سەگڤان ئیسماعیل
ئاخینك دهاتن خارێ، هەمی هیڤێن خوە ڕاچاندن بۆ ئەوان بیرهاتنێن دەم بسەرڤەچوویی، ژیان بەرەڤ هەناسەیا خوە یا هەلنگفتی دچۆ، ئەڤجا هەر جار دەمێ ئاخینکێن خوە دیتن لاوازی و بێهۆدەیی ئاسمانێ بهارێ بەرەڤ تاریبوونێ دچۆ…هەمی ئالاڤێن ژیانا خوەلی گرتنێ هیڤیێن چرمسی بەرەڤ بێهۆدەبوونا خوە ڕادەستی ئاڤابوونا ڕۆندکێن ب ڕەنگێ زەر بوویی دچۆ. دەم دچۆ..دەم دچۆ..هەر دەمێ دبێژی یا بوویی کۆلبە ب چ کەسێ ڕا نەدگەهشت.. ئەوی هیڤیێن ڕاچاندن بۆ گەهشتنا هەلاویستی و ئازار و خەمگینی گەهشتنە كۆپیتکا کەفتنا بێ ڕابوون. دەمێ بیرهاتن دوبارە دبوون ئێکسەر ڕۆژا پێنجشەمبیا ڕەش هاتە بیرێ؛ دەمێ دگۆت دێ هزرا خوە کەم پاشی دێ بەرسڤا خوە دەم…لێ بەرسڤا ئەوێ ڕەنگەکێ زەر بوو و خوبایبوونا خوە دا گەهشتبوو كۆپیتکا سەرێ كۆپێ کەمباخگرتی.
ل دووماهیێ هەمی هیڤیێن من نە بوون ڕاستی ژ ئەگەرێ بێدەستهەلاتدارییا من، ئەگەر ئەز ژی وەکی بەرێزی خودان هەبوون بام دبیت جارا ئێکێ دا بێژی بێتە ژیان یا ڕەشە ڕووتە…دەرگەهێن د چوون ئەڤینا تە هەمی بەرامبەری من د هاتنە گرتن.. بهارا من ژی ل داوییێ بوونە هەڤال دگەل ڕۆندکێن هەناسەیێن من ئەوێن هەڤرکی د کرن بۆ ئەوان شکەستنێن بووینە پەیام دگەل هەست و نەستا تێکەلی هەڤبوون، هەر جار وەکی ژیێ دانعەمرەکێ هەڤرکیێ د کەت لگەل هەبوونا ژیانا نە وەکهەڤ.
سالار محەمەد دۆسكی:
1- 5
زیندانیێ سیاسی، ملا ئەحمەد حەسەن زێوكی رێكانی ، گۆتاربێژ و پێشنڤێژێ مزگەفتا جودی ل دهۆكی ، د دیدارەكێ دا ل گەل رۆژناما ئەڤرۆ بەحسێ چیرۆكا دەستەسەركرنا خوە ژلایێ رژێما بەعسییا ئیراقێ ڤە كر، بتوهمەتا ئەندامبوونا رێكخستنێن نهێنی بۆ هاتبوو دروستكرن و تووشی چەندین ئەشكەنجەدان و نەخوشیان دبیت.
زیندانیێ سیاسی، ملا ئەحمەد حەسەن زێوكی رێكانی، گوتاربێژ و پێش نڤێژێ مزگەڤتا جۆدی ل دهۆكێ بۆ بەرپەرێ دیرۆك ل رۆژنامەیا ئەڤرۆ دیاركر، كو ل سالا 1970 ژدایك بوویە، خواندنا خوە یا سەرەتایی ل گوندێ هورە و قوتابخانا سیریێ ب دووماهی ئینایە، ژ بەر نەبوونا قوناغا ناڤنجی ل كومەلگەها سیریێ قەستا كومەلگەها شێلادزێ كریە، و خواندنا ناڤنجی ل وێ كومەلگەهێ ب دووماهی ئینایە، و دوڤدا ل ئامادەیا پیشەسازی ل دهۆكێ هاتیە وەرگرتن و پشتی چار سالان خواندن ب دوماهی ئینایە، ناڤبری دیاركر كو ژ بەر كاودانەكی سالەكا خواندنێ ل سەر دەربازبوو و نەگەهشت بچیتە تاقیكرنەكێ و ل خولا دووێ مامۆستایان هوشداری دایێ پشكداری تاقیكرنا نەبیت، چونكە هەر (10) سەركەفتیێن ئێكێ دهێنە ڕەوانەكرن بۆ پەیمانگەهێ و ئەوێ سالێ پشكداری تاقیكرنا نەبوو، و سالا دوڤدا شیا كویێ نمران (90) دەربێخیت و شیا ل پەیمانگەها تەنكلوژیا ل بەغدا بهێتە وەرگرتن، و پشتی ماوەكی وحوكمەتا وی سەر دەمی یا ئیراقێ ئەو گرێدان سەر ب (تصنیع عەسكەری) ڤە و كاودانێن نەخوش بۆ دروست بوون، و هەر چ دەم نەبوو و زێدەتر گرێدایی پەیمانگەهێ و (تصنیع عەسكەری) بووینە، و ئەو بۆ ئەگەرەك ل گەل چەندین هەڤالان خوە ڤەكێشیت و پشتی هاتیە دەڤەرا خوە دەست ب كارێ ئازادكر، و دوكانەكا سەرتراشیێ ل دەڤەرێ بخوە ڤەكر و بەردەوامی دا ژیانا خوە یا نورمال وی دەمی خێزاندار بوویە و بابێ كچەكێ بوویە.
