زاخۆ، دلۆڤان هالۆ:
هونەرمەندێ گەنج یێ ئیدارا سەربخوە یا زاخۆ، هاوار ئیبراهیم د دیدارەکێ دا بۆ ڕۆژناما ئەڤرۆ دیارکر کو ل ژیێ 10سالیێ حەز و ئارەزوویا ستران گۆتنێ ل دەف من پەیدا بوو، لێ من خوە گیرووکر هەتا ل سالا 2017 ب پشتەڤانیا مالباتا من دەرفەت بۆ من چێبوو و من هەڤالێن هونەرمەند نیاسین و نێزیکی دوو سالان ئەم پێکڤە د ڕوونشتین، پشتی هینگێ من دەست ب ستران گۆتنێ کر.
ناڤهاتی ئاماژە ب وێ چەندێ ژی کر کو ئەز ب عەشق و ڤیان هاتمە دناڤ قادا هونەری دا و من حەز ژ ستران و هونەری کر، ئەگەر نە پشتەڤانیا مالباتا من با ب تایبەت بابێ من، من ستران نە د گۆتن و من ئەڤ پێنگاڤە نە د هاڤێت، هونەر جوانی و هەڤالینیە، کەسێن دوور نێزیکی ئێك دکەت و پەیامەکا جوان بەلاڤ دکەت، لەورا من ئەڤ ڕێکە هەلبژارت، چونکی هونەر ل دەف من ئەرکەکێ پیرۆزە و شۆڕەش و عەشق یا تێدا، هونەر د چاڤێن من دا گەلەك مەزنە و گەلەك حەز ژێ دکەم و لگەل هونەری یێ ئارامم.
گۆت ژی:»ستران ل دەف من ڕۆحیەتەکە، هەموو مرۆڤ پێدڤی ب وێ چەندێ نە کو گۆهێ خۆ بدەنە سترانان و دەمەکێ بۆ تەرخان بکەن، چونکی ستران پەیامێن مەزن د گەهینیت، و د ژیانا مە دا گۆهداریا سترانان یا پێدڤیە، ل دەستپێکا خوە یا ستران گۆتنێ من قوتابخانا سترانا کوردی هونەرمەندێ خودێ ژێ ڕازی ئەیاز زاخۆیی هەلبژارت چونکی گەلەك حەز ژێ دکەم و ب سترانێن وی من دەستپێکر، ب تایبەت سترانێن دادێ لاندکێ ب هەژینە و بسکێن تە زراڤن و من دیت جارا عەولی، و چ تەڤنە تە ڕستی دەلال، بەردەوام ل دیوان و ئاهەنگان سترانێن وی دبێژم، ب بۆچوونا من دەرگەهێ چوونا ناڤ قادا هونەری هەر دوو هونەرمەندێن ستێر ئەیاز یوسڤ و ئەردەوان زاخۆیی نە».
زێدەتر ژی گۆت:»ل سالا 20123 من ئێکەم ستران ب شێوێ ڤیدیۆ کلیپ بناڤێ تل خەنا ل سەر فۆلکلۆرێ کوردی یێ داوەت و شەهیانان بەلاڤکر، هەر وێ سالێ من ڤیدیۆ کلیپەك ل سەر نەورۆزێ بەلاڤکر، پاشان ل سالا 2024 من ڤیدیۆ کلیپەك ل سەر عەشق و ڤیانا وەلاتی بەلاڤکر، و هەر دیسان من ڤیدیۆ کلیپەك ل دوور عەشق و ئەڤینیێ ژی بەلاڤکر، و ل دەمەکێ نێزیك ژی دێ ڤیدیۆ کلیپەکا نوو بەلاڤکەم، و د نوکە ژی دا ئەز مژوولی بەرهەمەکێ نوو مە بۆ وەرزێ بهارێ کو ب شێوەیەکێ نوو و سەردەمانەیە لێ تام کوردەوارییە».
نيشاندان