دوهی ل بارەگایێ‌ خوە د. عەلی تەتەر پارێزگارێ‌ دهۆكێ‌ كۆمبوونەكا بەرفرەهـ دگەل بەرپرسێن وەرزشی و ئێمناهیێ‌ ل دهۆكێ‌ كر ب ئامادەبوونا چیایی تەیموور پەرلەمانتارێ‌ ئیراقێ‌ و د. ئەحمەد قاسم سەرۆكێ‌ لژنەیا ئۆلمپی تایێ‌ دهۆكێ‌ و د. عەبدوللا سەرۆكێ‌ یانەیا دهۆكێ‌، تەوەرێ‌ سەرەكی یێ‌ كۆمبوونێ‌ ڕێكخستن و پاراستنا ئێنماهیێ‌ دناڤ یاریگەهێ‌ دا و ڕێكارێن بەرهنگاربوونێ‌ بەرانبەر هەر توندوتیژیەكێ‌ بەری دەستپێكرنا وەرزێ‌ نوو و كۆپا سۆپەرا ئیراقێ‌ بهێتە كرن.
د كۆمبوونێ‌ دا پارێزگارێ‌ دهۆكێ‌ پیرۆزباهییا یانە و جەماوەرێ‌ دهۆكێ‌ كر پشتی ناسناڤێن كۆپا ئیراقێ‌ و كۆپا كەنداڤی ب دەستڤە ئینایی و دیاركر ل رۆژێن بهێت دا دێ‌ یاریێن سۆپەرا ئیراقێ‌ ل دهۆكێ‌ هێتە كرن، و خواست هەموو لایەن د هەڤكاربن و ڕێنمایێن ئەمنی ژبۆ پاراستنا ئەنجامدانا قارەمانیێ‌ ل بەرچاڤ وەربگرن و هەموو یاری ب گیانەكێ‌ وەرزشی و ڤیان و دور ژ توندوتیژیێ‌ بهێتە كرن و روویێ‌ شارستانی یێ‌ وەرزشێ‌ ل پارێزگەهێ‌ بهێتە نیشان دان، دووڤدا دانۆستاندن ژلایێ‌ بەرهەڤبوویان هاتە كرن و بڕیار و ڕێنمایێن گشتی ل دور ڕێكخستن و بەرهەڤكرنا یاریگەهان هاتنە دەركرن.
كۆنگرەیێ‌ رۆژنامەڤانی بابەت ب تەسەلی هاتە بەحسكرن.
پشتی ب دووماهی هاتنا كۆمبوونا تایبەت، د. عەلی تەتەر پارێزگارێ‌ دهۆكێ‌ كۆنگرەیێ‌ رۆژنامەڤانی ئەنجامدا و بڤی شێوەیی ب تەسەلی گەلەك بابەت هاتنە بەحسكرن.
د بەراهییا ئاخڤتنا خوە دا ناڤهاتی بۆ دەزگەهێن رۆژنامەڤانی گۆت: ل دەستپێكێ‌ دڤێت ئەم ژبیرنەكەین پیرۆزباهییا یانەیا دهۆكێ‌ بكەین ب دەستڤەئینانا دو ناسناڤێن دیرۆكی، كۆپا ئیراقێ‌ و كۆپا كەنداڤی و مخابنییا خوە دیار كر كو یانەیا دهۆك نەشیا بچیتە كۆپا ئاسیا و گۆت: هەكە ژبەر چ ئەگەر بیت مخابن یانەیا دهۆك نەچوو كۆپا ئاسیا ژبەر ئەگەرەكێ‌ تەكنیكی چ پشتگۆههاڤێتن ژ مە بوویە یان ژی فدراسیۆنا فوتبۆلا ئیراقێ‌ بوویە یان ژ هەر كەسەك
