عەبدولرەحمان مەحموود
دزانن، ئەڤ قڕێژە
ژ نەسلا کێنە؟
ژ پەروەردە و هەلگرێن
کیژ هزرێنە؟
یان قوتابی و مریدێن
ڕێیا کێ نە؟
ئەو…
نەڤی یێن ئەبۆ جەهلی و
حەجاجی نە
کوڕێن ئەبۆ بەکرێ
بەغدادی نە
ژ نفشێ وەلاتەک پاشڤەمای و
هزر گەنی نە
زەبانیێن بەر دەرێ
دۆزەخێ نە
ئاشقێن مەی و
ڕێتنا خوینا ڤی و
یێ هەنێ نە
نە پاسەوانێن
بەر دەرێ کەعبێ نە
یان فەقیێن حوجرە و
مزگەفتێ نە
هەر نە ژ ئەهلێ
سونەت و قورئانێ نە
ئەو..
گورگێن هارن
بتنێ بۆ مە کوردان
کۆرە مارن
زالم و زوحاکێن
هەر و هەرجارن.
سالار محەمەد دۆسكی:
2-7
شێخ سەعید گەلی رومانی ئەو ژی گۆت: جارەكێ ل گازینویا سولاڤ یێ رونشتی بووم و ئەو گازینو یا بێ من وانا بوو و هەڤالێن وی دهاتنە دەڤ من هەڤالەكێ مە بناڤێ( تاهر محەمەد سالح ) بوو یێ دێرەروشی بوو وەك پێشتر من ئاماژە پێكری كو پوستەچیێ مەبوو و هات سلاڤ كر و روینشتە خوارێ و ئەز و ئەو بتنێ ل مێزەكێ رونشتینە خوارێ و دەستێ خوە برە بن مێزێ و پوستە داڤ من و پوستە گەلەك بوو یێ پێچایی بوو و بەلاڤووكێن حزبی دناڤ دا بوون و من ژێ وەرگرتن و من كرنە دناڤ بلوزێ خوە دا و وەرزێ زڤستانێ بوو و دووڤدا گۆت دا بچینە پیاسەكێ و ئەم دەركەفتین و بهێنەكێ بوو من بەحسێ (مەحمود ئێزدی)كر و بزاڤێن پێشمەرگەی و خواترا خوە ژ من خواست و ئەز چوومە دوكانا (مەهدی روستینكی) تەنشت گازینویا سولاڤ و من شامپویەك ژێكری و زەرفێن عسكری هەبوون و من شامپو كرە زەرفی دا و هەر ل دوكانێ من پوستێ خوە ژی كرە دنافڤ زەرفێ شامپوێ دا و ئەو زەرف دپێچایی بوون و كربوونە بالولوك و من زەرف ل دەستێ خوە گرت و ئەز چووم ل گومركێن هشك چووم و ل جهێ ئوڤەرپاسا نوكە دبێژنێ شمك زەرا ل نێزیك ئوتێلا سولاڤ و مەیدانەك بوو چار رێ بوو و ترافیك ژی نەبوون و ترۆمبێل كێم بوون من سەحكرێ چار زەلامێن ئەمنی ل جادێ دا دراوستیانیە و هەر كەسەكێ دبوریت گازی دكەنێ و داخازا ناسناما وی دكەن و پرسیارا ژێ دكەن و من ژی پێن خوە گرانكرن و ئەژی موتەخلف بووم و دەسپێ ەز بچم پرسیارا ناسنامەكێ ژ من بكەن چ ناسنامە من نینن و هەكە بهێمە پشكنینكرن بەلاڤووك ل زەرفێ من دانە ل گەل شامپویێ رێ هزرێن خوە دكەم و هێدی هێدی یێ نێزیكی وان دبم و من گۆت پاشڤە بزڤرم دێ گازی من كەن من خوە شاش نەكر ئەز چووم بەلێ من پێن