پەیامنێران، زنار و دلۆڤان:

وەزیرێ ڤەگوهاستنێ یێ حكومەتا هەرێما كوردستانێ دیار كر، دیزاینەكێ نوو و سەردەمیانە بۆ فڕۆكخانەیا نێڤدەولەتیا دهۆكێ هاتیە بەرهەڤكرن ودبێژیت: بڕیارە ل گەل كۆمپانیەكا نێڤدەولەتیا ناسیار، ب چەندین قووناغان و د دەمەكێ نێزیك دا دەست ب دروستكرنا وێ فڕۆكخانەیێ بهێتە كرن.
ئانۆ جەوهەر، وەزیرێ ڤەگوهاستنێ یێ حكومەتا هەرێما كوردستانێ گۆت: «بەری 10 سالان دیزاینەك بۆ فڕۆكخانەیا نێڤدەولەتیا دهۆكێ هاتبوو بەرهەڤكرن و دڤێت د نوكە دا ئەو دیزاینێ بەری نوكە بۆ فڕۆكخانەیێ گوهۆڕین تێدا بهێنە كرن، هەروەسا گەلەك ژ وان وەلاتێن فڕۆكخانە ژی هەین، فڕۆكخانەیێن نوو دروست كرینە، ل گەل هندێ فڕۆكخانە و شێوێ دروستكرنا فڕۆكخانەیان سال بۆ سالێ دهێنە گوهۆڕین».
ناڤهاتی ئاشكرا ژی كر، ل سالا 2023ێ، دیزاینەكێ نوو بۆ فڕۆكخانەیا نێڤدەولەتیا دهۆكێ هاتبوو ئامادەكرن و گۆت: «نوكە ئەم ل گەل كۆمپانیەكا نێڤدەولەتیا ناسیار مژوولی بابەتێ‌ شێوازێ دروستكرنا وێ فڕۆكخانێینە د دەمەكێ نێزیك دا، دێ كار كەین بۆ هندێ كو ب قووناغ دەست ب دروستكرنا وێ فڕۆكەخانەیێ بهێتە كرن».

بناڤێ خودێ مەزن و دلۆڤان

بناڤێ بنەمالا خودێ ژێ رازی (هاوژین محەمەد سەعید خورشید ئەرتوشی) سوپاسیەکا بێ سنۆر ئارستەی دام و دەزگەهێن لایەنێن حكومی، لەشكری، حزبی، زانا و مامۆستایێن ئایینی، ریهـ سپی و ماقویل و خەلکێ دەڤەرێ و هەمی كەسایەتیێن جڤاكی و پسمام و هەڤال و دۆستێن مە ژ دەرڤەی وەلاتی و ل دناڤا كوردستانێ چ ب ڕێكا نامە یان ب تەلەفۆنێ پشكداری د خەما مەدا كری.
سوپاس بۆ كەس و كارێن مە ژبۆ هەڤخەمی و ئەرک و زەحمەتا هەوە بری، چ د دەمێ ئینانا جەنازەیێ رەحمەتی یان د ڕێورەسمێن ڤەشارتنێ یان د رۆژانێن تازییێ دا.
هوین هەڤخەمێن مە بوینە و هەوە ئەڤ خەما مەزن ل سەر مە سڤك كر و خودێ خێرا هەر لایەكی بنڤیسیت، و جهێ رەحمەتی بەھشت بیت

إنا الله وانا الیه راجعون

ئاراز محەمەد سەعید خورشید ئەرتوشی

ژ پێش بنەمالا خودێ ژێ رازی ڤە

دهۆك، لەزگین جۆقی:

