بسپۆرەکێ کاروبارێن رۆژهەلاتا ناڤین دیار دکەت، دەستهەلاتا سووریێ دڤێت ل هەمبەر ئێرشێن ئسرائیلێ جارەکا دی رۆسیا ڤەگەریتە ڤە سووریێ و خوەدان پێگەهـ بیت و ئەو یەک ژی بوویە جهێ دلگرانیا ئەمریکا، رەوشا سووریێ ئالۆزە و دیارە دێ ئالۆزتر ژی لێ هێت.

فەهیم تاشتەکین بسپۆرێ کاروبارێن رۆژهەلاتا ناڤین دیار کر، ئەحمەد شەرع باش دزانیت ئێدی ئەمریکا پشتەڤانیێ ل دەستهەلاتەکا ناڤەندی بۆ سووریێ ناکەت، پشتی روودانێن ل سوەیدا و کوشتنا ب سەدان وەلاتیێن سڤیل یێن عەلەوی هەلوەستێ جڤاکێ نێڤدەولەتی ل هەمبەر سووریێ هاتیە گوهۆڕین و نها ئەمریکا و وەلاتێن رۆژئاڤایی دخوازا سیستەمەک نە ناڤەندی بۆ سووریێ دکەن و ئەو یەک ژی ب دلێ ئەحمەد شەرعی نینە و گۆت: (ل ئالیێ دی ئێرشێن بەردەوام یێن ئسرائیلێ ل سەر شامێ هەنە، وەلاتێن عەرەبی ژ بەر پەیوەندیێن خوە یێن بازرگانی ل گەل ئسرائیلێ ب چو رەنگەکێ د رەوشا نها دا نەشێن ژ بەر سووریێ ل دژی ئسرائیلێ دەرکەڤن، یا دی ل غەزە هەر رۆژ وەلاتیێن عەرەب دهێنە کوشتن و هەتا نها ژی کۆمکارا عەرەبی نەشیایە چو بکەت، ئەو یەک ژی نیشا ددەت شام نەشێت پشتا خوە ب وەلاتێن عەرەبی گەرم بکەت).
ناڤهاتی ئەو یەک ژی دیار کر، شام باش دزانیت کو سووریێ بۆ رۆسیا گەلەک یا گرنگە و پشتی هەڤدیتنێن ڤێ دووماهیێ د ناڤبەرا رۆسیا و سووریێ دا بەرپرسێن شامێ هەست ب ڤێ یەکێ کرینە، کو رۆسیا دڤێت جارەکا دی پێگەهێ خوە ل سووریێ بهێز بکەت، ئەحمەد شەرع هەست ب ڤێ یەکێ کریە د رەوشا نها دا تورکیا ژی نەشێت یا پێدڤی بۆ سووریێ بکەت، چونکی تورکیا وەکو ئەندامەکا ناتۆ نەشێت ژ بەر بەرژەوەندیێن خوە یێن ل گەل ئەمریکا ل دژی ئسرائیلێ وەکو پێدڤی هاریکاریا سووریێ بکەت، ژ بەر ڤێ یەکێ ژی دەستهەلاتا نها یا شامێ دڤێت بەرێ خوە بدەتە رۆسیا و د کۆمبوونێن ڤێ دووماهیێ دا ژی بەحسێ ڤێ یەکێ هاتیە کرن، لێ رۆسیا ژی نەڤێت پەیوەندیێن خوە ل گەل ئسرائیلێ ئالۆز بکەت.
بسپۆرێ کاروبارێن رۆژهەلاتا ناڤین ئەو یەک ژی دیار کریە، ئەمریکا دڤێت ئەحمەد شەرعی نەچار بکەت دا ل گەل کوردان و دورزیان پرسێن هەی چارەسەر بکەت و سیستەمێ نوو یێ سووریێ ژی ب دلی هەموویان بیت، هەکە ئەحمەد شەرع ل دژی ئەمریکا دەرکەڤیت ئەو یەک دێ بیتە ئەگەرێ ژناڤچوونا دەستهەلاتا وی، چونکی ئەمریکا ژ بەر بەرژەوەندیێن خوە یێن ل گەل ئسرائیلێ رێ نادەت سیستەمێ نوو یێ سووریێ ل دژی ئسرائیلێ بیت، ژ بەر ڤێ یەکێ ژی هەکە ئەحمەد شەرع بەرێ خوە بدەتە رۆسیا دبیت ئەو یەک ببیتە ئەگەرێ ژناڤچوونا دەستهەلاتا وی، چونکی سووریێ د رەوشەکێ دا نینە بشێت دژبەریا ئەمریکا بکەت.