خوە پیچەك گرانكرن و ئەز نێزیك بووم من دلێ خوە دا گۆت سلافكرن باشترە ژ نە سلافكرنێ و من سلافكر و ئێكی گۆتە من هەرە و هەڤالێ تەنشت وی گۆتە من وەرە و بەرەف واڤە چووم هەڤالێ وی گۆتێ بلا بچیت چ كێشە نینە دووماهیێ ئێك ژوانا گۆت بێژمە تە وەرە و ئەز نێزیك بووم گۆت ئەو چیە دەستێ تەدا ل جهێ زەرفی بدەمەڤێ و ئەو تەماشە بكەتێ من سەرێ شامپویێ دەرخست و من گۆتێ بتل شامپو من ژی بستەهی ڤەكر من گۆت دا چ هزرا ژمن نەكەت ئێكسەر گۆتە من هەرە و هەر ل گەل شامپویێ من سیكوتینەك ژی كری و من كلدانكا سیكوتینێ ژی ل گەل خوە ئینا و بابەت من ل گەل مال بەحس نەكر و بۆ شەڤ و شەڤەكا هڕو بابو چوومە بەرامبەر قوتابخانا مەمێ ئالان نوكە قوتابخانە هەیە وی دەمی دگۆتنێ پیشەسازی یا دهۆكێ قوتابیێن ئامادەیا پیشەسازی تێدا دخاند و دیوارێ پیشەسازیێ نە گەلەكێ ب سەربەر بوو بەلكو دیوارەكێ بەرا بوو و هێشتا ل مال من بەلاڤووكێن خوە كربوونە پەر پەر و كربوونە پەخلا خوە دا و بلوزەك ل بەر من بوو و بتنێ ئەز چووم ئەوا كاودانا مرۆوڤ نەدشیا ببیتە چەند ەسەك چونكە رەنگە ل سەر ژیانا مرۆڤی مەترسی بیت و من دەست هاڤێتە پەرەكێ كاغەزێ و ئێكسەر من دیت ئێك ژووردا هات ئەز پیچەكێ هێدی هێدی چووم و ئەوژی هێدی هێدی هات و پێن خوە گرانكرن و من نەزانی شكا ژمن دبەت یان ننە و ئەز ل جادێ دەربازبووم و ئەو ژی ل جادێ دەرباز بوو و دەمژمێر نێزیكی نەهی شەڤێ بوو و من ئەو كەس ژی نەنیاسی ئەز ل جادێ دەربازبووم ل تاخێ كوچەرا دوكانا (ئیسف سلێمان) هەبوو و دوكانا وی یا ڤەكری بوو من ژی گۆت دا بچمە كولایەكێ ل دەڤ ڤە خوم و من گۆت دا خوە ژ ئەڤی مرۆڤی قورتال بكەم و من نەزانی دووڤ من را دهێت یان ئاگەهـ ژ من نینە و پشتی چوویمە دوكانێ من داخازا كولایەكێ كر و ئەز خودانێ دوكانێ نیاسم و ئەو ژی من نیاسیت هەتا كولا بومن ئینای ئەو مرۆڤ پیچەكێ ل دوكانێ راوستیا و دووڤدا چوو و پشتی ڤەخارنا كولایێ جارەكا دی زڤریمە دیوارێ پیشەسازیێ و من دەست هاڤێتێ بەلاڤووكێن خوە ل دیواری دان و گەلەك یا بزحمەت بوو و سیكوتینی خوە لێنەدا چونكە هەوا دهات و گەهشتمە نیڤەكا دیواری و مژوولی لێدانێ مە ژ نشكەكێ ڤە من دیت زەلامەك ژ كوژیێ دیواری دەركەفت من ژی لەزكر و ئەو ژی هەر نێزیكی من بوو و گەلەك نێزیكی