قەیس وەیس:

دووماهی هاتنا یاریێن گەڕا 32ێ‌ ژ هەڤڕكیێن خولا ستێرێن ئیراقێ‌ یا فوتبۆلێ‌ گوهۆڕینێن جودا د ناڤا رێزبەندیێ‌ هاتنە كرن، یانەیا زەورا سەرێ‌ لیستی پاراست و یانەیێن كوردستانێ‌ ب ئەنجامێن خوە د ڕێزبەندیێن باش دانە و یانەیا شورتە بەردەوامە ل سەر هەڤڕكییا خوە بۆ سەرێ‌ لیستێ‌.
شەڕێ‌ سەرێ‌ لیستێ‌ و یانەیێن كوردستانی
تیما یانەیا زەورا ب كۆمكرنا 68 خالان سەرێ‌ لیستێ‌ دهێت، یانەیا شورتە ب كێمترییا گۆلان و ئێك یارییا پاشئێخستی ڕێزا دویێ‌ دهێت، یانەیا زاخۆ ژی جهێ‌ خوە ل رێزا سێیێ‌ پاراستییە ب كۆمكرنا 56 خالان، د بەرانبەر دا یانەیا دهۆك ئەوا پێنج یاریێن پاشئێخستی ماینە خودانا 48 خالانە ل رێزا شەشێ‌ دهێت و دەلیڤەیا هەڤڕكیی یا مایی بۆ رێزێن پێشیێ‌ و سەرێ‌ لیستێ‌، ژلایێ‌ خوەڤە هەردو یانەیێن دی یێن كوردستانی نەورۆز و هەولێر هەر ئێكی 41 خال هەنە رێزێن 12 و 13ێ‌ ل دووڤ ئێك دهێن.
د پرێس كۆنفرانس دا عەبدولغەنی شەهەد ڕاهێنەرێ‌ تیما فوتبۆلا یانەیا زاخۆ كەیفخوەشییا خوە دیار كر ب دەستڤە ئینانا ئەنجامێ‌ سەركەفتنێ‌ بەرانبەر كارەبا و گۆت: دەستپێكێ‌ سۆپاسییا هەموو یاریزانان دكەم ژبەركو ب مۆرالەكا بلند و سۆزا سەركەفتنێ‌ هاتبوونە دناڤ یاریگەهێ‌ دا، ئەم سەركەفتنە بۆ مە گەلەك گرنگ بوو دیسا ندێ‌ بیتە ئەگەر تیما مە ڤەگەڕیتە هەڤڕكیێ ل سەر رێزێن ئێكێ‌ و ڕژدین هەتا دووماهی یاری شەڕێ‌ بۆ سەركەفتنان بكەین، ژلایێ‌ دەرۆنی ژی یا گرنگ بوو تایبەت پشتی د یاریێن بۆری دا ئەنجامێن لاواز دەستڤە ئیناین، سۆپاسیا ڕاهێنەرێ‌ پێشتر تەلال ئەلبلۆشی دكەم كو ئێك ژ ئەگەرێن هێزا تیمێ‌ یە.
ژلایەكێ‌ دووڤە عەبدولغەنی شەهەد داخوازییەك ژ فدراسیۆنا فوتبۆلا ئیراقێ‌ كر و گۆت: هیڤیدارین پێداچوونەكێ‌ ل سەر بڕیارا خوە یا دوورئێخستنا جەماوەری د ناڤا یاریگەها خوە دا تایبەت د یاریێن دووماهییا خولێ‌ دا، جەماوەرێ‌ زاخۆ مەزنترین و باشترین جەماوەری ل سەر ئاستێ‌ ئیراقێ‌ و هەژی دیتن و پشتەڤانییا تیما خوە نە.
د كۆنگرەیەكێ‌ رۆژنامەڤانی دا ستێرا یانەیا هەولێر مستەفا قابیل كەیفخوەشییا خوە دیار كر كو بوویە ئێك ژ وان یاریزانان تیما خوە بەر ب سەركەفتنا بەرانبەر نەفت میسان بری و گۆت: هەموو یاریزانا ب ئێك دل و هێز یاری دكرن و شیاین ب گەهینە ئارمانجا خوە ئەڤ سەركەفتنە دەلیڤەیە بۆ بەردەوامییا ئەنجامێن باشتر و بۆ پێشڤەچوونێ‌ ڕژدین، گەشبینم هەولێر دێ‌ ب هێز ڤەگەڕیت، ژبەركو هەموو یاریزان دگەل كادرێ‌ ڕاهێنانێ‌ و كارگێریێ‌ ب ئێك ئارمانج و دل كار دكەن، مە هیڤییەكا مەزن هەیە ئەو ژی بشێن بەردەوامیێ‌ بدەینە سەركەفتنان پێخەمەت ب دەستڤە ئینانا ئێك ژ پلێتێن دەربازبوون بۆ قارەمانییەكا دەرڤە و ئەڤە ب سانەهی نابیت لێ‌ ڕژدین و كار ل سەر دكەین.
