بڕیارە سوبەهی هەتا ئێكشەمبییا بهێت سێ‌ یاریێن مایی ژ هەڤڕكیێن گەڕا هەشتێ‌ یا خولا ستێرێن ئیراقێ‌ بۆ یارییا فوتبۆلێ‌ بهێنە ئەنجامدان، .
زاخۆ بەر ب چەپەرێ‌ دویێ‌
چاڤەڕێ‌ دهێتە كرن شەمبییا بهێت ڕێكەڤتی 17ێ‌ كانوونا ئێكێ‌ تیما یانەیا زاخۆ ل یاریگەها رۆمادی ببیتە مێڤانا یانەیا ئەلگەرمە ئێك ژ یاریێن ئاگرین بۆ كوڕێن خابووری ئەوا دێ‌ ل دەمژمێر شەشێ‌ مەغرەب هێتە كرن، زاخۆ ئەوا دوهی یارییا خوە یا گەڕا چارێ‌ ژ كۆپا كەنداڤی بەرانبەر عەین یا ئیماراتی كری بێ‌ ڕاوەستیان گەشتا خوە ژ وەلاتێ‌ ئیماراتێ‌ ب فرۆكە و پاس گەهشتییە باژێرێ‌ رۆمادی بۆ ئەنجامدانا یارییا خوە یا خولێ‌.
كوڕێن خابۆری ئەوێن 13 خال كۆمكرین ژ چار سەركەڤتن، ئێك وەكهەڤی و دو خوسارەتیان ب شێوەیێ‌ بەروەرخت ڕێزا 11ێ‌ دهێت، ژلایێ‌ خوەڤە خودانێن ئەردی ئەلگەرمە 13 خال كۆمكرینە ژ چار سەركەڤتن، ئێك وەكهەڤی و دو خوسارەتییان ب جوداهییا گۆلان ل رێزا 10ێ‌ دهێت ب شێوەیێ‌ بەروەخت، زاخۆ دێ‌ بزاڤێ‌ كەت بەردەوامیێ‌ بدەتە ئانجامێن باش د خولێ‌ دا و دوبارە ڤەگەڕێتە ڕێزێن پێشیێ‌، دبەرانبەر دا یانەیا گەرمە دێ‌ پشت گەرمیێ‌ ب جەماوەرێ‌ خوە كەت.
ڕاهێنەرێ‌ زاخۆ یاریێ‌ ب زەحمەت دبینت
د دیدارەكا ڕۆژنامەڤانی دا ل دوور یارییا زاخۆ بەرانبەر یانەیا ئەلگەرمە ویسام ڕزق ڕاهێنەرێ‌ تیمێ‌ گۆت: تیما مە یارییەكا ب هێز بەرانبەر عەین یا ئیماراتی كرییە ئانكو یا وەستیایە و گڤاشتن ل سەر یاریزانان هەیە تایبەت لایەنێ‌ جەستەیی و دەرۆنی، بتنێ‌ رۆژەك وەكو بهێنڤەدان دناڤبەرا یاریێ‌ كۆپا كەنداڤی و خولا ئیراقێ‌ دا هەیە، لێ‌ نەچارین یارییا خوە بكەین، ترسا مە هنگاڤتنا یاریزانایە و ئەڤە ژی خالەكا نەرێنی یە ل سەر تیمێ‌، ب هیڤی نە بشێن ئەنجامێ‌ سەركەڤتنێ‌ بینن.

