سەرۆك بارزانی بۆ مالئاڤاهییا نڤێسەر و ئەكادیمیست و دیرۆكنڤیسێ كورد و سەرۆكێ بەری یێ ئەكادیمییا كوردی، دكتۆر (عەبدولفەتاح بۆتانی) پەیامەكا بەهیداریێ و هەڤخەمیێ بەلاڤكر.
د پەیاما سەرۆك بارزانی دا هاتییە، بەهیداری و سەرەخوەشیا خوە ئاڕاستەی مالبات و كەسوكار و دۆستێن خودێ ژێرازی دكتۆر عەبدولفەتاح بۆتانی و هەموو نڤیسەر و ڕەوشنبیرێن كوردستانێ و ئەكادیمییا كوردی دكەم و خوە ب هەڤپشكێ خەما وان دزانم.
سەرۆك بارزانی دبێژیت: ژ خودایێ مەزن هیڤیدارم گیانێ خودێ ژێرازی ب بەهەشتا بەڕین شاد بكەت و سەبر و هەدارێ ب هەموو ئالییەكی ببەخشیت.
ژ ئالیێ خۆڤە مەكتەبا سیاسی یا پارتی دیموكراتی كوردستان پەیامەكا بەهیداریێ ئاراستەی مالبات و كەسوكارێن د. عەبدولفەتاح بۆتانی كر و تێدا هاتییە، بەهیداری و سەرەخوەشیا خوە ئاڕاستەی بنەمالا خودێ ژێرازی و كەسوكار و هەموو نڤێسەر و ڕەوشنبیران دكەین و خوە ب هەڤپشكێ خەما وان دزانین. هیڤیخوازین هەڤخەمییا ئەدیب و نڤێسەر و دۆست و هەڤالێن خودێ ژێرازی ببتە ئەگەرێ هەداركرنا وان و ژ خەم و خەفەتا وان كێم بكەت.

نڤیسینگەها سەرۆكێ حوكمەتا هەرێما كوردستانێ بەیاننامەیەك دەربارەی كۆمبوونا مەسرور بارزانی و محەمەد بن زاید ئال نەهیان ل ئەبوزەبی بەلاڤ كر و تێدا ڕاگەهاند، هەردو ئالییان هێرشێن ل سەر ئیماراتێ پرۆتەستۆ كرن و دوپاتی ل سەر پاراستنا ئاسایشا دەڤەرێ كر.
نڤیسینگەها سەرۆكێ حوكمەتا هەرێما كوردستانێ بەیاننامەیەك بەلاڤ كر و تێدا ئاماژە ب وێ چەندێ دا مەسرور بارزانی، سەرۆكێ حوكمەتا هەرێما كوردستانێ، ل باژێڕێ ئەبوزەبی، ل گەل محەمەد بن زاید ئال نەهیان سەرۆكێ ئیماراتێ كۆمبوو.
د بەیاننامەیێ دا هاتییە، د دیدارێ دا كو شێخ محەمەد بن راشد ئال مەكتووم جێگرێ سەرۆك و سەرۆكوەزیرێن ئیماراتێ و حاكمێ دوبەی ئامادە بوو، هەردوو ئالییان هێرشێن ڤێ دووماهیێ یێن ل سەر ئیماراتێ پرۆتەستۆ كرن و پێدڤییا پاراستنا ئارامی و ئاسایشا دەڤەرێ دوپات كر.
هەروەسا ئاماژە ب وێ چەندێ ژی دا، دوپاتی ل سەر گرنگییا ب هێزكرنا پەیوەندیێن د ناڤبەرا هەرێما كوردستانێ و ئیماراتێ دا و بەرفرەهكرنا هاریكاری و هەماهەنگییا د ناڤبەرا وان دا د كەرتێن جۆراوجۆر دا كر.
د پشكەكا دی یا دیدارێ دا، دووماهیك پێشهات و گوهۆڕینێن دەڤەرێ هاتنە گەنگەشەكرن.

سەرۆكێ حوكمەتا هەرێما كوردستانێ د پەیامەكێ دا هەڤخەمیا خۆ بۆ مالئاڤاهییا د. عەبدولفەتاح عەلی بۆتانی، سەرۆكێ بەری یێ ئەكادیمییا كوردی دەربڕی.
مەسرور بارزانی، سەرۆكێ حوكمەتا هەرێما كوردستانێ پەیامەكا هەڤخەمیێ بەلاڤ كر و تێدا ڕاگەهاند، بەهیداری و سەرەخوەشیێ ل مالبات و كەسوكار و هەڤكارێن دیرۆكنڤیس، نڤیسەر، ئەكادیمیست و سەرۆكێ بەری یێ ئەكادیمییا كوردی، خودێ ژێرازی د. عەبدولفەتاح عەلی بۆتانی دكەم و هەڤپشكێ خەما وانم.