دهۆكێ‌ چەند یاریێن پاشئێخستی ماینە
ژبەركو تیما فوتبۆلا یانەیا دهۆكێ‌ موژیلی یاریێن كۆپا كەنداڤی بوو و شیابوو ب سەرفەرازی ناسناڤێ‌ كۆپایێ‌ ب دەستڤە بینت، د دەمێ‌ قارەمانیێ‌ دا فدراسیۆنا فوتبۆلا ئیراقێ‌ دەلیڤە دابوو دهۆكێ‌ یاریێن وێ‌ بهێنە پاشئێخستن بوخاترا ئەڤێ‌ قارەمانیێ‌ كو سەرجەمێ‌ و بوونە شەش یاری، دوهی یارییەك بەرانبەر تەلەبە ئەنجامدابوو و یێن مایی بڤی ڕەنگی نە، دگەل شورتە ل یاریگەها دهۆكێ‌، بەرانبەر هەولێرێ‌ ل هەولێرا پایتەخت، دگەل نەفت میسان دناڤ ئەرد و جەماوەرێ‌ دهۆكێ‌ و دێ‌ بیتە مێڤانا یانەیا دیالا و یارییا شەشێ‌ مێڤاندارییا یانەیا مینا یە بەسرایی بكەت.
یاریزانێن دهۆكێ‌ 32 گۆل تۆمار كرینە
تیما دهۆكێ‌ خوانا دەهـ یاریزانێن پشكداری د تۆمار كرنا 32 گۆلان دا هەیە سەرجەمێ‌ 33 گۆلان و بڤی ڕەنگی، پیتەر گۆرگیس حەفت گۆل، پاشەنگ عەبدوللا حەفت گۆل، كەریم دەرویش پێنچ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید، زانا عەلی و لۆكاس هێنریك گۆلەك تۆماركرینە، گۆلەك بۆ یاریزانەكێ‌ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
پشتی ڤەقەتییانێ‌ ژ سەركەفتنان دوبارە ڤەگەڕیا
د دووماهی یاری دا زاخۆ سەركەفتن ئینایی یارییا بەرانبەر شورتە بوو ئەوا ب گۆلەكێ‌ بێ‌ بەرانبەر ب دووماهی هاتی ل چارێ‌ نیسانا بۆری، پشتی ڤێ‌ یاریێ‌ بۆ پێنج یارییان ل دووڤ ئێك گۆلكەرێن زاخۆ نە شیاینە هیچ گۆلەكێ‌ تۆماربكەن دگەل هەر ئێك ژ، كەربەلا، نەفت میسان، نەورۆز، دیالا و زاخۆ، دیسان دگەل زەورا وەكهەڤبوون، لێ‌ یارییا حەفتییا بۆری ب سێ‌ گۆلان شیابوون سەركەفتنەكا باش ل سەر یانەیا كارەبا بینن، ژلایەكێ‌ دووڤە یاریزانێن وێ‌ 43 گۆلان د خولێ‌ دا ئیناینە و بەلاڤكرینە ل سەر یاریزانان و بڤی شێوەیی، پیشەكارێ‌ یانەیا زاخۆ یێ‌ بەرازیلی گۆستاڤۆ هێنریك ل سەرێ‌ لیستا گۆلكەرێن تیما خوە دهێت ب تۆماركرنا 16 گۆلان، هەڤالێ‌ وی و یاریزانێ‌ هەلبژارتیێ‌ ئیراقێ‌ ئەمجەد عتوان ب تۆماركرنا 13 گۆلان رێزا دویێ‌ دهێت، ناسر محەمەدو پێنج گۆل، ئەحمەد یاسین دو گۆل، دیبیۆتی ئۆگۆنا سێ‌ گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز، پاتریك مارسێلۆ هەر ئێك گۆلەك تۆماركرینە كو سەرجەمێ‌ گۆلێن زاخۆ بووینە.
