سیلاڤ بازێرکی

بەلگێن داران ڕەنگێ پێتی یێ پاییزێ یێ لێ
هەتا بێهنا گول و گیا، بێهنا گیا ب هوینێ یا لێ
بەری خەلك بچنە سەیرانێن بوهارێ
من دزانی خەملا پار نینە ڤێ بوهارێ
گول بەری ڕابن ب بشکڤن، هشك ببوون
هەمی بێهن ل سەر گۆڕەکی کۆم ببوون
هندی چاڤێ خۆ دگێرینم دا بابێ خۆ ببینم
بەلکی وەکی هەرجار ل سەرێ دیوانێ ببینم
ئەز چ ل جەژن، بوهار و نەورۆزان بکەم؟
نزانم کراسەکێ دی یێ ڕەش کەربکەم؟
ڤێ جەژن و نەورۆزێ چ تام و بێهن لێ نینە
چونکو بابێ من ل ناڤ چ ڕێزین دیوانا نینە
هزار جەژن نەشێن ڤی دلێ من خۆش بکەن
کەسێ شیان نینن خەریبییا تە ژ دلی دەر بکەن

هەمی جەژنا دا چاڤەڕێی بەژنا تە بم
نهۆ دێ هەروهەر هەلگرا خەما تە بم
تۆ ژ من هاتیە ستاندن و ئەز یا ڕازی مە!
ب کڕنۆشا سوپاسییێ ڤە بۆ خودێ یا ڕازی مە
لێ من چ دل نەماینە کەیفێ پێ ببینم
چونکو نەشێم بەژنا بن ئاخکری ببینم
خوەزی ئەز ئەو ئاخ بام یا ل سەر سینگێ تە
یان خۆزیکێن وی دەمێ دهێم بۆ دیدارا تە
ڤێ خەریبییێ جەرگێ من یێ کون کون کری
چاڤێ من ژ کەیف و خوشیان یێ کۆرە کری

حازم بلەیی

ل بن سیبەرا عەشقێ…
ل ڤێ خاکێ
خەم نە مێڤانەکێ ڕێڤینگە
بەلکو ئەو ئاگرێ پیرۆزە
یێ د کانییا دلێ مە دا چ جاران ڤەنامریێت.
ئەگەر ئەم ڕەشپۆشین
نە ژبۆ هندێ یە کو ئەم ژ رۆناهیێ دترسین!
بەلکو خەمێ ل سەر سینگێ مە هێلین چێکریە
و بریار نەدایە چ جاران کۆچ بکەت.

هەمی تشت ژ کێلێن باپیری دەستپێکر
ژ بێدەنگیا وان کێلێن مژاوی…
ئەوێ خوینا خۆ کرە ئاڤا کانییان
دا کو ڕەهێن مە نەشکێن.

پاشی… گۆری هاتە سەر بابی
ئەوێ بەرگێ وی یێ پێشمەرگایەتیێ
ب سەربلندی د ناڤ ئاگرێ ڤان چیایان دا سۆتی
دا کو ببیتە پارچەک ژ مێژوویێ.

مە گوت: ئێدی بەسە!
دێ کوڕێ مە ل بن سێبەرا وێ ئازادیێ روینیت
ئەوا ب خوینا وان هاتیە ئاڤادان
مە دخواست ئارامیەکێ ببینیت
سیبەرەکێ…کو بابی و باپیری ب گیانێ خۆ چێکری.
لێ مخابن!
تارییا ژێرزەمینێن ترسنۆکان ل هیڤیێ بوو
لەوا کوڕێ مە ژی
ب هەمان ناڤێ پیرۆز بوو ب قوربانی…
دا کو وێ سیبەرا نیڤرۆ، بۆ نەڤییان تەمام بکەت.
ئەڤە زنجیرەیا گەهشتنەکا بێ دوماهی یە
هەر برینەکا نوو،
پەنجەرەیەکە بەرەف ئاسۆیەکێ
کو تێدا خەم وەک سیبەرەکا هەمیشەیی
ل گەل مە دژیت.
زارۆکێن مە
پێش کو فێری پەیڤا ژیانێ ببن
خۆ د ناڤ کفنێن ڕەش یێت خەمێ دا دبینن
بەرگێ باب و باپیرێن خۆ…
وەک ئەمانەت دپارێزن.
ئەڤە قەدەرا مەیە
خەم نەک وەک ژان
بەلکو وەک ناسنامە هەلگرین
چونکە ئەوێ د ناڤ خەما نیشتمانێ خۆ دا
نەسۆت بیت،
چ جاران تاما ڕاستییا ژیانێ نزانیت.

