قەیس وەیس:

د رۆژانێن مێركاتۆیا هاڤینێ‌ دا خوە بەرهەڤكرن بۆ وەرزێ‌ نوو یا خولا ستێرێن ئیراقێ‌ یا فوتبۆلێ‌ هێشتا سیكا هاتن و چوونا یاریزانان یا ڤەكرییە، یانەیێن پشكدار ب نهێنی دگەل یاریزانان پەیوەندیێ‌ دكەن و بزاڤێ دكەن ڕازیبكەن، بوویە ئەگەر مێركاتۆ ببیتە شەڕەكێ‌ نهێنی دناڤبەرا یانەیان دا بۆ ب دەستڤە ئینانا یاریزانان، ئەڤ پرۆسێسە یا بەردەوامە و دبیت گوهۆڕین هەبن.
دهۆك یاریزانێ‌ ڕەڤەندا كورد و ئیراقی كۆمڤە دكەت
قارەمانا كۆپا ئیراقێ‌ و كۆپا كەنداڤی یانەیا دهۆك ل سەر دانۆستاندنێن خوە ژبۆ بهێزكرنا ڕێزێن تیمێ‌ یا بەردەوامە، هەرچەندە هێشتا بابەتێ‌ ڕاهێنەرێ‌ ئێكێ‌ یێ‌ تیمێ‌ ئێكلا نەبوویە و هەتا نوكە نە هاتییە ڕاگەهاندن لی ژلایێ‌ جادەیا وەرزشی چەند ناڤەك پێشتر هاتبوونە دەستنیشانكرن ژ وانا باسم قاسم ئەو ڕاهێنەرێ‌ ل وەرزێ‌ 2009-2010 ناسناڤێ‌ خولا ئیراقێ‌ بۆ دهۆكێ‌ ب دەستڤە ئینایی، ئەڤ دەنگۆباسە هات پشتی دگەل ڕاهێنەرێ‌ مسری نەگەهشتینە ڕێكەڤتنێ‌، یانەیا دهۆكێ‌ یا بزاڤێ‌ دكەت پرانییا یاریزانێن خوە گەنج و ڕەڤەندێن كوردستانی و ئیراقی یێن دەرڤە بینیت، ل دووڤ دەنگۆباسێن بەلاڤبووی، یانەیا دهۆك گەهشتییە ڕێكەڤتنێ‌ دگەل هەر ئێك ژ بلند حەسەن و یوسف ئەلئیمام، هەردو یاریزان ڕەڤەندا كوردن ل ئۆرۆپا و یاریزانێن هەلبژارتیێ‌ ئیراقێ‌ نە، دیسان گرێبەست دگەل عەمار موحسن ڕەڤەندا ئیراقی ل سویدێ‌، ژلایەكێ‌ دووڤە هێرشبەرێ‌ یانەیێ‌ ئیبراهیم غازی چوونا خوە ژ دهۆكێ‌ ڕاگەهاند و دبیت گرێبەستا یانەیا حدود ئیمزابكەت.
شاندەكێ‌ زاخۆ ل بەغدایە
ژلایێ‌ خوەڤە یانەیا زاخۆ ژی بەردەوامە ل سەر دانۆستاندنان تایبەت دگەل ڕاهێنەر ئەیۆب ئۆدیشۆ ئەوێ‌ هاتنا وی بۆ زاخۆ نێزك بوویە، لێ‌ ژلایەكێ‌ دووڤە پشتی هاتیە زانین كو ستێرێ‌ وێ‌ ئەمجەد عتۆان نێزیكی گرێبەستا یانەیا تەلەبە بوویە، شاندەكێ‌ یانەیێ‌ نوكە ل بەغدایە بۆ ئێكلاكرنا بابەتی وی هەروەسان ئێكلاكرنا ڕاهێنەرەكی و چەند یاریزانان، پێشتر یانەیا زاخۆ ڕاگەهاند بوو ئەوا گرێبەست دگەل یێ‌ بەرازیلی ئیدێلسۆن بۆربا سانتا ئیكێن یێ‌ ناڤدار ئۆرۆینۆ كو ل هێلا بەرەڤانیێ‌ لایێ‌ چەبێ‌ یاریێ‌ دكەت،
هەولێر دەست ب كاربوو
پشتی ل شەمبییا بۆری د كۆنگرەیەكێ‌ رۆژنامەڤانی دا ئۆمێد خۆشناو پارێزگارێ‌ هەولێرێ‌ ڕاگەهاندی دەرگەهێ‌ یانەیێ‌ هاتییە ڤەكرن و ئاریشە هاتنە چارەسەركرن، كارگێرییا یانەیێ‌ ب سەرپەرشتییا سەفین یاسین هەرزوو دەست ب دانانا پلانان بۆ وەرزێ‌ نوو كر و سۆزدا تیما هەولێرێ‌ بهێز ڤەگەڕینن، هەرچەندە پشتی چوونا كۆمەكا یاریزانان ژ یانەیێ‌ نموونە شێركۆ كەریم بۆ یانەیا زاخۆ و دلۆڤان مەهدی گۆلپارێزی بۆ یانەیا ئەلگەرمە، دەنگۆباسێن هەولێرێ‌ دیاركرینە كو وەرزێ‌ ئەڤ سالە دێ‌ ب تیمەكا نوو و هێزتر هێنە دناڤ خولێ‌ دا.
