هەولێر، قائید میرۆ:

رێڤەبەرێ گشتیێ ژێدەرێن ئاڤێ ئاشكرا كر، حوكمەتا هەرێما كوردستانێ دێ هاریكاریێن دارایی پێشكێشی جۆتیاران كەت بۆ چێكرنا پۆندێن ئاڤێ و دبێژیت: چێكرنا پۆندان كاریگەری ل سەر ئاستێ ئاڤێ هەیە و چەندین مفا بۆ كەرتێن جودا هەنە.
دكتۆر كاروان هەورامی، رێڤەبەرێ گشتیێ ژێدەرێن ئاڤێ بۆ رۆژناما ئەڤرۆ دیاركر، سیاسەتا حوكمەتا هەرێما كوردستانێ ئەڤەیە، گرنگیەكا زۆر ب پۆندێن ئاڤێ ددەت، ئەو ژی بۆ كۆمكرنا ئاڤێ و مفا وەرگرتن بۆ كەرتێن چاندنێ و گەشتوگوزارێ و گەلەك مەرمێن دی و گۆت: «هەتا نوكە چەندین پۆند ل سەرانسەری هەرێما كوردستانێ هاتینە چێكرن و هژمارەكا دی ژی كار تێدا دهێتە كرن، چێكرنا پۆندان كاریگەری ل سەر ئاستێ ئاڤێ هەیە و بۆ داهاتی دێ مفایەكێ زۆر بۆ هەرێما كوردستانێ هەبیت».
دكتۆر كاروان هەورامی گۆتژی: «ب فەرمانا مەسروور بارزانی، سەرۆكێ حوكمەتا هەرێما كوردستانێ ئێك ملیار و 500 ملیۆن دینار بۆ پۆندێن هەڤپشك هاتینە دابینكرن، ئانكو ئەو پۆندێن د ناڤبەرا وەلاتیان و حوكمەتێ دا دهێنە چێكرن، هەر گوندەكی یان هەر دەڤەرەكێ خەلك بخوازیت پۆندەكێ ئاڤێ چێكەت و شیانێن ماددی نەبن، حوكمەتا هەرێما كوردستانێ دێ‌ پشتەڤانیا دارایی پێشكێش كەت، ئەڤە ژی پێنگاڤەكا باشە، هەتا پێكڤە بشێین پۆندا چێكەین و بارگرانی ژی ل سەر داهاتێ گشتی كێم ببیت».

سندس سالح سلێڤانەیی:

پتریا شۆفێران گازندێ ژ وێ چەندێ دكەن هندەك ترۆمبێل، ب تایبەت یێن باری دەمێ ل سەر جادەیان هاتن و چوونێ دكەن دووكێلەكا مەزن ژێ دەردكەڤیت و ئەڤ چەندە وان بێزار دكەت و رێڤەبەرێ كۆمپانیەكێ ژی دبێژیت: ئەم بەردەوام ترۆمبێلێن خوە سەخبێر دكەین، لێ ژبەركو ب (گازوایلێ) كار دكەن و ئەو گاز نەگەلەكا پاقژە لەورا وێ دووكێلێ دكەت و رێڤەبەریا هاتن و چوونێ ژی دبێژیت: هەر ترۆمبێلەكا دووكێلێ بكەت شۆفێرێ وێ دێ هێتە سزادان و بەردەوام ئەم دووڤچوونا وان ترۆمبێلان دكەین.

كەریم درباس، شۆفێرەكە دبێژیت: ئەڤ دیاردە یا هەی و ئەز دشێم بێژم رۆژ بۆ رۆژێ د زێدەبوونێ دایە، ب تایبەت ژی ل دەف هندەك ترۆمبێلێن باری یێن دو تەن و دەمێ ئەم دكەڤینە پشت وان نەچاردبین پەنجەرێن ترۆمبێلا خوە بگرین، چنكو ئەو دووكێلا رەش زیانێن ساخلەمیێ دگەهینتە مرۆڤان هەروەسا بێهنێن گەلەك نەخۆش ژی ژێ دهێت.
حەیدەر عیسا، شۆفێرەكێ دی یە، دبێژیت: من ب خوە ئێشا رەبویێ یا هەی و دەمێ ئەو دووكێل دهێتە من ئێكسەر رەوشا منا ساخلەمیێ تێك دچیت و بێهنا من تەنگ دبیت و ئەز دبینم ئەڤە دیاردەیەكا ب مەترسیە.
ماجد ئدریس، نوونەرێ كۆمپانیەكا ڤەگوهاستنێن ئاهێن خوارنێ یە، دبێژیت: راستە ئەم هەست ب وێ چەندێ دكەین كو ئەو دیاردە یا هەی و مەژی پێ نەخۆشە و هەر هەیڤێ جارەكێ یان هندەك جاران دو هەیڤان جارەكێ ئەم ترۆمبێلێن خوە دبەینە پیشەسازیێ و سەخێر دكەین، لێ ژبەركو ب گازوایلێ كاردكەن و ئەو گاز ل پانزیخانەیان نەیا دروستە لەورا دووكێلێ دكەین و گەلەك جاران رێڤەبەریا هاتن و چوونێ سەرا وێ چەندێ ترۆمبێلێن مە ب گۆژمەكێ پارەی سزا داینە.
عەقیدێ مافپەروەر ئازاد تاها، بەرپرسێ پشكا پەیوەندی و راگەهاندنێ ل رێڤەبەریا هاتن و چوونا دهۆكێ دبێژیت: راستە مە ئاگەه ژ وێ چەندێ هەیە و ئەو چەندە سەرپێچیە ل سەر رێنمایێن هاتن و چوونێ، هەروەسا زێدەگاڤیە ل سەر ژینگەهێ ژی، لەورا بەردەوام ئەو جۆرێن ترۆمبێلان ژلایێ تیمێن رێڤەبەریا مە دهێنە سزادان و دێ ل سەر ڤێ چەندێ دبەردوام بین.

