هەرهین محەمەد

سەرۆكێ‌ پشكا زمانێ‌ ئنگلیزی ل كولیژا پەروەردە و بنیات ل زانكۆیا دهۆك ئاشكراكر، حەزەكا مەزن ل دەف قوتابیان دروست بوویە بۆ فێربوونا زمانێ‌ ئنگلیزی و سالانە گڤاشتنێن مەزن ل سەر پشكا ناڤبری بۆ وەرگرتنێ‌ دروست دبن و گۆت: حەزا كچان بۆ فێربوونا زمانێ‌ ئنگلیزی ژ كوران زێدەترە.

رێبەر سەلیم دۆسكی، سەرۆكێ‌ پشكا زمانێ‌ ئنگلیزی ل كولیژا پەروەردا بنیات ل زانكۆیا دهۆكێ‌ بۆ رۆژناما ئەڤرۆ ئاشكەراكر، ل دووڤ ئامارێن ئەڤ سالە، ل پشكا زمانێ‌ ئنگلیزی هەر دەه قوتابیێن سەركەفتیێن دەسپێكێ‌ كچ بووینە، ئانكو زێدەتر حەزا خواندن و فێربوونا ڤی زمانی ل دەف كچان هەبووینە، ئەڤە ژی ڤەدگەریت بۆ خەمخوریا كچان زێدەتر ژ یا كوران.
سەرۆكێ‌ پشكا زمانێ‌ ئنگلیزی ئەو ژی ئاشكەراكر، گرنگە ژبلی زمانێ‌ دایكێ‌ مرۆڤ زمانەكی دی ژی بزانیت و گۆت: زمانێ‌ ئنگلیزی زمانەكێ‌ ستاندارە و یێ‌ ئێكێ‌ یە ل سەر ئاستێ‌ جیهانێ‌ و ئەف زمانە د چەندین قوناغان دا دەرباز بوویە هەتا گەهشتیە ڤی ئاستی، ئەڤە بۆ وێ‌ چەندێ‌ دا خەلكێ‌ بیانی ب ساناهی فێر بیت و ئەڤە ئەنجامێ‌ كاركرنا زمانزانێن ئنگلیزی بوویە ل سەر دروستكرنا زمانەكێ‌ ستاندار.
ناڤبری ئەو ژی گۆت: فێربوونا قوتابیان بۆ زمانێ‌ ئینگلیزی دكەڤیتە ل سەر بەردەوامی دان ب خواندن و ئاخفتنا رۆژانە و بەرخودانا فلم و زنجیرێن درامایی، خۆشبەختانە نوكە تەكنەلوژی گەلەك یا پێشكەفتی یە و رێیێن ب ساناهی هەنە بۆ فێربوونا ڤی زمانی.
رێبەر سەلیم ئەو ژی گۆت: نۆكە هەر تشتەكێ‌ بهێتە دروستكرن ب زمانێ‌ ئنگلیزی یە و ئەگەر ب زمانەكێ‌ دی ژی بهێتە دروستكرن هەتا نەبیت زمانێ‌ ئنگلیزی بەر بەلاف نابیت و رەنگە بۆ زانایێن وەلاتێن دی ژی زمانێ‌ ئینگلیزی ب ساناهی تربیت.
سەرۆكێ‌ پشكا زمانێ‌ ئنگلیزی، ب باشی زانی كو نوكە خواندنا زمانێ‌ ئنگلیزی ل باغچەی و بازنێ‌ ئێكێ‌ ل قوناغا سەرەتایی دهێتە خواندن گۆت: هەر زمانەكێ‌ زارۆیێن مە ل خواندنگەهێ‌ فێرببن گەلەك باشە و هەتا فێربوونا زمانێن وەلاتێن جیرانێن مە (عەرەبی، توركی، فارسی)، بەلێ‌ ب گشتی زمانێ‌ ئنگلیزی یێ‌ جیهانی یە و باشە ئەگەر ئەم زارۆیێن خوە ل ژیەكێ‌ بچووك فێربكەین.
رێبەر سەلیم دۆسكی گۆت ژی: نوكە مەزنترین رێژا قوتابیان ل كولیژا پەروەردە و بنیات ل پشكا زمانێ‌ ئینگلیزی دخوینن و هەتا 500 قوتابیان ژ هەردو رەگەزان ل پشگا ناڤبری هەنە، سالانە گڤاشتنێن مەزن ل سەر پشكا مە هەنە بۆ وەرگرتنا قوتابیان و سالا بوری پتر ژ 90 قوتابیان ل قوناغا ئێكێ‌ هاتینە وەرگرتن و حەزا خەلكی ل سەر ڤێ‌ پشكێ‌ زێدەبوویە و ئەم ژی وەك ستافێ‌ پشكێ‌ گەلەك هاندانا قوتابیان دكەین بۆ فێربوونا زمانێ‌ ئینگلیزی.
ل دووماهیێ‌ رێبەر سەلیم سەرۆكێ‌ پشكا زمانێ‌ ئنگلیزی خواست ل سازیێن پەروەردێ‌ زێدەتر گرنگی ب زمانێ‌ ئنگلیزی بهێتەدان و دیار كر كو كولیژا پەروەردە و بنیات پەیوەندی ل گەل پەروەردێ‌ هەنە و سالێن بوری گەلەك مامۆستایێن پەروەردێ‌ و هەلگرێن باوەرناما دبلومێ‌ ل پشكێن جودا ل كولیژا ناڤبری بەردەوامی دایە خواندنا خوە بووینە هەلگرێن باوەرناما بەكالوریوسێ‌ نە و زێدەتر پەروەردێ‌ مفا ژ شیانێن وان مامۆستایان وەرگرتیە.

