تیما فوتبۆلا یانەیا دهۆك كەفتە خەفكا یانەیا نەفت یا بەغدایی پشتی نەشیایی خوە ژێ‌ قۆرتالبكەت و تووشی خوسارەتیێ‌ بووی ب گۆلەكێ‌ بێ‌ بەرانبەر، د یارییا واندا ئەوا ل یاریگەها كەرخێ‌ ل پایتەختێ‌ ئیراقێ‌ بەغدا هاتییە كرن، د ڤێ‌ یاریێ‌ دا ئەوا پیشەكارێ‌ دهۆكێ‌ لۆكاس د خولەكا 67ێ‌ دا.
مانا خوە ل رێزا حەفتێ‌ پاراست
تیما فوتبۆلا یانەیا دهۆك مانا خوە ل رێزا حەفتێ‌ ل سەر لیستا خولا ستێرێن ئیراقێ‌ پاراست ب كۆمكرنا 47 خالان كو ژ سەرجەمێ‌ 14 سەركەفتنان، پێنج وەكهەڤی و حەفت خوسارەتییان، دیسان كێمترییا شەش یاریێن پاشئێخستی هەنە، ل دووڤ پێشبینییان بۆ یاریێن داهاتی تایبەت یێن پاشئێخستی دەلیڤەیەكا باش بەرانبەر تیما دهۆكێ‌ هەیە ب دەستڤە ئینانا ئەنجامێن باش و پێشڤە بهێتە ڕێزێن پێشییێ‌ و هێشتا هەڤڕكە بۆ سەرێ‌ لیستێ‌.
ڕاهێنەرێ‌ دهۆكێ‌ گەشبینە ئاست و ئەنجام ڤەگەڕین
د پرێس كۆنفرانس دا لدۆر ئەگەرێن خوسارەتیێ‌ مەسعۆد میرال ڕاهێنەرێ‌ تیما دهۆكێ‌ گۆت: تیما نەفتێ‌ ئاستەكێ‌ مەزن نیشان دا و ئێك ژ تیمێن ب هێزە دناڤ خولێ‌ دا، پێنەڤێت هەكە ئاستێ‌ تیمێ‌ كێمتر ژ 50% بیت خویا دبیت چو ئاستێ‌ باش نیشان نەدایە، خوسارەتیەكا ب ژان بوو و دڤێت ئەو خەلەتیێن دناڤ یاریگەهێ‌ دا بۆ یارییا بهێت چارەسەربكەین، سۆزێ‌ ددەینە جەماوەرێ‌ خوە بۆ یاریێن بهێت ئاست و ئەنجام باشتربن، هێشتا مە یاریێن پاشئێخستی هەنە و بەردەوامین ل سەر هەڤڕكیێ بۆ رێزێن پێشیێ‌.
هەروەسان ناڤهاتی دیار كر ئەگەرێن دی ژی هەنە كو كارتیكرن ل سەر ئاستێ‌ تیمێ‌ دكەن ژ وانا ئەنجامدانا یارییان بەردەوام دناڤبەرا هەر چار رۆژان و یاریزان تووشی ماندیبوونێ‌ دبن تایبەت پشتی ب دووماهی هاتنا قارەمانییا كەنداڤی، هەروەسان د یارییا بەرانبەر نەفتێ‌ دا دوورئێخستنا یاریزانەكێ‌ كاریگەر ب كارتا سۆر و نە كرنا چەند یاریزانێن باش یێن سەرەكی دگەل تیمێ‌ ئەگەرەكێ‌ دی بوون، لێ‌ بۆ یارییا بهێت دڤێت هەموو بزاڤان بكەین قەرەبوو بكەین.
حەفتییا بهێت ئەلهۆیێن چیا دو یاری دگەل تەلەبە هەنە
چاڤەڕێ‌ دهێتە كرن تیما یانەیا دهۆك ل حەفتییا بهێت دو یارییان ل دووڤ ئێك دگەل یانەیا تەلەبە یا بەغدایی بكەت، یارییا ئێكێ‌ ل رۆژا شەمبی ل یاریگەها ئەلمەدینە ل بەغدا بهێت كرن، ئەڤ یارییە یا پاشئێخستی بوو ژ گەڕا 18ێ‌ ئەوا بڕیاربوو ل چاری شۆباتا بۆری هاتبا كرن لێ‌ ژبەر پشكدارییا تیما دهۆكێ‌ د كۆپا كەنداڤی دا هاتبوو پاشئێخستن، دیسان یارییا دویێ‌ كو بڕیارە هەر ل حەفتییا بهێت بیت دێ‌ ل یاریگەها دهۆك یا نێڤدەولەتی بیت رۆژا چارشەمبی دەمژمێر 8:30 شەڤ هێتە كرن.