رێڤەبەرێ شوونوار و كەلەپوورێن پارێزگەها دهۆكێ راگەهاند، باژێڕەكێ دیرۆكی، كو دیرۆكا وی بۆ بەری 5000 هزار سالان ڤەدگەڕیت هاتە دیتن.
د. بێكەس بریفكانی، رێڤەبەرێ شوونوار و كەلەپوورێن پارێزگەها دهوكێ بۆ رۆژنامەیا ئەڤرۆ گۆت: «گۆڕستانەكا گرنگ ب رەخ ڤی باژێڕی ڤە هاتیە دیتن، هەژمارەكا مەزن یا گۆڕان د ناڤ دا هاتینە دیتن، هەتا 40 گۆڕانە و ب ئاخا قەلاندی هاتینە چێكرن، دیرۆكا وان بۆ سەردەمێ هلنستی – سلوقی ڤەدگەڕیتە سەدەیا سێیێ بەری زاینێ».
گۆتژی: «ئەڤ جهە سەر ب ناوچەداریا خانكێیە ل دەڤەرداریا سێمێلێ، ل نێزیك گوندێ خانكا كەڤنە بناڤێ (گرێ تەحسین لەگ لەگ)، هەمی گۆڕ بۆ مۆزەخانەیا دهۆكێ‌ یا نیشتمانی دێ‌ هێنە ڤەگوهاستن».

هەولێر، قائید میرۆ:

رێڤەبەرێ گشتیێ بازرگانی دیاركر، سوبەهی 1/9/2025 دوماهی رۆژە بۆ تۆماركرنا فۆرما ئەلكترۆنی و دێ قووناغا ئێكێ یا ئەلكترۆنیكرنا فۆرما خۆراكی ب دوماهی بهێت و دبێژیت: قووناغا دویێ یا ئەلكترۆنیكرنا فۆرما خوارنێ‌ بهێتە دەستپێكرن.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیاركر، پڕكرنا فۆرما ئەلكترۆنی یا ئاهێن خوارنێ دێ‌ كەڤیتە د قووناغا دویێ دا، رێكارێن وێ گوهۆڕین ب سەردا هێن و بیتە بپارە و گۆت: «هەتا نوكە ل سەرانسەری هەرێما كوردستانێ زێدەتری 86%ێ وەلاتیان خۆ تۆماركریە، هەر وەلاتیەكێ ناڤێ خۆ تۆمار نەكربیت هەتا نها دێ هێتە بێ بەهركرن ژ وەرگرتنا پشكا خوارنا هەیڤانە».
نەوزاد شێخ كامل گۆتژی: «قووناغا دویێ یا فۆرما ئەلكترۆنی دی بڕێڤەچیت، ئەو ژی ڤەگوهاستنا ناڤێ وەلاتیان و تۆماركرنا زارۆكێن هەتا نوكە نەهاتینە تۆماركرن، هەروەسا بەلاڤكرنا پشكا ئەرزاقی دێ بیتە ئەلكترۆنی و ئیدی شێوازێ بەرێ یێ كسلاسیك نامینیت، هەتا بریكار دێ ب رێیا ئەلكترۆنی لیستێن خۆ هنێرن و هەر كەسەكێ بۆ دەمێ دو هەیڤان ژی سەرەدانا بریكاری نەكەت دێ ئەرزاقێ‌ وی هێتە راگرتن».

ئامێدیێ، مەحمود نهێلی:

ل دەمێ سەرەدانا گەشتیاران بۆ نێزیك جهەكی ل كۆڕنیشێ رییێ شین، ل سنۆرێ ناوچەدارییا شێلادزێ، هەژمارەكا مینان هاتنە دیتن، ئەڤە ژی بوویە جهێ مەترسیێ بۆ وان كەسان یێن ب مەرەما گەشت و سەیرانان قەستا وێ دەڤەرێ دكەن.
رێگر بێسفكی، بەرپرسێ راگەهاندنا رێڤەبەریا گشتی یا كاروبارێن مینان ل دهوكێ بۆ رۆژناما ئەڤرۆ دیار كر، پشتی ئەو هاتینە ئاگەهدار كرن، ب هەبوونا مەترسیان ل گەلیێ بالندا، تیمێن وان ل جهێ دەستنیشانكری ئامادەبوون و دو مین ژ جۆرێن V69 و VS50، ل نێزیك كۆڕنیشێ‌ روویێ‌ شین بوون هاتنە راكرن و ژناڤبرن.
ناڤهاتی گۆت: «ژبۆ پشترابوونێ ژ سەلامەتیا وەلاتیان و ئەو خەلكێ قەستا وێ دەڤەرێ دكەت، هەروەسا كۆمپانیێن چێكرنا جادەیێ، نوكە تیمێن مە مژوولی لێگەڕیانێنە و ب هاریكاریا خودێ چو مەترسیێن مین و تەقەمەنیان ل وێ دەڤەرێ ناهێلین».