هەروەسان ناڤهاتی گۆت: بابەتێ‌ دویێ‌ ل سەر ئەوان سزایێن فدراسیۆنا فوتبۆلا ئیراقێ‌ ل سەر هەردو یانەیێن دهۆك و زاخۆ هاتییە سەپاندن، دەمەكێ‌ درێژە كار ل سەر دهێتە كرن دگەل بەرپرسێن ئیراقی كو ئەڤ سزایێن گران بهێنە سڤكرن، هەر كەسەكێ‌ توندتیژی كربیت ڤەگۆلین ل سەر دهێتە كرن و دادگەهـ ژی دووڤچوونێ‌ دكەت، ئەم داخوازێ‌ ژ پشتەڤانان دكەین ئەو ببنە نوونەرێن باژێرێ‌ خوە و رەوشتێ‌ جوان یێ‌ باژێرێ‌ خوە بكەن، ئەم خەلكەكین حەزژ تەناهیێ‌ و ڕێزگرتنێ‌ وپێگیریێ‌ ب یاسا و ڕێنمایان دكەین، لەوما ژی پشتەڤانێن مە قەبوولنەكەت ژ ئەوان كەسێن توندوتیژیێ‌ دكەن، دێ‌ كامیرەیێن چاڤدێری زێدەتر هێنە دانان و دامۆدەزگەهێن ئەمنیی دێ‌ دناڤ پشتەڤانان دابن بۆ دەستنیشانكرنا ئەڤان كەسان، قووناغا ئێكێ‌ سۆزنامە هێتە وەرگرتن، هەكە دوبارەبوو دێ‌ ژ یاریگەهان هێنە قەدەغەكرن و دبیت بهێنە دادگەهكرن لدووڤ یاسایی بهێنە سزادان، هیڤیدارین جوانیی ورەوشتێ‌ پارێزگەها خوە پارێزن و شانازیێ‌ دبەین مە پارێزگەها ئێمناهی و ڕێزگرتن یا هەی.
هەروەسان ناڤهاتی گۆت: ئەم یێ‌ بەرهەڤییان بۆ وەرزێ‌ نوو دكەین ب هیڤییا خودێ‌ یانەیا دهۆك بشێت بەردەوامبیێ‌ بدەتە سەركەڤتنا، بێگۆمان ئەڤ سەركەڤتنە بپشتەڤانییا ڤی جەماوەر بوویە و ئێكەم جارە بڤی شێوەیی مەزن جەماوەر بەرهەڤی یاریگەها دبیت و ئەم سۆپاسییا خەلكێ‌ پارێزگەها دهۆكێ‌ دكەین و شانازیێ‌ پێ‌ دبەین كو جەماوەرێ‌ دهۆك و زاخۆ ب تنێ‌ هندی جەماوەرێ‌ ئیراقێ‌ هەمیێ‌ بوویە، هیڤییا مە ئەوە پێگیریەكا زێدەتر ب ڕێنمایان بهێتە كرن.
ژلایەكێ‌ دی یێ‌ گۆنگرەیێ‌ خوە رۆژنامەڤانی دا ناڤهاتی گۆت: دناڤا وەرزشێ‌ دا كاچەوا سەركەڤتنا پێخوەش دبین ل خوسارەتییان ژی توورەدبیت، لێ‌ ڕامانا وێ‌ نینە كارڤەدانەكا نەجوان نیشانبدەت، داخوازێ‌ ژ یانەیێن دیتر دكەین خوە ژ نڤێسارێن رەكەزپەرسیێ‌ و سۆكایتكرنێ‌ دووربێخن، چنكو وەرزش دوستایەتی و حەزژیكرن و بەرز بلندكرنا پەرنسیپێت مرۆڤایەتیێ نە، ل دووماهیێ‌ فەرە بێژم سۆپاسیەكا بێ‌ سنۆر ئاراستەیی بەرێز مەسرۆر بارزانی سەرۆكێ‌ حوكمەتا هەرێما كوردستانێ‌ بكەم كو تەخسیری د پشتەڤانییا خوە دا نەكر و ئەو ئەگەرەكێ‌ سەرەكی یێ‌ ب دەستڤەئینانا یانەیا دهۆك ب هەردو ناسناڤێن ئیراقێ‌ و كەنداڤی بوویە ئەو بوو ئەگەر ئەم پشتەڤانییا یانەیا دهۆكێ‌ بكەین، هیڤیدارین ئێدی ئەو گۆتنێن نە شرین دناڤبەرا پشتەڤانان نە هێتە گۆتن و ڕێزێ‌ ل ئێكودو و هەر یانەیەكێ‌ بگرن.