مامۆستایێ ئاینی، مەلا ئەحمەد زێوكی رێكانی، زێدەتر گۆت: شەڤا 15/10/ 1989دەنگێ دەرگەهێ ژوورا مە هات و بابێ من خواست دەركەڤم و پشتی من دەرگەه ڤەكری، تەماشە دكەمێ حەوشا مالا مە یا پڕە ژ چەكدارێن لەشكری و ئەوان چەكداران گۆت تو فلان كەسی؟، من گۆتێ بەلێ، گۆت كارێ خوە بكە و جلكان بكێ دێ ل گەل مە هێی و من ژی جلكێن كوردی كرنێ، و پشتی ل گەل دەركەفتیم ژ دیوارێ مال شیتكا من ڤەكر و دچاڤێن من ئالاند و گەلەك یا غەریب بوو بوو من، و من دلێ خوە دا گۆت ئەڤە چ بوو؟؟ فرقەكا لەشكری ل دەڤەرێ بوو و ئینا مە بارەگایێ فرقێ ل سیریێ و دیسا هەر وێ شەڤێ ئینامە ئامنا ئامێدیێ و هەر چ قوتان و ئاخفتنێن كرێت و هەر چ بەرامبەر من نەهاتەكرن، و دەستەسەركرنەكا نورمال بوو، دو هەڤال ژی ل گەل من بوون و رۆژا دی سپێدێ ئەم ب ترۆمبێلەكێ ڤەگوهاستینە ئەمنا دهۆكێ، و دەست و چاڤێن مە دگرێدای بوون و مە نەزانی كی كیە و پشتی گەهاندیمە ئەمنا دهۆك، برمە ڤەكولینێ و چاڤێن من دگرێدایی بوون و ئەوێ ڤەكولین ل گەل من كری ئێكسەر گۆت تو رێكخستیێن نهێنی سەر ب پارتی دیموكراتی كوردستان ڤە، و من گۆت هوسا نینە و ئەوێ ڤەكولین كری ب زمانێ عەربی ئاخفت و گۆت شاهد ل سەر تە هەنە و من هەر گۆت هوسا نینە، و ڤەكولین بێی ئێشاندن و قوتان بوو و پشتی بورینا دو هەتا سێ رۆژا دووبارە ڤەگەراندینە ئەمنا ئامێدیێ، پشتی بزاڤەكا ئازادكرنا مە هاتیەكرن، ژلایێ هەر دو مامێن هێژا (محەمەد كەلحێ ئاغا، ئەحمەد كەلحێ ئاغا) ژ دل سوپاسیا هەردوكان دكەم و چ كێماسی بوومە نەكرن، و گەلەك بزاڤێن ئازادكرنا مەدا كرن، و پشتی ڤەگەراندینە ئامێدیێ هەتا (13) رۆژا ماینە ل ئامێدیێ و رۆژەكێ جەماعەتێن ئەمنێ هاتن و كەلامچێن مە ژ دەستێ مەكرن، و ب وێ بۆچوونێ دهێینە ئازادكرن، ئەم دژوورەكێ دابووین ل هنداف دەرگەهێ ئەمنێ و مە دیت كی دهێت و كی چیت و ئێڤاری مە ژ نیشكەكێ ڤە دیت ترۆمبێلا ئەمنێ ژ دهۆكێ ڤەگەریا ڤە و دەمێ هاتینە ژوور دەنگێ كەلامچان هات، و مە هەستپێكر كو بەردانا مە نینە و كار بەرەف نەباشیێ ڤە یێ دچیت و هاتنە ژوور ئەم كەلامچەكرین و هەر وێ ئێڤارێ ئێكسەر ئەم بەرەف ئەمنا دهۆكێ ڤە برین، وێ شەڤێ ئەم ماینە ل ئەمنا دهۆكێ و رۆژا پاشتر سپێدێ زی ب ترۆمبێلەكێ ئەم ڤەگوهاستینە باژێرێ زاخۆ و دەمێ گەهاندینە ئەمنا زاخۆ بێی پرسیار و بێ هەر تشتەك ئێكسەر لێدان و قوتانەكا بێ دلوڤانی و هۆڤانە ل گەل مە هاتەكرن، وقوتانەكا ئێكجار زێدە و هەر گۆتن