قەیس وەیس:
پشتی ب دووماهی هاتنا یاریێن گەڕا هەشتێ ژ خولا پلا ئێكا كوردستانێ یا فوتبۆلێ دا ئەوا 17 یانەیێن هەرێمێ هەڤڕكیێ بۆ چار پلێتێن دەربازبوون بەر ب نایابێ دكەن، دناڤا واندا پێنچ یانەیێن پارێزگەهێ دهۆك، سێمێڵا، شێخان، بەردەڕەش و تەناهی شەڕی بۆ سەركەڤتنان دكەن پێخەمەت دەربازبوونێ.
ڕاهێنەرێ دهۆكێ گەشبینە
تیما فوتبۆلا یانەیا دهۆك بەردەوامی دایە ئاست و ئەنجامێن خوە یێن باش و شیایە پشتی ئەنجامدانا حەفت یارییان پێشڤە بهێتە ڕێزا سێیێ ب كۆمكرنا 14 خالان، ژ چار سەركەڤتن، دو وەكهەڤی و ئێك خوسارەتی هەیە، یاریزانێن وێ 18 گۆل تۆماركرینە و ب پتنێ پێنچ گۆل ل سەر هاتینە تۆماركرن.
لدۆر هەلوەست و ئارمانج تیمێ هەرمان سالح ڕاهێنەرێ تیما دهۆكێ گۆت: سۆپاس بۆ خۆدێ تیما مە سەركەڤتنەكا باش ل سەر خاك ئینایی، هەرچەندە دنیڤا ئێكێ دا ئاست ب دلێ مە نەبوو لێ پشتی د نیڤا دویێ دا گوهۆڕین هاتینە كرن ئاست باشتر لێهات و یارییا مە ب سێ گۆلێن پاقژ ب دووماهی هات، پێنەڤێت ئارمانجا مە ئێكە ئەو ژی دەربازبوونە بۆ پلا نایاب كو جهێ خوە یێ دورست، خولا پلا ئێك یا بزەحمەتە ژبەركو هەڤڕكییەكا دژوار هەیە، تایبەت هەموو یانە دەمێ دكەڤتە بەرانبەر دهۆكێ ب هێز یاریێ دكەن، گەشبینم ل سەر تیما خوە و ڕژدین بۆ ئارمانجا خوە.
سێمێل كەڤتە تەلها ئارارات
پشتی ئەنجامێن سەركەڤتی ل سەر دەستێ ڕاهێنەرێ نوو محەمەد یوسف د دیارییا خوە یا گەڕا هەشتێ دا ب خالەكێ ژ هەولێرا پایتەخت ڤەگەریا پشتی دگەل یانەیا ئارارات ب دو گۆلان وەكهەڤ بووی، ئەڤێ ئەنجامی بوو ڕێگر تیما سێمێل ڕێزا دویێ ژ دەست بدەت و پاشڤەبچیتە ڕێزا پێنجێ ب كۆمكرنا 13 خالان، ژ سێ سەركەڤتن، چار وەكهەڤی و خوسارەتییەكێ، یاریزانێن وێ 15 گۆل كرینە، 13 ل سەر بووینە.
سەركەڤتنێن بەردەڕەش ڕاوەستیان
تیما یانەیا بەردەڕش تووشی خوسارەتیەكا مەزن بوو بەرانبەر یانەیا بابان ب سێ گۆلان بێ بەرانبەر د یارییا واندا ئەوا ژ گەڕا هەشتێ ل یاریگەها بابان هاتیە كرن، ئەڤی ئەنجامی نە هێلا یانەیا بەردەڕش پێشڤە بچیتە ڕێزەكا باش و خالێن وێ مانە 11 خال ل ڕێزا شەشێ ڕاوەستیا ژ سێ سەركەڤتن، دو وەكهەڤییان و سێ خوسارەتی هەنە، یاریزانێن وێ 10 گۆل كرینە و 12 ل سەر بووینە.
