سەرۆكاتییا هەرێما كوردستانێ د بەیاننامەیەكێ دا ب توندی ئەو هێرشێن درۆنی پرۆتەستۆ كرن ئەوێن بۆریێن نەفتێ یێن ستراتیژی «ڕۆژهەلات بۆ ڕۆژئاڤا» سعودیێ كرینە ئارمانج، كو ب گۆتنا ریاز، ئەو هێرش ژ ئاخا ئیراقێ ڤە هاتینە ئەنجامدان.
د بەیاننامەیا سەرۆكاتییا هەرێما كوردستانێ دا هاتییە»پشتەڤانییا خوە یا تەمام ل گەل سعودیێ ڕادگەهینین و دوپاتیێ ل سەر وێ چەندێ دكەین كو نابیت ئاخا ئیراقێ بۆ هێرشكرنێ ل سەر وەلاتێن دەوروبەر بهێتە بكارهینان».
هەروەسا سەرۆكاتییا هەرێما كوردستانێ د بەیاننامەیا خوە دا پشتەڤانییا خوە بۆ ڤەكۆلینێن حوكمەتا فیدرالی یا ئیراقێ دیار كرییە ژ بۆ ئاشكراكرنا ئەنجامدەرێن وێ هێرشێ.
د دووماهیێ دا، سەرۆكاتییا هەرێمێ ڕێزگرتنا ل سەروەرییا وەلاتان و دیالۆگێ ب پێدڤی دیت ژ بۆ پاراستنا ئارامییا دەڤەرێ.
هەژی گۆتنێیە، ئەو هێرشە بووینە سەدەمێ زیانێن مادی و برینداربوونا چەندین كەسان، هەروەسا وەلاتێ سعودیێ نەچار كرییە هنارتنا نەفتێ ب ڕێیا وێ بۆریێ بۆ دەمەكی ڕابگریت، كو ئەو بۆری ئێك ژ گرنگترین ڕێڕەوێن هنارتنا نەفتا سعودیێ یە بێ كو پێدڤی ب دەربازبوونێ بیت ب تەنكئاڤا هورمزێ دا. سعودیێ ژی ڕاگەهاندیە، ل سەر داخوازا بەغدایێ بەرسڤا سەربازی ڕاگرتییە، هەتا دەلیڤە ب حوكمەتا ئیراقێ دهێتە دان ڤەكۆلینان بكەت.

ب هەلكەفتا دەربازبوونا 65 سالان ل سەر دەستپێكرنا شۆڕشا مەزنا ئیلۆنێ، مەكتەبا سیاسییا پارتی دیموكراتی كوردستان تەكەزێ ل سەر ب هێزكرنا هەماهەنگی و هەڤهەلوەستیێ د ناڤبەرا هەموو حیزب و ئالییێن سیاسی یێن كوردستانێ دا كر، ژ پێخەمەت چارەسەركرنا گیروگرفتان و پاراستنا قەوارەیێ دەستووری و سیاسی یێ هەرێما كوردستانێ و دەستكەفتێن نەتەوەیی.
مەكتەبا سیاسیا پارتی دیموكراتی كوردستان د پەیامەكێ دا ب هەلكەفتا دەربازبوونا 65 سالان ل سەر دەستپێكرنا شۆڕشا مەزنا ئیلۆنێ ڕاگەهاند، شۆڕشێ بزاڤا ڕزگاریخوازیا گەلێ مە بۆ قووناغەكا سیاسییا پێشكەفتیتر ڤەگوهاست و بوویە بنەمایێ بدەستڤەئینانا چەندین دەستكەفتێن دیرۆكی، ل بەراهییا وان ڕێككەفتنا 11ـی ئادارا 1970ێ، سەرهلدانا گەلێ كوردستانێ و دروستكرنا قەوارەیێ سیاسی و دەستووری یێ هەرێما كوردستانێ.
مەكتەبا سیاسیا پارتی ئاماژە ب وێ چەندێ كر، دەستپێكرنا شۆڕشا ئیلۆنێ ب ڕێبەرییا بارزانیێ نەمر و پێشڕەوییا پارتی ل 11ی ئیلۆنا 1961ێ، كارتێكرنەكا ئێكلاكەر ل سەر چارەنڤیسێ سیاسی یێ بزاڤا ڕزگاریخوازیا كورد هەبوو و ب پەیامەكا هەقخوازانە سەلماند كو ئیرادە و وەرەیا پیلایییا ڕۆلێن گەلێ مە ژ ناڤ ناچن و ژ پێخەمەت گەهشتنێ ب ئارمانجێن ڕەوا ل بەرامبەر چ پیلانگێڕیەكێ و سازشێ ناكەن.