هوون رێكخستنێن نهێنی نە و مە گۆتێ نەخێر، و تشتێ ژ قوتانێ نەخوشتر مە ل زاخۆ دیتی ئاخفتنێن نەخوش بەرامبەر مە هاتنە گۆتن، دەمێ ئەفسەرەك دهاتە ژوور و هەتا (15) كەسان ل گەل بوون ئەوێن قوتانا زیندانیان نە یاری بوو و دەمێ ئێك بێژیت كەفتیمە دەستێ ئەمنا بەعسیان و من دانپیدان نەكریە بوو من تشتەكێ گەلەك غەریب بە، ئەوا من ب چاڤێ خوە دیتی چ بەشەر تەحملا وێ قوتانا بەعیسان ناكەن، و نەچار بووینە ئەم هەرسێ دانپیدانێ بكەین، بەلێ ئەم دناڤا رێكخستنێن پارتی دیموكراتی كوردستان دا هاتینە رێكخستن و ئەڤە ژ ئەنجامێ قوتانەكا زێدە زێدە هات، و مە مرن ب چاڤێن خوە دیت و ئەگەر دانپیدانێ نەكەی دێ ب قوتانێ هێتە كوشتن.
سۆلین سلێمان:
رەوەند حەكیم، خودانێ پەرتووكخانەیەكێ یە، جهێ وی دكەڤیتە نیڤا بازاڕی ل نێزیك كەلها هەولێرێ، د دیدارەكێ دا بۆ رۆژنامەیا ئەڤرۆ گۆت: ژبەر حەزا منا زێدە بۆ خواندنا پەرتووكان من ئەڤ جهە بۆ خوە ڤەكریە و رۆژانە دەمێ خوە لڤی جهی دبۆرینم و كەسێن دهێت پەرتووكان ژمن دكڕن پتریا وان ژیێ وان د سەر (30) سالیێ دانە و هەموو جۆرێن پەرتووكان ل دەف من دهێنە فرۆتن، ب تایبەت ژی یێن گرێدای بۆارێ یاسیایێ.
هەروەسا گۆت: د چاردە سالێن بۆری دا هەڤالینەیەكا باش دناڤبەرا من و پەرتووكان دا چێبوویە و نوكە ئەز باش دزانم كا خواندەڤان پتر حەزژ خواندنا چ جۆرێن پەرتووكان دكەم ئەز وان دئینم و هەكە كاودانێن دارایی دباشبن بكڕ د مشەنە و هەردەم داخوازا من ژ هەموو كەسان ئەوە، ب تایبەت ژی گەنجان كو بەردەوام پەرتووكان بخوینن و باشتر خوە رەوشەنبیر بكەن.
هەرهین محەمەد:
سوهام محەمەد بەرواری، كو دهێتە هژمارتن ئێكەم شۆفێرا تەكسیێ یا ژن ل دهۆكێ، ددیدارەكێ دا بۆ ئەڤرۆ گۆت: كارێ من یێ سەرەكی خوارن چێكرن بوو دەمێ من داخوازیێن خەلكی ب ترۆمبێلا تایبەت گەهاندبان كریا من دا من و ب ڤێ چەندێ خوسارەت بووم و هەكە من ب تەكسیێ هنارت با ئەز دگەهشتمە بهایێ خوە یێ دروست و ل دووماهیێ من وەسا هزركر هەكە ئەز ب خوە تەكسەیەكێ بكڕم و هەر ئەز ب خوە داخوازیێن خۆ بگەهینم دێ باشتر بیت و وەسا دەركەت ژی باشتر بوو دگەهشتمە بهایێ خوە و بهایێ من یێ تەكسیێ و جارەكێ چوومە وەلاتێ ئیرانێ ژی من تەكسی دیتن و ل سەر نڤیسا بوو ئەڤ تەكسیە بتنێ بۆ ئافرەتانە، چونكو ژن ل گەل ژنێ یا ئارامە، لەورا من ترۆمبێلا خۆ ژ تایبەت كرە تەكسی و بتنێ شەش هەیڤان من ل سەر كاركر و سێ هەیڤان من د هاژوت و كەسێ ژێ نەدزانی.
