تیما كچێن یانەیا سەنحاریب بەردەوامە ل سەر ئاست و ئەنجامێن خوە یێن باش و پێنگاڤێن باش بەر ب دەستڤە ئینانا ناسناڤێ‌ وەرزێ‌ ئەڤ سالە یێ‌ قارەمانییا ئیراقێ‌، ئەوا نوكە هەڤڕكیێن قۆناغا دویێ‌ و دووماهیێ‌ ل سەر ئاستێ‌ یانەیێن ئیراقێ‌ هەولێرا پایتەخت مێڤاندارییا وێ‌ دكەت، قارەمانی ب پشكدارییا شەش یانەیێن ل هۆلا گرتییا یانەیا عەینكاوە دهێتە كرن.
پشتی بۆرینا سێ‌ رۆژان كچێن سەنحاریب سێ‌ یاری ئەنجامداینە و هەرسێ‌ یارییان ب سەركەڤتینە بەرانبەر یانەیێن، قەرەقووش(3-1) گێمان، بەرانبەر ئەمانەت بەغدا (3-چنە)، بەرانبەر دەربەندیخان (3-چنە)، بڕیارە ئەڤرۆ یارییا خوە یا چارێ‌ بەرانبەر كچێن یانەیا ئەفرۆدێت ل دەمژمێر (4:30) ئێڤاری بكەت، سوبەهی رۆژا ئەینی دێ‌ بەرانبەر خودانا ئەرد و جەماوەری و قارەمانا وەرزێ‌ بۆری یانەیا ئەكاد عەینكاوە ل دەمژمێر حەفتی شەڤ كەت.
ل دۆر دووماهی پێشهاتەیێن تیمێ‌ و ئەركێ‌ وان د یاریێن بهێت دا، ڕاهێنەر و سەرۆك یانە بۆچوونێن خوە بڤی شێویێ‌ بۆ رۆژنامەیا ئەڤرۆ دیاركرن.
داود رەبەن سەرۆكێ‌ یانەیا سەنحاریب گۆت: وەكو دیار تیما مە یا ڤۆلی بۆلێ‌ ئێكانە نوونەرا پارێزگەها دهۆكێ‌ یە د قارەمانیێ‌ دا، پشتی بۆرینا سێ‌ یارییان شیاینە ئەنجامێن سەركەڤتی بینن، مە دو یاری ماینە و هەموو هیڤی و ئارمانجێن مە بلندكرنا كۆپا ئیراقێ‌ یە و بۆ پارێزگەها دهۆكێ‌ ڤەگەرینن، قارەمانییەكا بهێزە و هەر شاش یانە هەڤڕكن تایبەت قەرەقووش، ئەكاد و یانەیا مە ژی، ژلایێ‌ ماددی و مەعنەوی ڤە هەر تشتەكێ‌ پێدڤی مە بۆ تیمێ‌ یێ‌ تەرخانكری، هیڤی خوازین بگەهینە ناسناڤی.
ژلایێ‌ خوەڤە د. هەكار بەرقی گۆت: ئەم یێن هاتینە هەولێرێ‌ بۆ هەڤڕكیێ‌ ل سەر ناسناڤی بكەین، هەرچەندە یانەیێن بهێز و هەڤركن هەنە و خودان یاریزانێن پیشەكار و زیرەكن، لێ‌ وەكو یانەیا سەنحاریب ژی هەتا دووماهی چركە دێ‌ شەڕی بۆ ناسناڤی كەین، بۆ مە گرنگ ئەوە د هەر یارییەكێ‌ دا ب سەركەڤین، ب كێمترین خەلەتی و باشترین شێوە مفایی وەربگرین، یاریێن بهێزتر ماینە لێ‌ من باوەری ب شیانێن یاریزانێن خوە هەنە ل دووڤ پلانێن مە و مۆرالا وان یا بلند دێ‌ سەركەڤین، مە دو یاریێن چارەنڤیس دگەل ئەكاد و ئەفرۆدێت ماینە و ڕژدین ب گەهینە ئارمانجا خوە، قۆناغەكا بهێزە و هەموو تیم دێ‌ شەڕی بۆ دەستڤەئینانا ناسناڤی كەن، ژبەركو هەروەسان گۆت: ئەم ئێكانە یانەیا دەڤەرا بەهدینان دناڤ قارەمانیێ‌ دا پشكدارین، بووینە ئێك ژ یانەیێن هەڤڕك، سۆپاسییا كارگێرییا یانەیێ‌ دكەم كو بەردەوام دۆڤچوونا تیمێ‌ دكەن و پشتەڤانێن ب هەر شێوەیەكی، سرۆشتییە هەر ڕاهێنەرەك هیڤیێن ناسناڤی هەبن، لێ‌ ئەم نە بتنێ‌ بۆ یانەیا خوە بەلكو بۆ دەڤەڕا بەهدیان شەڕی بۆ ناسناڤی دكەین.