دلۆڤان هالۆ:

د دیدارەکێ دا کچا باژێڕێ زاخۆ سارا ڕاشد بۆ ڕۆژناما ئەڤرۆ دیارکر ئەوێ شیا ڕێزا ئێکێ د قارەمانیا هێپ پرێس دا بینت ئێک ژ یاریێن پارسەنگی بۆ کێشا ٥٦کگم و شیا ١٣٠کگم بلندبکەت، د هەڤڕکیێن قارەمانییا پارێزگەهێ دا هاتیە کرن
هەروەسان ناڤهاتی گۆت: ب دەستڤەئینانا ناسناڤی هەستەکێ گەلەك خۆش بوو ب زۆری من شیا خۆ راگرم کو نەکەمە گری، ڤێ سەرکەفتنێ کارتێکرنەکا مەزن ل من کر کو ئەز زەحمەتیێن خۆ بدەمە لایەکێ و یا بەردەوام بم ب تایبەت بۆ قارەمانیێن نێڤدەولەتی، وەکو نوونەرا پارێزگەهێ و ئیدارا سەربەخۆ دێ پشکداری د قارەمانیان داکەم، پێشتر من وەرزش کرییە لێ د ژیێ سالیێ چوومە هۆلا لەش جوانیێ، وەکو کچا ئێکانە یا زاخۆ من پشکداری د تاقیکرنێن ڤێ یاریێ کربوو و شیام سەرکەڤم وەکو ئەنداما تیما کچام من بەرهەڤی بۆ قارەمانیێن بلند کرنا ئاسنی کریە.
ژلایەکێ دووڤە سارایێ گۆت: پشتەڤانا ئێکێ بۆ من کاپتن نەرمین زێباریە، ئەز ب مەرەما ڕاهێنانان چوومە هۆلا وێ یا لەش جوانیێ، لێ گەلەك پشتەڤانییا من کر کو پتر حەز ژ وەرزشێ بکەم ب تایبەت ڕاکرنا ئاسنی، هەروەسا خێزانا من ژی گەلەك هاریکاریا من کرییە ب تایبەت دەیك و بابێن من و خالێ من.
وەرزشڤانا کچ گۆت: پشتی من ئەڤ جۆرێ وەرزشێ هەلبژارتی باوەری بخۆبوونا من زێدەتر بوو، یارییەکا تایبەتمەندە ئەز ب هێزتربوون کو ژ چ ئاستەنگان نە ترسم، ژبلی کو ڕاهێنانێن ڤێ یاریێ لەشەکێ ساخلەم ب مرۆڤی د بەخشیت، ژ لایێ دەروونی ژی ڤە مرۆڤی ئارام دکەت، ئانکو مرۆڤی چەند ئێش و ئازار هەبن و یێ تۆڕە بیت ب بلند کرنا ئاسنی ئەو هەمی دچن، ژبەر هندێ من ئەڤ جۆرێ وەرزشێ هەلبژارت، ئەڤ جۆرێ وەرزشێ گەلەك یا ب زەحمەتە چونکی ژبەر پوینتەكێ د کێشا لەشێ مرۆڤی دا وە دکەت مرۆڤ ب مەهان ڕاهێنان بکەت و خۆ ماندی بکەت، هەر دیسان خۆ دوور بکەت ژ هندەك جۆرێن خوارنان، هندەك جاران بۆ من گەلەك یا ب زەحمەت بوو چونکی دڤێت کێشا لەشێ مرۆڤی دەستنیشان کری بیت بۆ ڤێ وەرزشێ.
ناڤهاتی گۆت ژی: هەتا نوکە چ هاریکاریا من نە هاتیە کرن، ئەز بخۆ هاری خۆ دکەم، ئەڤ جۆرێ وەرزشێ پێدڤی هاریکاریەکا مەزنە ژ لایێ ئیدارا سەربخوە یا زاخۆ ڤە ب تایبەت بۆ کچان، بلا بتنێ گرنگی ب جۆرەکێ وەرزشێ نەهێتە دان کو بتنێ فوتبۆل بیت و خویاکر کو ل سالا هێپ پرێس هاتیە دامەزراندن ل دهۆکێ، ئەڤە گەڕا شەشێ یا هێپ پرێس بوو، ل دەستپێکا سالا بهێت دێ قارەمانیا ڕاکرنا ئاسنی ل سەر ئاستێ کۆلیژێن زاخۆ هێتە ئەنجامدان بتنێ بۆ قوتابیێن کچ ژ هەموو بەشان.

د دیدارەكێ‌ دا كوڕێ‌ باژێرێ‌ دهۆكێ‌ و یاریزانێ‌ یارییا سۆارچاكیێ‌ دلشاد ئەحمەد بادی كەیفخوەشیا خوە دیاركر پشتی شیایی رێزا دویێ‌ ل سەرئاستێ‌ كوردستانێ‌ ب دەستڤە بینت و قارەمانییا ئەڤ جارە ب هێزترین هەڤڕكی دا دیاركرن.
