بارەگەهێ بارزانی بەلاڤكر: ب مخابنییەكا مەزنڤە دەنگوباسێ مالئاڤاهیكرنا خەباتكەرێ كورد (ئیبراهیم گاباری) گەهشتە مە. رەحمەتی ئیبراهیم گاباری كەساتییەكێ كوردپەروەرێ رۆژئاڤایێ كوردستانێ بوو كو ژییەكێ دوور و درێژ بۆ خەباتا كوردایەتیێ ل شۆڕشا ئیلۆنێ و قووناغێن دی یێن خەباتا گەلێ مە تەرخانكربوو».
بارەگەهێ بارزانی باس ل وێ چەندێ ژی كر» ئیبراهیم گاباری د وێ رێدا ئاوارەیی و دەمەكێ زۆر ل زیندانێ دیتییە و وی و مالباتا وی كاریگەرییەكا مەزن ل سەر بزاڤا رزگاریخوازا كوردی ل سووریێ هەبوو و نموونەیا خەباتكەرەكێ راستەقینە و وەفادار بوو».
بارەگەهێ بارزانی ئاماژەكر ژی» سەرۆك مەسعود بارزانی كو رەحمەتی ئیبراهیم گاباری ل چەندین قووناغێن دژوار ژ نێزیك نیاسییە، ب گوهلێبوونا مالئاڤاهیكرنا وی خەمبار بوو و سەرەخوەشیێ ل مالبات و كەسوكارێن وی دكەت».
رۆهنكر ژی» ب ڤێ هەلكەفتێ هەڤخەمییا خوە ئاراستەی مالبات و دۆستێن رەحمەتی ئیبراهیم گاباری وهەموو خەباتكەرێن رۆژئاڤایێ كوردستانێ دكەین و خوە ب هەڤپشكێن خەما وان دزانین».

ئامینە زكری، ئەنداما مەكتەبا سیاسی یا پارتی دیموكراتی كوردستان دوهی سێشەمبی 16/9/2025 ل بەپەرێ خوە ل تۆرا جڤاكییا (فەیسبووكی) بەلاڤكر: ئەڤرۆ ل گەل هەڤالێن خوە یێن ئافرەتێن كۆمیتەیا ناڤەندی و سەرپەرشتیارا ئێكەمین كۆنفرانسێ ئافرەتێن كوردستانێ، ل گەل سەرۆك بارزانی كۆمبووین.
ئامینا زكری گۆت ژی» بۆچوونا سەرۆك بارزانی یا گرێدای ب پرسا ئافرەتانڤە، پشتەڤانی و هاندان و بكارئینانا شیانێن ئافرەتانە، ل گەل خوە پێگەهاندن و پەیداكرنا سەقایەكێ گونجای بۆ وان».
ئامینا زكری گوت ژی» هزرا سەرۆك بارزانی ل سەر پشكدارییا ئافرەتان د شۆڕش و بزاڤا رزگاریخوازا كوردستانێدا ئەوبوو كو دیاركری: ئافرەتان ل شۆڕش و بزاڤا رزگاریخوازا كوردستانێدا ل ب ملێ زەلامان خەبات كریە، هەكە ژ زەلامان زێدەتر نەكربیت، كێمتر نەبوویە. د راستیدا ل شۆڕشیا ئیلۆنێ و گولانێ رۆلێ وان ژ زەلامان یێ كاریگەرتربوو، چونكە هەم دایك و ماموستا بوون بۆ زارۆیێن خوە، ژ ئالییەكێڤە رۆلێ جوتبار و پالەیان ژی ددیت، لەوما هەكە ئەو ئیرادەیا ب هێز یا ئافرەتان نەبا، دبیت شۆڕشێ خوە نەگرتبا، لەوما هەرچەند باسێ ئافرەتا كورد بهێتە كرن، كێمە».
ئامینا زكری د پشكا دی یا نڤیسینا خوە دا، دبێژیت سەرۆك بارزانی گوت» ئەز گەلەك یێ خوەشحالم كو دبینم هەژمارەكا مەزن ژ ئافرەتان رۆلەكێ مەزن و ب هێز د ئاڤاكرنا جڤاكیدا دبینن» و دوپاتكر» رۆلێ خوە د پەروەردەیێ ل سەر هزرا نیشتمانپەروەری ل سەر ئافرەتان و نڤشێن داهاتی بكەن، گرنگە ئافرەتا كورد رۆلێ خوە د هەموو واراندا ببینیت».
