بەرگەشت ئاكرەیی، پەیڤدارێ دەستەیا وەبەرهێنانێ ل هەرێمێ بۆ رۆژنامەیا ئەڤرۆ دیار كر، سەرۆكێ دەستەیا وەبەرهێنانێ و وەزیرێ ساخلەمیێ‌ ل حوكمەتا هەرێمێ پرسا وەبەرهێنانێ د كەرتێ ساخلەمیێ‌ دا گەنگەشە دكەن.
ناڤهاتی گۆت: «هەردو لایان بەحس ل ڕەوشا وەبەرهێنانێ د بیاڤێ‌ ساخلەمیێ‌ دا و ڕێكارێن پێشڤەبرن و بەرفرەهكرنا ڤی واری كر، دیسا دووپاتی ل سەر گرنگیا ئینان و بكارئینانا كەرستە و ئامیرێن نۆشداری یێن نوو و پێشكەفتی و بكارئینانا براندێن جیهانی كرن، ب مەرەما بلندكرنا ئاستێ خزمەتگوزاریێن ساخلەمیێ‌ و دابینكرنا خزمەتەكا باشتر و پێشكەفتی بۆ وەلاتیێن هەرێما كوردستانێ و باس ل گرنگیا هەماهەنگی و هەڤكارییا ناڤبەرا لایەنێن پەیوەندیدار هاتە كرن، بۆ پێشڤەبرنا وەبەرهێنانێ د ڤی واری دا».

رەمەزان زەكەریا:

دو ڕێكخراوێن ئەلمانی سێ شوونوارێن گرنگ یێن دەڤەرا ئاكرێ ب هەماهەنگی ل گەل ڕێڤەبەریا گشتی یا شوونوار و كەلەپوورێن هەرێما كوردستانێ و ڕێڤەبەریا شوونوارێن دهۆكێ‌ و ئاكرێ نووژەن دكەن.
هەردو ڕێكخراوێن لۆتس فلەوەر و گیز یێن ئەلمانی دەست ب نووژەنكرنا سێ شوونوارێن گرنگ یێن ئاكرێ كرینە، ئەو ژی كەنیسەیا مەریەما عەزرا، قوتابخانا كەڤن یا كەنیسێ و پرا كنیشتێ نە.
د. بێكەس بریفكانی، ڕێڤەبەرێ گشتی یێ شوونوار و كەلەپوورێن دهۆكێ ڕاگەهاند: بجهئینانا پڕۆژەیان دەلیڤەیا كاری بۆ پتر ژ 25 كەسان پەیداكریە گۆت: «نووژەنكرنا وان شوونەوارێن مێژوویی یێن دەڤەرا ئاكرێ دێ‌ بیتە ئەگەرێ ڤەژاندنا زێدەتر یا كەرتێ گەشتیاری ل دەڤەرێ».

ئامێدیێ، مەحمود نهێلی:

پشتی پرۆسێسا ئاشتیێ و چێكرنا جۆیا گوندێ وان، جۆتیارێن گوندێ گوهەرزێ شیان پشتی حەفت سالان ژ بەردانێ‌ ژ بەر شەڕی و ئالۆزیێن دەڤەرێ و نەبوونا ئاڤا پێدڤی، بیستان و زەڤیێن خوە شین بكەنەڤە.
سالح گوهەرزی ئێكە ژ جۆتیارێن دەڤەرێ بۆ ئەڤرۆ دیار كر، ئەو شیاینە بیستان و زەڤیێن خوە شین بكەنە ڤە و گۆت: «بەری حەفت سالان جۆیا گوندێ مە ژ ئەگەرێ شەڕێ پەكەكێ و توركیا ژ ناڤچوو بوو و ئاڤا پێدڤی نەدگەهشتە بیستانان، ژ بەر وێ یەكێ ژی جۆتیار و خەلكێ گوندی نەدشیان ب دروستی رەز و بیستانێن خوە شوین بكەن».
ناڤهاتی گۆت: «نوكە مە زێدەتر ژ 125 دۆنەمێن ئەردێ دێم ئاڤی كرینە و شین كرینە ڤە، دەستخۆشیێ‌ ل حكومەتا هەرێمێ دكەین، كو ئەڤ سالە جۆیا گوندێ مە چێكریە و ئاڤەكا باش دگەهیتە ناڤ بیستانێن مە».