د24 دەمژمێران دا نەورۆزێ‌ شەش گرێبەست ڕاگەهاند
ژلایێ‌ خوەڤە یانەیا نەورۆز بەردەوامە ل سەر بهێزكرنا ڕێزێن تیما خوە د 24 دەمژمێران دا گرێبەستا شەشیاریزانان ڕاگەهاند ئەو ژی، ڕاهێنەرێ‌ سربی دالیبۆر ساڤێژ، موجتەبا موحسێن یاریزانێ‌ هێلا ناڤین یێ‌ یانەیا ئەلقاسم، یێ‌ سربی ئۆجینیان مۆرسیج ل هێڵاا بەرەڤانیێ‌ دكەت و یێ‌ یانەیا زەورا محەمەد رەزا یاریزانێ‌ هێلا ناڤەڕاست، گۆلپارێز ریزا عەبدولعەزیز و نووكرنا گرێبەستا یاریزان تەقی فەلاح.

چاڤەڕێ‌ دهێتە كرن ئەڤرۆ ل سەر ڕێیا كورا مانگێشكێ‌ ل سنۆرێ‌ پارێزگەها دهۆكێ‌ دەست ب هەڤڕكیێن گەڕأ چارێ‌ و دووماهیێ‌ ژ قارەمانییا ئیراقێ‌ بۆ یارییا پایسلان ل سەر ئاستێ‌ ژیێن جودا بهێتە كرن، پشتی بەری دو رۆژان قووناغا سێیێ‌ ل هەولێرا پایتەخت ب دووماهی هاتی، یانەیا دهۆك وەكو نوونەرا ئێكانە یا پارێزگەهێ‌ ل سەر ئاستێ‌ لاوان، تازەپێگەهشتیان و پشكۆژان پشكدارن و ڕێزێن پێشیێ‌ د هەرسێ‌ قووناغێن بۆری دا ب دەستڤە ئیناینە.
خشتەیێ‌ هەڤڕكیێن یارییا بڤی شێوەیی بن
ئەڤرۆ رۆژا دوشەمبی، ل سەر ئاستێ‌ تازەپێگەهشتی و پشكۆژان، بەریكانەیا كت دژی دەمژمێرێ‌ بۆ درێژاهییا 15كم، ل سەر ئاستێ‌ لاوان بەریكانەیا كت گشت یاریزانان بۆ درێژاهییا 70كم لێكزڤڕین، ل سەر ئاستێ‌ پێشكەڤتیان ل بن ژیێ‌ 23 سالی دا، بەریكانە دێ‌ بۆ درێژاهییا 90كم لێكزڤڕین هەبیت، سوبەهی سێ‌ شەمبی، ل سەر ئاستێ‌ تازەپێگەهشتییان تیم دژی دەمژمێر بۆ بەریكانەیا 30كم، ل سەر ئاستێ‌ لاوان تیم بۆ گشت یانەیان ب درێژاهییا 100كم، چارشەمبییا بهێت ل سەر ئاستێ‌ پێشكەڤتیان كتب ۆ گشت یاریزانان ب درێژاهییا 150كم دێ‌ هەڤڕكی هێتە كرن، دووڤدا دێ‌ ڕێورەسمێن خەلاتكرنا تیم ویاریزانێن سەركەڤتی هێـتە كرن، بۆ زانین دەستپێكا یارییان ل دەمژمێر حەفتێ‌ سپێدێ بیت.
