هەولێر، قائید میرۆ:

رێڤەبەرێ گشتیێ بازرگانی ئاشكرا كر، ژڤانێ تژیكرنا فۆرما ئەلكترۆنی دێ بۆ دەمێ 10 رۆژان هێتە درێژكرن و دبێژیت: ئەو كەسێن ل دەرڤەی وەلاتی ئاكنجی، نەشێن پشكداریێ بكەن.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیاركر، پشتی تەمامبوونا دەمێ گوهۆڕینا فۆرما ئاهێن خوارنێ‌، هێشتا دەلیڤە بۆ وەلاتیان دێ‌ هێتەدان و دەمێ تژیكرنا فۆرما ئەلكترۆنی بۆ دەمێ چەندین رۆژان دێ هێتە درێژكرن و گۆت: «ل 5ی مەها بهێت ژڤانێ‌ ئەلكترۆنیكرنا فۆرما ئاهێن خوارنێ‌ دێ‌ ب دوماهی هێت، لێ‌ بۆ دەمێ‌ 10 رۆژێن دی دێ‌ هێتە درێژكرن، لەوڕا پێدڤیە وەلاتی لەزێ ل تژیكرنا فۆرما ئەلكترۆنی بكەن، بەروڤاژی ماف نامینیت و ئەرزاقێ وان دێ هێتە راگرتن».
نەوزاد شێخ كامل گۆتژی: «هەر وەلاتیەكێ ئاریشە هەبن و ناڤێ وی نەهێتە تۆماركرن، دشێت سەرەدانا فەرمانگەهێن فۆرما ئاهێن خوارنێ بكەت و ب رێیا پێشكێشكرنا داخوازەكێ ئاریشەیا وی دێ هێتە چارەسەركرن، بەلێ ئەڤ وەلاتیێن ل دەرڤەی وەلاتی ئاكنجی، نەشێن فۆرمێ تژی بكەن و پشكداریێ‌ د فۆرما ئەلكترۆنی دا بكەن، هەروەسا ئەڤێن ئاریشەیا تەلاقێ هەی، ئانكو ئەو هەڤژینێن پێكڤە ناژین، فۆرمێن تایبەت بۆ وانا هەنە و ناهێنە بێ بەهركرن».

سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ ب هەڤالینیا شاندەكێ مەكتەبێ دوهی 22/6/2025 سەرەدانا لقێ ئێك یێ پارتی كر و ژ لایێ د. نەوزاد عەبدوللا، بەرپرسێ لقێ ئێك و دەستەیا كارگێریا لقێ ڤە پێشوازی لێهاتە كرن.
سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ د سەرەدانا خۆ دا ب ئامادەبوونا بەرپرسێ لقێ كۆمبوونەك ل گەل كارگێر و بەرپرسێن ناوچەیێن سنۆرێ لقێ ئێك یێ پارتی ئەنجام دا.
بەرپرسێ مەكتەبا رێكخستنێ‌ د كۆمبوونێ دا باس ل ڕەوشا سیاسی یا دەڤەرێ و دوماهی پێشهات و گوڕانكاریێن ناڤخۆ و دەرڤە، هەروەسا كاركرن ل سەر بەرنامە و پلانەكا تۆكمە بۆ نهـۆ و پاشەرۆژێ ژ بۆ رێكخستن و زێدەتر بهێزكرنا ئۆڕگانێن پارتی ل سنۆڕێ لقێ ئێك یێ پارتی كر.

رەمەزان زەكەریا:

كاروانێ ئاڤەدانكرنێ ب پشتەڤانیا كابینەیا نەهێ یا حكومەتا هەرێما كوردستانێ یێ‌ بەردەوامە، د نوكە دا هژمارەكا پڕۆژەیان ل سنۆرێ دەڤەرداریێن ئاكرێ‌ و بەردەڕەشێ‌ دهێنە ئەنجامدان.
ئەندازیار محسن میرانی، رێڤەبەرێ سەخبێری و پاراستنا رێك و پران ل ئاكرێ بۆ ئەڤرۆ گۆت: «نو كە كار ل سەر سەخبێركرنا ڕێكێن سەرەكی و لاوەكی ل رۆڤیا بۆ بەردەڕەشێ‌، دیسا چێكرنا رێكێن هژمارەكا گوندان و دروستكرنا رێكا د ناڤبەرا بەردەڕەشێ‌ بۆ كەلەكێ‌ دهێتە كرن».
گۆتژی: «ل سنۆرێ‌ دەڤەرداریا ئاكرێ‌ ژی، ل هندەك گوندێن سەر ب ناوچەداریا گردەسێن ڤە پڕۆژەیێن خزمەتگوزاری دهێنە ئەنجامدان».