د پشكەكا دی یێ پەیامێ دا هاتییە كو ئێك ژ بنەمایێن بێوێنە یێن شۆڕشا ئیلۆنێ، ڕەنگڤەدانا جڤاكێ فرە ڕەنگ یێ كوردستانێ بوو، ب جۆرەكی شۆڕشێ شیا هەموو سنۆرێن دەڤەری، ئایینی و مەزهەبی نەهێلیت و تەڤایا گەلێ كوردستانێ د چارچۆڤەیێ هێزەكا بەرهەلستكار و ئێكگرتی دا دژی دیكتاتۆر و ستەمكاران كۆم بكەت هەتا د گۆڕەپانا سیاسییا ناڤخوەیی و جیهانی دا وەك هێزەكا كارتیكەر و خودان بڕیار ڕۆلێ هەژی یێ خۆ بگێڕیت.
مەكتەبا سیاسیا پارتی تەكەز كر كو ڤێ هەلكفەتێ ب دەرفەت دزانن بۆ پێداگریێ ل سەر ب هێزكرنا هەماهەنگی و هەڤهەلوەستیێ د ناڤبەرا هەموو حیزب و ئالییێن سیاسی یێن كوردستانێ دا، ژ پێخەمەت چارەسەركرنا گیروگرفتێن كوردستانێ و پاراستنا قەوارەیێ دەستووری و سیاسی یێ هەرێما كوردستانێ و دەستكەفتێن نەتەوەیی.
د دووماهییا پەیامێ دا، ل گەل هنارتنا سلاڤان بۆ گیانێ پاقژێ بارزانیێ نەمر و كاك ئدریسێ هەردەم زیندی و دانانا ڕێزێ بۆ هەموو شەهیدێن كوردستانێ و هێزا پێشمەرگەی، مەكتەبا سیاسییا پارتی پەیمان بۆ سەرۆك بارزانی، گەل و نیشتیمانی دوپات كرەڤە كو دێ ل سەر ڕێبازا بارزانی بەردەوام بن هەتا بدەستڤەئینانا تەڤایا ئارمانجێن بلند یێن گەلێ كوردستانێ.

پشتی شەهیدکرنا شەرڤانەکێ کورد ئالۆزی ل گەلەک باژێرێن رۆژئاڤایێ کوردستانێ دروست بووینە و هەروەسا ل زیندانا کۆبانێ ژی ٩ گرتیان جانێ خوە ژ دەست دان و خەلک ل دژی رەوشا هەی دەست ب خوەنیشادانێن مەزن کرینە.

گرۆپەکێ چەکدار یێ سەر ب هۆزێن عەرەبی شەرڤانەکێ بەرێ یێ هێزێن سووریا دیموکرات ب ناڤێ سامی شێخموس ل مالا وی رەڤاندن و ب رەنگەکێ درندانە شەهید کرن و پاشی ژی ل هەمبەر شەهیدکرنا وی کوردان ل هەموو رۆژئاڤایێ کوردستانێ دەست ب خوەنیشادانان کرن و داخواز کرن کوژەک بگەهیتە سزایێ خوە.
بەرپرسەکێ کورد ل رۆژئاڤایێ کوردستانێ ژی دیار کر، نەرازیبوونا ل دژی شەهیدبوونا شەرڤانێ بەرێ یێ هەسەدێ بەردەوامن و هەروەسا هێزێن سووریێ بزاڤ کرینە کو گرتیێن ل زیندانا کۆبانا ببنە حەلەبێ و گرتیان ژی ئەو یەک قەبوول نەکرینە و د ئەنجاما ئالۆزیان دا ٩ گرتی جانێ خوە ژ دەست داینە و گەلەک گرتیێن دی ژی بریندارن و دوهی ل هەموو باژێرێن رۆژئاڤایێ کوردستانێ وەلاتیێن کورد دەست ب خوەنیشادانان کرن و داخواز دکەن کوژەک بگەهیتە سزایێ خوە و هەروەسا یێن بووینە ئەگەرێ مرنا ٩ گرتیان ژی دڤێت بهێنە سزادان و نها رەوش ل رۆژئاڤایێ کوردستانێ گەلەک ئالۆزە و خەلک زۆرداریا چەکدارێن رژێما سووریێ قەبوول ناکەن.
هەمان بەرپرسی ئەو یەک ژی دیار کر، دوهی مەزلوم عەبدی هاتیە کۆبانێ و نها قەدەغەیا هاتنوچوونێ بۆ دەمێ ٧٢ دەمژمێران ل کۆبانێ هاتیە راگەهاندن و هێزێن ئەمنی ل هەموو دەڤەران بەلاڤ بووینە دا رەوشێ ئارام بکەن، چونکی هندەک هێزێن توندرەو ل سووریێ هەنە و وان نەڤێت رەوشا سووریێ و رۆژئاڤایێ کوردستانێ یا ئارام بیت و دخوازن ئالۆزیان دروست بکەن، شەهیدکرنا شەرڤانێ بەرێ یێ هەسەدێ ب ناڤێ سامی ژی نیشا ددەت وان دڤێت ئالۆزیان د ناڤبەرا کوردان و عەرەبان دا دروست بکەن و دڤێت هەموو ئالی هیشار بن، چونکی نها سووریێ د رەوشەکا گەلەک هەستیار دایە و هەکە ئالۆزی مەزنتر لێ بهێن دێ زیان گەهیتە هەموو خەلکێ سووریێ.