هەولێر، قائید میرۆ:
رێڤەبەرا ئەندازا هاتنوچوونێ دیاركر، هەژمارەكا زۆرا پڕۆژەیێن رێك و پران ژ لایێ حوكمەتا هەرێما كوردستانێ ڤە هاتینە ئەنجامدان و ئەندازەیا هاتنوچوونێ ژی كارێ ئەندازەیا رێكان ئەنجامدایە و دبێژیت: پڕۆژەیێن رێك و پران كاریگەری ل سەر سەلامەتیا وەلاتیان هەبوویە.
دیلان عەبدولا، رێڤەبەرا ئەندازەیا هاتنوچوونێ بۆ رۆژناما ئەڤرۆ خویاكر، كابینەیا نەهێ یا حوكمەتا هەرێما كوردستانێ گرنگیەكا زۆر ب رێك و پران دایە و كاریگەری لسەر كەرتێ هاتنوچوونێ هەبوویە، رێكا د ناڤبەرا باژێڕان دا زۆر نێزیكتربوویە و گۆت: «ئێك ژ كاریگەریێن پڕۆژەیێن رێك و پران پاراستنا گیانێ وەلاتیانە، لەوڕا رێڤەبەریا ئەندازەیا هاتنوچوونێ د سالێن بۆری دا ب شێوەیەكێ سەردەمیانە ئەركێ خۆ ئەنجامدایە و چەندین پڕۆژە بۆ كێشانا هێلێن سەر جادەیان و دانانا بەربەستێن سەلامەتیێ و هێمایێن هاتنوچوونێ بجهئینانینە».
دیلان عەبدولا گۆت ژی: «ئەنجامدانا پڕۆژەیێن رێك و پران بووینە ئەگەر قەلەبالغی كێم ببیت و روودانێن هاتنوچوونێ ژی كێم ببن، ئەڤە ژی ئەگەرە رێژەیا گیان ژ دەستدانێ كێم ببیت، ئارمانجا سەرەكیا مە پاراستنا گیانێ شۆفێر و وەلاتیانە، هەر پڕۆژەیەكێ دهێتە ئەنجامدان و هەر ئەندازەیەكا بۆ دهێتە كرن، مەرەم ژێ‌ ئەوە كارئاسانی بۆ شۆفێری پەیداببن».

زاخۆ، دلۆڤان هالۆ:

یونس محەمەد، سەرۆكێ باژێڕڤانیا ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو د پڕۆژەیەكێ نوو یێ خزمەتگوزاری دا ب گوژمێ دو ملیار دیناران جاددە و كۆلانێن ناڤخوە یێن گوندێ دەشتمرا خوارێ و سەری ل ئیدارەیا سەربخوە یا زاخۆ دهێنە چێكرن و قێركرن.
سەرۆكێ باژێڕڤانیا ئیدارەیا سەربخوە یا زاخۆ گۆت: «ب درێژاهیا پێنج كیلۆمەتران جاددە و كۆلانێن ناڤخوە یێن ڤی گوندی دێ هێنە چێكرن و قێركرن، دیسا ب درێژاهیا هزار و 500 مەتران سۆلینێن ئاڤڕێژ ژی دێ هێنە دروستكرن».
گۆت ژی: «ئەڤ پڕۆژە ب مەرەما باشتركرنا ڕێكێن هاتنوچوونێ و دابینكرنا خزمەتگوزاریانە بۆ وەلاتیێن گوندێ دەشتمرا خوارێ و سەری، ل دەمەكێ نێزیك دێ ئەڤ پڕۆژە ب دووماهی هێت و كەڤیتە د خزمەتا خەلكێ گوندی دا».

دهۆك، لەزگین جۆقی:

رێڤەبەری كۆچ و كۆچبەران ل دهۆكێ دیاركر كو گەڕا نەهێ یا ڤەگەڕیانا ئاوارەیان بۆ شنگالێ‌ دێ دەست پێ كەت و هەتا مەها خزیرانا سالا بهێت دێ یا بەردەوام بیت.
پیر دەیان، رێڤەبەری كۆچ و كۆچبەران ل دهۆكێ بۆ رۆژناما ئەڤرۆ گۆت: «د ناڤ گەڕا نەهێ دا ناڤێن پتر ژ 400 خێزانێن ئاوارە بۆ ڤەگەڕیانا شنگالێ‌ دێ هێنە تۆماركرن، ئاوارە ل هەموو كەمپان دشێن ناڤێن خۆ بۆ ڤەگەڕیانا شنگالێ‌ تۆمار بكەن».
گۆت ژی: «چو گڤاشتن ل سەر ئاوارەیان نینە، دئازادن بۆ ڤەگەڕیانا شنگالێ‌، نوكە ل كەمپان دەست ب تۆماركرنا ناڤێن ئاوارەیان هاتیە كرن و دێ یا بەردەوام بیت».

وەلاتیێن رۆژئاڤایێ کوردستانێ بەردەوامیێ ددەتە خوەنیشادانان و داخواز دکەن کو پەروەردە ل هەموو رۆژئاڤایێ کوردستانێ ب زمانێ کوردی بیت و مامۆستایێن کورد ژی دیار دکەن هەکە بریارا شامێ نەهێتە هلوەشاندن دێ ئالۆزیێن مەزن روو دەن.