هەرهین محەمەد:

داخویانییەكێ‌ دا دورەید جەمال دۆسكی ڕاهێنەرێ‌ یارییا مەلەڤانیان ل پارێزگەها دهۆكێ‌ بۆ رۆژنامەیا ئەڤرۆ گۆت: ئەڤ سالە من شەش خولێن مەلەڤانیان ڤەكرینە و بەردەوامم، گەلەك حەزدكەم خولان بۆ زارۆكێن د ژیێ‌ پێنچ سالی هەتا دەه سالی ڤەكەم تایبەت هەكە ئەوی وەرزش ژی كربیت دێ‌ زویكا فێر بیت، دشێم بێژم دپاشەرۆژێ‌ دا دوورنینە ببیتە یاریزانێ‌ مەلەڤانیان.
زێدەتر ژی گۆت: قارەمانی هاتینە ڤەكرن ژلایێ‌ هندەك كەسان و حەزكریە مەلەڤانگەها وان بهێتە بەرچاڤ بیت بۆ وان زارۆكان یێن هاتینە خولا وان و ئەوێ‌ قارەمانیێ‌ ژی دەنگ نەڤەدایە و هەموو پشكدارنەبووینە دبیت نەزانی بیت، یارییا مەلەڤانیا تایبەت مەندیا خوە هەیە، ل دهۆكێ‌ نەوەك هندەك یارییان یا بەرنیاسە، چونكو فدراسیۆن و جهێن شولەژێ‌ گرنگیی پێنادەن و دەستێ‌ وان دانینە و نەشێن تشتەكی بكەن، دبیت ئەو كەسێن ل فدراسیۆنا مەلەڤانیا ب رێڤەدبەن نە دئەكتیڤ بن، یان ژی چو تشت ددەستێ‌ وان دانینە بكەن دا ئەڤێ‌ یاریێ‌ پێشبێخن، ئەو یاریێن دی نموونە فوتبۆل گەلەك دسەرنجراكێشن بۆ خەلكی و پێڤە هاتینە گرێدان و جهێن شولەژێ‌ ژی چاڤێ‌ خوە دەنێ‌.
هەروەسان دورەیدی گۆت: گەلەك جاران من خول ڤەكرینە و زارۆكێن خودان شیان دگەل بووینە بتنێ‌ هەكە چاڤدان بوو هەبیت و بەردەوام دگەل مەبان و مەراهێنان پێ‌ كربان باوەردكەم دا هەڤركیا یاریزانێن ئیراقێ‌ كەن و دبیت بناڤێ‌ كوردستانێ‌ یان ئیراقی هاتبانە هەلبژارتن و چووبانە قارەمانیێن دەرڤە.

قەیس وەیس:

پشتی بۆ ماوەیێ‌ دو حەفتییان، بڕیارە تیما فوتبۆلا یانەیا دهۆك كەمپێ‌ خوە ل باژێرێ‌ پیرمام یێ‌ هەولێرا پایتەخت ب دووماهی بینت و دەست ب قووناغا دویێ‌ یا بەرهەڤیان ل یاریگەها خوە بكەت خوە بەرهەڤكرن بۆ وەرزێ‌ نوو یێ‌ خولا ستێرێن ئیراقێ‌ ئەوا بڕیارە ل 13ێ‌ ئەیلۆنا بهێت دەستپێبكەت، دیسان خوە بەرهەڤكرن بۆ سۆپەرا ئیراقێ‌ ئەوا دهێتە پێشبینیكرن دناڤبەرا پێنج بۆ هەشتێ‌ ئەیلۆنا بهێت دگەل یانەیا شورتە قارەمانا وەرزێ‌ بۆری بكەت.
ل دووڤ ژێدەرێن رۆژنامەڤانی یانەیا دهۆكێ‌ ڤەگەڕیانا ستێرێ‌ تیما خوە پیتەر گۆرگیس بۆ ناڤ رێزێن تیما خوە دا ڕاگەهاند، بڕیارە ل دەستپێكا حەفتییا بهێت دگەل پێشەكارێ‌ كۆتیڤۆاری یانیك زاكێری پشكداریێ‌ دناڤ ڕاهێنانێن تیمێ‌ دا بكەن و دهێتە پێشبینیكرن پێكهاتیێ‌ دهۆكێ‌ تەمام بیت، پشتی رێژەیا پێشەكارێن خوە گەهاندینە شەش یاریزانان.
ئەلهۆیێن چیا ب سەرپەرشتییا ڕاهێنەرێ‌ خوە یێ‌ بەرازیلی سێرجیو ڤاراس دێ‌ دوشەمبییا بهێت یارییەكا هەڤالینی ل یاریگەها خوە دگەل یانەیا هەولێر كەت، دبیت هەر ل حەفتییا بهێت یارییەكا دی دگەل یانەیەكا بەغدایی بكەت بەری دیدارا خوە یا سۆپەرا ئیراقێ‌ دگەل یانەیا شورتە، سەرباری هێشا ژڤانێ‌ دروست نە هاتییە دانان، لێ‌ دهێتە پێشبینیكرن دناڤبەرا پێنچ بۆ هەشتێ‌ ئەیلۆنا بهێت ل یاریگەها شەعب یان یا دهۆكێ‌ بهێتە كرن.