گۆلكەرێن خولێ‌ پشتی ب دووماهی هاتنا گەڕا 32ێ‌
موهەنەد عەلی هێرشبەرێ‌ شەرتە ب تۆماركرنا 23 گۆلان سەرێ‌ لیستێ‌ دهێت، پیشەكارێ‌ یانەیا زاخۆ یێ‌ بەرازیلی گۆستاڤۆ هێنریك رێزا دویێ‌ دهێت ب تۆماركرنا 16 گۆلان، ژلایێ‌ خوەڤە مەروان حسێن هێرشبەرێ‌ نەورۆز ب 15 گۆلان رێزا سێیێ‌ دهێت، سەید رەشید گۆلكەرێ‌ ئەلقاسم ب14 گۆلان رێزا چارێ‌ دهێت، ئەمجەمەد عتوان ستێرا یانەیا زاخۆ ب13 گۆلان رێزا پێنجێ‌ دهێت، هەر ئێك ژ سیمۆن مسۆڤا یێ‌ یانەیا تەلەبە، ئەلحارس حاتم یاریزانێ‌ ئەلقاسم و ئێزی كێلڤن یێ‌ یانەیا ئەلكەرخ هەر ئێك 11 گۆل هەنە رێزێن شەشێ‌ هەتا نەهێ‌ دهێن.
یاریێن حەفتییا 33ێ‌ دێ‌ بڤی شێوەیی هێنە كرن
بڕیارە سوبەهە دوشەمبی هەڤڕكیێن گەڕا 33ێ‌ بڤی شێوەیی بهێنە ئەنجامدان، یانەیا هەولێر دێ‌ ل یاریگەها ئەلمەدینە بیتە مێڤانا یانەیا دیالا، ژلایێ‌ خوەڤە یانەیا نەورۆز دێ‌ دناڤ ئەرد و جەماوەرێ‌ خوە دا مێڤاندارییا یانەیا نەفت یا بەغدایی كەت، كارەبا دێ‌ مێڤاندارییا ئەلقاسم كەت و نەجەف دێ‌ بیتە مێڤانا نەفت ئەلبەسرا، ل سێ‌ شەمبییا بهێت یانەیا زاخۆ د ناڤ ئەرد و جەماوەرێ‌ خوە دا مێڤاندارییا یانەیا حدود كەت، زەورا بەرانبەر نەفت میسان، جەوییە بیتە مێڤانا كەربەلا و ئەلگەرمە دێ‌ شورتە مێڤان كەت، چارشەمبییا بهێت دێ‌ هەڤڕكیێن ڤێ‌ گەڕێ‌ ب ئەنجامدانا دو یارییان ب دووماهی هێت، یانەیا دهۆك د یارییەكا بهێز دا دێ‌ یانەیا تەلەبە مێڤان كەت، مینا دێ‌ ل بەغدا بیتە مێڤانا خودانێن ئەردی یانەیا كەرخ د یارییەكا دی یا هەڤڕكی دا.

هەموو حەز ژێكەرێن یارییا فوتبۆلێ‌ ل جیهانێ‌ ئەڤ شەڤە دێ‌ چاڤەڕێ‌ دیتنا ئێك ژ ب هێزترین یاریێن مەزنە ئۆرۆپا دهێتەكرن كو دبیتە كلاسیكۆیا جیهانی دناڤبەرا هەردو یانەیێن بەرشەلۆنا و ریال مەدرید ئەوا دێ‌ ل یاریگەها لویس كۆمبانیس ئۆلمپی یا تایبەت ب یانەیا بەرشەلۆنا ڤە ل دەمژمێر 5:15 ئێڤاری ژ چارچووڤەیێ‌ هەڤڕكیێن گەڕا 35ێ‌ یا خولا ئسپانیا هێتە كرن.
ئەڤ یارییە هەتا ڕادەیەكی مەزن دێ‌ یا چارەنڤیس بیت بۆ سەرۆسیمایێ‌ قارەمانا وەرزێ‌ ئەڤ سالە یا خولێ‌، بەرشەلۆنا خودانا 79 خالان سەرێ‌ لیستێ‌ دهێت، ب جووداهییا چار خالان یانەیا ریال مەدرید رێزا دویێ‌ دهێت، ب تنێ‌ سێ‌ گەڕ ماینە خول ب دووماهی بهێت، ئەڤ یارییە بۆ مێرینگی وەكو دەلیڤەیە دووماهیێ یە ئەو بشێت بەردەوامیێ‌ بدەتە هەڤڕكیێ ل سەر لیستی، هەكە ب سەركەڤت دێ‌ ئێك خال بتنێ‌ دناڤبەرا واندا مینت، دیسا ندێ‌ قەرەبوویا دووركەڤتنا خوە ژ چامپیۆنزێ‌ و كۆپا شاهێ‌ ئسپانیا كەت.