ئەنداما مەكتەبا سیاسی یا پارتی دیاركر ژی» بۆچوونا سەرۆك بارزانی ئەوە كو پێدڤییە مافێ ئافرەتان یێ پاراستی و رێزلێگرتی بیت، چونكە ئەڤ بۆچوونە پشكەكە ژ فەلسەفا شێخ عەبدولسەلام بارزانی و پشتی وی ژی شێخ ئەحمەد بارزانی و مەلا مستەفا بارزانی، هەروەسا سەرۆك بارزانی دوپاتی ل وێ چەندێ كر ( هەردەم پشتەڤان و هاریكارێ هەوەمە)».
ئامینا زكری ئەوژی بەرچاڤكر»سەرۆك بارزانی هەردەم دوپاتیێ ل سەر وێ چەندێ دكەت كو پێدڤییە ئافرەتێن كوردستانێ شیانێن خوە پێشڤەببەن و ل دۆر ڤێ چەندێ پشتەڤانەكێ ب هێز بوویە، باشترین نموونە ژی پارتی وەك ئێكەك پارتا باشوورێ كوردستانێ رێژەیا كۆتایا ئافرەتێن كۆمیتەیا ناڤەندی ل كۆنگرەیێ 14 بلندكریە بۆ 15%».
ئامینا زكری سوپاسییا سەرۆك بارزانی كر ودبێژیت» سەرۆك بارزانی ژێدەرێ هێز و باوەرییا مەیە، سوپاس بۆ پشتەڤانیكرنا ئێكەمین كۆنفرانسێ ئافرەتان، سوپاس بۆ پشتەڤانییا سەرۆك بارزانی ل بجهئینانا راسپاردەیێن كۆنفرانسی و هاندان بۆ زێدەتر كاركرنێ و رۆل دیتنێ و باشتركرنا رەوشا ئافرەتان».

دیدار/ دلۆڤان ئاكرەیی

وەزیرێ سامانێن سروشتی ل حوكمەتا هەرێما كوردستانێ، ل دۆر دەستپێكرنا هنارتنا پەرتۆلا هەرێما كوردستانێ راگەهاند، ل نێزینك دێ بەر ب چارەسەركرنێ چیت، ژ ئالیێ خوەڤە رێڤەبەرێ گشتیێ كۆمپانییا ب بازاركرنا پەترۆلا ئیراقێ(سۆمۆ) راگەهاند: تێكگەهشتنەك باش هەیە و بزاڤ د بەردەوامن بۆ گەهشتنێ ب رێككەفتنا دوماهیێ بۆ وێ چەندێ پەترۆلا كوردستانێ بهێتە هنارتن و بگەهیتە بەندەرێ جەیهان یێ توركی.
كەمال محەمەد سالح، وەزیرێ سامانێن سروشتی ل حوكمەتا هەرێما كوردستانێ ل گەل لیو جیون، قونسلێ گشتیێ كۆمارا مللی یا چینێ ل هەرێما كوردستانێ كۆمبوو.
د دیدارەكێدا قونسلێ گشتیێ چینێ ل هەرێما كوردستانێ نێزیكبوونا گەهشتنێ ب چارەسەرییا دۆسێیا پەترۆلی د ناڤبەرا ئیراقێ و هەرێما كوردستانێدا بلند هەلسەنگاند و بەرهەڤییا وەلاتێ خوە بۆ پشتەڤانیكرنێ ل ڤێ پێنگاڤێ نیشادا.
وەزیرێ سامانێن سروشتی ل حوكمەتا هەرێما كوردستانێ ئاماژە ب چارەسەركرنا كێشە و ئاستەنگێن پێشبەری هنارتنا پەترۆلا هەرێما كوردستانێ كر كو ل نێزیك دێ بەر ب چارەسەركرنێ چن، هەروەسا وەبەرهێنان و كار و پڕۆژە و چالاكیێن وەلاتێ چینێ ل هەرێما كوردستانێ بلند هەلسەنگاندن.
ژ ئالیێ خوەڤە كۆمپانییا ب بازاركرنا پەترۆلا ئیراقێ (سۆمۆ) راگەهاند: هەموو گرێبەست و پێبەندی ل گەل كۆمپانیێن كڕیارێن پەترۆلا بەرهەمئینایا كوردستانێ ب ئەنجام گەهاندیە.
(كۆمپانییا (سۆمۆ) ئەوژی دیاركر كو هنارتنا پەترۆلا هەرێما كوردستانێ، دێ ناڤودەنگییا ئیراقێ زڤرینیت وەك ژێدەرەكێ سەرەكیێ پەرتۆلێ بۆ بازارێ تێهنیێ ئۆرۆپا.
