سەرۆكێ هەرێما كوردستانێ وبالیۆزێ فرەنسا ل ئیراقێ دوپاتی ل وێ چەندێ دكەن كێشەیێن د ناڤبەرا هەولێرێ و بەغدایێ ب رێكا دانوستاندنێ و ل سەر بنەمایێ دستووری بهێنە چارەسەركرن.
نێچیرڤان بارزانی، سەرۆكێ هەرێما كوردستانێ، پێشوازی ل پاتریك دورێل، بالیۆزێ فرەنسا ل ئیراقێ كر.
د دیدارەكێدا، هەڤبەندیێن فرەنسا ل گەل ئیراقێ و هەرێما كوردستانێ هاتنە گەنگەشەكرن و هەروەسا بیر و بۆچوون ل دۆر رەوشا گشتییا ئیراقێ و هەرێما كوردستانێ، دەلیڤەیێن وەبەرئێنانێ و بازرگانیێ بۆ كۆمپانیێن فرەنسی ل ئیراقێ و هەرێما كوردستانێ، هاتنە لێكگۆهارتن.
هەردو ئالییان دوپاتی ل چارەسەركرنا كێشەیێن د ناڤبەرا هەردو حوكمەتێن ئیراقا فیدرال و هەرێما كوردستانێ ب رێكا دانوستاندنێ و ل سەر بنەمایێ دستوورێ ئیراقێ، كر.
د تەوەرەكێ دی یێ كۆمبوونێدا، باس ل دووماهی پێشهاتێن رۆژهەلاتا ناڤین هاتە كرن و سەبارەت ڤێ چەندێ هەردو ئالییان ب گرنگییا پاراستنا ئارامییا دەڤەرێ دوپاتكر و داكۆكی ل پێدڤییا دوورئێخستنا ئیراقێ ژ كێشە و ئالۆزیێن دەڤەرێ، كر.
چەند بابەتێن جهێ گرنگییا هەڤپشك، ئالییەكێ دی یێ دیدارێ بوو كو یان برێم، قۆنسلێ گشتیێ فرەنسا ل هەرێما كوردستانێ تێدا بەرهەڤ بووی.

پارتی دیموكراتی كوردستان ل سنوورێ پارێزگەها دهۆكێ 22 بەربژار بۆ هەلبژارتنێن جڤاتا نوونەرێن ئیراقێ یێن هەین، هەروەسا پارتی ل سنوورێ پارێزگەها نەینەوا ژی 62 بەربژار بۆ هەلبژارتنێن جڤاتا نوونەرێن ئیراقێ یێن هەین كو بڕیارە ل 11/11/2025 بهێنە ئەنجامدان.
سەباح بەیتوللا، هاریكارێ بەرپرسێ مەكتەبا رێكخستنا پارتی دیموكراتی كوردستان ل پارێزگەها دهۆكێ گوت» هەژمارەكا مەزن ژ كادرێن پارتی دیموكراتی كوردستان ناڤێن خوە تۆماركربوو بۆ وێ چەندێ ببنە بەربژارێن لیستا پارتی بۆ هەلبژارتنێن جڤاتا نوونەرێن ئیراقێ».
گوت ژی» پارێزگەها دهۆكێ ب گۆڕەی قانوونێ دێ 11 نوونەر ل جڤاتا نوونەرێن ئیراقێ هەبن، ژبەر وێ چەندێ ژی پارتی ل سنوورێ پارێزگەها دهۆكێ و ئیدارەیا سەربخوەیا زاخۆ دێ 22 بەربژار هەبن».
هاریكارێ بەرپرسێ مەكتەبا رێكخستنا پارتی دیموكراتی كوردستان ل پارێزگەها دهۆكێ رۆهنكر ژی» هەر كەسەكێ د ناڤ پارتی دیموكراتی كوردستان دا خوە بەربژار بكەت پاشی پێرابوونێن حزبی و قانوونی هەنە بۆ ئێكلاكرنا ناڤێن بەربژارێن پارتی و بێگومان بەربژارێن پارتی دێ ژ خەلكێ پسپۆر و خەباتكەر و دیارێ دەڤەرێ بن».
ژ ئالیێ خوەڤە خسرۆ گۆران، بەرپرسێ لقێ 14 یێ پارتی دیموكراتی كوردستان گوت» پارتی ل سنوورێ پارێزگەها نەینەوا سێ لق یێن هەین ئەوژی لقێ 23 ل مەخموورێ و لقێ 14 ل مووسل و لقێ 17 ل رۆژئاڤایێ دیجلە و ل سنوورێ هەرسێ لقان پارتی 62 بەربژار یێن بۆ هەلبژارتنێن جڤاتا نوونەرێن ئیراقێ یێن هەین ژبەركو بەهرا پارێزگەها نەینەوا ل جڤاتا نوونەرێن ئیراقێ 31 كورسی نە».
خسرۆ گۆران گوت ژی» بەربژارێن پارتی ژ هەموو تەخ و چین و پێكهاتە و نەتەوەیان پێك دهێن، ژ بەركو ئاكنجیێن پارێزگەها نەینەوا چار ملیۆن و 500 هزار كەسن و یا مەزنە، بەربژارێن مە ژی 95% كوردن و ژ هەموو ئایین و نەتەوەیان تێدا هەنە وەكو كورد و سوننە و شیعە و ئێزدی و پێكهاتەیێن دی ژی».
بەرپرسێ لقێ 14 یێ پارتی خویاكر ژی» بەربژارێن مە ل سەر بنەمایێ باوەرنامەیێ و ژێهاتنێ و شارەزاییێ و دلسۆزیێ و هەبوونا وان د ناڤ خەلكیدا و خودان ئەزموونێن باش یێن هاتینە دیاركرن. لەوما ئەڤە پیڤەرن بۆ بەربژاركرنێ و مە بزاڤكریە بنەمایێن باش بن بۆ بەربژاركرنا وان . پشكەك ژی ژێ كو دوبارە هاتینە بەربژاركرنێ ئەون یێن ب ئەزموون و د چالاكن و پەرلەمانتارێن دیارن ل شنگالێ و مەخموورێ و زومار و دەشتا نەینەوا و سەنتەرێ باژێرێ مووسلێ و جهێن دی».