سەرۆكێ حوكمەتا هەرێما كوردستانێ دبێژیت: خودایێ مەزن گیانێ وی ب بەهەشتێ شاد بكەت و ئارامی ب هەموویان ببەخشیت.

كۆمبوونا مەسرور بارزانی، سەرۆكێ حوكمەتا هەرێما كوردستانێ ل گەل سەرۆك و بەرپرسێن ئیماراتێ ل باژێڕێ ئەبوزەبی، گرنگییەكا مەزن پێ هاتییە دان و بوویە مانشێتێ سەرەكی یێ هەژمارا ڕرژا چارشەمبی یا مەزنترین و دیارترین ڕۆژنامەیێن وی وەلاتی.
ڕۆژا سێشەمبی، 1/9/ 2026، مەسرور بارزانی، سەرۆكێ حوكمەتا هەرێما كوردستانێ، د چارچۆڤەیێ سەرەدانا فەرمی دا بۆ باژێڕێ ئەبوزەبی، ل گەل شێخ محەممەد بن زاید ئال نەهیان، سەرۆكێ ئیماراتێ و شێخ محەممەد بن راشد ئال مەكتووم، جێگرێ سەرۆكی و حاكمێ دوبەی كۆمبوو.
سەرەدانێ و ناڤەرۆكا كۆمبوونان، دەنگڤەدانەكا مەزن د میدیایێن ئیماراتێ دا هەبوو. ل ڕۆژا چارشەمبی، 2/9/ 2026، هەموو ڕۆژنامەیێن فەرمی و بناڤودەنگ یێن وی وەلاتی ژ وان ژی(الاتحاد، البیان، الخلیج، ئەلوەتەن و زە ناشیۆنال یا ئینگلیزی)بەرپەرێ ئێكێ و مانشێتێ سەرەكی یێ خوە تەرخان كر بۆ ڕوومالكرنا دیدارێ.
ڕۆژنامەیێن ئیماراتێ د مانشێتێن خوە دا دوپاتی ل سەر چەند خالێن گرنگ كر كو د كۆمبوونێ دا هاتینە گۆتن، ژ وان ژی:
ب هێزكرنا ئاسایش و ئارامیێ: پترییا ڕۆژنامەیان (وەك الاتحاد و الخلیج) د مانشێتێ سەرەكی دا نڤیسیبوون «سەرۆكێ دەولەتێ و مەسرور بارزانی: چەسپاندنا هۆكارێن ئاسایش، ئارامی و ئاشتیێ ل ڕۆژهەلاتا ناڤین».
پێشڤەبرنا پەیوەندییان: ڕۆژنامەیا (البیان و ئەلوەتەن) ڕۆناهی ئێخستبوو سەر ب هێزكرنا پەیوەندیێن دۆستانە یێن د ناڤبەرا ئیماراتێ و ئیراقێ ب گشتی و هەرێما كوردستانێ ب تایبەتی، ب ئارمانجا پێشڤەبرنا هاریكارییان ب شێوەیەكێ كو خزمەتێ ب بەرژەوەندییا هەردوو گەلان بكەت.
ئابۆری و ئاڤەدانی: د پشكەكا دی یا ڕاپۆرتا ڕۆژنامەیان دا باس ل وێ چەندێ هاتییە كرن كو هەردوو ئالییان هیڤی خواستبوون ئەڤ جۆرە دیدارە ببنە ئەگەرێ ب جهئینانا ئومێدێن گەلان بۆ گەشەپێدان و ئاڤاكرنا پاشەڕۆژەكا گەشتر.
ڕۆژنامەیا زە ناشیۆناڵ (The National): وەك ڕۆژنامەیەكا پێشەنگا ئینگلیزی زمان، ب وێنەیەكێ مەزن یێ هەر سێ سەركردەیان ل بەرپەرێ ئێكێ نڤیسیبوو «سەركردەیان پێشوازی ل سەرۆكێ حوكمەتا كوردستانێ كر»، و ئاماژە ب پشكداربوونا بەرپرسێن دی یێن ئیماراتی ژ وان ژی شێخ حەمدان بن زاید د دیدارێ دا كربوو.
پەیوەندیێن د ناڤبەرا هەرێما كوردستانێ و ئیماراتێ د سالێن بۆری دا گەشەیەكا بەرچاڤ ب خوەڤە دیتییە. هەردەم سەركردەیێن هەردوو ئالییان دوپاتیێ ل سەر بەرفرەهكرنا ئاستێ لێكگۆهارتنا بازرگانی و هاندان و ەبەرهێنەرێن ئیماراتی دكەن بۆ كاركرن د پڕۆژەیێن چاندنێ، گەشتوگوزارێ و ژێرخانەیێ یێن هەرێما كوردستانێ دا.