هەر دوهی سێشەمبی 16/9/2025، نزار شەتری، رێڤەبەرێ گشتیێ كۆمپانییا ب بازاركرنا پەترۆلا ئیراقێ (سۆمۆ) گوت» حوكمەتا فیدرال و حوكمەتا هەرێما كوردستانێ و كۆمپانیێن وەبەرهێنانا پەترۆلێ، پێدڤی ب تمامكرنا میكانیزمێن بجهئینانا قانوونا بودجەی نە و ل دۆر وێ چەندێ تێكگەهشتنا باش هەیە و بزاڤ د بەردەوامن بۆ گەهشتنێ ب رێككەفتنا دوماهیێ بۆ وێ چەندێ پەترۆلا هەرێما كوردستانێ بهێتە هنارتن و بگەهیتە بەندەرێ جەیهان یێ توركی».
شەتری گوت ژی» نوكە پەترۆلا خام یا هەرێما كوردستانێ ناهێتە هنارتن، بەلكو ل ناڤخوەیا هەرێما كوردستانێ دهێتە بكارئینان، نوكە ژی ب گۆڕەی قانوونا بودجەیا سالا 2025 كاردكەین، بۆ وێ چەندێ رێژەیا زێدە پشتی بكارئینانێ، بهێتە هنارتن».
رێڤەبەرێ گشتیێ كۆمپانییا ب بازاركرنا پەترۆلا ئیراقێ (سۆمۆ) رۆهنكر ژی» هنارتنا پەترۆلا هەرێما كوردستانێ، د نوكەدا دێ بازارێ ئۆرۆپا ژی پڕكەت، ب تایبەت كو كێشە د ناڤبەرا رووسیا و ئۆرۆپا دا هەیە».

دیدار/ دلۆڤان ئاكرەیی

ئەندامەكێ جڤاتا نوونەرێن ئیراقێ ژ فراكسیونا پارتی دیاركر: ئیراقێ ترسا كارڤەدانێن پارتی هەیە ب تایبەتی ل بایكۆتكرنا هەلبژارتنێن جڤاتا نوونەرێن ئیراقێ
شێروان دووبەردانی، ئەندامێ جڤاتا نوونەرێن ئیراقێ ژ فراكسیونا پارتی دیموكراتی كوردستان ل دۆر كێشەیێن د ناڤبەرا هەولێرێ و بەغدایێ دا بۆ رۆژنامەیا (ئەڤرۆ) گوت» ب مخابنی ڤە ل بەغدا یاری ب هەستێن خەلكێ كوردستانێ دهێنە كرن ب رێیا بەهانەیێن بێ بنەما ب مەبەستا نەهنارتنا مووچەیێ خەلكێ كوردستانێ، رۆژەكێ دبێژن پەترۆل ناهێتە هنارتن و رۆژەكێ دبێژن پارەیێ داهاتییان یێ كێمە و رۆژەكێ ژی دبێژێن هەرێم پێگیری رێككەفتنان نەبوویە، ب ڤان كار و كریارێن وان حالەتێ دەرونی یێ خەلكی دلگران كریە، یا سەیر ئەوە بۆچی ئیراقێ هانا خوە بۆ جڤاتا دەولەتێ بریە، كو دراستیدا ڤێ پرسێ چو پەیوەندی ب ڤێ جڤاتێ ڤە نینە، ئەڤ جڤاتە زێدەتر كارێ وێ شرۆڤەكرن و شیكرنا كارێن ئیدارییە، بەلێ بۆ پرسا هەولێرێ و بەغدایێ بڕیارا دادگەها فیدرالی هەیە كو د راستیدا ڤێ پرسێ چو پەیوەندی ب ڤێ جڤاتێ ڤە نینە، چونكە سەرۆك وەزیرێن ئیراقێ، مەحەمەد شیاع سودانی، وی بخوە شیرەتكارێ قانوونی هەیە».
دووبەردانی ئاشكراكر» ئەوا نوكە ئیراق دكەت دەم كوشتنە، هەتاكو ئەڤسالە چەند پارەیەكێ كێم بهنێریت، یان د نوكەدا ژبەر وێ چەندێ پارتی بایكوتا هەلبژارتنان نەكەت، پشكەك ژ مووچەی بەری هەلبژارتنان بهنێرن، بەلێ ئەڤە چارەسەری نینە، چونكە د دەما شەش مەهاندا دو مووچە هاتینە و هەكە ئەڤ سێ مەهە ژی ب دوماهی بهێن و مووچەیەك بهێتە هنارتن كەنگی ئەڤە جهێ قەبوولكرنێ یە؟».

