زنار تۆڤی:
سترانبێژ (بەدیل ئیبراهیم) د دیدارەكێ دا بۆ رۆژنامەیا ئەڤرۆ گۆت: د ژیەكێ بچووكدا بەهرەیا دەنگخۆشیێ ل دەف من هەبوو، ل قوتابخانێ مامۆستایەكێ من دڤیا من ببەتە ئیستانبولێ، داكو ببمە سترانبێژ، بەلێ بابێ من نەهێلا بچم و گۆتە ل وێرێ دێ رێیا خۆ بەرزەكەیی، ئەو كارەكێ باشبوو بابێ من كری، چونكی دبیت، نوكە ئەز ببامە سترانبێژەكێ تورك.
ناڤهاتی گۆت: دەمەكە ب خێزانڤە ل ئورۆپا دژیم، ژبەركو ل ئورۆپا پتر دەلیڤە بۆ من چێبوو، كو خزمەتا هونەرێ كوردی بكەم، چونكی ل توركیا مۆزیكا كوردی یا قەدەغە بوو، هەروەسا ل ئەلمانیا من كاسێتا خۆ یا ئێكێ تۆماركر و ب سترانا سالێ هاتمە نیاسین، دیسان ئێك ژ ئێستگەهێن سەرنجراكێش یێن ژیانا من یا هونەری، پشكدارییا من بوو د بەرنامێ بەهرەمەندان “X-Factor” یێ ئەلمانی، كو رۆژەكێ سپێدێ زوو تەلەفۆنەك بۆ من هات و گۆتە من، ئەم ژ ئێكس فاكتەرین ل ئینتەرنێتێ مە كارێن تە دیتینە و مە دڤێت پشكداربی، من ژی ب مەرەما ناساندنا كلتۆر و هونەرێ كوردی بۆ ئورۆپیان پشكداری تێدا كر، ئەز سەركەفتم هەتا گەهشتیمە قووناغا پێنجێ و من ستران ب كوردی د گۆتن، كارڤەدانا خەلكێ و لژنا دادوەران یا ئەرێنی بوو، دەمێ من ستران ب كوردی دگۆتن بینەرێن ئەلمانی رادبوونە ژ پێرڤە و دەست بۆ من دقۆتان.
ناڤهاتی، شەش ئەلبۆمێن سترانان هەنە، هژمارەكا سترانێن تاك ژی هەنە، بزاڤ كرینە زارۆیێن وی ژی سترانان بێژن، كچەكا وی د كلیپەكا وی دا سترانان ل گەل دبێژیت، كوڕێ وی ژی هۆزان د بۆارێ هونەری دا كاردكەت.
نيشاندان