من بوو و من نیاسی ژی و ئەوی ژی ئەز نیاسیم و یا دووماهیێ من ل دیواری دا خوە نەگرت و من ل عامودێ دا هەر خوە نەگرت چونكە كارێ لەزێ بوو و چ ب دەستێ من نەا هەما من بەرەك دانا سەر و ئەز چووم و دەرسووكەك ل سەرێ من بوو ناڤ چاڤ و بن گوههێن خوە من گرت بوون من گۆت دا نەهێمە نیاسین و ل جادێ دەربازبووم و چووم وێ شەڤێ نەچوومە مال و ئەوی كابرای پێزانین گەهاندنە ئەمنێ كو هندەك بەلاڤووكێن حزبی هاتینە بەلاڤەكرن وی ئەم نیاسین وەك رێكخستن و هەمان دەم دەستەك ل گەل ئەمنێ ژی هەبوو و نەدڤیا شكائێتێ ل مە بكەت و ئانكو ل هەر دو سەران دا شول دكر ژ ئالیەكی دەست حزباتیێ ڤە دا و لایەكی ڤە تێكەلیا ئەمنێ ژی دكر و نە مرۆڤەكێ خواندەڤا بوو و بتنێ دڤیا ژیانا خوە برێڤەبەت و دەمێ پێزانین گەهاندین ئەمن 12ی شەڤێ هات ئەو دەڤەر هەمی دورپێچ كر و چەند گەنج ژ مالا ئینانە دەرێ و ئەو بەلاڤووك ل گەل خوە برن و ئە ژی ب شەڤ چوومە مالا مامێ خوە وان و من گۆت ئەگەر شكەك ل سەر من هەبیت دێ چنە مالا مە و پرسیارا مال كەن و ل مالا مامی خوە نڤستم هەتا سپێدێ و چ پرسیارا من نەهاتە كرن و دەمێ سپێدێ چوویمە چایخانێ من هەڤالێن خوە دیتن و من (تاهر) دیت كرە كەنی و گۆت ئەوێ هەبوو پێزانین گەهاندینە ئەمنێ من گۆتێ ئەز زانم ئەوێ پێزانین گەهاندینێ و پێشتر من دیاركری كو ل گەل هەر دو لایەنا كاردكر ئەو ژی ل چەیخانێ یێ رونشتی بوو ب حكمێ ئەم هەر دو خەلكێ دەڤەرەكێ بووین ئەوی هند جورعەت نەكر ناڤێ من بدەتە ئەمنێ و دا بیتە بابەتەكێ خوینداری و ئەڤە ژی ئەگەرەك بوو، باراپتر من چالاكیێن خوە بتنێ دكرن یا بزحمەت بوو باوەری ب كەسەكی بینی دا ئەم ئاشكرا نەبین چونكە رێنما ئەو بوون كو زێدەتر خوە ب پارێزن و بەرپرسێ هەمی هەڤالێن خوە ئەز بووم و ل دەسپێكێ مە شانەكا سەرەكی هەبوو بناڤێ (رزگاری).
دلۆڤان هالۆ:
ئەیاد جەقسی، فرۆكەڤانەكێ كوردێ خەلكێ ئیدارەیا سەربەخۆیا زاخۆیە، د دیدارەكێ دا بۆ رۆژنامەیا ئەڤرۆ دبێژیت: بۆ جارا ئێكێ ل سالا 2003ل باژێرێ مشیگان ل وەلاتێ ئەمریكا من ل گەل چەند هەڤالان خۆ فێری هاژۆتنا فرۆكێ كر و پشتی سالەكێ من دەست ب خوندن و راهێنان كر د بۆارێ فرۆكەڤانیێ دا و ل 2005 ب شێوەیەكێ فەرمی من موولەتا هاژۆتنا فرۆكەیێ وەرگرت و هەتا نوكە یێ بەردەوامم.
