هیلین سالم:

ماموستایەکا زانکۆیێ بۆ روژنامەیا ئەڤرۆ دیار کر ئەو ژنێن کار دکەن ئازادیا تاکەکەسی لدەف پەیدا دبیت ژ ئەگەرێ تێکەلبوون و نیاسینا خەلکەکی و باوەری بخۆبوون لدەف وان پترە و ژنێن خودان کار و داهات پتر خۆ لسەر پێت خۆ دگرن و پێدڤی ب چ کەسا نابن.

خوناڤ ئافرەتەکا ٢٩ سالی یە، خودان دکانە و لبەر کادکەت و گوت؛ پشتی من زانکۆ ب دووماهیک ئینای و چ کار بدەست من نە کەفتین من و هەڤژینێ خۆ بریار دا دکانەکێ پێکڤە بو خۆ ڤەکەین، چونکی ئەو ژی یێ بێکار بوو، مە پشتەڤانیا ئێکودو کر و دکانەکا گرێدایی كەل و پەلێن ئافرەتان ڤەکر ل تاخەکێ جڤاکی، ئەو هاریکاریا من دکەت ئەز ژن ب رێڤە دبەم.
هەلز جەعفەر ئافرەتەکا خودان کارە، ئەڤە ٩ سالە دکانەکا گرێدایی پێدڤیێن ئافرەتان ب رێڤە دبەت و بو رۆژنامەیا ئەڤرۆ گۆت؛ ئەز ‌‌‌‌‌حەز ژ کارێ سەربەخۆ دکەم و من ئەڤ کارە کریە داکو یا ئازاد بم د مەزاختیان دا، نە هەرگاڤا پێدڤی ب پارا بم بێژمە هەڤژینێ خۆ.
دکتورە سەمیا سەعید ماموستایا زانکۆیێ و بسپور د بیاڤێ جڤاکی دا، بۆ روژنامەیا ئەڤرۆ دیار کر، گەلەک یا گرنگە ژن ببیتە خودان کار د هەر بیاڤەکی دا، چونکی ژن خو دبینیت سەرکێش و دشێت سەرکردایەتیا مالا خۆ بکەت و هەڤسەنگیێ بێخیتە دناڤبەرا کارێ مال و ژدەرڤە و گۆت؛ بەلێ گەلەکا جارا ژن ژ نەچاری کارەکی دکەت نە لدویڤ دل و شیانێت وێ یە بەلکو ژ نەچاریە، بتنێ داکو بشێت خۆ و مالا خۆ برێڤە ببەت.
ماموستایا زانکۆیێ د بەردەوامیا ئاخفتنێن خۆدا دیار کر کو بەهرا پتریا خێزانان د هاریکارن دگەل ژنێ، بەلێ هەکە خێزانەک یا هاریکار نەبیت دێ بارێ وێ گەلەک گران بیت و گوت؛ ژبەرکو هندەک خێزانان هەر باوەری ب کارکرنا ژنێ ل ژدەرڤەی مال نینە و هەموو بەرپرساتیا مالێ دانایە لسەر ملێت وێ لەوما بارێ وێ گەلەک گران دبیت و رەنگڤەدانەکا نەرێنی لسەر ساخلەمیا وێ دکەت.

رەمەزان دەشتمری/ زاخۆ

2- 3

ل رۆژا 13/9/1983دەمێ‌ فروكەیا جەنگی ئەوا توركی ل دەڤەرا گوندێ‌ خێلافتێ‌ كەفتی خوار و فروكڤانێن ئەڤێ‌ فروكێ‌ ب دیلی كەفتین ددەستێن پێشمەرگەیێن رێكخراوا مە یا خەبات دا و هەر ل ئەوێ‌ شەڤێ‌ دا ئەڤ هەردوو فروكڤانە مە رادەستی بارەگایێ‌ لیژنا ناوچا زاخۆ كرن و هەردو فروكڤانە بۆ بارەگایێ‌ لقی ئێك هاتن هنارتن و ل رۆژا پاشتر هێزەكا عەسكرێ‌ حكومەتا ئیراقێ‌ و دگەل هەژمارا دوازدە فروكەیێن هەلیكوپتەر ژ جوێ‌ سەمتی بۆ سەر دەڤەرێ‌ هاتن و ئەز پێشمەرگە موسا یونس دنافبەرا گوندێ‌ چەمتڕی و گوندێ‌ باجلێ‌ دا ئاسێ‌ ماین و یا مە شیایی ئەم هلباسكی دارەكێ‌ بین و مە خوە هەشاردا و بۆ ماوێ‌ شەش جاران ئەڤان فروكەیێن هەولیكوپتەر تەقە و رەمی ل ئەوێ‌ دارێ‌ كرن ئەوا ئەوا ئەم ل سەر ئەوێ‌ دارێ‌ و بەلێ‌ سوپاس بۆ خودایێ‌ مەزن ئەم پاراستی ماین هەتا ئێڤاری ئەو فروكە بۆ پاشدا زڤرین و ئەمژی ب سلامەتی ماین ساخ.