زێدەتر گۆت: رۆژەكێ كەسەكێ بەرنیاس یێ سۆشیالێ ئەز دیتم ل ترافیكێ و گۆتە من من دڤێت ئێكەم كەس بم ریكلاما تەبكەم و پشتی وی دەمی ل دهۆكێ دەنگڤەدا ژنەك تەكسیێ دهاژۆت و ئشتیراكا گەلەك ژنان بووم و تەلەفۆنا من دكرن و هەتا نوكە ژی دكەن و ژبەر كارێ خۆژی و نەفەرێن من یێن ژن یێن تایبەت ژی.
دوهی دوشەمبی 28/7/2025 ل سەلاحەدین، سەرۆك مەسعود بارزانی، پێشوازی ل شاندەكێ كۆمارا ئیسلامییا ئیرانێ ب سەرۆكایەتییا رەزا رەحمانی، پارێزگارێ ئازەربایجانا رۆژئاڤا (ئۆرمیێ) كر.
د دیدارەكێدا پارێزگارێ ئازەربایجانا رۆژئاڤا سلاڤێن تایبەت یێن مەسعود پزیشكیان، سەرۆككۆمارا ئیسلامییا ئیرانێ گەهاندنە سەرۆك بارزانی و هەروەسا سوپاسییا حوكمەتا هەرێما كوردستانێ ژی كر كو ئاسانكارییەكا گەلەك باش بۆ وان سەرەدانكاران دكەت كو ب رێكا دەرگەهێ سنۆریێ حاج ئومەران سەرەدانا ئیراقێ دكەن.
هەر د وێ دیدارێدا، دوپاتی ل هەڤبەندی و دۆستایەتییا دیرۆكی د ناڤبەرا هەرێما كوردستانێ و كۆمارا ئیسلامییا ئیرانێ دا و پێشڤەبرنا هەڤبەندیێن ئابۆری و لڤینا بازرگانی د ناڤبەرا هەردو ئالییاندا هاتە كرن.
نێچیرڤان بارزانی، سەرۆكێ حوكمەتا هەرێما كوردستانێ د پەیڤەكێدا كو دوهی دوشەمبی 28/7/2025 ل هەولێرێ ل چالاكییەكا رێكخراوا (یەزدا) یا ئێزدی و رێكخراوا (جێرمەن كووپەریشن) یا ئەلمانی بۆ سالڤەگەرا 11 یا جینۆسایدا ئێزدییان هاتیە پێشكێشكرن، سەرەرای بەرچاڤكرنا رەوشا ئێزدییان، دوپاتی ل پێگیریێ ب پێشكێشكرنا هەموو جۆرێن پشتەڤانیێ بۆ ئێزدییان و پاراستنا مافێن وان كر.
دلشاد شەهاب، هاریكارێ سەرۆكێ هەرێمێ و پەیڤدارێ سەرۆكایەتییا هەرێما كوردستانێ ب نوونەرایەتییا نێچیرڤان بارزانی، سەرۆكێ هەرێما كوردستانێ و ب هەڤالینییا شاندەكێ سەرۆكایەتییا هەرێمێ، پشكداری د وێ چالاكیێدا كر و پەیڤا سەرۆكێ هەرێما كوردستانێ پێشكێشكر.
دەقێ پەیڤا سەرۆكێ هەرێما كوردستانێ:
چەند ڕۆژێن كێم یێن ل بەراهییا مە، ئەم دێ بیرهاتنا ب ژان و ئێش یا (11) سالییا جینۆسایدا ئێزدییان كەین. هەر سال هەرێما كوردستانێ ب هەموو پێكهاتێن خوەڤە، وەك چەندین بیرهاتنێن دی یێن تەحل، ب خەمەكا كوور، ڤێ بیرهاتنێ زندی دكەت، ئو ب ڕێز و وەفاداری، هەموو قوربانیێن وێ تاوانكارییا سەد سالێ، ب بیر دئینیت. كۆمكوژییەكا كێم وێنە یا دیرۆكی، كو ڕێكخراوا تیرۆرستییا داعشێ، ل شەنگالێ و دەڤەرێن ئێزدییان، ل هەمبەر خەلكێ سڤیل و بێگونەهێ مە یێ ئێزدی، ئەنجام دای.
ئەم دەستخوەشیێ ل ڤێ چالاكیێ دكەین كو ڕێكخراوا یەزدا ب هاریكارییا ڕێكخراوا جێرمەن كووپەرەیشن، بۆ ساخكرنا ڤێ بیرهاتنێ، رێكئێخستییە. هەروەسا جهێ دەستخوەشیێیە كو رەڤاندی یێن كەچ و خۆرتێن ئێزدی یێن ڕزگاربوویێن دەستێ داعشێ، رۆلێ سەرەكی بۆ بەرهەڤكرن و سازكرن و بڕێڤەبرنا ڤێ چالاكیێ گێڕایە. ئەڤە نیشانا هێز و ڕژدی و ئیرادەیا وان یا ب هێزە بۆ ڕابوونەڤێ و بەردەو‌امبوونێ.