زێدەتر ناڤهاتی گۆت: ل شەمبییا بۆری ب پشكدارییا 60 یاریزانێن ل سەر ئاستێ‌ هەرێمێ‌ و ئیراقێ‌ پشكداری د قارەمانییا سۆارچاكیێ‌ دا كربوون ئەوا ل هەولێرا پایتەخت هاتیە كرن كو دهاتە هژمارتن ئێك ژ ب هێزترین قارەمانیێن وەرزێ‌ 2025ێ‌ ب ناڤێ‌ ( Kurdistacompetition- jumping) بۆ بەریكانەیێن ئاستەنگ 60سم، 80سم، 100سم، پشتی هەڤڕكییەكا بهێز بتنێ‌ ب جوداهییا سێ‌ چركەیان ڕێزا دویێ‌ د بەریكانەیا ئاستەنگ بۆ 100سم هاتیم، پێخوەشحالم كو د دەمەكی دا ژ نشكەكێ‌ ڤە دا دووركەڤم ژ هەڤڕكییان لێ‌ ب مۆرالا بلند و ڕژدی ل سەر ئارمانجا خوە من هەموو بزاڤكرن و شیام ڕێزێن پێشیێ‌ بهێم.
ژلایەكێ‌ دووڤە ناڤهاتی دیاركر یارییا سۆارچاكیێ‌ ئێك ژ وەرزشێن تایبەتمەندە ب ژیانا من ڤە هاتییە گرێدان، نە بتنێ‌ بۆ حەز ژێكرن ڤێ‌ یاریێ‌ دكەم بەلكو بۆ هەڤڕكییا ب دەستڤە ئینانا هەر ناسناڤەكی بیت، ڕێكەكا دوور ئەز دچم دناڤبەرا دهۆك و هەولێر دا هەتا ڕاهێنانان بكەم و بەرهەڤییان بۆ هەر قارەمانییەكێ‌ بكەم، ئەڤ یارییە بهێنفرەهیەكا مەزن دڤێت هەتا یاریزان ب گەهیتە ئارمانجا خوە، هیڤییا من ئەوە ل پارێزگەها دهۆكێ‌ ژی ئەم جهێن تایبەت بۆ ڕاهێنانان و ئەنجامدانا ڤێ‌ یاریێ‌ ببینن.
بۆ زانین دلشاد ئەحمەد وەكو ماستەر بۆ یارییا تایكواندۆیێ‌ ژی پلە بەرزە و دیارییا سۆارچاكیێ‌ دا پشكداری د نێزیكی 32 قارەمانیێن نافخوە، ئیراقێ‌ و نێڤدەولەتی دا كرییە، ل وەرزێ‌ 2018ێ‌ و 2019ێ‌ قارەمانێ‌ كوردستانێ‌، ل 2021ێ‌ یێ‌ دویێ‌ د قارەمانییا نێڤدەولەتی یا مسرێ‌ دا هاتبوو، ل 2022ێ‌ ناسناڤێ‌ كوردستانێ‌ ب دەستڤە ئینا، ل 2023ێ‌ ناسناڤێ‌ قارەمانییا ئیراقێ‌ ب دەستڤە ئینابوو.

پشتەڤانێن ڕیال مەدرید یا ئسپانی ژ ستێرێ‌ تیما خوە یێ‌ بەرازیلی ڤێنێسیۆس جۆنیرۆ د ڕازی نینن و هزر دكەن ئەو ئەگەرێ‌ سەرەكی یێ‌ هەبوونا ئاریشەیانە دناڤ تیمێ‌ دا.