هەروەسا گۆت: ل سالا 2021 من دەست ب چێكرنا فرۆكەیەكێ كر و ل 2023 ب دووماهی ئینا، فرۆكەیەكا سڤك و دو نەفەری یە، مەكینا وێ چار سلندرە و لەزاتیا وێ (185) كیلۆمەترن د دەمژمێرەكێ دا و بۆ دەمێ بهێت من ل بەرە فرۆكەیەكا باشتر چێبكەم، بۆ زانین خۆشیا فرۆكەڤانیێ ئەوە مرۆڤ وەكو بالندەیەكی دفڕیت ژ جهەكی بۆ جهەكی و دووراتیا دناڤبەرا باژێران دا نێزیك دكەت و نەخۆشیا وێ ژی ئەوە دەمێ ئاریشەیێن تەكنیكی بۆ فرۆكێ دروست دبن.
بێوار حەمدی:
مۆزیكژەن (زیاد عیماد) كو ژیێ وی (26) سالن و ئەڤە چەند سالن ئۆرگێ دژەنیت، د دیدارەكێ دا بۆ رۆژنامەیا ئەڤرۆ گۆت: هەر چەندە من ب شێوەیەكێ ئەكادیمی مۆزیك نەخواندیە، بەلێ حەزا من بوو مۆزیكێ بوو ئەگەر كو ئەز زوو فێری ژەنینا ئۆرگێ ببم، لێ هەر دبێژم ئەو كەسێ ب ئەكادیمی فێردبیت باشترە.
هەروەسا گۆت: ئۆرگێ ڕامانەكا مەزن بۆ ژیانێ هەیە، لەورا تبلێن وێ یێن سپی نیشانا خۆشیێ نە و یێن ڕەش ژی نەخۆشیێ نە، لەورا دڤێت هەردوك پێكڤە بهێنە ژەنینن دا رامانەكا دروست بدەنە ژیانا مە.
سندس سالح سلێڤانەیی:
لارین عەبدولستار، كچەكا گولفرۆشا خەلكا دهۆكێ یە، د دیدارەكێ دا بۆ رۆژنامەیا ئەڤرۆ دبێژیت: ئەڤە پێنج سالن ئەز ڤی كاری دكەم، فرۆتنا گولان كارەكێ خۆش و ب ساناهی یە، هەروەسا گەلەك مەزاختی ژی پێ نەڤێن، لەورا دێ یا بەردەوامبم.
هەروەسا گۆت: ئەزا كەیفخۆشم كو گەلەك كچان دەست بڤی كاری كریە، چنكو كاودانێن نوكە وەسا دخوازن كچ ب خۆ ژی بۆ خۆ سەحا كارەكی بكەت ژ بۆ هندێ دا پارەیەك بگەهیتێ ئەو ژی یا هاریكاربیت د ئاڤاكرنا خێزانەكا بەختەوەردا، بۆ زانین ئەم ل جهێ خۆ گەلەك جۆرێن گولان دفرۆشین، بەلێ ل رۆژا ڤالانتاینێ و هندەك بیرهاتنێن دی پتر گول دهێنە فرۆتن، كو ئەو ژی بۆمە ژ دەرڤەی وەلاتی دهێت، ژوانا ل (هولەند، كینیا، تركیا، ئیران، چین) و گەلەك جهێن دی.
ل رۆژا دوشەمبی 2/2/2026، ل پیرمام سەرۆك بارزانی ل گەل شاندەكێ بلند یێ چارچۆڤەیێ هەماهەنگیێ ب سەرۆكایەتییا محەمەد شیاع سوودانی، سەرۆك وەزیرێن ئیراقێ و سەرۆكێ هەڤپەیمانییا ئاڤەدانكرن و گەشەپێدانێ كۆمبوو.
ب گۆرەی بەیاننامەیەكا نڤیسینگەها سوودانی» د كۆمبوونێدا، كو هەر ئێك ژ نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ بەرهەڤبووین، پێنگاڤێن پێكئینانا حوكمەتا نوو یا ئیراقێ و هەلبژارتنا سەرۆككۆماری هاتنە گەنگەشەكرن».
