سێمێل، موسا خالد:
گرنگیدان ب پێشئێخستنا كەرتێ چاندنێ، د. عەلی تەتەر، پارێزگارێ دهۆكێ ب ئامادەبوونا خەلیل مەحمود، دەڤەردارێ سێمێلێ و رێڤەبەرێن گشتی یێن چاندنێ و وەبەرهێنانێ ل پارێزگەها دهۆكێ دوهی 18/6/2025 سەرا پڕۆژەیێ ستراتیجی یێ كاڤین گرین هاوس یێ وەرگرتنا بەرهەمێن چاندنێ یێ كەرتێ تایبەت دا و گەڕیانەك د ناڤ پڕۆژەی دا كر و ژ نێزیك سەحكرە قووناغێن دوماهیێ یێن بجهئینانا پڕۆژەی .
پارێزگارێ دهۆكێ د پەیڤەكێ دا باس ل گرنگیا پڕۆژەی د بیاڤێ چاندنێ دا ژ بو وەرگرتنا بەرهەمێ جۆتیارێن دەڤەرێ كر و گۆت: «ئەڤە پڕۆژەكێ ئێكانەیە ل سەر ئاستێ هەرێمێ و ئیراقێ و دێ خزمەتەكا مەزن یا جۆتیارێن دەڤەرێ كەت، نەخاسمە د بیاڤێ وەرگرتن و عمباركرنا فێقی ل وەرزێن جودا یێن سالێ، دیسا پشتەڤانیا حكومەتێ و پارێزگەهێ بۆ چێكرنا ڤان جۆرە پڕۆژەیان دیاركر، كو دەلیڤەیێن كاری بۆ سەدان گەنجان دێ پەیداكەن».
پڕۆژەیێ ناڤبری ل سەر رووبەرێ 577 هزار مەترێن دوجاركی و ب گوژمێ 60 ملیار دیناران دهێتە بجهئینان، ژ 100 عمبارێن ساركرنێ و كارگەهێن جوداكرنا فێقی و بەرهەمێن چاندنێ و قوتوبەنكرنێ و پڕۆژەیێ چاندنا پتر ژ 200 هزار دار زەیتۆنان و چاندنا گەلەك جۆرێن كەسكاتی پێك دهێت، دێ بیتە بنگەهەكێ سەرەكی بۆ دابینكرنا ئاسایشا خوارنێ و هەتا نوكە ب رێژەیا 85% پڕۆژە هاتیە ئەنجامدان.
نيشاندان