زاخۆ، دلۆڤان هالۆ:
ڕەشا سالح، شێوەکارا خودان شیانا باژێڕێ زاخۆ د دیدارەکێ دا بۆ ڕۆژناما ئەڤرۆ دیار کر کو هونەرێ شێوەکاری وەکو تالنتەکێ یە ل دەف من، و ئەز د تالنتا خوە دا شیام گەلەك سەرکەفتنان ب دەستخۆڤە بینم ئەڤە ژی بەهرەکە ژ دەڤ خودایێ مەزن، هونەرێ شێوەکاری نامێ دگەهینیت و ئەز ب ڕێکا هونەرێ شێوەکاری ناما خوە وەکو من دڤێت ب ڕێکا کەڤالێن خوە دگەهینم، هونەرێ شێوەکاری هونەرەکێ بێدەنگە و من شیا ب ڕێیا ڤی هونەری بابەتێن کەڤالێن خوە داڕێژم و گەلەك دەرگەهـ ب ساناهی بۆ من ڤەکرن کو بشێم ژێ دەرباز ببم.
ناڤهاتیێ ئاماژە ب وێ چەندێ ژی کر کو شێوەکارێ سەرکەفتی دڤێت ئێکەم جار بهایی بدەتە خۆ و کارێ خۆ یێ هونەری و یێ دووربیت ژ چاڤلێکرنێ، و شێوازێ خۆ یێ تایبەت هەبیت و د بەرژەوەندیا وەلاتێ خۆ دا بیت، ئێکەمین کەسێ هاریکاری و پشتەڤانیا من کری مامۆستا عەونی سامی بوو، و نوکە ژی هەر ئەو هاریکاریا من یا ماددی و مەعنەوی دکەت، لەوڕا ئەز گەلەك سۆپاسیا وی دکەم، خۆشییا کارێ من ئەوە دەمێ کو ئەز کەڤالەکێ د نەخشینم هەست ب ئارامیێ دکەم و دەروونێ من ئارام و ساخلەم دبیت، گەلەك جاران دەمێ کەڤالان د نەخشینم مۆزیك و ستران ژی دگەلدانە و هندەك جاران لگەل کەڤالان سەمایێ دکەم، و هەستەکێ نەخۆشە دەمێ ئەز ژ دروست کرنا کارێن شێوەکاری دوور دکەڤم هەر وەکو ئەز ژ زاڕۆکێ خوە دوور.
گۆت ژی:»من گەلەك کەڤال یێن هەین و بەهرا پتریا وان گرافیكن، دناڤبەرا سالا 2008 هەتا 2018 من چالاکیێن باش هەبوون و کەڤالێن من بۆ گەلەك جهـ و وەلاتان چووینە، کەڤالێن من گرێداینە ب شێوازێ دناڤبەرا واقعی و سریالی و تەعبیری دا و ئەز هندەك هێمایان دناڤدا بکاردئینم وەکو گیانەوەران و پرچا درێژ و جلۆبەرگ و چاڤ و چەندین هێمایێن دی، ئەز حەز ژ هەموو جۆرێن کەڤالان دکەم و هەر جۆرەکێ ژی ڕامانا خۆ یا تایبەت هەیە، و پتریا کارێ من رەش و سپی یە چونکی هونەرێ گرافیكێ د بنیات دا ڕەش و سپی یە».
شێوەکار ڕەشا گۆت ژی:»من چار پێشانگەهێن تایبەت و چەندین پێشانگەهێن هەڤبەش ڤەکرینە ل زاخۆ هەتا سلێمانیێ، و چەندین باوەرنامە و خەلاتێن سەرکەفتیێ ئێکێ و دووێ وەرگرتینە ل سەرانسەری کوردستانێ، هەر دیسان ل سەر ئاستێ وەلاتێن عەرەبی ژی من خەلاتێ رافع ئەلناسری ل وەلاتێ ئۆردنێ وەرگرتیە، و ل چەندین وەلاتان ژی من بەشداری د پێشانگەهێن هونەری دا کرینە وەکو ئەلمانیا و سوید و پۆلەندا و چین و ئەرمینیا و تورکیا».
زێدەتر ژی گۆت:»ل وەلاتێن جیهانێ کەڤال ب بهایەکێ باش دهێنە فرۆتن چونکی هونەرمەندێن وان ب بهانە و بهایی ددەنە کەڤالێن خۆ، لێ ل دەڤ مە هونەرمەندی گەلەك بها نینە، ژ بەرهندێ کارێ وان ژی بێ بهایە، بۆ نموونە ژ بەری چەند ڕۆژان کەڤالەکێ من د پێشانگەهەکێدا ژ لایێ هندەك کەسێن بیانی ڤە هاتە دزین و ئەگەر من دووڤچوون بۆ نەکربا کەڤالێ من بۆ من نە دزڤری ڤە و بۆ چ کەسێ ژی نە خەم بوو، لەوڕا هێشتا هونەرمەند ل وەلاتێ مە ب بها نەبوویە، و هونەرێ شێوەکاری د ئاستەکێ دا خراب دایە، خۆش بەختانە ئەز هونەرمەندم ژبەرکو هەمی کەس نەشێن ببنە هونەرمەند، و ل داهاتی ژی من پرۆژەك هەیە».
نيشاندان