قەیس وەیس:
پێنگاڤێن دووماهیێ یێن گشت یانەیێن وەرزشی ئەوێن پشكدار د خولا ستێرێن ئیراقێ بۆ 2025-2026 بەردەوامن تایبەت یانەیێن دهۆك و زاخۆ هەولێر و نەورۆز ئەوا بڕیارە هەڤڕكیێن خولێ ل 13ێ ڤێ مەهێ ب پشكدارییا 20 یانەیان بشێوەیی خول دو قووناغ بهێنە كرن، ل وەرزێ بۆری یانەیا شورتە قارەمان بوو.
دهۆكێ یاریزان و درێسێ خوە نیشان دا.
د ڕێورەسمەكێ جەماوەری دا بەرهەڤبوونا د. عەلی تەتەر پارێزگارێ دهۆكێ، د. نەوزاد عەبدوللا بەرپرسێ لقێ ئێك یا پارتی دیموكراتی كوردستان، چەند ئەندام پەرلەمانتار و پشتەڤانێن یانەیێ ل هۆلا گرتییا زانكۆیا دهۆكێ یانەیا دهۆك ب گرتە ڤیدیۆ و خواندن دەستكەڤتێن چار سالێن بۆری یێن یانەیێ هاتە پێشكێشكرن و نیشاندانا یاریزانێن خوە و جلۆبەرگێن وەرزێ نوو یێن تیمێ بۆ خولا ستێرێن ئیراقێ دەستنیشانكرن كو ژ حەفت ڕەنگان و هێمایێن جودا هاتبوونە نیشان دان، ڕەنگێن، زەر، شین و پورتەقالی بۆ یاریزانان، ڕەنگێن رەش، سۆر، رساسی و مۆر بۆ گۆلپارێزان، هەروەسان دناڤا درێسی دا دیاركرییە، كو دەرگەهێ ئامێدیێ، رۆژ كو هێمایێ ئۆلییا ئێزدییان و نڤێسیان بزمار كو نڤێسارەكا كەڤنارە یا كوردی.
پارێزگارێ دهۆكێ پەسنا رۆلێ سەرۆك بارزانی و مەسرۆر بارزانی كر
د گۆتارا خوە دا، د. عەلی تەتەر پارێزگارێ دهۆكێ گۆت: سوپاسییا جەنابێ سەرۆك بارزانی و رێزدار مەسرۆر بارزانی سەرۆكێ حوكمەتا هەرێما كوردستانێ دكەین كو بەردەوام پشتەڤانییا هەموو یانەیێن وەرزشی ل هەرێما كوردستانێ دكەن ب تایبەتی د قووناغێن هەستیار دا یێن قارەمانیێن فوتبۆلێ دەربازكرین كو جەنابێ وان بەردەوام ل سەر هێل بووینە، هەروەسا دەستخووشیا كارگێرییا یانەیێ و هەموو یاریزانان دكەین و هیڤیدارین وەرزێ نوو جەماوەرێن هەموو یانەیان ب گیانێ وەرزشی پشتەڤانییا یانەیێن خۆ بكەن و دووربن ژ هەر كریارەكا دبیتە ئەگەر ب سزادانا یاریزان و یانەیان.
ژلایەكێ دووڤە ناڤهاتی گۆت: ئەم كەیفخوەشین نە بتنێ فوتبۆلا دهۆكێ دو ناسناڤێن مەزن ب دەستڤە ئیناینە بەلكو یانەیێن ئافرەتێن دهۆك تیما فوتسالێ خودانا سێ ناسناڤان د چار سالان دا و یانەیا سەنحاریب قارەمانا ڤۆلی بۆلی بۆ دو سالان، ئەڤە ژی نیشانێن پێشكەڤتنا وەرزشی نە و دەرئەنجامێ پشتەڤانییا سەرۆك بارزانی و سەرۆكێ حوكمەتا هەرێمێ نە، ئەم د بەردەوامین بۆ پشتەڤانییا وەرزشا پارێزگەها خوە بێ جوداهی.