هەر وەسا سالم ئیسماعیل گوت: ل هەیڤا ئیلۆنا سالا 1985ی ل ئەوی دەمی ئەز زەگورد و بێ‌ مال و خێزان بیم و هەمی دەما ئەز ل دەڤەرێ‌ بیم و ل دەمێ‌ بێهنڤەدانێ‌ ژی هەر ئەز ل دەڤەرێ‌ بیم. ڕۆژەكێ‌ ئەز ژ گوندێ‌ وەرمێلێ‌ بۆ ەڤەرێ‌ دهاتم و ئەز گەهشتم دناڤبەرا گوندێ‌ بلدێشا و گوندێ‌ بەرزیركێ‌ دا و من بەرێ‌ خۆە دایێ‌ دوو فروكێن هەلیكوپتەر هاتن و ل بەراهیكا من ترومبێلەك ژ جورێ‌ پیكەم یا پری سندوقێن ڤالە بی داب ۆ گوندێ‌ هەركوندێ‌ چیت و ل ئەوی دەمی باجانێن سور ژ ئەوان چەمان بۆ باتیفا و زاخۆ دبرن. ئەو فروكەیێن هەلیكوپتەر ئەو ترومبێلا پیكەم راوەستاندن و ل دور ئەڤێ‌ ترومبێلێ‌ زڤڕین و ئەز ژی بۆ دویراتین شێست میتران ژ جهێ‌ رویدانێ‌ دویر بیم و من خوە ل بەر دارەكا دار بەڕی هەشاردا و چەند ئەڤ فروكەیێن هەلیكوپتەر دزڤڕین ئەز ل ل دویف دەورا ئەوان ل دور دارێ‌ دزڤریم. خەلكێ‌ گوندێ‌ بەرزیركێ‌ هەمیان ئەڤ دیمەنە ب چاڤێن خوە دیتن و هەمی ل سەربانا تەماشەیی ئەڤی دیمەنی دكرن. فروكڤانێن ئەڤان فروكەیان پشتی ئەف ترومبێلا پیكەم راوەستاندین و شوفێرێ‌ ئەڤێ‌ پیكەمێ‌ ئینان خوار و جلكێن وی ژبەركرن و تازی و رویسكرن و ئەوی شورقرێ‌ پیكەمێ‌ ئەو سندوقێن د ترومبێلێ‌ دا ژی هەمی پێ‌ ئینان خوار و هەتا كو زانین چ تشتێ‌ قەچاخ دگەل خودانێ‌ ترومبێلێ‌ نەبین و پاشی ئەو هەردوو فروكەیێن هەلیكوپتەر چوون و ئەز ژی بۆ گوندێ‌ بەرزویركێ‌ هاتم , هەر ل ئەوی دەمی خەلكێ‌ گوندێ‌ بەرزیركێ‌ ل هاوارا مە هاتن و گوتن خودایێ‌ مەزن هاریكارە و مە ب چاڤێن خوە دیت كا ئەڤ هەلیكوپتەرە چەوا ل دور سەرێ‌ تە دزڤرین و بەلێ‌ تە دگەل دەورا وان خوە دزڤراند و تو نەدیتی. ب راستی ل ئەوێ‌ رۆژێ‌ بۆ من گەلەك یا نەخوشبی و ئەز ب تنێ‌ ل بنێ‌ ئەوێ‌ دارێ‌ هوسا ئەوان هەلیكوپتەران ئەز تەنگاف كرم و بەلێ‌ سوپاس بۆ خوادیێ‌ مەزن ئەز ب سلامەتی ژناڤ ئەڤێ‌ ئاریشێ‌ و تەنگاڤیێ‌ دا قورتال بیم.