بێوار حەمدی:

مەلایەکی دیار کر، لگۆر شەریعەتێ ئیسلامێ هەر تشتەکێ کچ مفایێ خۆ ژێ ببینیت دشێت مەهرا خۆ لسەر چێکەت، پارێزەرەکی ژی گۆت؛ لگوڕەی یاسایێ مەهر لدووڤ وێ پێکهاتنێ دمینیت ئەوا دناڤبەرا کچ و کوران دا.

پارێزەر عەلی رەسول بۆ ڕۆژنامەیا ئەڤرۆ دیار کر کو لگوڕەی یاسایێ مەهرەیا کچ و کوران لدویڤ وێ پیکهاتنێ دمینیت ئەوا دناڤبەرا واندا و گۆت؛ گەلەک جاران کچ بێی پێشەکی ژی دهێتە مەهرکرن، ب مەرجەکی هەکە ئەو یا ڕازی بیت و بێژیت من پێشەکی نەڤێت.
پارێزەری د بەردەوامیا ئاخفتنێن خودا دیار کر ژی کو گەلەک جاران کچ لدویڤ شەریعەتی بتنێ مەهرەیا خۆ دنڤیسیت، داکو زەکات لێنەکەڤیت و گۆت؛ ژلایێ یاسایی ڤە دڤێت پاشەکی دووماهیک هەر بهێتە نڤیسین، لێ پێشەکی لدویڤ بریارا دناڤبەرا واندا دمینیت کو دشێن نە نڤیسن.
مەلا محەمەد ئەمین زانایێ ئایینێ ئیسلامێ، سەبارەت هەمان بابەت دیار کر کو مەرجێ سەرەکی یێ مەهرکرنێ هندەک پەیڤن، ئەڤجا چ ژلایێ دادگەهێ ڤە بیت یان ژلایێ زانایەکێ ئایینی و گۆت؛ ئەگەر بریارا دادوەری و گرێبەستا دادگەهێ لگەلدا بیت باشترە، داکو مافێ وێ کچێ نەهێتە خوارن، ژبەرکو هەکە ل دادگەهێ نەبیت رەنگە چ بەلگە نەبن و زەڵام بێژیت من ئەڤ مەرجە و ئاخفتنە نەگۆتینە.
مەلای گۆتژی؛ لدویڤ شەریعەتێ ئیسلامێ هەر تشتێ کچ مفای ژێ ببینیت یێ دروستە مەهرەیا خو لسەر چێکەت وەکو ( زێر، خانی، پارە…) چونکو د شەریعەتی دا ڕێژەیەکا دەستنیشانکری ژبۆ مەهرێ دیار نەکریە، بەلکو لدویڤ پێچێبوون و پێکهاتنا دناڤبەرا کچ وکوران دا دمینیت.