پیرۆزباهیێ ل وان ژی دكەم یێن كو ب شێوەیەكێ سەركەفتی، بەرنامەیێ مەشقكاریێ یێ (مافێن خوە بزانە) ب دووماهی ئینای، هەروەسا هەموو پشتەڤانیێ ل ماف و سەر‌نج و تێبینی و پێشنیاز و داخازیێن ڕزگاربوویان دەربارەی (قانوونا ڕزگاربوویێن ئێزدی) ل ئیراقێ دكەم.
ئەركێ مەیە ئەم ئەڤرۆ ل ڤێرە بین. ئەم ل ڤێرێینە داكو ئامادەیی و پیگیرییا خوە بۆ پێشكێشكرنا هەموو پشتەڤانی و هەر پشتگیرییەكێ بۆ هەڤوەلاتیێن خوە یێن ئێزدی، دوبارە بكەین. دا بێژینە وان: هوون نە ب تنێنە. وەك هەردەم ئەم ل گەل هەوەینە و هەردەم دێ ل گەل هەوە بین.
ل گەل هەمی ئێش و ژانێن چوویی، ئەم ب ئومێد ل پاشەڕۆژێ دنێڕین. دەستێ مە د دەستێ ئێكدا، دێ پێكڤە بین و دێ پێكڤە كار كەین بۆ دەرمانكرنا برینێن هەوە، كو ئەم دزانین گەلەك كوورن و وەسا ب ساناهی ناهێنە دەرمانكرن! گەلێ كوردستانێ د دیرۆكا خوەدا چەندین كارەسات و جینۆساید دیتینە، لێ هەردەم بهێزتر ژ بەرێ یێ ڕابوویەڤە. ئەم قوربانییان و ئێش و ژانا ژبیر ناكەین، لێ ئەم د پشتڕاستین كو پێكڤە دێ ڤێ ژی دەرباز كەین.
جهێ داخ و دلگرانییەكا مەزنە كو (11) سالا پشتی جینۆسایدا ئێزدییان، هێشتا نێزیكی نیڤا ڤێ پێكهاتەیا رەسەن و سەرەكی یا جڤاكا مە، ئاوارەیە و د كەمپاندا دژیت، ژیان و ژیارەكا دژوار دەرباز دكەت. د ڕەوشەكا گران یا ئابۆری و جڤاكی و دەروونیدا دژین. دەڤەرێن وان نەهاتینە ئاڤەدانكرن و هند ئارامی و تەناهی تێدا نینە وان پشتڕاست بكەت كو ڤەگەڕنە جهێن خوە. ژ هەمووان ژی گرانتر: بجهنەئینانا دادپەروەریێیە بۆ جڤاكا ئێزدی.
سالا 2014ێ و پشتی هنگی ژی، دەما كو داعش چەند كیلۆمەترەكا ژ مە دوور بوو، بودجەیا مە ل بەغدایێ هاتبوو بڕین، هەرێما كوردستانێ د ڕەوشەكا گران و دژوار یا ئابۆری و ئەمنیدا، ب سینگەكێ فرەهـ، دەرگەهێن خوە بۆ هەموو پێكهاتێن ئیراقێ ڤەكرن كو ژ دەستێ تیرۆرێ و توندوتیژیێ دڕەڤین و د هاتنە كوردستانێ.
وان ڕۆژان، خەلكێ بەهدینان ب تایبەتی و یێ كوردستانێ ب گشتی، گەلەك جامێری كر و هەمبێز و مال و مزگەفت و دێرێن خوە بۆ لێقەومییان ڤەكرن، كو جهێ شانازی و پێزانینەكا مەزنە و چو جارا ناهێتە ژبیركرن. ژ هینگی وەرە هەتا نهو، چ ژێ هاتبیت، هەرێما كوردستانێ خەمساری نەكریە بۆ خزمەتكرنا ئاوارەیان، بتایبەتی ژی ئێزدییان، لێ ب راستی ئەڤە تێرێ ناكەت!.
ئەم گەلەك ژ نێزیك ئاگەهدارین و ویژدانا مە دئێشیت دەما كو ئەم دبینین زارۆكەكێ ئێزدی یێ ژدایكبوویێ كەمپان، نهۆ ژیێ وی یازدە سالن و نەچارە بارێ ژینگەهـ و ژیان و ژیارەكا گران، هلگریت. ژیانا كەمپان، بەردەوامییا دەردەسەرییەكێیە كو یازدە سالن دەستپێكریە. هیچ نە راستە هەڤوەلاتییەكێ ئیراقێ، ئەڤ وەلاتێ دەولەمەند، دگەل هەموو شیان و هەبوونا خوە، یازدە سالان ژیانا دەردەسەریێ ببۆرینیت. هاریكاریا مرۆڤانە، قەت بەس نییە و تێرا ئێزدییان ناكەت، ئەڤ پرسە گەلەك ژڤێ چەندێ مەزنترە.
