قەیس وەیس:
جەماوەرێ‌ وەرزشی و پشتەڤانێن یانەیا دهۆك ئەڤرۆ ب ژڤانێ‌ مزگینییا سەركەفتنێ‌ نە ئەوا دێ‌ ژ پایتەختێ‌ ئیراقێ‌ بەغدا هێت، دەمێ‌ تیما یانەیا دهۆك ل یاریگەها ئەلمەدینە ببیتە مێڤانا یانەیا دیالا ژ چارچووڤەیێ‌ یارییا پاشئێخستی یا گەڕا 24ێ‌ ئەوا دێ‌ ل دەمژمێر حەفتی شەڤ ژ خولا ستێرێن ئیراقێ‌ یا فوتبۆلێ‌ هێتە كرن.
دهۆك گەشبینە بۆ ڤەگەڕاندنا هێزا خوە
تیما یانەیا دهۆك د ڤێ‌ یاریێ‌ دا داخواز كرییە ژبۆ ڤەگەڕاندنا هێزا خوە پشتی د سێ‌ یاریێن بۆری دا بتنێ‌ ئێك خال بدەستڤە ئینایی، د دو یاریێن ئێكێ‌ دا تووشی خوسارەتیێن گران بووی بەرانبەر یانەیێن جەوییە(4-چنە) و شورتە(3-1) دگەل نەفت میسان بێ‌ گۆل وەكهەڤبوو، خالێن خوە گەهاندینە 52 خالان ل رێزا شەشێ‌ دهێت ژ 15 سەركەڤتن، حەفت وەكهەڤی و نەهـ خوسارەتییان، ژلایێ‌ خوەڤە یانەیا دیالا ل رێزا 17ێ‌ دهێت ب كۆمكرنا 31 خالان، ئەڤ یارییە بۆ ئەلهۆییان دەلیڤەیە ڕێكا خوە یا ئەنجامێن خراب بۆ یێن باش ڤەگەڕینیت و جەماوەرێ‌ خوە ئاشت بكەت، دبیت نە پشكدارییا هەردو یاریزانێن دهۆكێ‌ یێ‌ لوبنانی كەریم دەرویش و پیتەر گۆرگیس دگەل تیمێ‌ كارتیكرنا خوە هەبیت ئەوێن دێ‌ دگەل هەلبژارتیێن خوە بەرهەڤییان بۆ ڤاڤارتنێن مۆندیالا جیهانی دكەن، لێ‌ دروشمێ‌ ئەلهۆییا ڕاوەستییانا ژ دەستدانا خالانە.
ئەمیر ئەزرەفشان بەرانبەر تاقیكرنا دویێ‌ یە
ڕاهێنەرێ‌ نوو یێ‌ یانەیا دهۆك و كوڕێ‌ رۆژهەلاتا كوردستانێ‌ ئەمیر ئەزرەفشان و هاریكارێ‌ وی پێشرەو عەزیز ئەوێن ژ یانەیا دالكۆرد هاتینە دهۆكێ‌ بەرانبەر تاقیكرنەكا ب هێز یا دویێ‌ یە، پشتی د یارییا بۆری بەرانبەر نەفت میسان تیم بڕێڤە برین، ل دووڤ داخویانییا ڕاهێنەری د پرێس كۆنفرانسێ‌ رۆژنامەڤانیێ‌ پشتی یاریێ‌ دا، ئەو گەشبینە ئاستێ‌ یاریێ‌ باشتر بیت و ئەنجامێن سەركەڤتی ڤەگەرین.