ل دۆر دووماهی بەرهەڤیێن دهۆكێ‌ تارق سەعید ڕاهێنەرێ‌ تیمێ‌ بۆ رۆژنامەیا ئەڤرۆ گۆت: قووناغا ئەڤرۆ یا چارێ‌ و دووماهیێ یە ژ قارەمانیێ‌ ئانكو یا ئێكلاكەرە بۆ دیاركرنا یاریزان و یانەیێن سەركەڤتی و هەلبژارتنا یاریزانان بۆ ناڤ ڕێزێن هەلبژارتیێ‌ ئیراقێ‌، لەوما ژی دڤێ‌ قووناغێ‌ دا دێ‌ هەڤڕكییەكا دژوارتر ژ قووناغێن بوری دا هەبیت، مە ل سەر سێ‌ ئاستان پشكداری كرییە و یاریزانێن مە شیاینە ڕێزێن پێشیێ‌ بهێن، تایبەت تیما لاوان كو هەڤڕكێن بۆ دەستڤە ئینانا ناسناڤێ‌ وان، زێدەباری یاریزانێن تازەپێگەهشتی و پشكۆژان.
هەروەسان ناڤهاتی گۆت: ژبەركو قووناغا دووماهیێ‌ ئێكلاكەرە و دناڤ ئەردێ‌ مە دایە دەلیڤەیا دەستڤە ئینانا ناسناڤی و ڕێزێن پێشیێ‌ بەردەستە و دێ‌ هەموو بزاڤان كەین ژ دەست نەدەین، هەرچەندە ل سەر ئاستێ‌ لاوان تیما سیناعە د قووناغا سێیێ‌ دا یا ئێكێ‌ هاتبوو لێ‌ خوەشبەختانە ئەو دەمێ‌ هاتیە تۆماركرن بتنێ‌ كێمتری 34 چركان بوو لەوما ژی یاریزانێن مە شیانێن هەین دێ‌ بۆرینن تایبەت دناڤ ئەردێ‌ مەدایە و یاریزانێن مە ئەو مۆرال و شارەزاهییا هەیین ڕێزا ئێكێ‌ ب دەستڤە بینن.
دیسان گۆت تارق سەعید گۆت: مە هیڤیێن هەین ل سەر ئاستێ‌ تازەپێگەهشتییان بۆ یاریزانان عەبدولرەحمان شیڤان ئەكرەم و برایێ‌ وی عەلی شیڤان ئەكرەم و سەنەر هێرش رەجەب بشێن ئەنجامێن دلخوەشكەر بینن، دیسان ل سەر ئاستێ‌ پشكۆژان بۆ شێوازێ‌ تیم دژی دەمژمێر ڕێزێن ئێكێ‌ بدەستڤە بینن.

ب فەرمی هژمارەیا کەسێن خوە بۆ فدراسیۆنا فوتبۆلا ئیراقێ بەربژارکرین گەهشتنە ٤١ ژ وانا پێنچ کەس ژ هەرێما کوردستانێ نە، ئەو بڕیارە هەلبژارتنێن وان ل ناڤەڕاستا ڤێ مەهێ ل پایتەختێ بەغدا بهێنە کرن.
ل دووڤ ڕاگەهاندنا وەزارەتا وەرزش و لاوێن ئیراقێ ناڤێ ٤١ کەسان ڕاگەهاندییە، چار کەسان بۆ پۆستێ سەرۆک فدراسیۆن، پێنچ کەسان بۆ پۆستێ جێگرێ ئێکێ، دو کەس بۆ پۆستێ جێگرێ دویێ، ٢٩ کەسان بۆ پۆستێ ئەندامێن فدراسیۆنێ، دو کەسانێن کچ بۆ پۆستێ ئەندامەتیێ، دەستەیا گشتی پێکهاتییە ژ ٦٦ کەسان ئەوێن ماف هەین بۆ پرۆسێسا دەنگدانێ، دێ نوونەرێن یانەیێن کارگێریێن بەروەخت هێنە ڕاگرتن ل دووڤ یاسایێ، ئەو بڕیارە هەلبژارتن ل ١٦ێ ڤێ مەهێ بهێنە کرن.
