هەڤسەرۆکێ دەم پارتی دیار دکەت، سەرۆک مەسعود بارزانی رۆلەک سەرەکی گێرا و پشتەڤانیا وی وەسا کر رێککەفتنا ڤێ دووماهیێ د ناڤبەرا شامێ و هەسەدێ دا بهێتە ئیمزا کرن، رۆلێ سەرۆک بارزانی گەلەک مەزن بوو و سوپاسیا سەرۆک بارزانی دکەین.
تونجەر باکرهان هەڤسەرۆکێ دەم پارتی ل باژێرێ ئامەدێ د خوەنیشادانەکێ دا کو ژ بۆ پشتەڤانیا رۆژئاڤایێ کوردستانێ هاتبوو ساز کرن ئاخڤی و دیار کر، ئێرشێن گەلەک مەزن ل سەر گەلێ کورد ل رۆژئاڤایێ کوردستانێ هەنە، چەکدارێن داعشێ ب پشتەڤانیا شامێ و تورکیا دخواستن دەستکەفتیێن گەلێ کورد ل سووریێ ژناڤ ببەن، کوردان ل هەموو جیهانێ ل هەمبەر ئێرشێن چەکدارێن جۆلانی و داعشێ دەست ب خوەنیشادانێن مەزن کرن، براستی ژی کوردان کارەک گەلەک مەزن کر و بۆ هەموو جیهانێ سەلماندن کو کورد ل هەر جهەکێ بن برایێن هەڤدو نە و دێ پشتا هەڤدو گرن و گۆت: (هێزێن پاشکەفتی ب پشتەڤانیا تورکیا ب هەموو شیانێن خوە ئێرشی کوردان ل سووریێ کرن، وان دڤێت جارەکا دی کورد بێ ماف بمینن، وان دڤێت کورد بندەست بن و نەگەهنە مافێن خوە، لێ کوردان ل هەموو جیهانێ پشتەڤانیا رۆژئاڤایێ کوردستانێ کرن، ئەو یەک کاریگەریەکا خوە یا گەلەک مەزن ل سەر هەلوەستێ وەلاتێن جیهانێ هەبوو و ژ بەر ڤێ یەکێ ژی رێککەفتنا ڤێ دووماهیێ د ناڤبەرا هەسەدێ و شامێ دا هاتە ئیمزا کرن).
هەڤسەرۆکێ دەم پارتی ئەو یەک ژی دیار کر، سەرۆک مەسعود بارزانی رۆلەک سەرەکی گێرا، پشتەڤانیا سەرۆک بارزانی یا بۆ رۆژئاڤایێ کوردستانێ وەسا کر پیلانێن ل دژی کوردان سەر نەگرن، خەلکێ مە ل هەرێما کوردستانێ ژی پشتەڤانیا برایێن خوە کرن، براستی ژی یا ل هەرێما کوردستانێ هاتە کرن کارەک گەلەک مەزن و دیرۆکی بوو و گۆت: (ئەم سوپاسیا سەرۆک بارزانی دکەین، رۆلێ جەنابێ وی بۆ پشتەڤانیا رۆژئاڤایێ کوردستانێ رۆلەک مەزن و دیرۆکی بوو، هەروەسا ئەم سوپاسیا خەلکێ خوە ل هەرێما کوردستانێ ژی دکەین کو ب هەموو رەنگەکێ پشتەڤانیا خووشک و برایێن خوە ل رۆژئاڤایێ کوردستانێ کرن و ئەو ب تنێ نەهێلان).
ناڤهاتی د دووماهیا ئاخڤتنا خوە دا ئاماژە ب ڤێ یەکێ ژی کر، ئێدی کەس نەشێت کوردان بێ ماف بهێلیت، کوردان دڤێت ل رۆژهەلاتا ناڤین ب ئازادی بژین و بگەهنە مافێن خوە، سەردەمێ خاپاندنا و زۆرداریا ل سەر کوردان ب دووماهی هاتیە، ئەڤرۆکە کورد بهێزن و پتر ژ هەر دەمەکێ ژی ئێکگرتی نە و مە د خوەنیشادانێن ژ بۆ رۆژئاڤایێ کوردستانێ دا دیت کا کورد چەند هشیارن، دڤێت ئێدی تورکیا و وەلاتێن دی یێن رۆژهەلاتا ناڤین رێزێ ل داخوازیێن کوردان بگرن و دەست ژ سیاسەتا خوە یا بەرێ ل هەمبەر کوردان بەردەن.
نيشاندان