تیما باسکێت بۆلا یانەیا دهۆکێ ڤەگەڕیا خولا پیشەکارێن ئیراقێ پشتی دوورکەڤتنەکا درێژ ژبەر کاودانێن دارایی و ئەڤچارە ب خوون گەرمێن گەنجێن باژێرێ خوە و کادرێ ڕاهێنانێ یێ نافخۆ دلێ جەماوەرێ خوە یێ ڤێ یاریێ خۆشتر بکەن، پشتی شیایین ڕێزا ئێکێ بهێن و ببنە قارەمانێن خولا پلا ئێک، ب سەرکەڤن ل سەر یانەیا ئەلنعمانیە ب ئەنجامێ 93- 42 خالان، د یارییا فینالێ دا ئەوا دوهی ل هۆلا گرتییا یانەیا دهۆکێ هاتیە کرن.
محەمەد حسێن کاروانێ خۆ ب دووماهی ئینا
د ڕێورەسمێن ڤێ یاریێ دا دادڤانێ نێڤدەولەتی کوڕێ باژێرێ دهۆکێ محەمەد حسێن ب فەرمی کارۆانێ خوە یێ دادڤانیێ ب دووماهی ئینا پشتی ٢٢ سالێن خزمەتێ و دادڤانیێ ل سەر ئاستێ یاریێن خولێن کوردستانێ، ئیراقێ و رۆژئاڤا ئاسیا، محەمەد حسێن خودانێ خەباتەکا درێژ د دادڤانییا باسکێت بۆلێ دا د ٢٢ سالێن بۆری دا دادڤان بوویە ل خولێن ئیراقێ و کوردستانێ، هەروەسان د چار قارەمانێن جودا یێن رۆژئاڤا ئاسیا دادڤانی کرییە دیسان دادڤانێ سەر مێزێ بوویە ئەوێ دەستپێکا وی ل سالا ٢٠٠٤ێ بوو کو ژ خولا پلا سێیێ دەستپێکرییە، ل سالا ٢٠١٢ێ شارا نێڤدەولەتی وەرگرتبوو، ل سالا ٢٠٢٠ێ شارا نێڤدەولەتی یا دادڤانێ سەر مێزێ بدەستڤە ئینابوو.
لدۆر ڤێ دەستکەفتێ د داخویانیەکێ دا. عەبدوللا جەلال سەرۆکێ یانەیا دهۆکێ گۆت: سۆپاس بۆ خودێ تیما مە ڤەگەڕیا جهێ خوە یێ دروست پێخوەشحالم بڤێ تیمێ و ڤەگەڕیانەکا جودایە ژبەرکو هەموو یاریزان کوڕێن باژێرێ دهۆکێ نە و ئەڤە گەلەک یا گرنگە، ئەڤ تیمە ل سەر دەستێ کاپتن میقداد ڕەعدی ئەڤە بۆ ماوەیێ نێزیکی پێنج سالانە کار ل سەر ڤان گەنجان کریە و خوە بەخش بۆ ماوەیەکێ درێژ بەردەوامبوویە، پشتی ماندیبوونەکا بەرچاڤ شیا بگەهینە ئاستەکێ باش و پشکدارییەکا سەرفەراز بکەن و بگەهنە خولا نایابا ئیراقێ.
هەروەسان ناڤهاتی گۆت: بۆ وەرزێ بهێت گەشبینین پشکدارییەکا باش و بهێز بکەین، وەکو دیارە ژی یانەیا دهۆک خودانا پێنج ناسناڤێن خولا ئیراقێ یە و سێ کۆپا یێن ئیراقێ ب دەستڤە ئینایە دگەل ڕێزا سێیێ یا ئاسیا، ب ئانەهیا خودێ بۆ سالا بهێت پلانەکا باش هەبیت دێ تیمەکا بهێز دروستکەین، دەستخوەشیێ ل کادرێ ڕاهێنانێ دکەین کو سۆزا خوە بجهئینایی لدووڤ ئەوا گۆتی ئەوان باوەری ب خوە هەبوو بێ کو هیچ یاریزانەکی ژ دەرڤە بینیت پشتگەرمی ب کوڕێن باژێری خۆ کریە.