ئەركێ حوكمەتا ئیراقێیە خوە ل هەڤوەلاتیێن خوە یێن ئێزدی بكەتە خودان و ئاوریەكێ جددی ل وان ڤەدەت. ئەڤە ب پلەیا ئێكێ بەرپرسیارییا حوكمەتا ئیراقێیە كو ئێدی ڕێكێ نەدەت شەنگال و دەڤەرێن دی یێن ئێزدییان، مەیدانا ڤەكری یا گرۆپێت چەكدار و میلیشیا بن. دڤێت ئارامی و تەناهی و خزمەتگۆزاری بۆ شەنگالێ و دەڤەرێن دی یێن وان بهێنە ڤەگەڕاندن، دا كو ئێزدییان پشتڕاست بكەن كو دشێن ڤەگەرن و جهێن خوە ئاڤەدان بكەن.
لڤێرێ، ئەم دیسا داخوازا خۆ دوبارە دكەین بۆ بجهئینانا رێككەفتنا حوكمەتا هەرێما كورستانێ و حوكمەتا ئیراقا فیدرال بۆ ئاساییكرنا رەوشا شنگالێ، هەروەسا چێكرنا پارێز‌گەها شنگالێ. نابیت شنگال بۆ هەتاهەتایێ مەیدانا ناكۆكیێن گرۆپێن چەكدار و ئێكلاكرنا ئەجێندایێن هەرێمی بیت. بەردەوامیا ڤێ رەوشێ ل شنگالێ و دەردۆرێن وێ، ستەمەكا مەزنە ل ئێزدییان دهێتە كرن، د دەمەكێدا دڤێت هاریكارییا وان بهێتە كرن داكو بشێن رابنەڤە و ژیانەكا نوو دەست پێ بكەنەڤە.
هەروەسا ژی ئەركێ جڤاكا ناڤدەولەتییە كو پتر د هەوارا ئێزدییان بهێت، هاریكارییا وان بكەت بۆ ئاڤەدانكرنا دەڤەرێن وان یێت وێرانكری. پشتەڤانێ وان بێت بۆ بجهئینانا دادپەروەریێ و سزادانا تاوانكاران. ئەم سوپاسییا هەموو وان وەلاتان دكەین یێن كو كۆمكوژییا ئێزدییان وەك جینۆساید ناساندی. ئەم ل سەر ئاستێ ناڤدەولەتی دێ د كار و هەولێن خوە دا بەردەوام بین داكو جینۆسایدا ئێزدییان زێدەتر بهێتە ناسكرن. پاراستنا پێكهاتەیەكا رەسەنا ڤێ دەڤەرێ، ئەركێ مەیە ل هەرێما كوردستانێ و ئیراقێ، هەروەسا ژی ئەركێ هەموو مرۆڤایەتیێیە. دڤێت، هەموو ئەركێ خوە ل هەمبەر ئێزدییان پێك بینن.
ئەم هەموو خوشك و برایێن خوە یێن ئێزدی پشتڕاست دكەین كو هەر دەمەكێ و ل هەر جهەكێ پێدڤی بیت، دێ بەرگریێ ژ وان كەین و دێ وان پارێزین. هەروەسا من دڤێت دوبارە بكەم كو نڤیسینگەها مە یا رزگاركرنا ڕەڤاندیێن ئێزدی دێ یا بەردەوام بیت ل سەر كارێ خوە و هندی ئێزدییەكێ رەڤاندی مابیت، هەر چ پێدڤی بیت دێ كەین بۆ رزگاركرن یان ئا‌شكراكرنا چارەنڤیسێ وان.
ئەم گەلەك باش دزانین كو بۆ گەلەك مالباتێن ئێزدی یێن كو هیچ تشتەكی دەربارەی زارۆك و كەسوكارێن خۆ یێن بەرزە نزانن، یازدە سالە بۆ وان هیچ نەهاتییە گهۆڕین و د هەمان دەردەسەریێدا دژین. دلێ مە یێ دگەل وان و ئەم دبێژینێ: ئەم بێهنا خوە نادەین هەتا تشتەكێ مسۆگەر ژ خوەشتڤیێن هەوە نەزانین.