پەراوێز:
ئەڤ تێکستە وەک وەفادارییەک هاتیە نڤیسین بۆ گیانێ پاکژێ شەهیدێن شەڤا ٢٣ ل سەر ٢٤ی ئادارا ٢٠٢٦، کو تێدا ب مووشەکان بارەگایێ هێزا پێشمەرگەی ل دەڤەرا (سپیلک) ل ئیدارا سۆران هاتە تۆپباران کرن، و بوو ئەگەرێ شەهیدبوونا شەش پێشمەرگەیێن قارەمان و برینداربوونا سی یێن دی. ئێک ژوان شەهیدا، ب باب و باپیر شەهیدن.

حەجی حامد هروری

ژینگەها دبێژیت:
ئەڤ سال ئەز گەلەکا ڕند و جوان و ب خەملم، جوانی و ڕندییا من هەمی دول و نهال و گر ب کەسکی و گولێن رەنگا و رەنگ داپۆشینە. .
سویلاڤ وەک مەیا سەرخۆشا دهێت خار، ڕووبار دین و هاربووینە، هەمی گلێش و کەرب و کین ڕامالشتینە، دار و تەڕاش بخەملن، داراچەقێن خۆ خویلکرینە، ئاوازێن تەیر و بلبلا ژینگە ڕاکرییە ڕەقس و تلیلییا، پەزکیڤی کەفتنە دگولهێلا عەشکەکا بێ وێنەدا، دناڤ سروشتی دا دلەیزن، کەو کەوزویری ل مل و دۆل و نهال و چیا دقەبن، ئەو سڤۆرێ زڤستانێ هەمییێ دقوقلکا دارێ دا گۆشەگیربووی، وەک سۆفییا دێ هێتە دەر، زیڕەزیڕێ لسەرچەقێن دارێ لاڤا بۆ دارێ دکەت کو وێ سالێ حەواندی.
ژینگەهـ : گازندا خۆ دگەهینیت مژ و عەوران و بارانێ، ئەرێ هوین دزانن ئەز گەلەک سۆپاسییا هەوە دکەم وە ئەز تێر ئاڤ کریمە، لێ جاران ئەز پێدڤی هەناسە و گەرماتییا رۆژێ مە ب شەڤێ غەریبێ هەیڤ و دیتنا ستێرا نم.
گەر چاڤێ ڕۆژێ هەلهات، سینگێ خۆ بدەم ڕۆژێ، ژبەرکو ب تێهنییا رۆژێ هاویژدبم، مەست دبم، زیندی گیانەوەر ژی دێ جۆت جۆت دناڤ سروشتێ من دا مەست و سەرخۆش بن، کەڤنە گولهێلا جۆتبوونێ وێ گاڤێ ئەز وان پەردە پۆش و دنخێڤم دکەم.
عەوری و بارانێ گۆت:
ئەز دێ خۆ دەمە لایەکی مژ و باران دێ خۆ زیزکەن، لێ وێ گاڤێ هندەک دڕندە و هۆڤ دێ هێن و ڕند و جوانییا تە بن پێ و کرێت کەن، دێ تە بێ هەتک و ڕویسکەن.
ئاگری بێ رەحمانە لسەر سینگێ تە هەلکەن، ناهێلن داڤەک ژکەزییا تە سەرێ خۆ بلندکەت، ئەڤ دڕندە چ مێهرەبانییێ لدەڤ نابینی، سپێدێ تا ئێڤارێ دێ پێ ل جوانییا تەنن، چەند خوارنا خۆ یا ڕۆژێ دێ لبن سیها دارێ د دفنا خۆدا ئینن، کەیف و خۆشییێ لسەر سینگێ تە کەن، لێ مخابن ئێڤارێ هەمی بەرماییکێن خۆ دێ ل بەر بێهنا تە هێلن، دێ تە ژی هەڕمینن، دێ گیانەوەرا ژی ژەهراویکەن و ژ تە زیزکەن. تو دێ خۆ بۆ کییە مەحفیر، داربچەقێن خۆڤە دێ بۆ بنە سیهوان، لێ ئێڤارێ دێ تە بێ دەستنڤێژ هێلن، ئها وێ گاڤێ دێ پێدڤی من بی، جارەک دی دێ خۆزی و هەوارێن خۆ گەهینییە من بهێم سەرێ تە بشووم، جارەکا دی تە تافیل کەم.