شاهۆ فەرید:

د دووماهی كۆمبوونا خوە دا كارگێرییا یانەیا شێلادزێ‌ چەند بڕیار و ڕاسپاردە دەركرن بەرهەڤی بۆ وەرزێ‌ نوو یا خول و قارەمانیێن كوردستانێ‌ و دووڤچوونا ژێرخانەیا وەرزشی.
كارگێرییا یانەیێ‌ ئاماژیی چەند پێنگاڤان كر كو دێ‌ دەستپێكەن ئەوژی دووڤچوون و بزاڤكرن ژبۆ ڕاكرنا سزایێن ل سەر یانەیێ‌ ئەوا ژلایێ‌ فدراسیۆنا فوتبۆلا كوردستانێ‌ هاتینە دەركرن كو وەرزێ‌ بهێت ئێدی جەماوەر ڤەگەریتە یاریگەهێ‌ و یاری ژ ل یاریگەها شێلادزێ‌ بهێتە كرن، بۆ وەرزێ‌ ئەڤ سالە تیما وان یا فوتسالێ‌ پشكداری د قارەمانیێن ل سەر ئاستێ‌ جودا یێن كچان ل پارێزگەها دهۆكێ‌ و كوردستانێ‌ بكەن.
ژ بڕێارێن هاتینە دەركرن تاقیكرن و ڤەكرنا قارەمانیێن یارییا ڤۆلی بۆلێ‌ ل ناڤەڕاستا مەها بهێت و قارەمانا شەترەنجێ‌ ل چرییا ئێكێ‌ یا بهێت ژبۆ دانانا پێكهاتیێن بهێز بۆ خول و قارەمانیێن داهاتی، دیسان ئیمزاكرنا گرێبەستێ‌ دگەل ئەوان یاریزانێن خودان شیان دناڤ ئەكادیمیا یانەیێ‌ دا، هەروەسان دێزاینكرنا درێسێ‌ تیما فوتبۆلێ‌ بۆ وەرزێ‌ نوو و دەستنیشانكرنا جهەكی بۆ فرۆتنێ‌.
ژلایەكێ‌ دووڤە دیار كر بۆ زانین و دووماهی پێشهاتیێن بڕێڤەچوونا كارێ‌ دروستكرنا یاریگەها یانەیێ‌ دووڤچوون بەردەوام بیت و زێدەتر چاڤدێری بهێتە كرن.

عەلی حاجی:

د داخویانیەکێ دا سکرتێرێ یانەیا زاخۆ یا وەرزشی بۆ رۆژنامەیا ئەڤرۆ دیار کر ب ئەو دێ یارییەکا هەڤالینی ل هەولێرا پایتەخت ئەنجامدەن و پاشی بەرەڤ کەمپەکێ ڕاهێنانێ ڤە چن ل وەلاتێ تورکیا.
زێدەتر هشیار شەهباز گۆت: بۆ ماوەیەکە تیما مە ژ بۆ وەرزێ نوو یێ کوپا کەنداڤی و خولا ستێرێن ئیراقێ و قارەمانیێن داهاتی دەست ب یەکەیێن ڕاهێنانێ کرینە، هەتا ڕادەیەکێ هندەک گوهۆڕین دناڤ تیما مە دا پەیدا بووینە لێ مە شیایە هژمارەکا باش ژ یاریزانێن خوە یێن وەرزێ بوری د ناڤ تیما خوە دا بهێلین، تیما مە پێدڤی ب دەمەکێ دەست نیشان کری هەیە بۆ هندێ یە کو تیما مە پتر لێک تێگەهشتن پەیدا بیت و ڕاهێنەرێ مە بشێت پلانێن خوە ل سەر یاریزانان بجهـ بینیت، ئەڤرۆ رۆژا پێنچ شەمبی ل هەولێرا پایتەخت دێ یارییەکا هەڤالینی ئەنجامدەین و پاشی دێ بەر ب وەلاتێ تورکیا ڤە چین بۆ دانانا کەمپەکێ ڕاهێنانێ ئەوا دهێتە پێشبینیکرن بۆ ماوەیێ هەشت رۆژان بەردەوامبیت تێدا دێ ئەنجامدانا چەند یارییەکێن هەڤالینی هەبن.
ل دووماهیێ گۆت ژی: کەمپێ مە دێ ل باژێرێ ئیستانبولێ بیت و دێ هەولدەین دو هەتا سێ یاریێن هەڤالینی ژی ل وی کەمپێ ڕاهێنانێ دا ئەنجام بدەین ژبەرکو مە پێدڤییەکا مەزن ب یاریێن هەڤالینی هەیە.
بۆ زانین تیما یانەیا زاخۆ وەکو نوونەرا ئیراقێ و کوردستانێ دێ پشکداریێ د کۆپا کەنداڤی دا کەت ئەوا بڕیارە هەڤرکیێن وێ ب پشکدارییا هەشت یانەیێن کەنداڤی ل دووماهییا مەها بهێت ب شێوەیێ دو کۆم هاتنووچوون بکەت.