رۆژنامەیا ماركا یا ئسپانی ڕاوەرگرتنەكا بەرفرەهـ بۆ پشتەڤانێن ڕیال مەدرید دروست كربوو تێدا دابوو دیاركر ئەرێ‌ هین دگەل فرۆتنا ڤێنێسۆسی نە، دیاربوو كو 86% ب بەلێ‌ دانیە كو دڤیچت بهێتە فرۆتن، 7% خواستینە پشتەڤانییا وی بهێتە كرن، هەر دڕاوەرگرتنا سالێ‌ دا هاتییە ئەرێ‌ كی ئەگەرێن داكەڤتن و ئاریشەیێن ریالێ‌ یە، پشتەڤانان ب ڕێژەیا 61% دانایە ڤێنێسیۆس ئەگەرێ‌ ئاریشەیانە، لێ‌ 23% بۆ كارگێریێ‌ ڤەگەراند بوو و 16% بۆ راهێنەری دانابوو.

عایشە عەجیب

د دیدارەکێ دا ڕەمەزان حەسەن ڕاھێنەرێ تیما خۆلێکدانا یانەیا زاخۆ بۆ ڕۆژنامەیا ئەڤرۆ بەحسێ تیما خۆلێکدانێ و چەندین ئاریشە و گازندەیێن ڤێ یاریێ ل باژێرێ زاخۆ دکەت و گۆت: مە دڤێت بچینە کەمپەکا ڕاهێنانێ ل دەرڤەی ھەرێمێ و ئەم گڤاشتنان ل یاریزانێن خۆ دکەین دا کو ب ھێز بن ژ بۆ وەرزێ نوو یێ خول و قارەمانیێن نافخوە و دەرڤە.
ناڤھاتی زێدەتر گۆت ژی: ھەتا نوکە مە چ بەرھەڤی بۆ وەرزێ نوو نە کرینە، لێ بەس بەردەوام ڕاھێنانان ب یاریزانێن خوە دکەین، ھەروەسا یاریزانێن مە بەر ب ئاستەکی باش چووینە و نموونە ژی مە هەنە وەکو شەھید حسنی، محەمەد سەمیر، بارزان رەعەد، وەلات محەمەد، ئەحمەد عدنان گەلەك یاریزانێن دی ژی ل دەرڤەێ هەرێمێ پشکداریێ د یاریێن خۆلێکدانێ دا کرینە ل وەلاتێ مسر، ئوردون و ئیرانێ، وەکو یاریزانێن ڤێ یاریا خۆلێکدانێ مە چەندین ناسناڤ تومارکرینە، دەھان باوەرنامە و خەلاتێن ڕێزلینانێ ژ ئالییێ کۆپا ئێراقێ ڤە مە وەرگرتینە..
رەمەزان حەسەن گۆت ژی: وەکۆ تیما خۆلێکدانا زاخۆ د خوازین هەر قارەمانیەك بھێتە کرن چ ل سەر ئاستێ هەرێمێ و دەرڤەی هەرێمێ ژ ئالییێ یانەیا زاخۆ ئاگەھـ ژ مە ھەبیت و پشتەڤان بیت ژ ئالییێ مادی و مەعنەوی ڤە، یا من دڤێت بێژم هندەك کەس خوە ب ئەرکێ بەرپرسیارەتییا وەرزشی دزانن، لێ چ گرنگیێ ب وەرزشێ و ڤێ یاریا خولێکدانێ ناکەنە خودان، ھەروەسا ئەڤ جھێ نوکە ئەم لێ ژی ملکێ ڕێڤەبەرییا لاوانە ل زاخۆ چەندین جاران داخاز ژ مە کرینە کو وێرێ بجھ بھێلین لێ ژ بەر نەبوونا چ ھۆلان نەچاربووینە ھەتا نوکە لێ بمینین.
ژلایەکێ دووڤە ناڤهاتی گۆت: ھندەک جاران پێدڤییێن یانەیێ ژ لایێ فدراسیۆنا ئێراقێ یا خۆلێکدانێ ڤە بۆ مە دھێنە دابین کرن، داخوازێ ژ سەرپەرشتێ ئیدارەیا سەربەخۆیا زاخۆ و جھێن شولە ژێ دکەین ھاریکاریا تیمێ بھێتە کرن و ھۆلەک مودرن بۆ ڤێ تیما مە بھێتە چێکرن، گرنگیێ و پشتەڤانییێ بدەت ڤێ تیما مە، چونکی ئەڤ یاریێن هەنێ تەمامکەر و پێشڤەبرنا بزاڤێن وەرزشی ل دەڤەرێ یە.