دهۆك، دلۆڤان ئاكرەیی:

پەیڤدارێ وەزارەتا ساخلەمیا حوكمەتا هەرێما كوردستانێ دیاركر، كاروانێ چارێ یێ‌ نەخۆشێن تالاسیمیایێ و بەخشەر و هەڤالێن وان بۆ نەشتەرگەرییا چاندنا مەژیێ‌ هەستی، پشتی پشكنین و بەرهەڤیێن نۆشداری و ڕێكارێن زانستی، ل فڕۆكەخانەیا نێڤدەولەتی یا هەولێرێ ژ لایێ وەزارەتا ساخلەمیێ ڤە بۆ دەرڤەی وەلاتی هاتنە هنارتن.
سەركار سۆرچی، پەیڤدارێ وەزارەتا ساخلەمیا حوكمەتا هەرێما كوردستانێ بۆ رۆژنامەیا ئەڤرۆ گۆت: «ل سەر فەرمانا مەسرور بارزانی، سەرۆكێ حوكمەتا هەرێما كوردستانێ، كاروانێ چارێ، كو ژ 52 وەلاتیێن هەرێما كوردستانێ ژ نەخۆشێن تالاسیمیا و بەخشەر و هەڤالێن وان پێكهاتبوو، بۆ نەشتەرگەرییا چاندنا مەژیێ‌ هەستی، پشتی پشكنین و بەرهەڤیێن نۆشداری و ڕێكارێن زانستی، ل فڕۆكەخانەیا نێڤدەولەتی یا هەولێرێ ژ لایێ وەزارەتا ساخلەمیێ ڤە بۆ دەرڤەی وەلاتی هاتنە هنارتن».
ناڤهاتی ئاماژە ب وێ‌ چەندێ‌ ژی كر كو هەموو مەزاختیێ‌ هاتنوچوون و مان و پشكنین و نەشتەرگەری و چارەسەریان ب فەرمانا سەرۆكێ‌ حكومەتا هەرێما كوردستانێ‌ بۆ وان نەخۆشان دێ‌ هێتە دابینكرن و پارە ل سەر بودجەیا پێدڤی یا دابینكری بۆ هنارتنا 140 تووشبوویێن تالاسیمیایێ بۆ ئەنجامدانا نەشتەرگەرییا چاندنا مەژیێ‌ هەستی یە، پشتی چوویە د وارێ بجهئینانێ‌ دا و گۆت: «هنارتنا وان بۆ هەژمارەكا نەخۆشخانەیێن پێشكەفتی یە ل جیهانێ‌، دیسا نێزیكی 11 ملیار دیناران ل سەر بودجەیا حوكمەتا هەرێما كوردستانێ‌ بۆ نەخۆشێن خودان بەخشەر و نەخۆشێن بێ بەخشەر هاتیە دیاركرن، د نوكە دا 172 وەلاتی ل نەخۆشخانەیانە و ل ڕۆژێن بهێن ژی، كاروانێ پێنجێ ژ تووشبوویی و هەڤالێن وان، ب مەرەما چارەسەریێ‌، بۆ دەرڤەی وەلاتی دێ هێنە هنارتن».

رەمەزان زەكەریا:

رێڤەبەرییا گشتی یا وەبەرهێنانێ ل پارێزگەها دهۆكێ ئاشكراكر، نوكە دەرفەتا وەبەرهێنانێ بۆ چێكرنا پڕۆژەیێ باژێڕێ پیشەسازیێ بەردەڕەشێ‌ هاتیە راگەهاندن، هەر وەبەرهێنەرەكێ بڤێت دشێت بۆ چێكرنا كارگەهان وەربگریت.
د. هەڤال سەدیق، رێڤەبەرێ گشیێ وەبەرهێنانێ ل پارێزگەها دهۆكێ‌ بۆ ئەڤرۆ گۆت: «ئەڤ پڕۆژە یێ‌ تایبەتە ب دانانا كارگەهێن بەرهەمئینانا هەموو جۆرێن كەرەستەیێن خوارنێ و ئاڤاهییان و بەرهەمێن پیشەسازیێن جوراوجور، ئەڤ پڕۆژە ل سەر رووبەرێ 806 دۆنەمێن ئەردی دێ هێتە چێكرن».

