردستانێ پێشكەفتنێن بەرچاڤ ب خۆڤە دیتینە، ب تایبەتی پشتی پێشكەفتنێن تەكنەلۆژیایێ، نوكە میدیا ل هەرێما كوردستانێ، مینا میدیایا جیهانی د دەركرنا بڕیارێن سیاسی دا یا پشكدارە و كاریگەریێن زۆر و رۆلەكێ بەرچاڤ هەیە، ل گەل پێشكەفتنا رۆژنامەڤانی، ژێرخانا قانوونیا هەرێما كوردستانێ پێشڤەچوونێن بەرچاڤ بخۆڤە دیتینە».
حاكم ئازاد حەمەدەمین گۆت ژی: «داخوازێ ژ رۆژنامەڤان و دەزگەهێن راگەهاندنێ دكەین، هەرێم و دەڤەر یێن د رەوشەكا ئالۆز دا دەرباز دبن، ژ بەر شەڕێ د ناڤبەرا ئەمریكا و ئیرانێ دا، لەوڕا بۆ ب دەستڤەئینانا زانیاریان و ئاشكراكرنا راستی و دروستیا هێرشێن لسەر هەرێما كوردستانێ پەیوەندیێ ب هێزێن ئەمنی ڤە بكەن، ب تایبەتی ب ئەگەرێ هێرشێن میلیشایێن ژ قانوونێ دەركەفتی، چەندین كەس ل هەرێما كوردستانێ شەهید و برینداربووینە».

ئامێدیێ ، مەحمود نهێلی:

هەژمارەكا زۆرا مین و تەقەمەنیان و تی ئێن تی یێن ڤەدایی ل چیایێ زێبارێ بەرانبەر كۆمەلگەها سیریێ یا سەر ب ناوچەدارییا شێلادزێ ڤە ژ لایێ وەلاتیان ڤە هاتینە دیتن و دبێژن مەترسیا پەقینێ ل سەر هەیە.
فەرهاد، وەلاتیەكێ‌ كۆمەلگەها سیریێ یە بۆ رۆژناما ئەڤرۆ دیاركر، دەمێ وان سەرەدانا چیایی كری ب مەرەما ئینانا گل و گیایێ بهارێ ل چیایێ بەرانبەر كۆمەگەها سیریێ، ئەو ل سەر هەژمارەكا مین و تەقەمەنیان هەلبووینە و گۆت: «ئەڤ تەقەمەنیە ژ مین و گوللەیێن توپا و تێلە و تی ئێن تی یا پێك دهێن، دیسا گەلەك ژ وان د پێكڤە گرێدایی نە، خودێ نەكەت ب پەقن دێ روودانێن مەزن و دلتەزین ژێ‌ دروست بن».
ناڤهاتی ئاشكرا ژی كر، ئەڤ تەقەمەنیە ل جهێن جودا یێن ڤی چیایی هاتینە دیتن و بارا پترێ ل وان جهانە یێن بەری نوكە جهێن لەشكەری بووینە، چێدبیت شەڕ ژی ل وان جهان د ناڤبەرا لەشكەرێ توركیا و چەكدارێن پەكەكێ دا هاتینە كرن و گۆت: «هیڤیدارین ئەڤ كەسێن قەستا ڤی چیایی دكەن، گەلەك د هشیار بن و خوە نێزیكی جهێن لەشكەری و شەڕ لێ چێبووی نەكەن، دیسا داخوازێ‌ ژ لایەنێن پەیوەندیدار دكەین، وان تەقەمەنیان راكەن، ژ بەر كو بووینە مەترسی ل سەر ژیانا وەلاتیان».

رەمەزان زەكەریا:

رێڤەبەرێ‌ پارستن و سەخبێریا رێك و پران ل ئاكرێ‌ دیار كر، ژ بەر رێگریێ‌ كارێ‌ نووژەنكرنا رێیا بەردەڕەشێ‌ بۆ كەلەكێ‌ هاتیە راوەستاندن.
ئەندازیار محسن میرانی، رێڤەبەرێ‌ پارستن و سەخبێریا رێك و پران ل ئاكرێ‌ بۆ ئەڤرۆ گۆت: «مە دخواست كارگەها قێری یا ئاسنگەران بدەینە كاری، داكو پێدڤی ب كڕینا قێری ژ دهۆكێ نەبین، بەلێ مخابن خەلكێ گوندێ پیرچاوش ڕێگری ل كاركرنا كارگەهێ كریە و ناهێلن كار بهێتە ئەنجامدان، ئەڤە ژی بوویە ئەگەر نووژەنكرنا رێیا سەرەكی یا بەردەڕەشێ‌ بۆ كەلەكێ‌ بهێتە راوەستاندن».
گۆت ژی: «داخوازێ ژ خەلكێ دەڤەرێ و گوندیێن پیرچاوش دكەین، د هاریكار بن و ڕێگریێ ل نووژەنكرنا رێكا سەرەكی یا بەردەڕەشێ‌ بۆ كەلەكێ‌ نەكەن، ژ بەركو یا پێدڤیە بهێتە نووژەنكرن، بۆ ڕێگریكرن ل كارەساتێن هاتنوچوونێ».