هەروەسان دیار کر دەرگەهێ خوە بەربژارکرنێ هاتییە گرتن، د پرۆسێسا هەلبژارتنان دا ١٣ کەس دێ هێنە هەلبژارتن، سەرۆک فدراسیۆن، جێگرێ ئێکێ و یێ دویێ، نەهـ کەس ژ کوڕان و ئێک ئەنداما کچ دێ بۆ فدراسیۆنا فوتبۆلا ئیراقێ هێنە هەلبژارتن.
هەر ئێک ژ یونس مەحموود، ئەیاد بنیان و عەدنان درجال خوە بۆ پۆستێ سەرۆکێ فدراسیۆنێ بەربژارکرینە، پێنچ کەسان ژ هەرێما کوردستانێ خوە بەربژارکریینە ئەو ژی هەر ئێک د. ئەحمەد قاسم ژ دهۆکێ، تاها عەبدولحەکیم ژ زاخۆ، گۆڤەند عەبدولخالق ژهەولێرێ، مەحموود ئەحمەد و تەنیا حسێن حەسەن ژ سلێمانیێ.

ل دووماهییا حەفتییا بۆری ب پشكدارییا 23 ڕاهێنەرێن هەرێما كوردستانێ‌ و ئیراقێ‌ خولەكا نێڤدەولەتی بۆ ڕاهێنەرێن یارییا فوتسالێ‌ هاتە ڕێكخستن و خوزی حەمید تاكە كچا پارێزگەها دهۆكێ‌ پشكدارە كو دبیتە مەزنترین پلەیا ڕاهێنەران و دهێتە هژمارتن بۆ جارا دویێ‌ یە ل ئیراقێ‌ دهێتە دانان.
ل دۆر ڤێ‌ یەكێ‌ كچا باژێرێ‌ دهۆكێ‌ و ڕاهێنەرا یانەیا ئەلئەرتاوی یا سعۆدیێ‌ بۆ رۆژنامەیا ئەڤرۆ گۆت: ب خوەشحالی ڤە وەكو ئێكەم ڕاهێنەرا كچ ل سەر ئاستێ‌ كوردستانێ‌ و ئیراقێ‌ دناڤا خولا LEVEL 3 یا ئاسیایی پشكدار بووینە كو دبیتە یا نێڤدەولەتی ئەوا دێ‌ یا بەردەوام بیت هەتا شەشێ‌ مەها بهێت ل پایتەختێ‌ ئیراقێ‌ بەغدا ب پشكدارییا 23 ڕاهێنەرێن یارییا فوتسالێ‌ كو ژلایێ‌ وانەبێژێن فەرمی و باوەرپێكری ژ فدراسیۆنا ئاسیایی یێ‌ لوبنانی د. نەبیل ناسیف، د. وەمیز شامل و ب هاریكارییا وانەبێژێ‌ ئاسیایی هەیسەم بەعیوی و دێ‌ ب سەرپەرشتییا سەرۆكێ‌ لژنەیا فوتسالێ‌ و كەناران زیاد شاملی هێتە بڕێڤەبرن.
هەروەسان ناڤهاتی گۆت: ئەڤ خولە گەلەگ یا گرنگە بۆ ڕاهێنەرێن فوتسالێ‌ تایبەت ئەوێن حەز هەین د خولێن پیشەكاران ل هەر وەلاتەكێ‌ دەرڤە كار بكەن، پێنەڤێت شێوازێ‌ خولێ‌ تیۆری و پراكتیكی یە و ئەڤە ژی دەلیڤەیە زێدەتر مفایی بگەهینەمە، وەكو تاكە كچ دناڤ ڤێ‌َ خولێ‌ دا خوە سەربلند بینم و هیڤیدارم ب گەهمە وێ‌ ئاستی بلند بشێم مفایی ب گەهیمە وەرزشڤانێن كچ یێن باژێر و وەلاتێ‌ خوە كوردستانێ‌ دیسان ئەو یانەیا ئەز لێ‌ كار دكەم بشێن ئاستێ‌ یاریزانێن خوە یێن كچ بلندتر بكەم.
بۆ زانین ل وەرزێ‌ بۆری 2024-2025 خوزی حەمید وەكو ڕاهێنەرا ئێكێ‌ یا تیما ئەلئەرتاوی شیابوو تیما خوە ب گەهینە یارییا دووماهییا خولا فوتسالا كچێن سعۆدیێ‌ و شیان ڕێزا دویێ‌ ب دەستڤە بینن و ببیتە ئێكەم ڕاهێنەرا كوردستانی و ئیراقێ‌ ڕێزا دویێ‌ بهێت.