د بەیاننامەیا نڤیسینگەها سوودانی هاتیە ژی» د دیدارەكێدا باش ل پێشهاتێن نوكە یێن دەڤەرێ و رەوشا سووریێ و گرنگییا ئێكگرتنا كۆتارا نیشتمانییا سیاسییا ئیراقی بەرامبەر ڤان گوهۆڕین و روودانان هاتە كرن، ب شێوەیەكی كو پێگەه و بەرژەوەندیێن بلند یێن ئیراقێ ب هێزتر بكەت».
ل رۆژا دوشەمبی 2/2/2026 ل پیرمام، سەرۆك مەسعود بارزانی پێشوازی ل موسەننا سامەرائی، سەرۆكێ هەڤپەیمانییا عەزم كر.
ب گۆرەی بەیاننامەیەكا بارەگەهێ بارزانی» د دیدارەكێدا رەوشا سیاسییا ئیراقێ و دەڤەرێ ب گشتی هاتە گەنگەشەكرن، هەروەسا باس ل دووماهی پێنگاڤێن پرۆسەیا سیاسی ل ئیراقێ بۆ پێكئینانا حوكمەتا نوو هاتە كرن».
ل رۆژا دوشەمبی 2/2/2026، مەسرور بارزانی، سەرۆكێ حوكمەتا هەرێما كوردستانێ، پێشوازی ل عیرفان سدیق، بالیۆزێ بریتانیا ل ئیراقێ كر.
ب گۆرەی بەیاننامەیەكا حوكمەتا هەرێما كوردستانێ» د كۆمبوونەكێدا رەوشا گشتییا ئیراقێ و بزاڤ و دانوستاندنێن هەلبژارتنا سەرۆككۆماری وپێكئینانا كابینەیا نوو یا حوكمەتا فیدرال هاتە گەنگەشەكرن».
د پشكەكا دی یا كۆمبوونێ، بیر و بۆچۆن ل دۆر دووماهی گوهۆڕین و پێشهاتێن دەڤەرێ و ب تایبەتی رەوشا سووریێ هاتە لێكگۆهارتن و دووپاتی ل چارەسەركرنا كێشەیان ب رێكا ئاشتیێ و دانوستاندنێ و پاراستنا مافێن گەلێ كورد و هەموو پێكهاتەیێن سووریێ هاتە كرن.
ل رۆژا دوشەمبی 2/2/2026، مەسرور بارزانی، سەرۆكێ حوكمەتا هەرێما كوردستانێ، پێشوازی ل بێریڤان ئاماز، جێگرا سەرۆكێ پەرلەمانێ هەرێما نۆدراین – ڤێستڤالن یا ئەلمانی كر.
حوكمەتا هەرێما كوردستانێ د بەیاننامەیەكێدا بەلاڤكر» د دیدارەكێدا دووپاتی ل گرنگییا پێشڤەبرنا هەڤبەندیێن هەرێما كوردستانێ و ئەلمانیا د وارێن جۆراوجۆردا هاتە كرن».
حوكمەتا هەرێمێ دیاركر ژی» جێگرا جێگرا سەرۆكێ پەرلەمانێ هەرێما نۆدراین – ڤێستڤالن یا ئەلمانی، رۆلێ كارا یێ هەرێما كوردستانێ د پاراستنا ئاسایش و ئارامییا دەڤەرێ دا و ب تایبەتی ئارامكرنا شەڕ و ئالۆزیێن ڤێ دووماهیێ ل سووریێ و داكۆكیكرن ژ مافێن گەلێ كورد و پێكهاتەیێن دی یێ ن وی وەلاتی، بلند هەلسەنگاند».
رێڤەبەرێ نڤیسینگەها رزگاركرنا رەڤاندنیێن دەستێ داعشێ ل حوكمەتا هەرێما كوردستانێ راگەهاند: نێزیكی 400 وەلاتیێن كوردێن ئێزدی د ناڤ كەمپا هۆلێ دانە ل سووریێ و ژ ئەگەرێ زالبوونا ژنێن داعشێ و گوهۆڕینا ناسنامەیا زارۆیان، پرۆسەیا ڤەدیتن و رزگاركرنا ئافرەت و زارۆیێن رەڤاندی یێن ئێزدی تووشی ئاستەنگێن مەزن بوویە.