ئەمیر ئەزرەفشان ئەوێ‌ هاتییە جهێ‌ ڕاهێنەرێ‌ بەرێ‌ مەسعۆد میرالی ئەوێ‌ دەست كاركێشانا خوە پشتی یارییا دگەل تەلەبە ڕاگەهاندنی دەرئەنجامێ‌ ب توندی ژی ژلایێ‌ فدراسیۆنا فوتبۆلا ئیراقێ‌ ڤە هاتییە سزادان بۆ دوورئێخستنا وی هەتا ب دووماهی هاتنا خولێ‌ و 25 ملیۆن دیناران، ئەمیر ئەزرەفشان پێشتر ئەركێ‌ ڕاهێنەراتییا یانەیێن دالكۆرد د خولا پلا ئێكا سویدی و ئۆستەرسۆند یا خولا نایابا هەمان وەلات كرییە، دیسان باوەرنامەیا پرۆ یا ئۆرۆپی و دو باوەرنامەیێن ماستەر د بۆرێن جودا وەرگرتینە، بەری نوكە دگەل یانەیا دالكۆرد ڕاهێنەرێ‌ هەر ئێك ژ ڕێوان ئەمین، هارۆن ئەحمەد، پاشەنگ عەبدوللا و یێ‌ لوبنانی عیماد لاواتی د خولا سویدا كرییە.
هارۆن گەشبینە ب ڤەگەڕیانا ئەلهۆییان
د پرێس كۆنفرانسێ‌ رۆژنامەڤانی یێ‌ پشتی یارییا بۆری هارۆن ئەحمەد ستێرێ‌ یانەیا دهۆك گۆت: د یاریێن دگەل جەوییە و شورتە دو خوسارەتیێن گران و نەچاڤەڕێكری مە دان و كاودانێن هەستیار مە هەبوون، هەروەسان ئەم بێ‌ ڕاهێنەر بووین ل دووڤ شیانێن خوە مە یاری دكرن، لێ‌ پشتی یارییا بۆری و هاتنا ڕاهێنەرێ‌ نوو ئاستێ‌ مە باشتر لێهات و ئەم نێزیكتر بووین ژبۆ تۆماركرنا گۆلان و مە د خال ژ دەستدان، گەشبینم بۆ یاریێن مای یدێ‌ بهێز ڤەگەڕین و ڕاهێنەر دێ‌ پلانێن باش هەبن
ئەلهۆییان چەند یاریێن پاشئێخستی ماینە
پشتی ئەڤرۆ تیما دهۆكێ‌ یارییا خوە یا چارێ‌ ژ سەرجەمێ‌ ئەوا شەش یاریێن پاشئێخستی دكەت، دو یاریێن مایی ژی هەتا سوبەهی دێ‌ فدراسیۆنا فوتبۆلا ئیراقێ‌ ژڤان و دەمێ‌ وێ‌ دیار كەت، یارییا ئێكێ‌ ئەوا ژ گەڕا 28ێ‌ بەرانبەر یانەیا هەولێر بڕیارە ل یاریگەها شەهید فرانسۆ حەریری هێتە كرن، یارییا دویێ‌ و دووماهیێ‌ دێ‌ بەرانبەر یانەیا مینا یا بەسرایی بیت دناڤ ئەرد و جەماوەرێ‌ خوە دا ئەوا دێ‌ ژ چارچووڤەیێ‌ گەڕا 33ێ‌ یا پاشئێخستی بیت.
34 گۆل یاریزانێن دهۆكێ‌ تۆمار كرینە
تیما دهۆكێ‌ خوانا دەهـ یاریزانێن پشكداری د تۆمار كرنا 34 گۆلان دا هەیە سەرجەمێ‌ 35 گۆلان و بڤی ڕەنگی، پیتەر گۆرگیس هەشت گۆل، پاشەنگ عەبدوللا حەفت گۆل، كەریم دەرویش پێنچ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی و لۆكاس هێنریك هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید، زانا عەلی گۆلەك تۆماركرینە، ژلایەكێ‌ دووڤە گۆلەك بۆ یاریزانەكێ‌ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
هەلوەستێ‌ گشتی یێ‌ ڕێزبەندییا خولێ‌
1- شورتە 77 خال
2- زەورا 74 خال.
3- زاخۆ 63 خال.
4- تەلەبە 56 خال.
5- جەوییە 56 خال.
6- دهۆك 52 خال، كێمتر سێ‌ یارییان.
7- نەفت 52 خال.
8- ئەلگەرمە 49 خال.
9- ئەلقاسم 48 خال.
10- نەفت ئەلمیسان 45 خال.
11- هەولێر 44 خال، كێمتر یارییەك.
12- كارەبا 44 خال.