دهۆك، لەزگین جۆقی:

رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ راگەهاند، حكومەتا نوو یا ئیراقێ ئەگەر چو پلان و بەرنامە بۆ ئاوارەیان نەبن، زەحمەتە ئاوارە بشێن د كابینەیا نوو یا ئیراقێ دا ڤەگەڕنە جهێن خۆ و دبێژیت: پێدڤیە 15 ملیۆن دینار بۆ قەرەبوویا هەر خێزانەكێ بهێنەدان، هەتا بشێن ڤەگەڕن.
پیر دەیان، رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ بۆ ئەڤرۆ گۆت: «پێدڤیە د حكومەتا نوو یا ئیراقێ دا پلانەك بۆ ڤەگەڕیانا ئاوارەیان ب هەڤكاری ل گەل حكومەتا هەرێما كوردستانێ بهێتە دانان، هەكە ئیراقێ چو پلان و بەرنامەیێن باش نەبن، زەحمەتە ئاوارە بشێن ڤەگەڕن و پڕۆژەیێن خزمەتگوزاری بگەهنە دەڤەرێن وان».

ئامێدیێ، مەحمود نهێلی:

د بەردەوامیا گەهاندنا پڕۆژەیێن خزمەتگوزاری دا بۆ دەڤەرێ و گرنگیدان ب كەرتێ چاندنێ و ئاڤدێریێ، جۆیا گوندێ گوهەرز ل چەمێ مەهیدێ دهێتە چێكرن، نوكە پڕۆژە ل ژێر بجهئینانێ یە و ل دەمەكێ نێزیك دێ كەڤیتە د خزمەتا جۆتیاران دا.
رێبەر سادق، رێڤەبەرێ ناوچەدارییا دێرەلۆكێ‌ بۆ رۆژناما ئەڤرۆ دیار كر، كابینەیا نەهێ‌ یا حكومەتا هەرێما كوردستانێ گرنگیەكا زۆر دایە كەرتێ چاندنێ و ئاڤدێریێ و گۆت: «د ئەڤ سالە دا چەندین جۆیێن ئاڤدێریێ ل سنۆرێ ناوچەداریا دێرەلۆكێ‌ هاتینە چێكرن، ئێك ژ وان ژی پڕۆژەیێ چێكرنا جۆیا چەمێ مەهیدێ یە یا گوندێ گوهەرز ب درێژاهیا سێ‌ هزار و 200 مەتران».
دیار ژی كر، ژ بۆ چێكرنا جۆیا ئاڤدانێ یا گوندێ گوهەرزێ ل چەمێ مەهیدێ گوژمێ 328 ملیۆن و 885 هزار دیناران هاتینە مەزاختن و جۆتیارێن هەردو گوندێن گوهەرز و بلاڤە دێ مفای ژێ بینن و گۆت: «پڕۆژە د قووناغێن دووماهیێ‌ دایە و ل نێزیك دێ كەڤیتە د خزمەتا جۆتیارێن هەردو گوندان دا».