هەر دیسان پێشمەرگەیێ‌ شۆڕەشا گولانێ‌ سالم ئێسماعیل بەحسێ‌ برینداربوونا خوە دكت و دبێژت: ل سپێدەهیا رۆژا 13/10/1983ی ئەم ل جهەكێ‌ دبێژنێ‌ شكەفتا بەلەتویا ل پشتا گوندێ‌ باگولاتكێ‌ ل هەشارێ‌ بین و ل دەمژمێر شەشی سپێدێ‌ جەوابەك بۆمە هات، و گوتن: ئەڤە هێزەكا مەزن یا ئەسكری و جاشا بۆ سەر دەڤەرا گوندێ‌ زێوكێ‌ ڤە بۆ سەر دەڤەرێ‌ هات و هەر دەملدەست بەرپرسێ‌ رێكخراوا مە یا خەبات شەهید عەمەر حسێن بریاردا هەر ئێكسەر كو پێشمەرگە ب لەز بۆ دەڤەرا گوندێ‌ زێوكێ‌ و مێرگەسورا بچن و دا بەرسینگا ئەڤێ‌ هێرشێ‌ بگرن. ئەوبی ئەز دوو هەڤالێن خۆە یێن پێشمەرگە سەدیق جەرجیس و سەلیم موستەفا ل بەراهیكا هەمی هەڤالێن خۆ بۆ گوندێ‌ زێوكێ‌ ڤە چوون و ل دەمێ‌ دەم گەهشت تەنشتا گوندێ‌ زێوكێ‌ و ئەسكەر ژی گەهشتن بۆ ناف گوندێ‌ زێوكێ‌ دا. ل ڤێرێ‌ شەری و تەقێ‌ دەستپێكر و ل ئەوی دەمی عەسكەر ل دور مە زڤرین و ئەم هەرسێ‌ ب تنێ‌ دناڤ گوندی دا ماین و شەرێ‌ سینگ و سینگ و گولان گولان دەستپێكر. هەڤالێن مە یێن پێشمەرگە ئەو بۆ رۆژهەلاتا گوندێ‌ زێوكێ‌ چوون و ئەم ل رۆژئاڤایێ‌ گوندێ‌ زێوكێ‌ دا ماین و هەر وەسا پێشمەرگەیێن رێكخراوا دلبرین و پێشمەرگەیێن رێكخراوا رێنجبەران ژلایێ‌ گوندێ‌ لێڤو ڤە بۆ جهێ‌ شەری هاتن و تەقە و شەر بەرفرەهبی و مودەرعێن عەسكەری گەهشتن بۆ ناف گوندێ‌ زێوكێ‌ دا و ئەم هەرسێ‌ هەڤالێن پێشمەرگە بۆ لایێ‌ گوندێ‌ مێرگەسورا ڤە چوون و ل ئەوی دەمی فروكەیێن هەیكوپتەر ژ جورێ‌ سەمتی بۆ سەر دەڤەرێ‌ هاتن و رەمی ل پێشمەرگەیی كرن. ل ئەوی دەمێ‌ هەڤالێ‌ مە سەلیم موستەفا ژمە ڤەقەتیا و مە نەزانی ئەو ب چ سەرچوو و چارەنڤیسێ‌ ئەوی چ لێهات و ئەز و هەڤالێ‌ خۆە سەدیق جەرجیس مە هەر شەر كر و ئەم ل بەرسینگا عەسمەری راوەستان و ل دەمەكێ‌ مە بەرێ‌ خوە دایێ‌ دوو مودرەعێن ئەسكەری هێرشی مە كرن و ئەم نەچاربین پاشدا هاتن و ل تەنشتا گوندێ‌ زێوكێ‌ چالەكا مەزن یا بێ‌ ئاڤ هەبی و مە خوە هاڤێت د ئەوێ‌ چالێ‌ دا و ئەو مودەرعە هاتن ل هنداڤی مە راوەستان و تەقە ل مە كرن. بەلێ‌ ژبەركو ئەم گەلەك دنێزیكی ئەوان بین و لویلبا دوشكا ئەڤان مودەرعان ل هنداڤی مە شورنەدبی و گولەیێن ئەڤان مودەرعان ژ مە نەدگرتن. ل دەمەكێ‌ مە هایی ژدەنگێ‌ ئەسكەرا بی و گوتن دا پێكڤە هیرشی ئەڤێ‌ چالێ‌ بكن و ئەوان هەردوو موخەربان ب كوژن. ئەوی دەمی من و هەڤالێ‌ خۆە