13- نەورۆز 43 خال.
14- نەجەف 41 خال.
15- كەرخ 40 خال.
16- مینا 39 خال، كێمتر یارییەك.
17- دیالا 31 خال، كێمتر یارییەك.
18- نەفت ئەلبەسرا 29 خال.
19- كەربەلا 22 خال.
20- حدود 17 خال.

یاریزانێ‌ كوردستانی و هەلبژارتیێ‌ ئیراقێ‌ هەژار جەبار عەزیز میدالییا زێرین ب دەستڤە ئینا پشتی شیایی ڕێزا ئێكێ‌ د كۆپا كاپانبای یا نێڤدەولەتی بۆ یارییا فرۆكەڤانییا ئاسمانی ب دەستڤە بینت ئەوا ل ئەینییا بۆری هەڤڕكیێن وێ‌ باژێرێ‌ تالدیكۆرغان وەلاتێ‌ كازاخستانێ‌ هاتییە كرن.
د داخویانیەكا رۆژنامەڤانی دا حارس محەمەد سەرۆكێ‌ فدراسیۆنا ئیراقێ‌ یا یاریێن فرۆكەفانی دیار كر، پێنج یاریزانێن هەلبژارتیێ‌ ئیراقێ‌ پشكدار كۆپا كاپانبای یا نێڤدەولەتی دا كر ئەوا ل ئەینییا بۆری باژێرێ‌ تالدیكۆرغان یا كازاخستانی هاتییە كرن، ب گشتی 46 یاریزان ژ 16 وەلاتێن جیهانی پشكداربوون، یاری ب شێوەیێ‌ تیم و ئاستێ‌ كت د هاتنە كرن، ل سەر ئاستێ‌ كت یاریزانێ‌ مە هەژار جەبار عەزیز شیا رێزا ئێكێ‌ ب دەستڤە بینت و ببیتە خودان میدالییا زێری، ل سەر ئاستێ‌ تیمێ‌، هەلبژارتیێ‌ ئیراقێ‌ ل رێزا سێیێ‌ هات، ئەڤە ژی باشترین دەستكەفتە و بۆ جارا ئێكێ‌ ل سەر ئاستێ‌ نێڤدەولەتی ب دەستڤە دئینن.
ناڤهاتی دیار كر ئەڤ دەستككەفتە دێ‌ بیتە پێنگاڤەكا مەزن یارییا فرۆكەڤانییا ئاسمانی بەر ب پێشڤە بچیت دیسان دەرگەهێن باشتر بۆ قارەمانیێن داهاتی بهێتە ڤەكرن، دێ‌ هەموو بزاڤان كەین هەلبژارتیێ‌ ئیراقێ‌ د پرانییا هەلكەفتێن جیهانی پشكداربیت.
بۆ زانین یاریزانێن هەلبژارتیێ‌ ئیراقێ‌ پێكهاتی بوون ژ زەید عەبد كامل و محەمەد مەجید محەمەد ژ دهۆكێ‌، هەژار جەبار عەزیز ژ هەولێرێ‌، رێبین رەشید و عەبدوللا ئەیاد ژ سلێمانیێ‌ پشكداربوون.

شاهۆ فەرید:

د داخویانیەكا تایبەت دا راهێنەرێ تیما ڤۆلی بۆلێ كچێن یانەیا سەنحاریب د. هەكار برقی بۆ رۆژنامەیا ئەڤرۆ دیار كر بۆ وەرزێ‌ ئەڤ سالە ئەوان پیلانێن باش هەنە و ئارمانجا سەرەكی دەربازبوون ژ قۆناغا ڤاڤارتنان و هەڤڕكی بۆ ناسناڤێ‌ قارەمانییا ئیراقێ‌ یە.