رەمەزان زەكەریا:

ل دەڤەرداریا ئاكرێ و ل سەر پێشینەیا مەهانە یا سەرۆكاتیا باژێرڤانیا ئاكرێ، هەژمارەكا كار و پڕۆژەیێن خزمەتگوزاری هاتنە ئەنجامدان.
زێرەڤان تەمۆ، پەیڤدارێ باژێرڤانیا ئاكرێ بۆ ئەڤرۆ گۆت: «ل سەر پێشینەیا باژێرڤانیا ئاكرێ هەژمارەكا پڕۆژەیان هاتنە بجهئینان، وەكو: بەرفرەهكرن و كۆنكریتكرنا جادەیا سەروەران و بەرفرەهكرن و سەخبێركرنا جادەیا زالگەها رۆژهەلاتێ ئاكرێ، بەرفرەهكرنا جادەیا شەهیدان ب رەخ بنگەهێ ئاهێن خوارنێ ڤە».
ناڤبری گۆتژی: «ئەڤ پڕۆژە ژی هاتینە بجهئینان، وەكو: چاندنا هەژمارەكا زۆرا داران ل سنۆرێ باژێرڤانیا ئاكرێ و كۆنكریتكرن و ڤەكرنا جادەیا خزمەتگوزاری یا مۆلا ئاكرێ و بەرفرەهكرنا جادەیا نێزیك قوتابخانەیا سەروەری ل تاخێ ئازادی».

رەمەزان زەكەریا

هشكە سالیێ گۆهۆرینێن مەزن و كاریگەر ل سەر ژیانا رۆژانەیا وەلاتیان كرینە، ژبەر ڤێ‌ چەندێ‌ حۆكمەتا هەرێما كوردستانێ بۆ چارەسەركرنا ئاریشا كێم ئاڤێ ل دەڤەرا ئاكرێ كار ل سەر لێدانا ٢٣ بیرێن ئاڤێ دكەت.

محسن محەمەد، مۆختارێ گەرەكا حەسەن بۆ ئەڤرۆ گۆت: كێمیا ئاڤا ڤەخوارنێ گەلەك زۆر بوو ب لێدانا بیرێن ئاڤێ‌، ئەڤ دەڤەرە پارچە ئەردێن وان بۆ پێشمەرگەهێن قارەمان هاتبوونە دابەشكرن و پشتی هاتنا ڤێ بیرا ئاڤێ كەیفخۆشیەكا زۆر ل دەڤ خەلكی هەموویان دروست بوویە.
محەمەد سادق، وەلاتیەكێ دەڤەرێیە بۆ ئەڤرۆ گۆت: بەری نوكە كێشەیا مە یا مەزن ئاڤ بووـ ئاڤ ب تانكەرا بۆ مە دهات، بەلێ تێرا مە نەدكر، ئەڤ دەڤەرە یا زۆرە، بەلێ نوكە بیر دهێتە لێدان و دێ چێ بیت و ئەم دێ ب ئاڤ كەڤین، هەتا پرۆژەیێ ئاڤا ئاكرێ تەمام دبیت ئەڤە دێ خزمەتا مە كەت و ئەم سۆپاسیا حۆكمەتا هەرێما كوردستانێ دكەین.
ئەندازیار زرار ئەحمەد، رێڤەبەرێ ئاڤا ئاكرێ بۆ ئەڤرۆ گۆت: بیر ل هەمی دەڤەرێن سنورێ ئاكرێ دهێنە لێدان، دگەل هەر سێ ناوچەداریێن گردەسێن و بجیل و دینارتە و سەنتەرێ ئاكرێ ٢٨ پرۆژەنە ٢٣ لێدانا بیرانە و پێنج ژی هێلا ڤەگۆهاستنێ نە بۆ وان دەڤەران، ئەوێن تۆرێن ئاڤێ نەبن یان تۆرا وان ژ كار كەفتی بن.
ناڤبری گۆتژی: ب گوژمێ دو ملیار و پێنج سەد ملیۆن دیناران ژلایێ حۆكمەتا هەرێما كوردستانێ ڤە كار ل سەر لێدانا ٢٣ بیرێن ئاڤێ ل گوند و سەنتەرێ باژێرێ ئاكرێ دهێتەكرن و پشتی پرۆژەیێ ئاڤا ئاكرێ دهێتە تەمامكرن دەرگەهێ ١٥٠ بیرێن ئاڤێ دهێنە گرتن بۆ پاراستنا ئاڤا ژێر ئەرد.