دەرگەهێ یاریگەها دهۆكێ بۆ یانەیێن كوردستانی ڤەكرییە
كارگێرییا یانەیا دهۆك وەكو دەستپێشخەرییەك و هەماهنگییەكا براینی، بڕیارداییە دەرگەهێ یاریگەهێن خوە بۆ یانەیێن كوردستانی د گەڕا ئێكێ دا ڤە كەت، ئەوا ل سەر ڕاسپاردا د. عەلی تەتەر پارێزگارێ دهۆكێ هاتی كو یاریگەها دهۆكێ دێ دێ بیتە ئەردێ یاریگەها یانەیا نەورۆز یا سلێمانیێ و یانەیا هەولێر ژبەر نووژەن كرنا یاریگەهێن وان، هەروەسان هەكەر یاریگەها یانەیا زاخۆ بۆ گەرا دویێ یا بەرهەڤ نەبیت دێ یاریگەها دهۆكێ وەكو ئەردێ یاریگەها زاخۆ بۆ هێتە تەرخانكرن، ژلایەكێ دووڤە بەری مەهەكێ شاندەكێ كارگێرییا یانەیا مووسل سەرەدانا یانەیا دهۆكێ كربوو ژبۆ دانا یاریگەها دهۆكێ بۆ یاریێن مووسلێ د خولا ستێرێن ئیراقێ دا، ڕازیبوون ژی هاتە كرن و بڕیاردا بۆ ماوەیێ ئێك قۆناغ ئانكو هەتا دبیت هەتا نەهـ یاریێن خوە ل یاریگەها دهۆكێ بكەت.
زاخۆ سۆپەرەك ئینا و هیڤیێن مەزن هەنە
كارگێرییا یانەیا زاخۆ ب فەرمی گرێبەستا یاریزانێ كامیرۆنی گابی كیكی ڕاگەهاند، ئەوێ ل هێلا بەرەڤانیێ یاریێ دكەت، یاریزانێ ناڤهاتی پێشتر دگەل دینامۆ برێست یا بیلارۆسی، شریف تێراسبۆل یا مۆلدیڤی و ئەكتوبی یا كازاخستانی كرییە و یاری ل چامپیۆنز لیگ ژی ئەنجامداینە، بڤێ چەندێ پیشەكارێن زاخۆ بوونە حەفت یاریزان وەكو مافەك یێ هەیی ژبەركو پشكداری د دو قارەمانیێن جودا هەنە، خولا ستێرێن ئیراقێ و كۆپا كەنداڤی، بۆ زانین تیما فوتبۆلا زاخۆ كەمپێ خوە یێ ڕاهێنانێ ل وەلاتێ توركیا دانابوو تێدا چەند یاریێن هەڤالینی كربوون.
سەرۆكێ یانەیا زاخۆ گەشبینە
ژلایەكێ دووڤە عەمار فەرهاد سەرۆكێ یانەیا زاخۆ دیار كر ئەڤرۆ دێ یاریزانەكێ نوو هێتە دناڤ ڕێزێن تیما مە دا ئەو ژی حسێن عەلی ڕەڤەندا ئیراقی و یاریزانێ هەلبژارتیێ ئیراقێ و یانەیا هێرنڤین یا هولەندی و خویاركر وەرزێ ئەڤ سالە ب سانەهی نابیت لێ وان ئارمانجێن مەزن هەنە بۆ دەستكەڤتێن مەزن و گەشبینن و خویا كر بۆ كۆپا كەنداڤی و خولا ئیراقێ بەرهەڤیێن باش كرینە و باوەری ب كادرێ ڕاهێنانێ و یاریزانان هەیە و هیڤی خواست سالەكا دیرۆكی بیت بۆ زاخۆیی و كوردستانێ.