ئەندامەكا كۆمیتەیا ناڤەندییا پارتی دیموكراتی كوردستان راگەهاند: هندەك ئالیێن بەغدا پێگیری بڕیارێن حوكمەتێ نابن و بەردەوام كێشەیان بۆ رێككەفتنێ ل گەل هەرێما كوردستانێ دروست دكەن.
ئەشواق جاف، ئەنداما كۆمیتەیا ناڤەندییا پارتی دیموكراتی كوردستان گوت» چەند ئالییەك ل بەغدایێ كو دژی رێككەفتنێ نە ل گەل هەرێما كوردستانێ، باوەری ب فیدرالیزمێ نینە، هەردەمێ ئیراقێ بەرژەوەندییا هەڤوەلاتیێن خوە و سەروەرییا ئاخا خوە خستە بەری بەرژەوەندییا وەلاتێن دی و فەرمانێن دەرەكی، وی دەمی دێ بیتە وەلاتەكێ دیموكراسی و فیدرالی».
ئەشواق جاف گوت ژی» ب دیتنا من ب شێوەیەكێ دەمكی، دێ كێشەیێن دی بۆ هەرێما كوردستانێ دروست كەن، چونكە ئەوێن ل ئیراقێ هاتینە سەر دەستهەلاتێ، هندەك ژوان باوەری ب فیدرالیزمێ نینە، تاكو بڕیارا سیاسییا ئیراقێ تمام ئیراقی نەبیت و كاریگەرییا سیاسەتا دەرەكی ل سەر نەبیت، هەڤدەم تاكو بەرژوەندییا هەڤوەلاتیێ ئیراقێ ژ زاخۆ هەتا بەسرە نەبیتە پرسا بەراهیێ و بەری بەرژەوەندییا وەلاتێن دی، نابیتە وەلاتەكێ دیموكراسی و فیدرالی».
وێ ئەنداما كۆمیتەیا ناڤەندییا پارتی خویاكر» د هەموو دانوستاندنێن مە دا ل گەل حوكمەتا ئیراقێ، مە رێككەفتن كریە و ل كارنامەیا حوكمەتێ هاتییە جهگیركرن و ل جڤاتا نوونەرێن ئیراقێ دەنگ ل سەر هاتییە دان، بەلێ سەرۆكێن حوكمەتێن ئێك ل دووڤ ئێكێن ئیراقێ دەمێ ل سەر كورسیێن خوە د روونن، كارنامە پشتگوهڤە دهاڤێت، نەك هەر ئەو بەندێن پەیوەندی ب هەرێما كوردستانێ هەی، بەلكو پترییا بەندێن د ناڤ كارنامەیا حوكمەتێ دا هەبوون، لەوما مە داخوازكر ئالیێ سیێ بەرهەڤی دانوستاندنان بیت یان ژی چاڤدێرییا دانوستاندنان بكەت».
دیاركر ژی» مە تشتەكێ زێدەتر نەڤێت ژ ئەوا د دستووریدا هاتی، ب كێمتر ژ وێ چەندێ ژی رازی نابین و قەبوول ناكەین، ئەوان وێنەیەكێ گەلەك خراپ ژ ئیدارەدانا دەولەتێ نیشا هەموو جیهانێ دا ب بڕینا مووچەیێ خەلكێ كوردستانێ بیێ كو هیچ بەلگەیەكێ دستووری و قانوونی هەبیت».

مەسرور بارزانی، سەرۆكێ حوكمەتا هەرێما كوردستانێ ل مێرگەسۆرێ پشكداری د بەهییا عەبدوللا عەزیز مەلا خال هەمزە مێرگەسۆری دا كر.
مەسرور بارزانی هەڤخەمییا خوە گەهاندە مالبات و گەسوكارێن رەحمەتی و هیڤی خواست خودایێ مەزن گیانێ وی ب بەهەشتێ شاد بكەت و ئارامیێ ب مالبات و كەسوكار و هەڤالێن وی ببەخشیت.