هەروەسان ناڤهاتی گۆت: ل دووڤ پێنگاڤا مە یا ئێكێ‌ مە یاریزانێن هەرە باش ل سەر ئاستێ ئیراقێ ئیناینە د ناڤرێزێن تیمێ دا، ئەڤە دێ هێزەكا باشتر دەتە پێكهاتێ مە، بەرهەڤی ژی باشی دهێنە كرن بۆ ڤاڤارتنان، وەكو پێنگاڤا ئێكێ‌ مە هزرا خوە دانایە ل سەر دەربازبوونێ ژ قۆناغا ڤاڤارتنان، دووڤ دا دێ باشتر كار كەین بۆ هەڤڕكیا ناسناڤی ژی چۆنكو مە دڤێت ئاستەك و هێزەكا باشتر نیشان بدەین، ئەو پلانێن مە دارشتین دێ بزاڤێ‌ كەین ب باشی و ئاست بهێنە جێبەجێكرن، دێ تیمەكا نموونە ژ لایێ ئاستی و یاریێ ڤە نیشاندەین بەر ب پێشڤەبچین، یاریزانێن پێشتر تنێ سێ دگەل تیمێ ماینە و هندەك ژی تیمێن مە یێن دی سەركەفتینە و ئەوێن مە دەرڤە ئیناین.
د.هەكاری گۆت ژی: ل دووڤ پێزانین مە ڤاڤارتنێن قۆناغا ئێكێ‌ یا قارەمانییا ئیراقێ‌ دێ‌ ل دووماهییا تەموزێ بیت لێ هێشتا باژێر و یاریگەها یاریێ نە هاتیە دیار كرن، هەڤڕكی دێ یا ب هێز بیت دناڤبەرا تیمان دا و دهێتە پێشبینیكرن شەش تیم دێ ڤاڤارتنا دەربازبنە قوناغا دووماهیێ كەن، هەر شەش تیم دێ پێكڤە یاریێ كەن و ئێك دێ ناسناڤی دەستڤەئینت، ئەم ئەڤێ تیما بەرهەڤدكەین پشت راستین دێ هەڤركیا دەربازبوونێ و ناسناڤی كەین.

عەلی حاجی:

د داخویانیەکێ دا ستێرێ باسکێت بۆلا یانەیا زاخۆ و یاریزانێ هەلبژارتیێ ئیراقێ بۆ رۆژنامەیا ئەڤرۆ دیار کر هنگاڤتنا وی د دەمەکێ هەستیار دا بوو و وی دڤیا زێدەتر ئاستی دگەل هەلبژارتیێ ئیراقێ پێشکێش بکەت.
زێدەتر موراد عەلی گۆت: هنگاڤتنا من د دەستێ چەپێ دایە و پشتی وێ روودانا ترافیکی هەر ئێکسەر من نەشتەرگەریەک بۆ دەستێ خوە ئەنجامدا، هنگاڤتنا من ڕاستە پشتی دووماهی هاتنا خولا پێشەگەرێن ئیراقێ بوو لێ دەمەکێ هەستیارە ژی ژبەر کو ئەز یاریزانێ هەلبژارتیێ ئیراقێ مە و من دڤیا گوپیتکا ئاستێ خوە دگەل هەلبژارتی پێشکێش بکەم، لێ هنگاڤتن ژی پشکەکە ژ وەرزشێ و پێدڤییە پتر خوە ماندی بکەم دا کو د زویترین دەم دا دوبارە ڤەگەرم یەکەیێن ڕاهێنانێ، د وێ روودانێ دا کارتێکرن ل دەستێ من یێ چەپێ بوویە لێ ب ئانەهیا خودێ ئەو نەشتەرگەریا من کری دێ هاریکار بیت ژ بۆ ڤەگەریانا من بۆ یاریێ.
ناڤبری گۆت ژی: پێدڤییە ب رژدی ل سەر خوە کار بکەم بۆ ڤەگەریانا خوە و د نوکە من پێدڤی ب بهێنڤەدانێ هەیە هەتا کو دەستێ من ب تەمامی دروست دبیت. و خویاکر وەکو یارێزانێ کوردستانی ئەو دێ هەموو بزاڤان کەت جهێ خوە دناڤ ڕێزێن هەلبژارتیێ ئیراقێ دا پارێزیت، دیسان گەشبینە بۆ وەرزێ بهێت یانەیا زاخۆ ب شێوەکێ باشتر و ب هێزتر ڤەگەڕێتە دناڤ خولێ دا.