وەرگرتنا پسیاران ژ رۆژنامەڤانان
ل دووماهیێ‌ دەرگەهێ‌ دانۆستاندنێ‌ دگەل رۆژنامەڤانا هاتە ڤەكرن بۆ وەرگرتنا پسیاران و بەرسڤدانێ‌، ژ گرنگترین بەرسڤێن د. عەلی تەتەر پارێزگارێ‌ دهۆكێ‌ بڤی شێوەیی بوو، هیڤییا مە ئەوە هەردەمێ‌ سزایەك هەبیت بۆ هەردو لایان هەبیت بۆ نموونە هەكەر یاریزانەكی یا ڕاهێنەرەكی كارەكێ‌ نە یاسایی پەیداكر و هاتە سزادان و هەمان دەمدا یاریزان یان ڕاهێنەرێ‌ تیما ك دی هەمان كاركرییە ئەوژی ب هەمان سزا بهێتە سزادان، هیڤییا مە ئەوە چاڤێ‌ ئێكسانەیێ‌ و چارچووڤەیێ‌ ڕێنمایان ئەوێن ل ئیراقێ‌ هەبن.
ل هەموو دونیایێ‌ ناكۆكی و شەڕ دچێدبن، لێ‌ نابیت بگەهیتە وێ‌ ڕادەیی توندوتیژی مەزنتر بیت و ئاریشە مەزنتربن، وەكو پارێزگەها دهۆكێ‌ كو ئیدارا دهۆك و ئیدارا سەربەخۆ یا زاخۆ كارەكێ‌ باش دكەین كون اهێلین ئێدی ئەڤ توندتیژییە بهێنە كرن و مەزنتر لێبن.
هەروەسان گۆت: یانەیا دهۆك پێدڤی ب یاریگەهەكا مەزن هەنە و گەنگەشە ل سەر دهێتە كرن و جهەكێ‌ باشتر و گونجایتر ل باژێرێ‌ دهۆكێ‌ بهێتە دروستكرن و ئەوژی یا دپلانێن مە دا، وەكو دیار ژی مە پرۆژەیێن مەزن و ئیستراتیژی نە یێن ئاڤادانیێ‌ ل پارێزگەهێ‌ یێن دهێنە كرن كو ل سەر ئاستێ‌ هەموو ناحییە و قەزایێن پارێزگەهێ‌، لێ‌ پرۆژەیێ‌ یاریگەهێ‌ د پلاندایە دێ‌ هێتە دروستكرن، یانەیا دهۆك یا بوویە هەموو لایەن، نەتەوە، ئاین، بچووك و مەزن و نە ب تنێ‌ ل پارێزگەهێ‌ بەلكو كوردستانێ‌ و دەرڤەیی ئیراقێ‌ ژی.
هەروەسان گۆت: بەری چەندەكێ‌ ئەم دگەل بایلۆزا وەلاتێ‌ ئسپانیا ل كوردستانێ‌ كۆمبووین، مە بەحسی سەركەڤتنێن دهۆكێ‌ كربوو، ب حكمێ‌ هندێ‌ كو دەستەیەكا لالیگا یا ئسپانی ل بەغدایە، لەوما ژی مە خواست پشتەڤانییا هەردو یانەیێن دهۆك و زاخۆ بكەت، نامە بوومە هنارتییە و ئەو هاریكارن، لێ‌ لڤێری هەردو یانە دێ‌ چەوا شێن مفایی ژێ‌ وەرگرن و بابەتی بكەنە د بەرژوەندییا یانەیێن خوەدا.

عەلی حاجی:

د داخویانیەکێ دا کاپتنێ یانەیا زاخۆ بۆ رۆژنامەیا ئەڤرۆ دیار کر بۆ سالا سێیێ یە ئەو گرێبەستا دگەل یانەیا زاخۆ نوو دکەت و زاخۆ د قوناغەکا دیرۆکی دا دەرباز دبیت.