هەولێر، قائید میرۆ:

رێڤەبەرێ بەرهەمئینانا كارەبێ خویا كر، خشتەیەك بۆ برێڤەچوونا پڕۆژەیێ ڕۆناهی هاتیە دانان و دبێژیت: هەتا دوماهیا سالا بهێت، دێ‌ سەرانسەری هەرێما كوردستانێ ڤەگریت.
فارس میرخان، رێڤەبەرێ بەرهەمئینانا كارەبێ بۆ رۆژناما ئەڤرۆ دیاركر، هەتا نوكە ملیۆنەك و 100 هزار كەس ژ پڕۆژەیێ كارەبا ڕۆناهی مفاداربووینە و نێزیكی 290 هزار هەڤپشكێن كارەبێ، پشتی مفاداربووین، كارەبا 24 دەمژمێری هەیە و گۆت: «كاركرن یا بەردەوامە، هەتا كارەبا هەموو هەرێما كوردستانێ دبیتە 24 دەمژمێری، نوكە ل سەنتەرێن باژێڕێن هەولێر و دهۆك و سلێمانیێ پڕۆژەیێ ڕۆناهی دهێتە ئەنجامدان و هەتا دوماهیا سالا بهێت، دێ سەرانسەری هەرێما كوردستانێ ڤەگریت، خشتەك هاتیە دانان بۆ بڕێڤەچوونا پرۆسا كارەبا پڕۆژەیێ ڕۆناهی».
فارس میرخان گۆتژی: «مە نوكە چار هزار و 200 مێگاواتێن كارەبێ وەكی بەرهەم هەنە، پشتی ل هژمارەك تاخێن باژێڕان كارەب بوویە 24 دەمژمێری، هەتا نوكە ئێك هزار و 260 موەلیدە هاتینە ڤەمراندن، مەرەم ژ ئەنجامدانا پڕۆژەیێ ڕۆناهی بۆ كێم مەزاختنا كارەبێ یە ژ لایێ وەلاتیان و دێ كاریگەریێن زۆر ل سەر كەرتێ كارەبێ هەبیت و وەلاتیان ژی دێ كارەبا بەردەوام هەبیت».

دهۆك، لەزگین جۆقی:

ب پشتەڤانیا مەسرور بارزانی، سەرۆكێ حكومەتا هەرێما كوردستانێ، ئەڤرۆ 23/6/2025 سێ هۆلێن بیرەوەرییان بۆ ئێزدیان ل دەڤەرداریا شێخان دێ هێنە ڤەكرن و مەزنترین هۆلا بیرەوەرییان ل سەر ئاستێ هەرێما كوردستانێ بۆ ئێزدیان هاتیە دروستكرن.
سەعید جردۆ، سەرۆكێ دەستەیا بلندا بنگەهێ لالشێ‌ بۆ ئەڤرۆ راگەهاند، ئەڤرۆ رێورەسمێن ڤەكرنا ئاڤاهیێن هۆلا لالشێ‌ بۆ سیمینار و كۆمبوونان و هۆلا لالشێ‌ بۆ بیرەوەریێن جڤاكی و بنگەهێ لالشێ‌ تایێ شێخان دێ هێنە ڤەكرن و گۆت: «ئەڤ هەرسێ‌ هۆلە ب پشتەڤانیا سەرۆكێ حكومەتا هەرێما كوردستانێ هاتینە نووژەنكرن».

زنار تۆڤی:

بێوار عەبدولعەزیز، پەیڤدارێ رێڤەبەرییا بەرگریا شارستانی ل پارێزگەها دهۆكێ، بۆ رۆژناما ئەڤرۆ دیاركر، دوهی سێ گەشتیارێن عەرەب ل سنۆرێ پارێزگەها دهۆكێ خەندقین.
ناڤهاتی گۆت: «ئێك ژ وان كچەكا 14 سالی بوویە، بناڤێ نورا ئەدهەم، خەلكا مووسلێ‌ یە، ل گرێ گەورێ یا سەر ب دەڤەرداریا سێمێلێ ڤە، كەفتییە د ناڤا بیرەكا ئاڤێ دا و خەندقییە، هەروەسا هەمان رۆژ خووشك و برایەك پێكڤە چووینە سەر سكرێ دهۆكێ مەلەڤانیا بكەن، هەردو گەشتیارێن عەرەب بوون، ژییێ ئێك ژ وان 11 سال بوون و یێ دیتر ژی 23 سال بوون، هەردو د سكرێ دهۆكێ دا خەندقین و ل گەل هندێ، سێ كەسێن دیتر ژی ل سكرێ دهۆكێ هاتینە رزگار كرن، دیسا تەرمێن هەرسێیان بۆ نۆشدارییا داد ل دهۆكێ هاتنە ڤەگوهاستن».