سەردانێن ئێك ل دووڤ ئێك یێن مەسرور بارزانی بۆ وی وەلاتی و پێشوازیێن گەرم یێن سەركردایەتییا ئیماراتێ، ئاماژەنە بۆ ڕۆلێ گرنگ یێ هەرێما كوردستانێ وەك هەڤپشكەكا باوەرپێكری د دەڤەرێ دا.

نڤیسەرێ ناڤدارێ تورك و دۆستێ دلسۆزێ گەلێ كورد د. ئیسماعیل بێشكچی، بۆ ئێكەمجار پشتی دەربازكرنا نەخۆشییەكا دژوار پەیامەك بەلاڤ كر و سوپاسییا مەسرور بارزانی، سەرۆكێ حوكمەتا هەرێما كوردستانێ كر بۆ هاریكاری و بەرسڤدانا وی یا بەردەوام د دەمێ وەرگرتنا چارەسەریێن نوشداری دا.
ئیسماعیل بێشكچی، ئێك ژ دیارترین ڕۆناكبیرێن توركیایێ د بەڕەڤانیێ ژ مافێن گەلێ كورد دا، ڕاگەهاند «گەلەك دلخوەش و سوپاسگوزارم بۆ بەرسڤدان و خەمخۆرییا سەرۆكێ حوكمەتا هەرێما كوردستانێ».
ناڤبری ئاماژە ب وێ چەندێ ژی كر، مەسرور بارزانی هاریكارییەكا مەزن پێشكێش كریە و چەندین جاران ل ڕەوشا ساخلەمییا وی پرسییە و گۆت «مەسرور بارزانی هاریكارییەكا بێئەندازە پێشكێشێ من كر د دەمێ نەخوەشییا من دا و چەندین جاران ل ساخلەمییا من پرسییە». هەروەسا سوپاسییا هەموو وان كەسان ژی كر یێن كو ب پەیام یان ب چاڤدێری خەمخۆرییا خوە بۆ باشتربوونا وی دەربڕی.

هەولێر، قائید میرۆ

سیاسەتمەدارەكێ ڕۆژئاڤایێ كوردستانێ ئاشكرا كر، قووناغەكا نوو ل سووریێ دەستپێكرییە و كورد خوە بەرهەڤ دكەن ژ بۆ مسۆگەركرنا مافێن خوە د ناڤا دەستوورێ سووریێ دا. دیاركر ژی ژی، لەشكەرێ ڕۆژ دێ ڤەگەڕیت بۆ ڕۆژئاڤایێ كوردستانێ و هەر وەك هێزا پێشمەرگەی دێ مینیت. هەروەسا د شەش مەهێن بهێت دا دێ ئاوارەیێن ڕۆژئاڤایێ كوردستانێ ژی یێن ل هەرێما كوردستانێ ئاكنجی ڤەگەڕن بۆ جهێن خوە.
عەبدولڕەحمان ئاپۆ، سیاسەتمەدارێ كورد ل ڕۆژئاڤایێ كوردستانێ بۆ ڕۆژنامەیا (ئەڤرۆ) گۆت «قووناغەكا نوو ل ڕۆژئاڤایێ كوردستانێ هاتییە دەستپێكرن و 14 سالێن دەستهەلاتا هێزێن سووریا دیموكرات ژی دووماهی هاتن، چونكی ئەو هێز دێ چنە د ناڤا لەشكەرێ سووریێ دا و چو هێزێن چەكدار ل دەرڤەی دەستهەلاتا حوكمەتێ نامینن. ئانكو قووناغا سیاسی دەستپێكرییە و هەتا نوكە تنێ ڕێككەفتنێن لەشكەری هاتینەكرن د ناڤبەرا هێزێن سووریا دیموكرات و دەستهەلاتا دیمەشقێ دا. بەلێ ژ نوكە و پێڤە دێ ڕێككەفتنێن سیاسی هێنە ئەنجامدان ژ بۆ گەرەنتیكرنا مافێن كوردان ل سووریێ».