هەروەسا دوهی کەسوکارێن قوربانیێن زیندانا کۆبانێ ژی خوەنیشادان کرن و دیار کرن، یا نها دهێتە کرن تاوانەک مەزنە، چاوا بەرپرسێن زیندانێ رێ داینە تشتەک وەسا روو بدەت، بۆچی رێگری ل تێکدەران نەهاتیە کرن و روودانا ئاگرێ ل زیندانا کۆبانێ جهێ گومانێ یە و یا هاتیە کرن کۆمکوژیە و گەلێ کورد ل سووریێ ب چو رەنگەکێ ل هەمبەر کۆمکوژیا زیندانا کۆبانێ بێدەنگ نامینیت و هەکە تاوانبار نەگەهنە سزایێن خوە دێ خوەنیشادانێن ل رۆژئاڤایێ کوردستانێ ژی بەردەوام بن.
چاڤدێرێن سیاسی یێن کورد ژی دیار دکەن، کوردان ل رۆژئاڤایێ کوردستانێ شاشیەک گەلەک مەزن کرن دەمێ بریار دان ببنە پشکەک ژ دەولەتا سووریێ، چونکی هەتا نها ژی چەکدارێن تەحریر شام کوردان وەکو دوژمنێ خوە دبینن و بەرهەڤ نینن راستیا هەی قەبوول بکەن و ل ئالیێ دی نها کورد ل سووریێ د رەوشەکا لاواز دانە و پڕانیا چەکێن گران ژی رادەستی شامێ کرینە، ژ بەر ڤێ یەکێ ژی هێزێن سووریێ دخوازن ب هەر رەنگێ هەی زۆرداریێ ل کوردان بکەن، هێشتا ژی زمانێ کوردی وەکو زمانێ فەرمی ل سووریێ نەهاتیە قەبوول کرن و شەهیدکرنا شەرڤانەکێ بەرێ یێ هەسەدێ و درووشمێن چەکدارێن عەرەبی ل دژی گەلێ کورد ل سووریێ نیشا ددەت کو یا ل ژێر ناڤێ ئینتیگراسیۆنێ هاتە کرن شاشیەک گەلەک مەزن بوو و هەکە رەوش وەسا بەردەوام بیت مخابن دێ کورد باجەکا گەلەک مەزنتر ژ نها دەن.
چاڤدێرێن سیاسی یێن کورد ل سووریێ و رۆژئاڤایێ کوردستانێ ژی داخواز ژ هەموو هێز و ئالیێن سیاسی یێن کوردی دکەن بەری هەر تشتەکێ ناکۆکیێن خوە بدەنە رەخەکێ و بەرەیەکێ بهێز ئاڤا بکەن و خوەدان ژ کوردان دەرکەڤن و رێ نەدەن چەکدارێن عەرەبی سڤکاتیێ ب کوردان بکەن، هەکە ئەو یەک نەهێتە کرن دێ کارەساتێن گەلەک مەزنتر ژی ل رۆژئاڤایێ کوردستانێ روو دەن، چونکی نیەتا چەکدارێن عەرەبی نەهێلانا کوردانە و هەکە رێگری ل وان نەهێتە کرن دێ چەکدارێن عەرەبی ل رۆژئاڤایێ کوردستانێ تاوانێن گەلەک مەزنتر ژی ئەنجام دەن.
هەژی ئاماژەپێدانێ یە هەتا نها گەلەک وەلاتیێن کورد ل قامشلۆ و کۆبانێ ژ ئالیێ هێزێن ئیمناهیێ ڤە هاتینە دەستەسەرکرن و هێزێن ئێمناهیێ داخواز دکەن رەوش ئالۆزتر لێ نەهێت، د هەمان دەمی دا چەکدارێن هۆزێن عەرەبی ژی گەفا ڤێ یەکێ دکەن هەکە کەسەک ژ وان بهێتە کوشتن ئەو دێ ئێرشی دەڤەرێن کوردی یێن رۆژئاڤایێ کوردستانێ کەن و نها رەوشەکا گەلەک ئالۆز و نەئاسایی ل رۆژئاڤایێ کوردستانێ هەیە، وەلاتیێن کورد ژی دیار دکەن هەکە تاوانبار نەهێنە سزادان ئەو دێ بەردەوامیێ دەنە خوەنیشادانان و زۆرداریا چەکدارێن عەرەب ژی ب چو رەنگەکی قەبوول ناکەن.