ئەڤرۆ، شاكر ئەتروشی:

رێڤەبەرێ‌ كارگەها ئیسفەنجی ل دهۆكێ‌ دیار كر، د شیانێن وان دایە بەرهەمێ كارگەها خوە رەوانەی دەرڤەی هەرێمێ‌ بكەن، لێ‌ ب مەرجەكی هەكە حوكمەت ئاسانكاریان بۆ وان دابین بكەت و گۆت: نوكە ئیسفەنجێ‌ دهۆكێ‌ ل هژمارەیەكا پارێزگەهێن ئیراقێ‌ دهێتە فرۆتن.

رەمزی ئەرگۆشی، رێڤەبەرێ‌ وێ‌ كارگەهێ‌ بۆ رۆژنامەیا ئەڤرۆ گۆت: كارگەها ئیسفەنجی ل دهۆكێ‌، ل سالا (2003) هاتیە ڤەكرن و هەتا نوكە كارگەها ئێكانەیە ل سنورێ‌ پارێزگەها دهۆكێ‌ و بەردەوام بەرهەمێ‌ وێ‌ كو ژ قالبێن ئیسفەنجی و دوشەكان پێك دهێن بۆ هەرێما كوردستانێ‌ و چەند پارێزگەهان ل ناڤەراست و ژێریا عیراقێ‌ دچیت و مە گەلەك بریكارێن خوە ل وان پارێزگەها هەنە.
دەربارەی كەرەستەیێن چێكرنا ئیسفەنجی وەكو مەكینە و ئامیرەیێن كاری پتریا وان بۆ مەژ دەرڤەی هەرێمێ‌ دهێن و هەموو ژی ل دووف ستاندەرتێن جیهانی و ژ كوالیتیێن باشن، لەورا سال بۆ سالێ‌ ئەم یێن شیاین بەرهەمێن خوە زێدەتر لێ‌ بكەین، هەروەسا بۆ پتریا پارێزگەهان فرێكەین و هەكە حكومەت پشتەڤانیا مە بكەت و ئاسنكاریان بۆ مە دابین بكەن ئەم دشێین ئیسفەنجێ‌ خوە رەوانەی دەرڤەی هەرێمێ‌ بكەین.
دەربارەی رەنگێن ئیسفەنجی ژی گۆت: رەنگی چو جوداهی نینە، چونكو هەموو ئیسفەنج ل دووڤ ستاندارتێن جیهانی دهێتە چێكرن و نوكە پتری (120) كەسان ل كارگەهێ‌ كاردكەن، ژبلی شۆفێر و هندەك كەسێن دی، ئانكو ئەم یێن شیان ب كێماسی دەلیڤەیا كاری بۆ (150) كەسان دابین بكەین و ب دیتنا من ئەڤە ژی پێنگاڤەكا باشە تۆ مووچەیەكێ‌ هەیڤانە بۆ خێزانێن وان كەسان دابین بكەی.
دەربارەی گۆرهۆڕینێن ئەڤ سالە (2025) ل كارگەهێ‌ دهێتە كرن، ئینانا ئامیرەكێ‌ نوو یە دێ‌ شێین ل دووف داخوازیان ناڤان ژی ل سەر وان دۆشەكان نڤیسین، بۆ نموونە دۆشەكا بووك و زاڤا دێ‌ شیێن ناڤێن وان هەردویان ل سەر نڤیسین و بۆ پاشەرۆژێ‌ هندەك بەرنامە و پلانێن نوو بۆ پێشڤەبرنا كارگەهێ‌ ل بەردەستن، لێ‌ هەكە حوكمەت هاریكاریا مە بكەت و هندەك ئاسانكاریان بۆ مە بكەت، بۆ نموونە كێمكرنا باجێ‌ و ئەرزانكرنا بهایێ‌ كارەبا گشتی و دابینكرنا گازا مولیدەی دێ‌ پێنگاڤێن مە خۆرتتر هێنە هاڤێتن.