شێخان یا بزاڤێن خوە قورتالكرنێ دكەت
ژلایێ خوەڤە یانەیا شێخان دناڤ ئەرد و یاریگەها خوە دا دو خال ژ دەستدان پشتی دگەل یانەیا دچەمچەمال ب دو گۆلان وەكهەڤبووی، تیما سێیێ یا پارێزگەهێ ب تنێ حەفت خال هەنە ژ ئێك سەركەڤتن و چار وەكهەڤییان و سێ خوسارەتی هەنە، یاریزانێن وێ شەش گۆل كرینە لێ نەهـ گۆل ل سەر هاتینە تۆماركرن ئەوا ل ڕێزا 13ێ دهێت، ئەڤ ڕێزبەندییە یا باش نینە و پێدڤییە بەردەوام ئەنجامێن باش بینت ژبۆ خوە قۆرتالكرنێ.
تەناهی یا دمەترسیێ دا
تیما یانەیا تەناهی یا د بازنەیا مەترسیێ دا ئەوا ئەنجامێن وێ نە خوەجهـ پشتی د دووماهی یارییا خوە ژ چارچووڤەیێ خولێ ژ دەرڤەیی یاریگەها خوە دگەل بازیان بێ گۆ وەكهەڤبوو، ڕەوشا تیمێ د ڕێزبەندیێ دا باش نینە ئەوا پێنچ خال هەین ل ڕێزا 16ێ و بەری دووماهیێ دهێت ب ئێك سەركەڤتن، دو وەكهەڤی و خودانا چار خوسارەتیانە، بتنێ یاریزانێن وێ سێ گۆل كرینە لێ 14 گۆل ل سەر هاتینە تۆماركرن، د یاریێن بهێت دا هیچ دەلیڤەیەك نینە بۆ تەناهی ژبلی سەركەڤتنان ژبۆ پێشڤەچوون و مەترسییا داكەڤتنێ ڕاكەت.
چەند یانە سەردكەڤن و چەند دادكەڤن
ل دووڤ ڕێنمایێن فدراسیۆنا فوتبۆلا كوردستانێ بۆ یانەیێن پشكدار د خولا پلا ئێك دا، چار یانەیێن ڕێزێن پێشیێ دهێت دێ دەربازنە پلا نایاب و چار یانەیێن ڕێزبەندییا دووماهیێ ئێكسەر پاشڤەچنە پلا دو، ئەوا یاریێن وان ب شێوەیێ خول ئێك قووناغ دهێتە كرن.
هەلوەستێ گشتی پشتی ب دووماهی هاتنا یاریێن گەڕا هەشتێ
1- شەقلاوە 19 خال.
2- زانكۆیا جیهان 15 خال.
3- دهۆك 14 خال.
4- بابان 13 خال.
5- سێمێل 13 خال.
6- بەردەڕەش 11 خال.
7- چەمچەمال 10 خال.
8- كۆیە 10 خال.
9- بازیان نەهـ خال.
10- هەولێر هەشت خال.
11- خاك هەشت خال.
12- كفری هەشت خال.
13- شێخان حەفت خال.
14- شۆرجە شەش خال.
15- سۆران شەش خال.
16- تەناهی پێنچ خال.
17- ئارارات سێ خال.
یاریێن گەڕا نەهێ دێربیەك هەیە
چاڤەڕێ دهێتە كرن ل ئەینی و شەمبییا بهێت یاریێن گەڕا نەهێ بهێنە كرن ژ گرنگترین و بهێزترین یاریێن ڤێ حەفتیێ دا، یانەیا سێمێل دێ یانەیا دهۆكێ مێڤان كەت، شێخان دێ بیتە مێڤانا شۆرجە، هەروەسان، بەردەرەش دێ بازیان مێڤان كەت، هەر ژ یاریێن دی، خاك- بابان، كۆیە- ئارارات، هەولێر- مفری، سۆران- شەقلاوە، چەمچەمال- زانكۆیا جیهان، بۆ زانین یانەیا تەناهی دڤێ حەفتیێ دا دێ یا چاڤەڕێ بیت.
نيشاندان