چەند رۆژن ل پڕانیا باژێرێن رۆژئاڤایێ کوردستانێ وەلاتیێن کورد دەست ب خوەنیشادانان کرینە و داخواز دکەن حوکمەتا شامێ بریارا خوە یا ل دۆر پەروەردەیێ ل رۆژئاڤایێ کوردستانێ هلوەشینیت، چونکی نابیت ل رۆژئاڤایێ کوردستانێ تنێ سێ وانە ب زمانێ کوردی بن و دڤێت هەموو وانە ب زمانێ کوردی بن و پێدڤیە تنێ چەند وانەیەک ب زمانێ عەرەبی بن، چونکی چەندین سالن زارۆیێن کوردان ل هەموو رۆژئاڤایێ کوردستانێ ب زمانێ کوردی دخوونن و نها سەپاندنا زمانێ عەرەبی دێ بیتە ئەگەرێ ئالۆزیێن گەلەک مەزن و دڤێت شام پێداچوونێ د بریارا خوە دا بکەت.
گەلەک ژ مامۆستایێن کورد ژی دیار کرن، چەند سالن پەروەردە ل رۆژئاڤایێ کوردستانێ ب زمانێ کوردی بوویە و نابیت نها ب جارەکێ هەموو تشت بهێنە گوهۆڕین و ئەو یەک دێ بیتە ئەگەرێ روودانا ئالۆزیێن گەلەک مەزن و نها ژی گەلەک ژ قۆتابیێن کورد ناخوازن بچنە قۆتابخانێ و سالا نوو یا خواندنێ بایکۆت کرینە، ئەو یەک ژی نیشا ددەت خەلک ژ رەوشا نها رازی نینن و دڤێت حوکمەتا شامێ پێداچوونێ د بریارا خوە دا بکەت، کا چاوا زارۆیێن عەرەبان ماف هەیە ب زمانێ عەرەبی بخوونن دڤێت زارۆیێن کوردان ژی هەمان ماف هەبیت و هەکە ئەو دبێژن کورد برایێن مە نە وی دەمی دڤێت رێزێ ل داخوازیێن کوردان بگرن.
ل ئالیێ دی ئیلهام ئەحمەد سیاسەتمەدارا کورد ژی دیار کر، ئەو ژ بریارا شامێ دەرحەق پەروەردێ رازی نینن و وان دەست ب بزاڤەکا مەزن کرینە کو شام پێداچوونێ د بریارا خوە دا بکەت، چونکی یا نها دهێتە کرن دێ بیتە ئەگەرێ ئالۆزیێن مەزن، دڤێت شام ل گۆر راستیا ل رۆژئاڤایێ کوردستانێ سەرەدەریێ بکەت و دڤێت پڕانیا وانەیێن زارۆیان ب زمانێ کوردی بن و گۆت: (مە بەری نها ژی سەبارەت ب زمانێ کوردی گەلەک جاران بۆ بەرپرسێن شامێ دیار کریە کو دڤێت رێزێ ل داخوازیێن گەلێ کورد بگرن، سێ وانە د حەفتیەکێ دا گەلەک کێمن و بێگومان گەلێ کورد ل سووریێ ڤێ یەکێ قەبوول ناکەت، خوەنیشادانێن نها ژی نیشا ددەن کو رەوش وەسا بەردەوام نابیت و مە ژی ب فەرمی داخواز ژ حوکمەتا شامێ کریە کو پێداچوونێ د بریارا خوە دا بکەت).
گەلەک ژ چاڤدێرێن سیاسی یێن رۆژئاڤایێ کوردستانێ ژی دیار دکەن کو بابەتێ زمانێ کوردی هێلا سۆرە و دڤێت هەموو هێز و ئالیێن سیاسی یێن رۆژئاڤایێ کوردستانێ رێ نەدەن سیستەمێ نها یێ پەروەردێ بهێتە گوهۆڕین، هەکە نها ل هەمبەر بریارا شامێ هەلوەستەک مەزن نەبیت دێ پاشی شام گەلەک بریارێن دی ژی ل دژی گەلێ کورد دەت و گرنگە هەموو پارت و هێزێن سیاسی پشتەڤانیێ ل داخوازیێن گەلێ کورد بکەن و نابیت سیستەمێ پەروەردێ ل رۆژئاڤایێ کوردستانێ بهێتە گوهۆڕین، چونکی مافێ رەوا یێ گەلێ کوردە کو پەروەردە ب زمانێ کوردی بیت و نابیت حوکمەتا نها یا شامێ بەردەوامیێ بدەتە سیاسەتا شاش یا رژێما بەرێ یا سووریێ، ژ بەر ڤێ یەکێ ژی دڤێت کورد ل رۆژئاڤایێ کوردستانێ بەردەوامیێ بدەنە خوەنیشادانان دا شام نەچار بیت بریارا خوە یا شاش هلوەشینیت.