سەدیق جەرجیس چوار نارنجوك هەبین و ئێك ژ ئەوان نارنجوكان یا دوكێلێ‌ بی. ل ئەوی دەمی مە هەردوكان پێكڤە ب ئەوان ئارنجوكان رەمی ل ئەوان ئەسكەران كرن و ب چەكێ‌ كلاشینكوفێ‌ تەقە ل ئەوان عەسكەران كرن و مە گوهـ ل دەنكێ‌ نالین و قارێنا برینداریا ئەوان ئەسكەران بی و ب لەز مە خوە ژناف ئەوێ‌ چالێ‌ دەرخست و ئەم بۆ گوندێ‌ مێرگەسورا ڤە چوین و ئەم نێزیكی سەد میتران چوین مە هند دیت توپەكا ئەسكەری ل دنافبەرا مە هەردوكان دا كەفت و پەقی و هەر دجهدا ئەز و هەڤالێ‌ خۆە سەدیق جەرجیس برینداربین. بەلێ‌ ب هەر حالێ‌ هەبی مە خوە گەهاندە بنێ‌ گوندێ‌ مێرگەسورا و ئەم گەهشتن بەر لێڤا كەفرەكێ‌ و مە خۆە هەشاردا. ل ئەوی دەمی ئەم گەلەك ژ هەڤالێن خۆە دویر كەتبین و هەر وەسا مەفیشەك و تەمەمەنی ژی نەمابین و مە هەرویان بریاردا هەكەر ئەسكەر گەلەك نێزیكی مە بین ب ئەوان فیشەكێن ل سەر چەكێن مە ماین ئەم دێ‌ پێ‌ تەقێ‌ و شەڕی كین هەتا فیشەكێن مە ب دوماهیك بێن و پاشێ‌ و ب گولەیێن دوماهیێ‌ دێ‌ خۆە ژی پێ‌ كوژین و ناهێلین ئەم ب ساخی و دیلی ب كەفتن دناف دەستێن ئەسكەری ڕژێما بەعسیاندا دا. ئەڤی شەری هەتا پشتی نیڤرو ڤەكێشا و فروكەیێن هەلیكوپتەر تەقەكا زور ل پێشمەرگەیی كرن و گەلەك تەنگافكرن. بەلێ‌ ئەوبی پێشمەرگەیێن رێكخراوا شەهید شەهباز سالح ژ دەڤەرا گوندێ‌ پیرەكا ل هاوارا ئەوی شەری هاتن و ب گولەیێن ئاربیجیان تەقە ل ئەڤان فروكەیان كرن و ژ هەمی لایانڤە پێشمەرگەیی هیرشی ئەسكەری كرن و شیان پاشدا بشكێنن و هەتا ئەڤ عەسكەرە بۆ جهێن خۆە ژێ‌ هاتین ب سەر شوری ڤەگەریانە جهێن خۆە ئەوێن ژێ‌ هاتین. بەلێ‌ ب مخابنیڤە د ئەڤی شەرێ‌ دا پێشمەرگەیەك ب ناڤێ‌( ئیسماعیل مچولی) هات شەهیدكرن. و هەر وەسا هەژمارا چواردە پێشمەرگەیێن دیتر هاتن برینداركرن ئەوژی( فازل عەلی چەمباهیڤی، ئیسماعیل عەڤدو خوالشی، حزنی هەورێزی، عەبدلواحد متیفی، زەعیم میرو دەركاری، عەمەر حسێن بەرپرسێ‌ رێكخراوا خەبات، سەدیق جەرجیس، سالم ئیسماعیل، عەمەر نوردینی ) ناڤێن دیتر ل بیرا من نەماینە. ب راستی ژ ئەڤی شەڕی دا ئەم گەلە بێ‌ چارەبین و مە مرنا خۆە ل پێش چاڤێن خۆە دەیناتبی ژبەر كو ئەم ژ هەڤالێن خۆە ڤەتیایی بین و نە مە و نەژی ئەوان مە چ ژچارەنڤیسێ‌ ئێك و دوو نەدزانی و هەر وەسا هەڤالێن مە وەسا تەخمین دكرن و ئەز هەڤالێ‌ خۆە سەدیق جەرجیس یێن هاتین شەهید كرن.