سەرۆكێ دەزگەهێ ئاشۆرییان ژ پێخەمەت دادپەروەریێ راگەهاند: هەرێما كوردستانێ رۆلەكێ گرنگ د پاراستنا ئاشۆرییاندا گیرایە، ب تایبەت پشتی سالا 2003 كو هەژمارا وان ل دەڤەرێن دی یێن ئیراقێ ب شێوەیەكێ بەرچاڤ كێمبوویە، هەروەسا ئاماژەكر: هەرێما كوردستانێ بوویە جهەكێ ئارام و سەلامەت بۆ وان ئاشۆریێن ژ ترسا گەف و هێرشان دەڤەرێن خوە بجه هێلاین.
سام دەرمۆ، سەرۆكێ دەزگەهێ ئاشۆرییان ژ پێخەمەت دادپەروەریێ د داخۆیانییەكا رۆژنامەڤانیدا گوت» بەری سالا 2003، هەژمارا ئاشۆرییان ل ئیراقێ ل سەر ئاستێ جیهانێ ل بلندترین ئاستدا بوو ب شێوەیەكی ل بەسرا مە كەنیسە هەببوو، بەلێ نوكە ئێك ئاشۆری ژی ل وێرێ ناژیت، ل بەغدایێ ژی 95% ژ ئاشۆرییان نەماینە، یان ئیراق بجه هێلایە یان هاتینە هەرێما كوردستانێ».
سەرۆكێ دەزگەهێ ئاشۆرییان ژ پێخەمەت دادپەروەریێ ئەگەرێ ڤێ مشەختبوونێ بۆ وان گەفێن روو ب روویێ وان بووین زڤراند و ئاماژە ب وێ چەندێ كر» چونكە گەف لێ هاتینە كرن كەنیسە هاتینە تپپبارانكرن، وەك ل كەنیسەیا سەیدەتولنەجات روودای و خەلك ل دەمێ پەرستنا خودێ دا كوشتی».
سام دەرمۆ، رەوشا هەرێما كوردستانێ بلند هەلسەنگاند و گوت» سوپاس بۆ خودێ، ل هەرێما كوردستانێ چو كەنیسە ناهێنە تۆپبارانكرن و سەلامەتی و ئارامی هەیە».
هەروەسا ناڤبری ئاماژە ب پێنگاڤەكا ئەرێنی كر بۆ بیرئینانا دیرۆكا ئاشۆرییان و گوت» ئێك ژ سەركەفتنان بۆ ئاشۆرییان ئەوە كو بۆ جارا ئێكێیە ژ سالا 1933، ل سێمێلێ دێ مۆنۆمێنتەكا تایبەت ب ئاشۆرییانڤە هێتە دروستكرن، بۆ بیرئینانا وێ كۆمكوژیێ ئەوا ژ ئالیێ لەشكرێ ئیراقێڤە دژی خەلكێ بێچەك یێ ئاشۆری هاتیە كرن».
هەڤدەم، سەرۆكێ دەزگەهێ ئاشۆرییان ژ پێخەمەت دادپەروەریێ ئاماژە ب هەبوونا هندەك كێشەیان كر، وەك كێشەیا زەڤییان و نەبوونا دەلیڤەیێن كاری، كو د كۆمبوونەكێدا ل واشنتۆنێ ل گەل مەسرور بارزانی، سەرۆكێ حوكمەتا هەرێما كوردستانێ، باس لێ كربوو و گوت» مە ئەڤ كەیسە پێشكێشی سەرۆكێ حوكمەتا هەرێما كوردستانێ كر، وی ژی سۆز دا دووڤچوونێ بۆ بكەت، ئەڤە ژی تشتەكێ گەلەك باشە».
كۆمكۆژییا سێمێلێ ژ ئالیێ لەشكرێ ئیراقێڤە ب سەركردایەتییا جەنەرال بەكر سدقی ل مەها تەباخا سالا 1933 ئاكنجیێن ئاشۆری یێن ئیراقی ل سێمێلێ و دەوروبەر كربوونە ئارمانج، ب گۆڕەی ئامارێن بریتانیا د ناڤبەرا 300 بۆ 600 ئاشۆری هاتبوونە كوشتن، د دەمەكیدا ژێدەرێن ئاشۆری هەژمارا كوشتییان د ناڤبەرا سێ هزار بۆ شەش هزار كەسان د خەملینن.