د بەرانبەر دا ڕاهێنەرێ‌ یانەیا بەرشەلۆنا فلیك سۆزدایە ئەو وانەیەكێ‌ بدەتە ریال مەدرید و نەهێلیت نێزیكی تیما وی بیت بۆ هەڤڕكییا ناسناڤی، دێ‌ بزاڤێ‌ كەت ل سەر كیستێ‌ هەڤڕكا خوە و دناڤ ئەرد و جەماوەرێ‌ خوە دا دربەكێ‌ دی ل ریالێ‌ بدەت و بگەهیتە مەرەما خوە ناسناڤێ‌ خولا ئسپانییا.
چەند دیدارێن ئاگرین دناڤبەرا واندا هاتینە كرن؟
دیدارێن دناڤبەرا هەردو یانەیان دا هەردەم بوویە جهێ‌ پووتەدانا پرانییا جەماوەرێن وەرزشی ل جیهانێ‌ لەوما ژی ب كلاسیكۆیا ئەردی و جیهانێ‌ هاتییە بناڤكرن، لەوما ژی دیدارێن دناڤبەرا واندا ئاگرین بووینە د هەموو خول و قارەمانیێن جودا و بڤی ڕەنگی.
د خولا ئسپانیا دا
189 یاری هاتینە كرن، 79 سەركەفتن بۆ ڕیالێ‌، 75 بۆ بەرشەلۆنا، 35 یاری ب وەكهەڤی.
د چامپیۆنزێ‌ دا
هەشت جاران بەرانبەری ئێك بووینە، سێ‌ سەركەفتن بۆ ڕیالێ‌، دو بۆ بەرشەلۆنا و سێ‌ وەكهەڤی.
د كۆپا شاهێ‌ ئسپانیا دا
39 یاری دناڤبەرا هەردو یانەیان دا بووینە، 18 سەركەفتن بۆ بەرشەلۆنا، 13 بۆ ڕیالێ‌ و هەشت وەكهەڤی هاتینە.
د سۆپەرا ئسپانیا دا
سەرجەمێ‌ 18 یارییان دا، 10 سەركەفتن بۆ ڕیال مەدرید، شەش بۆ بەرشەلۆنا و دو وەكهەڤی ب دووماهی هاتینە.
سەرجەمێ‌ گشتی یێ‌ هەموو یارییان، 260 یاری دناڤبەرا ڕیال مەدرید و بەرشەلۆنا دا هاتینە كرن، یانەیا مێرێنگی 105 سەركەفتن، یانەیا بەرشەلۆنا 101 سەركەفتن و د 51 یارییان دا وەكهەڤ بووینە.

ژ گرنگترین یاریێن ئەڤرۆ یێن ئاگرین ل خولێن ئنگلتەرا، ئەلمانیا و ئیتالیا بڤی رەنگی نە
د خولا ئنگلیز دا گەڕا 36ێ‌ ،
نیۆكاسل- چێلسی، دو یێ‌ پشتی نیڤرۆ.
نۆتینگهام فۆرست- لیستەر ستی، دەمژمێر 4:15 ئێڤاری
مان یۆنایتد- وێستهام، 4:15 ئێڤاری.
لیڤەرپۆل- ئارسنال، 6:30 ئێڤاری.
خولا ئیتالیا گەڕا 36ێ‌.
ئۆدینیزی- مۆنزا، 1:30 نیڤرۆ.
تۆرینۆ- ئینتەر میلان، حەفتی مەغرەب.
ناپۆلی- جەنەوا، نەهێ‌ شەڤێ‌.
خولا ئەلمانییا گەڕا 33ێ‌.
بایرن لیڤەركۆزن- بۆرۆسیا دۆرتمۆند، 4:30 ئێڤاری.
ئینتراخت فرانكفۆرت- سانت باولی، 6:30 شەڤ.
شتۆتگارد- ئۆگسپۆرگ، 8:30 شەڤ.