مەتین سەباح جمعە

ل ژوورەکا تاری و بێدەنگ، نڤیسەرەک ل پشت مێزا خۆ روینشتبوو، چاڤێن وی یێن وستییای ب تنێ ڕەشاتییا مەرەبێ و سپیاتییا کاغەزێ ددیتن. بۆ وی، ژیان نە یا ب ساناهی بوو؛ هەر پەیڤەکا د نڤیسی، پارچەک بوو ژ وێ خەمێ یا کو د دلێ وی دا ڕەگ ئاڤێتین. هەست دکر کو نەخۆشیێن ژیانێ وەکی مژەکا ستویر دەوروبەرێن وی گرتینە و دڤێن قەلەمێ وی بشکێنن. وی دگۆتە خۆ: «پا چەوا ئەز دشێم نڤیسینێ بۆ خەلکی بکەم، دەما ژیان ل بەر چاڤێن من ئەڤقاس یا تاری و گران بیت؟».
د وێ تنێبوونێ دا، نڤیسەری خەیالا پیرەمێرەکێ زانا کر، کو د هزرا وی دا وەکی ڕێ نیشاندەرەکێ ددرەخشی. زانایێ پیر بازنەکێ زێرین دایە دەستێ وی و ب دەنگەکێ هێمن گۆتێ: «کوڕێ من، ل ڤێ بازنێ بنێڕە، ل سەر نڤیسییە: «ئەڤە ژی دێ بۆریت…». ئەگەر تو د ناڤ تاریاتییا نەخۆشیێ دا نەیی، تو چ جار قەدرێ چرا و ڕۆناهییێ نزانی. خەما تە، نە دویماهییا ڕێیێ یە، بەلکو ئەو هێزە یا کو دێ پەیڤێن تە کەتە هیڤی بۆ دلێ خەلکی».
نڤیسەری پێنوسێ خۆ بلند کر، وی زانی کو هەر چەند ژیان ل بەر چاڤێن وی یا نەخۆش بیت، بەلێ ئەرکێ وی ئەوە وێ خەمێ بکەتە خۆشی بۆ یێن دی. وی ل سەر کاغەزێ نڤیسی: «خۆشی ئەو چرایە یا ڕێکا من ڕۆشن دکەت، بەلێ نەخۆشی و خەم ئەو تاریاتییە یا فێری من دکەت چەوا ڤێ چرایێ د ناڤ بایا دا بپارێزم».
ژ وێ شەڤێ پێدا، نڤیسەری ب خەما خۆ دەست ب چێکرنا هیڤییان کر. پەیڤێن وی بوونە دەرمان بۆ برینێن خەلکی، چونکی وی دزانی کو نە خەم دێ مینیت و نە خۆشی، تنێ ئەو ڕاستییا مرۆڤایەتییێ دمینیت یا کو د ناڤبەرا هەردوکان دا دهێتە نڤیسین.