خۆیاكر ژی» بڕیارە هێزێن كوردی ب تایبەتی جڤاتا نیشتمانییا كوردی ل سووریێ دەست ب دانوستاندنان بكەت ژ بۆ وێ چەندێ مافێن كوردان ل دەستوورێ نوو یێ سووریێ بهێنە مسۆگەركرن. ل كۆنفرانسێ مەها نیسانێ ڕێككەفتن هاتییەكرن ئالیێن كوردی پێكڤە دێ چنە دیمەشقێ بۆ دانوستاندنێ. دەستهەلاتدارێن سووریێ داخواز كریە لەشكەرێ ڕۆژ ڤەگەڕیت سووریێ و مینا (قەسەدێ) تێكەلی لەشكەرێ سووریێ بهێتەكرن، بەلێ مە پێشنیازەكا دی هەیە، ئەو ژی لەشكەرێ ڕۆژ ڤەگەڕن بۆ ڕۆژئاڤایێ كوردستانێ و مینا پێشمەرگەیێن هەرێما كوردستانێ ڕۆلێ خوە بگێرن. بڕیارا لەشكەرێ ڕۆژ د دەستێ سەرۆك بارزانی و هەڤپەیمانییا نێڤدەولەتی دایە. سەرۆك بارزانی بڕیار دایە لەشكەرێ ڕۆژ ڤەگەڕیت بۆ ڕۆژئاڤا، بەلێ ئەم دخوازین هەر وەك هێزا پێشمەرگەی بمینیت. ئەم باوەرین دێ ئەحمەد شەرع و دەستهەلاتا سووریێ ب ڤەگەڕیانا لەشكەرێ ڕۆژ ڕازی بن، ژ بەر كو هندەك دەڤەرێن ڕۆژئاڤایێ بۆ بنەجهكرنا لەشكەرێ ڕۆژ هاتینە دیاركرن و ل داهاتی ژی دێ د ناڤا دەستوورێ سووریێ دا ئاماژە ب هەبوونا پێشمەرگەیێن ڕۆژ هێتەكرن و بنە هێزەكا دەستووری و فەرمی».
ڤی سیاسەتمەداری گۆت ژی «پشتی 14 سالێن شۆڕشا سووریێ دێ ب شێوەیەكێ دەستووری مافێن كوردان هێنە بنەجهكرن ل سووریێ و ئێدی سەردەمێ سەربازی دێ ب دووماهی بهێت. ئەم دخوازین سیستەمێ سووریێ ببیتە پەرلەمانی و فیدرالی. سەرۆكێ جڤاتا نیشتمانییا كوردی ژی هەمان داخواز كریە و ل پاشەڕۆژێ ژی دێ سیستەمێ فیدرالی بنەجه كەین د ناڤا دەستووری دا».
پتر گۆت»ئەم ناڤەشێرین هەتا نوكە (قەسەدێ) تنێ نونەرایەتییا خوە كریە ل سووریێ نەكو هەموو كوردان. پشتی چەندین سالان ئەم تێگەهشتین ئەمریكا و هەڤپەیمانان تنێ بەرژەوەندییێن خوە ل بەرچاڤن، لەوڕا ژی ئەم وەك كورد داخوازا مافێن خوە دكەین و كار بۆ پاراستنا بەرژەوەندیێن خوە دكەین».
ل دۆر ڤەگەڕیانا ئاوارەیێن ڕۆژئاڤایێ كوردستانێ ژی عەبدولڕەحمان ئاپۆی ئاشكرا كر «ل هەرێما كوردستانێ 265 هزار ئاوارەیێن ڕۆژئاڤایێ كوردستانێ هەنە و بەری نوكە هەژمارا ئاوارەیێن ڕۆژئاڤا زێدەتر ژ 300 هزار كەسان بوون. ئەز باوەرەم پشتی سەرێ سالا داهاتی دێ پرۆسەیا ڤەگەڕیانا ئاوارەیان ب ڕێڤە چیت و هەموو ئاوارەیێن ڕۆژئاڤا یێن نوكە ل هەرێما كوردستانێ ئاكنجی دێ ڤەگەڕن بۆ جهێن خوە ل ڕۆژئاڤای. نەتەوەیێن ئێكگرتی ژی كار ژ بۆ ڤەگەڕاندنا وان دكەت. ژ بەر ڕەوشێ خەلك هەتا نوكە بەرهەڤ نینە ڤەگەڕن، بەلێ شەش مەهێن دی دێ ڕەوشا ڕۆژئاڤایێ كوردستانێ ئاسایی بیت و خەلك ژی دێ ڤەگەڕیت».
ئاماژە كر» ئەم سوپاسییا سەرۆك بارزانی و حوكمەتا هەرێما كوردستانێ ژی دكەین كو 14 سالە ئەم مێڤانین. خەلكێ هەرێمێ قەنجی هەبوویە ل گەل خەلكێ مە و ئەم چو جارەكێ ڤێ چەندێ ژبیر ناكەین. بەلێ ژ نوكە و پێڤە پێدڤییە ئاوارە ڤەگەڕن بۆ جهێن خوە. ل چەند مەهێن بهێت دێ خزمەتگوزاریێن ڕۆژانە ژی ل ڕۆژئاڤایێ كوردستانێ هێنە دابین كرن».