زێدەتر ئەمجەد عەتوان گۆت: دەما یانەیا زاخۆ گرێبەستا خوە پێشکێشی من کری بۆ وەرزێ سیێ ل دویف ئێک بۆ من نە هند تشتەکێ ب زەحمەت بوو و من پێدڤی ب دەمی نەبوو هەتا ئەز بریارا خوە بدەم بەلکو هەر ئێکسەر من بریارا خوە دا گرێبەستا خوە نوو بکەم وئەز گەلەک مرتاح دگەل یانەیا زاخۆ و سەرەدەریا خەلکێ وێ ژی گەلەک یا تایبەتە،پرۆژەیێ یانەیا زاخۆ ژ پرۆژەیێن گەلەک باشە و هەتا نوکە وی پرۆژەیی سەرکەڤتنەکا باش یا ئینایی،بۆ وەرزێ ئەڤ سالە ژی زاخۆ د قوناغەکا مێژوویی دا دەرباز دبیت و نابیت ئەم وەرزێ ئەڤ سالە بێ ناسناڤ ب دوماهی بینین لێ ژبیر نەکەین ژی ئەرکێ مە گەلەک یێ ب زەحمەتە،مە باوەرییەکا باش ب تیما خوە هەیە کو دێ شێت ئاستەکێ باش پێشکێش بکەت.
ناڤبری گۆت ژی: هەتا ڕادەیەکێ گوهۆڕین کەڤتینە د تیما مە دا لێ یا گرنگ ئەوە هەماهەنگیەکا باش دناڤبەرا یاریزانان دا پەیدا ببیت ژبەرکو خول یێ نێزیک دبیت و پێدڤیە ئەم ب هێز دەست ب وەرزێ نوو یێ خولێ بکەین.

یانەیا ناپۆلی یا ئیتالی تووشی دربەكێ‌ مەزن بەری دەستپێكرنا وەرزێ‌ نوو یا خولا ئیتالی پشتی ب فەرمی هاتییە ڕاگەهاندن هێرشبەرێ‌ وێ‌ یێ‌ بەلجیكی رۆمێلۆ لۆكاكۆ تووشی هنگاڤتنەكا مەزن یا پێ خوە بوویە و دێ‌ بۆ سێ‌ مەها دووركەڤیت ژ یاریگەهان.
ئەڤ دەنگۆباسە یانە و پشتەڤانێن ناپۆلی بێ‌ زاركرینە بوویە ئەگەر نەچاربن ل پێكگۆرەكی پەیدابكەن، ل دووڤ رۆژنامەیا كۆرێری دێلۆ سپۆرت یا ئیتالی یانەیا ناپۆلی دەست ب دانۆستاندنان كرییە و هەر ئێك ژ یێ‌ هۆلەندی جواشوا زێركزی، یێ‌ فرەنسی جان فلیپ ماتا و یێ‌ ئوكراینی ئارتیم دۆڤبێك و یێ‌ مۆنتێنێگرۆ نیكۆلا كرێستۆڤێچ بەربژارێن بهێزن و دوور نینە هەر ئەڤرۆ ناڤەك بهێتە ڕاگەهاندن.

یێ‌ ئسپانی پێب گواردیۆلا ڕاهێنەرێ‌ یانەیا مانچستەر یۆنایتد یا ئنگلتەرایێ‌ پەستا یاریزانێ‌ خوە یێ‌ نوو یێ‌ هولەندی تیجانی ڕایندرزی كر، پشتی د ئێكەم یارییا ژ خولا ئنگلتەرایێ‌ ب چار گۆلێن پاقژ سەركەڤتن لسەر وولفەر هامبتۆن ئینایی و هاتنا وی ب چارەكرنا ئاریشەیەكێ‌ دناڤ تیمێ‌ دا دیاركرن.
د كۆنگرەیەكێ‌ رۆژنامەڤانی دا گواردیۆلایی گۆت: ل دەستپێكێ‌ ئینانا یاریزان ڕایندرز بۆ ناڤ ڕێزێن تیمێ‌ ئەوبوو جهێ‌ دی برۆینی بگریت، ژبەركو چوونا وی ئاریشەیەك بۆ مە پەیدا كر، د یارییا ئێكێ‌ دا دیاربوو كو ئەوی ئەو ئاریشە چارەسەركر، گۆلەك تۆماركر و ئێك بۆ هەڤالێ‌ خوە چێكر، یا گرنگ گۆنجاندنا وی دگەل تیمێ‌ و شیانێن دناڤبەرا هێرشبەریێ‌ و هێلا بەرەڤانیێ‌ بوویە.