حسێن قائیدی، رێڤەبەرێ نڤیسینگەها رزگاركرنا رەڤاندنیێن دەستێ داعشێ سەبارەت ب رەوشا ئێزدییان ل كەمپا هۆلێ ئاماژە ب وێ چەندێ دا كو ب رێكا بانگەوازییەكێ كو رۆژا 24/1/2026 هاتیە بەلاڤكرن، هەژمارا تەلەفۆنەكا تایبەت تەرخانكرییە بۆ وێ چەندێ هەر كەسەك ل رۆژئاڤایێ كوردستانێ پێزانینەك ل سەر بێسەروشوونبوویێن ئێزدی ل كۆمپا هۆلێ یان هەر دەڤەرەكا دی هەبیت، ئاگەهدارییا وان بكەت.
گوت ژی» كارمەندێن مە بەردەوام دووڤچوونێ بۆ پێزانینان دكەن، پێشتر مە پێزانین هەبوون كو هەژمارەكا ئافرەت و زارۆیێن ئێزدی ل وی كەمپێ بوون، بەلێ هەتا نوكە هیچ دەنگوباسەكێ نوو ل دۆر نینە».
ب گۆڕەی دووڤچوونا نڤیسینگەها رزگاركرنا رەڤاندنیێن دەستێ داعشێ، نێزیكی 400 كوردێن ئێزدی د ناڤ كەمپا هۆلێ دا ماینە. حسێن قائیدی، دووپاتی ل وێ چەندێ ژی كر» د ناڤ كەمپا هۆلێ دا جۆرە بالادەستییەكا داعشێ هەیە كو ژ ئالیێ ژنێن تیرۆرستڤە دهێتە بڕێڤەبرن، ل وێرێ زیندانیكرن و كوشتن ژی هەیە».
رێڤەبەرێ نڤیسینگەها رزگاركرنا رەڤاندنیێن دەستێ داعشێ رۆناهی ئێخستە سەر وان ئاستەنگێن ل پێشبەری نیاسینا رەڤاندییان هەین و گوت» دو جۆرێن ئێزدییان د ناڤ كەمپا هۆلێ دا هەنە، پشكەك ژ وان نەوێرن ناسنامەیا خوە ئاشكرا بكەن، چونكە دێ مەترسی ل سەر ژیانا وان دروست بیت، پشكەكا دی ژی ئەو زارۆیەنە كو ل وێرێ هاتینە مەزنكگرن و ناڤ و ئایین و زمانێ وان هاتینە گوهۆڕین، ئەڤێ چەندێ ژی وەكریە نیاسینا وان گەلەك ب زەحمەت بیت».
سەبارەت ب هەماهەنگیێ ل گەل هێزێن سووریا دیموكرات (هەسەدە)، رێڤەبەرێ نڤیسینگەها رزگاركرنا رەڤاندنیێن دەستێ داعشێ راگەهاند كو پێشتر هەسەدە بەرهەڤییا خوە نیشادایە هاریكارییا وان بكەت بۆ زڤڕاندنا رەڤاندیێن ئێزدی، بەلێ وەكو قائیدی دبێژیت» مە هەردەم پلانا خوە هەبوویە و چەندین جاران ژی مە شاند هنارتینە وێرێ، بەلێ ژ ئەگەرێ وێ چەندێ خێزانێن داعشێ هێشتا ل سەر هەمان بیر و باوەرێن توندڕەوی ماینە، پشكنینا خیڤەت ب خیڤەت بۆ هێزێن ئەمنی ژی كارەكێ ب زەحمەت و پڕ مەترسی بوو».
نيشاندان