سەرۆكێ یانەیا دهۆكێ قازانجا وەرزێ بۆری دیاركر
د گۆتارەكا خوە دا د. عەبدوللا جەلال سەرۆكێ یانەیا دهۆكێ گۆت: ئەڤ درێسە دەربینە ژ هەموو دەڤەرێن بەهدینان وەكو نوونەرا پارێزگەهێ و دەڤەرا بەهدینانە، ژلایەكێ دووڤە گۆت: د وەرزێ بۆری دا ب كۆژمەیێ 340 دەفتەرێن دولاری داهاتی و قازانجا قارەمانییان بوو، دیسان ئێك ملیار و 161 ملیۆن دینارا ژلایێ سپۆنسەر و پلێت و فرۆتنا درێسێن تیمێ وەكو قازانج بووینە داهاتی، ئەڤە ژی دبیتە ئێكەم جار دهێتە ڕاگەهاندن، ژلایەكێ دووڤە پرۆژەیەكێ تایبەت یێ یانەیا دهۆك بۆ پاشەرۆژێ ب یاریگەهـێن بچووك، خارنگەهـ و كافی هەتا، دناڤا ڕێورەسمان دا نیشان دابوو.
ئەڤرۆ دێ بڕیارا سزایان هێنە ئێكلا كرن
دهێتە پێشبینیكرن ئەڤرۆ فدراسیۆنا فوتبۆلا ئیراقێ د كۆمبوونا خۆ یا ئاسایی دا بڕیارێ ل سەر سڤككرن یان ڕاكرنا سزایان ئەوێن ل سەر هەردو یانەیێن دهۆك و زاخۆ هاتینە سەپاندن ئەوا دەرئەنجامێن پشتی یارییا كۆپا ئیراقێ دناڤبەرا یانەیێن دهۆك و زاخۆ ل 18ێ مەها بۆری ل یاریگەها شەعب هاتییە كرن، ل دووڤ دەنگۆباسێن نە فەرمی فدراسیۆنا فوتبۆلا ئیراقێ دێ ئەڤرۆ بڕیارێ دەت ئەڤچەندە هات پشتی شاندەكێ لژنەیا سزایان و دێسپلینێ هاتییە پارێزگەها دهۆكێ و دگەل سەرۆكێ هەردو یانەیێن دهۆك و زاخۆ كۆمبوون ژبۆ وەرگرتنا سۆزنامەیێن جودا كو كۆنترۆلا یاریگەهێ و جەماوەری بهێتە كرن، ئەڤ لژنە ڕاپۆرتا خوە پێشكێشی فدراسیۆنێ كربوو.
دهێتە چاڤەڕێ كرن یاریێن گەڕا ئێكێ ژ خولا ستێرێن ئیراقێ بڤی شێوەیی بن.
رۆژا شەمبی 13- 9- 2025
ئەمانەت بەغدا- دیالا ، یاریگەها ئەلكەرخ ل دەمژمێر شەشێ ئێڤاری.
تەلەبە- زاخۆ، یاریگەها ئەلمەدینە ل دەمژمێر 8:30 شەڤ.
نەورۆز- كارەبا، یاریگەها دهۆك ل دەمژمێر 8:30 شەڤ.
رۆژا ئێكشەمبی 14- 9- 2025.
نەفت میسان- مینا، یاریگەها میسان ل دەمژمێر شەشی ئێڤاری.
ئەلقاسم- نەفت، یاریگەها نەجەف، ل دەمژمێر شەشی ئێڤاری.
دهۆك- ئەلگەرمە، یاریگەها دهۆك، ل دەمژمێر 8:30 شەڤ.
یارییا زەورا دگەل شورتە هاتە پاشئێخستن بۆ دەمەكێ دی.
رۆژا دوشەمبی 15- 9- 2025.
ئەلغراف- مووسل، یاریگەها ناسریە ل دەمژمێر شەشێ ئێڤاری.
هەولێر- نەجەف، یاریگەها دهۆك، ل دەمژمێر 8:30 شەڤ.
ئەلكەرخ- جەوییە، یاریگەها كەرخ، ل دەمژمێر 8:30 شەڤ.
نيشاندان