سلاڤ ل بیرهاتن و گیانێ قوربانیێن ئێزدی و ل ئیرادەیا بهێز و خۆڕاگرییا ئێزدییان. سلاڤ ل بیرهاتن و گیانێ هەموو وان پێشمەرگێن قەهرەمان یێن كو ب فەرماندەییا سەرۆك مەسعوود بارزانی، بۆ رزگاركرنا شنگالێ و پاراستنا هەموو پێكهاتەیێن كوردستانێ و ئیراقێ، گیانێ خوە داین.
دوهی دوشەمبی 28/7/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ كۆمارا ئیسلامییا ئیرانێ ب سەرۆكایەتییا رەزا رەحمانی، پارێزگارێ ئازەربایجانا رۆژئاڤا (ئورمیێ) كر.
د كۆمبوونەكێدا كو فەرامەرز ئەسەدی، قۆنسلێ گشتیێ كۆمارا ئیسلامییا ئیرانێ ل هەولێرێ بەرهەڤ بووی، بیر و بۆچوون ل دۆر پێشڤەبرنا هەڤبەندیێن دو ئالییانە ب تایبەتی د وارێن لێكگۆهارتنا بازرگانی و ئاسانكاریكرن بۆ هاتنوچوونا گەشتیاران د ناڤبەرا هەردو ئالییاندا هاتە كرن.
شاندێ ئیرانی سوپاسییا حوكمەتا هەرێما كوردستانێ كر بۆ هاریكاریكرن و بەرهەڤیێن پێشوازیكرنێ ل زیارەتكارێن ئیرانی بۆ جهێن پیرۆزێن ئیراقێ.
دوهی دوشەمبی 28/7/2025، رێبەر ئەحمەد، وەزیرێ ناڤخوە ل حوكمەتا هەرێما كوردستانێ، د كۆنگرەیەكێ رۆژنامەڤانیدا ل هەولێرێ ل گەل قاسم ئەعرەجی، شیرەتكارێ ئاسایشا نیشتمانییا ئیراقێ راگەهاند: شاندێ ئیراقێ ئەوێ سەرەدانا هەرێمێ كری ژ پترییا دەزگەهێن ئەمنی و سەربازی یێن ئیراقی پێكهاتبوو، بۆ ڤەكۆلینێ ل گەل لژنەیەكا دی یا هەرێما كوردستانێ، ل سەر وان هێرشێن درۆنی كو ل دەمێن بۆری ئاراستەی هەرێما كوردستانێ دهاتنە كرن و تێدا زەڤیێن پەترۆلی ب ئارمانج دگرتن .
وەزیرێ ناڤخوە گوت» مخابن ئەڤە چەندین جارە ئەو هێرشە دوبارە دبن و ل دەمێن بۆریدا ژی چەندین لژنەیێن دی هاتبوونە دروستكرن، ب لژنەیا هەڤپشكڤە، ڤەكۆلینا تمام هاتیە كرن و گەهشتنە دەرئەنجامێن تمام ژی، بەلێ هەتا نوكە هیچ پێرابوونەكا پێدڤی نەهاتیە وەگرتن و سنۆرەك بۆ ڤان گرۆپان نەهاتیە دانان».
گوت ژی» هیڤیییا مە هاتنا ڤێ لژنەیا هەڤپشك، ڤێجارێ ببیتە دووماهی لژنە بۆ وێ چەندێ ئەڤ لژنە راستییان بۆ هەردو ئالییان ئاشكراكەن، ئەوێن ل پشت ڤان هێرشانە، بهێنە دەستنیشانكرن و رادەستكرن بۆ حوكمەتا فیدرالی تاكو پێرابوونێن ئەمنی و قانوونی ل بەرامبەر بهێنە وەرگرتن و هەرێما كوردستانێ ب چاڤێ دوژمن نەهێتە سەحكرن».
رێبەر ئەحمەد دیاركر ژی» دڤێت سنۆرەك بۆ وان گرۆپان بهێتە دانان و دوور بكەڤن ژ گەفكرنێ و تێكدانا ئارامییا هەرێما كوردستانێ، هیڤیدارین ب هەبوونا قاسم ئەعرەجی دەرئەنجامێن ڤێ لژنەیێ د باشبن، هەموو هاریكارییەك ژی ژ ئالیێ حوكمەتا هەرێمێ بۆ وێ لژنەیێ دێ هێتە كرن، ل سەر راسپاردەیا مەسرور بارزانی، سەرۆكێ حوكمەتا هەرێمێ، كو رێنمایی داینە دەزگەهان هەر چ پێدڤی بیت بۆ ئاسانكاریێ و ئەو بەلگە و پێزانینێن هەین بهێنە دان ب وێ لژنەیێ. تاكو سنۆرەك بۆ وان گەفان بهێتە دانان و دووماهی ب وان مەترسییان بهێتە كرن، چونكە ئەو گرۆپە ژ سنۆرێ یێن دەركەفتین و پێدڤییە ئێدی دووبارە نەبن.