سان جۆلا گەنجەکێ کوردە و ژیێ وی ٢٢ سالن و شیا د هەلبژارتنێن هەرێمی ل باژێرێن ویتین یێ سەر ب دووسەلدۆرفێ سەرکەفتنەکا مەزن بدەستڤە بینیت و بۆ دەزگەهێن راگەهاندنا ئەلمانیا دیار کر، ئەو ژ سەرکەفتنا خوە حێبەتی مایە، چونکی گەلەک سیاسەتمەدارێن ناڤدار یێن ئەلمانیا ل هەمان باژێری هەڤڕکیا وی دکرن لێ وی شیایە رێژەیەکا مەزن یا دەنگان بدەستڤە بینیت و سەرکەڤیت.
گەنجێ کورد یێ ٢٢ سالی د هەمان دەمی دا قۆتابیێ پشکا زانستێن سیاسی یە و ئەندامێ پارتا سوسیال دیموکرات یا ئەلمانیا و بەرپرسێ لقێ لاوان یێ وێ پارتیێ یە ل باژێرێ ویتین کو دکەڤیتە باشورێ باژێرێ دووسەلدۆرڤ یێ ئەلمانیا.
دەزگەهێن راگەهاندنا ئەلمانیا ب گرنگی بەحسێ سەرکەفتنا گەنجێ کورد دکەن و وەسا دبینن دێ د پاشەرۆژێ دا بیتە سیاسەتمەدارەکێ گەلەک زیرەک و دێ شێت کارێن گەلەک مەزن ژی ئەنجام دەت.

ناڤەندا چاڤدێریا مافێن مرۆڤی یا سووریێ دیار کر، گرۆپێن چەکدارێن سەر ب تورکیا بەری کو ژ عەفرینێ دەرکەڤن و بچنە وارێن خوە، هەموو ئاڤاهیێن کو بەری نها ژ بۆ وان هاتبوونە دروست کرن، خراب کرن دا کەس پشتی وان ئاڤاهیان بکار نەئینیت.
هەمان ناڤەندێ ئەو یەک ژی دیار کریە، نها ژی گەلەک گرۆپێن چەکدار ل عەفرینێ و دەوروبەرێن وێ ماینە و ئاریشەیان ژ بۆ خەلکی دروست دکەن، گرۆپێن چەکدار گوهداریا شامێ ژی ناکەن و ئالۆزیان دروست دکەن و بەرهەڤ نینن ئەو دەڤەرێن کو ب زۆرێ داگیر کرینە بجهـ بهێلن.
ئەو یەک د دەمەکێ دایە کو بەری نها هەمان ناڤەندێ دیار کربوو پشتی ژناڤچوونا رژێما بەشاری گەلەک ژ گرۆپێن چەکدار ژ دەوروبەرێن عەفرینێ چووینە جهێن خوە و کورد ڤەگەریانە وارێن خوە، لێ هەتا نها ژی ب هزاران خێزانێن عەفرینێ ژ بەر گرۆپێن چەکدار نەشێن ڤەگەرنە ڤە مالێن خوە ل عەفرینێ و دەوروبەرێن وێ.