فەهیما ئیبراهیم

تابلۆیەکم ژ بۆیاغا ئازاران، تێکەلەکم ژ دەرد وبرینان. هەر رەنگەک ئاماژەیێ ب کەسەرەکێ ددەت. چ گیانێن ساخ دناڤ وێنەیێ مندا نینن، گەڤالێ کەسەکی یە د گۆڕەکی ڤەکری دا هاتیە وێنەکر و چ بێهنا ژیانێ ژێ ناهێت، چ دلخوەشکەری د دیتنا وی دا نینە. هەر کەسێ تەماشەی بکەت بتنێ رۆندکان دبارینت… مینا تابلۆیەکی ئاشۆپی ب برینەکا سالان تۆزا خەریبییێ دارێتییە سەر خویا دبت.
هەر پارچەک ژ من ب سالان هاتیە نەخشاندن، گەلەک ئازار و نەخوەشیێن دیار دکەڤنە بەر چاڤان. تا ئیرۆ کەس نەشیایە شڕۆڤەکێ بۆ ببینت. د بنەرەت دا ناهێتە شڕۆڤەکرن، بەلکو موعجیزەک بت یان ژی نفرەتەک بت پێ هاتبمە گرێدان. دزانم تە تێکەلییەکا باش دگەل ڕەنگان هەبوو، تە دزانی دێ چەوان ڕەنگان تێکەلی هەڤ کەی، دا کو جانترین کەڤال وێنەکەی.
تا ئەڤڕۆ هێشتا گرفتارم، خوە ناس ناکم، تە پتری هەموو رەنگا رەنگێ ترسی بکارئینابوو. نە دزانم بەنییەكا خودێ مە مینا هەر بەنییەكا دی، یان ژی مڕۆڤەکا نفرەتلێکریمە بۆ ئازاران هاتیمە وێنەکرن. ل خوە دنێرم ژ بلی ڤی دلێ تەمەت گەردوونی خەم و ترس هەلگرتی چ تشتێ دی دگەل من نینە. من هەموو باوەریێن خوە ژ دەستدان. من خوە ل بەندا هەلوەریانا ئازارێن خوە گرت. چەند دەم دبۆرت کوما وان ل سەرئێک دبنە چیا و ل بن دا پتر ئاسێ دمینم. ل بەندا وێ رۆژێ بووم تو بهێی دەستێ من بگری و من رزگارکەی، نە ئەو ڕۆژ هات و نە تو بۆ من بوویە رزگارکەر.
دزانم کەڤالێ من ب دەستێن تە یێن رەنگین هاتیە نەخشاندن، لێ تۆزا سالان شۆنتبلێن تە ل سەر نە هێلاینە. بتنێ دکێلیکەکێ دا تو هاتبای و ئەز ژ ڤی چارچۆڤەی دەرئێخستبام، ب تبلێن خوە یێن نازک ڕۆندکێن من ڤەمالی بان، ئەڤ ماندیبوونا هندە سالان دا مینا پەڕێ بالندەیەکی سڤک بت و ل گەل بایێ ئۆمێدەکا دوور فڕت. من حەزدکر دەمێ تە نیگاردکرم تە پارچەک ژ من ژبیرکربا، تە ئەڤ دلێ هندە مەزن ل سەر ڤی تابلۆیێ چارچۆڤەکری نەخشە نەکربا مادەم تە دزانی دێ هندە ئازاران بینت. دا بەرەکی رەق ل شوونا وی کەیە د ڤی سینکی دا. من نە دزانی نیازێن تە دخرابن. دێ ل نیڤا ڕی من هێلی. ب دەستێن خوە ئەو تابلۆیێ تە وێنەکری دناڤ ئاگرێ غەریبییێ دا سۆت.
خوەزی ژ دەستپێکێ رازی نەببام، من نەهێلابا دەست بهاڤێژییە فرچە و بۆیاغان. بلا بیانیەک بام مینا هەموویان، نە چێکرییێ دەستێ تە بام. ل وێ ڕۆژا تە دەست هاڤێتیە رەنگکرنا من، بتنێ تە دەرد و ئازار دمن دا وێنەکرن، ئەو چریسکا رۆناهییێ تە داییە رۆحا من، ئەڤرۆ بوو ئاگر و پێ هاتم سۆتن.