ژ ئالیێ خوەڤە قاسم ئەعرەجی، شیرەتكارێ ئاسایشا نیشتمانییا ئیراقێ د وی كۆنگرەیێ رۆژنامەڤانیدا گوت» ئەم ل هەولێرێ نە بۆ گەنگەشەكرنێ ل سەر وان هێرشێن درۆنی ل دژی زەڤیێن پەترۆلی ل هەرێما كوردستانێ، كو ئەو هێرشەو زیانێ دگەهیننە ئابۆرێ ئیراقێ».
گوتژ ی» دڤێت ئەو هێرشكارانە بگەهنە سزایێ خوە، ئەم وان هێرشان پرۆتەستۆ دكەین چ ل ناڤ هەرێما كوردستانێ یان دەرڤەی هەرێما كوردستانێ بن».
دیاركر ژی» مە رێز و سوپاسی بۆ سەرۆك بارزانی و سەرۆكێ هەرێمێ و سەرۆكێ حوكمەتا هەرێمێ هەیە بۆ وێ هەماهەنگییا ل گەل مە كری، پشتڕاستبوونێ ددەین هێزا هەرێما كوردستانێ، هێزا ئیراقێ و بەغدایێ یە».
پتر گوت» هەر ب ئارمانج گرتنەك ل سەر بەرژەوەندیێن ئیراقێ، بەرژەوەندییا گەلێ ئیراقێ دئێخیتە د مەترسیێدا، لەوما محەمەد شیاع سودانی، فەرماندەیێ گشتیێ هێزێن چەكدار ل ئیراقێ، ب رێكا لژنەیەكا ڤەكۆلینێ، یێ رژدە ل سەر دەستنیشانكرنا وان ئالییان. هەروەسا گەنگەشەكرنا مە ل سەر وان پێزانینان كر كو ژ ئالیێ بەرپرسێن هەرێمیا كوردستانێ هەنە».
خویاكر» حوكمەتا فیدرالی و لژنەیا تەكنیكی ئارمانجا وان لێپرسینێ ل دەستدریژیكاران بكەن، بەلێ نوكە چاڤەڕێی ئەنجامێن ڤەكۆلینان دكەین و پاشی دێ هووردەكارییان ئاشكرا كەین».
دادگەها بلند یا فیدرالی ل ئیراقێ دو سكالایێن تایبەت ب مووچەیڤە و سكالایەكا دی یا تایبەت ب پڕۆژەیێ رۆناهی ل هەرێما كوردستانێ رەتكرن و دیاركر ئەو سكالایە تایبەتمەندییا دادگەهێ نینن.
دوهی دوشەمبی 28/7/2025، دادگەها بلند یا فیدرالی ل ئیراقێ گەنگەشە ل دۆر دو سكالایان كر ل دۆر مووچەیێ فەرمانبەرێن هەرێما كوردستانێ، كو ژ ئالیێ هەژمارەكا فەرمانبەران ل دژی سەرۆك وەزیرێن ئیراقێ و وەزیرا داراییا فیدرالی هاتبوونە تۆماركرن.
ئەو هەردو سكالایە ژ ئالیێ پێنج فەرمانبەرێن هەرێما كوردستانێ هاتبوونە تۆماركرن، تێدا داخواز كربوو مووچەیێ مەهانە یێ فەرمانبەران د دەمێ خوەدا بهێتە هنارتن و ئەو بابەتە تێكهەلی ململانێیێن سیاسی نەهێتە كرن.
بڕیارا دادگەها فیدرال بۆ هەردو سكالایان ئەوبوو كو تایبەتمەندییا دادگەهێ نینن.
هەر دوهی دوشەمبی 28/7/2025، دادگەها بلند یا فیدرالی ل ئیراقێ سكالایەكا دی گەنگەشەكر كو ل دژی بڕیارا حوكمەتا هەرێما كوردستانێ سەبارەت پڕۆژەیێ رۆناهی هاتبوو تۆماركرن، كو تایبەتە ب دابینكرنا كارەبا 24 ساتی بۆ هەڤپشكێن كارەبێ ل هەرێما كوردستانێ.
سكالا ژ ئالیێ سروە عەبدولواحد، سەرۆكێ فراكسیۆنا نەوەی نوێ ل جڤاتا نوونەرێن ئیراقێ هاتبوو تۆماركرن و سكالالێكری ژی سەرۆكێ هەرێما كوردستانێ و سەرۆكێ حوكمەتا هەرێما كوردستانێ بوون.
دادگەها بلند یا فیدرالی ل ئیراقێ ئەو سكالایە ژی رەتكر و دیاركر كو تایبەتەمەندییا وێ نینە.
نيشاندان