زاخۆ، دلۆڤان هالۆ:

سەرۆكاتیا زانكۆیا زاخۆ دیاركر كو ئەو وەكو زانكۆ هەشت پڕۆژەیێن ستڕاتیژی ڕادگەهینن و ئەڤ هەشت پڕۆژە ژ نڤیسینا ئەكادیمی و ڤیدیۆیێن زانستی هەتا دگەهیتە تاقیگەها سیاسەتان، ناڤەندا ڤەكۆلینان، زانست بۆ جڤاكی، یانەیا ژینگەهێ، یانەیا دیبەیتێ و گۆڤارا قوتابیان، ئەڤە هەموو پێكڤە دێ سیستەمەكێ زیندی یێ مەعریفی پێكئینن، ئەڤە ب تنێ چالاكی نینن، بەلكو كارگەهەكا بەرهەمئینانا ئەقلێ ڕەخنەیی و زانستێ كارانە.
سەرۆكاتیا زانكۆیا زاخۆ ئاماژە ب وێ چەندێ ژی كر كو ئەڤ هەشت پڕۆژە دێ زانكۆیا زاخۆ كەنە چەقەكێ ڤەكۆلینێن زیندی ب زێدەبوونا نڤیسینێن ئەكادیمی، بەلاڤكرنا ڤەكۆلینێن قوتابیان، دیجیتالكرنا زانستی ب زمانێ كوردی، زانكۆ دێ پێگەهەكێ بهێز د ناڤ نەخشەیێ زانستی یێ جیهانی دا وەرگریت، دیسا زانكۆ دێ ژ جهەكێ وانەگۆتنێ بیتە دەزگەهەكێ كاریگەرییا مەعریفی، مفایێ ئێكێ بۆ قوتابیان دێ ئەو بیت: ژ وەرگرەكێ بێدەنگ دێ بیتە بەرهەمێنەر، قوتابی دێ فێری نڤیسینا پرۆفیشنال و ئاخڤتنا لۆژیكی و چارەسەركرنا ئاریشەیان بن، ئەڤە ژی دێ وان كەتە خودانێ كەسایەتیەكا سەركردە و باوەرنامەیەكا بهێز.
زانكۆیا ناڤهاتی ئاشكرا ژی كر كو زانكۆیەكا زیندی بجهئینانا ڤێ پلانێ، هەژمارەیا چالاكیێن سالانە دێ ب رەنگەكێ بەرچاڤ زێدە بیت و ڕۆژانە دێ دیبەت هەبن، ب بەردەوامی دێ ڤیدیۆ و گۆڤار بەلاڤ بن، دێ كەمپینێن ژینگەهێ و سمینارێن جڤاكی هەبن، ئەڤە دێ ژینگەكا زانستی یا تێر و تەسەل دروست كەت، كو هەر قوتابیەك تێدا جهێ خوە ببینیت.

زاخۆ، دلۆڤان هالۆ:

ڕێڤەبەرێ باخچەیان ل سەرۆكاتیا باژێڕڤانیا زاخۆ دیاركر، ئەم چیمەنێ هەر چار وەرزان كەسك ل باخچە و دوورگەو پاركێن سنۆرێ ئیدارەیا سەربخوە یا زاخۆ دچینین، چونكی ب درێژاهیا سالێ یێ شینە و هشك نابیت، و خەمل و جوانیەكا دی ددەتە باژێڕی.

فەلاح حەسەن، ڕێڤەبەرێ باخچەیان ل سەرۆكاتیا باژێڕڤانیا زاخۆ بۆ ڕۆژناما ئەڤرۆ دیاركر، لێ تشتێ نەخوەش یێ ڤی چیمەنی ئەوە كو چاڤدێری و سەخبێریكرنا ڤی چیمەنی گەلەك یا ب زەحمەتە، چونكی پێدڤیه بەردەوام دەرمانێ كیمایی لێ بهێتە ڕەشاندن، و ل وەرزێ هاڤینێ ژی دڤێت ڕۆژانە دوو هەتا سێ جاران بهێتە ئاڤدان.
ناڤهاتی ئاماژە ب وێ چەندێ ژی كر، ژبلی چاندنا چیمەنێ هەر چار وەرزان كەسك، د نوكە دا ئەم دارێن جۆراو جۆر یێن هەر چار وەرزان كەسك ل زاخۆ دچینین وەكو دارا توویا بێ بەرهەم و هندەك جۆرێن دارێن كاژان، زێدەباری چاندنا گۆلێن جۆراو جۆر یێن هەر چار وەرزان كەسك.
گۆت ژی:»ب چاندنا چیمەن و دار و گولان ڕێژا كەسكاتیێ ل زاخۆ بەردەوام د زێدەبوونێ دایە، بڤێ چەندێ ڕێژەكا زێدەتر یا ئۆكسجینێ و هەوایێ پاقژ ل زاخۆ پەیدا دبیت».