ژلایەکێ دووڤە ناڤهانی گۆت: بۆ وەرزێ بهێت دێ کۆمبوونەکا بەرفرەهـ ل گەل شارەزا و کەسانێن پسپۆر د ڤێ یاریێ دا کەین پێخەمەت چاوانییا باشترین شێوە خۆ بەرهەڤبکەین، یا گرنگتر ژی بۆ مە نووژەنکرنا هۆلا باسکێت بۆلێ یە ئەوا کار ل سەر چێکرنا وێ بنیڤا ڕێکێ مایە، ب هاریکارییا حکومەتا هەرێما کوردستانێ بهیڤینە ئەڤێ هۆلێ تمامبکەین، وەکو دیار د فوتبۆلێ دا جەماوەرێ یانەیا دهۆکێ ئێکەمە، هەکە ئەڤ هۆلە ژی بهێتە دروستکرن بێگۆمان دێ د ڤێ یاریێ ژی دا جەمتاوەرێ مە ئێکەم بیت.
ژلایێ خوەڤە میقداد ڕەعەد ڕاهێنەرێ تیما باسکێت بۆلا گۆت: بەری چار سالان مە ئەڤ بابەتە و سۆز دابوو کو دێ تیمەکا باش بەرهەڤکەین بۆ چار سالێن بهێت کو بشێت ڤەگەڕیتە جهێ خوە یێ دروست کو ئەم پێنگاڤەکێ پاڤێژیت پێشتر چو جاران نە هاتیە کرن کو پارەیەکێ خەیالی د هاتە مەزاختن، گەلەک ڕەخنە و ئاخڤتن ژی هەبوو، لێ مە کارێ خۆ دکر و هەموو بزاڤ دکر و نەهێلا ئەو کارتیکرن ل سەر یاریزانان بهێتە کرن، هەروەسان پشتەڤانییا کارگێریێ مە بەردەوامی دا پلانا خوە، سەرباری هندەک جاران مە شکەستن دئینا لێ ئەم نە ڕاوەستیاین لێ دناڤەرۆکێ دا مە گەشەیەکا دی و پلانەکا دیتر هەبوو هەتا گەهشتییە وێ ڕادەیی.
هەروەسان گۆت: مە زەحمەتەکا مەزن بر لێ بهێنفرەهیەکا مەزنتر هەبوو و پێکڤە کارەکرن و هەڤکاری هەبوو، خولا پلا ئێک ب پشکدارییا چەند یانەیێن بهێز و خودان ناڤ ل سەر ئاستێ ئیراقێ و ئیراقێ نە و نوونەرێن چەند باژێرانە، سۆپاس بۆ خۆدێ ئەم گەهشتینە ئارمانجا خوە دەربازبووینە پلا نایابا ئیراقێ، دەستخوەش بۆ هەموو یاریزانان و سۆپاس بۆ کارگێرییا یانەیێ و جەماوەرێ پشتەڤان.
بۆ زانین دڤێ خولێ دا ١٣ یانەیێن ئیراقی و کوردستانی پشکداری کربوون، هاتبوونە بەلاڤکرن ل سەر چار کۆمان یاریێن وان ب شێوەیێ خول ئێک قووناغ دهاتنە کرن، هەردو یانەیێن دهۆک و ئەلنعمانییە دەربازبوونا خوە مسۆگەر کرییە، ژلایەکێ دووڤە فدراسیۆنا باسکێت بۆلا ئیراقێ دێ بڕیارێ ل سەردو یان ئێک ژ ئەوان یانەیێ هاتینە چارگۆشەیا زێرین دەن یانەیا ئاسۆ و ئەلتەزامن، ژبۆ ئێکلاکرنا هژمارەیا دەربازبوویان دناڤبەرا سێ بۆ چار یانەیان.
باسکێت بۆلا دهۆکێ ڤەگەڕیا خولا پیشەکارێن ئیراقێ
نيشاندان