یاریزانێن دهۆكێ‌ 32 گۆل تۆمار كرینە
تیما دهۆكێ‌ خوانا دەهـ یاریزانێن پشكداری د تۆمار كرنا 32 گۆلان دا هەیە سەرجەمێ‌ 33 گۆلان و بڤی ڕەنگی، پیتەر گۆرگیس حەفت گۆل، پاشەنگ عەبدوللا حەفت گۆل، كەریم دەرویش پێنچ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید، زانا عەلی و لۆكاس هێنریك گۆلەك تۆماركرینە، گۆلەك بۆ یاریزانەكێ‌ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
دهۆكێ‌ چەند یاریێن پاشئێخستی ماینە
ژبەركو تیما فوتبۆلا یانەیا دهۆكێ‌ موژیلی یاریێن كۆپا كەنداڤی بوو و شیابوو ب سەرفەرازی ناسناڤێ‌ كۆپایێ‌ ب دەستڤە بینت، د دەمێ‌ قارەمانیێ‌ دا فدراسیۆنا فوتبۆلا ئیراقێ‌ دەلیڤە دابوو دهۆكێ‌ یاریێن وێ‌ بهێنە پاشئێخستن بوخاترا ئەڤێ‌ قارەمانیێ‌ كو سەرجەمێ‌ و بوونە شەش یاری و ب ڤی رەِنگی، بەرانبەر تەلەبە ل بەغدا، دگەل شورتە ل دهۆكێ‌، بەرانبەر هەولێرێ‌ ل هەولێرا پایتەخت، دگەل نەفت میسان ل دهۆكێ‌ و دێ‌ بیتە مێڤانا یانەیا دیالا و یارییا شەشێ‌ مێڤاندارییا یانەیا مینا یە بەسرایی بكەت.

قەیس وەیس:

چاڤەڕێ‌ دهێتە كرن شەمبییا بهێت دەمژمێر سێیێ‌ ئێڤاری تیما فوتسالا یانەیا ئافرەتێن دهۆكێ‌ یارییەكا گرنگ بەرانبەر خودانێن ئەردی تیما كچێن یانەیا سیروانی حەلەبچە بكەت، ژ چارچووڤەیێ‌ یارییا ئێكێ‌ و چوونێ‌ ژ قۆناغا چارگۆشەیا زێرین دەربازبوون بۆ یارییا دووماهییا خولا فوتسالا كچێن كوردستانێ‌.
تاقیكرنەكا بهێزە بۆ كچێن دهۆكییان
تیما ئافرەتێن دهۆكێ‌ قارەمانا وەرزێ‌ بۆری شیابوو وەكو سەركێشا كۆما ئێكێ‌ دەربازبیتە ڤێ‌ قۆناغێ‌ پشتی شیایی 16 خالان سەڕێ‌ لیستێ‌ بهێت ب پێنچ سەركەفتن و وەكهەڤییەك ببیتە ئێكا یانە د قۆناغا كۆمان دا چو خوسارەتییان نە دەت، د بەرانبەر دا تیما كچێن فوتسالا سیرۆوانی حەلەبچە ل رێزا دویێ‌ د كۆما دویێ‌ دا هاتبوو ب كۆمكرنا نەهـ خالان، یارییا ڤێ‌ گەڕێ‌ بۆ كچێن دهۆكییان تاقیكرنەكا بزەحمەتە بەر ب یارییا دووماهیێ‌ ژبەركو دێ‌ ژ دەرڤەیی یاریگەهـ و دووری جەماوەرێ‌ خوەبن.
تیما دهۆكێ‌ دێ‌ بزاڤێ‌ كەت ب سەركەفتیانە ڤەگەڕیت پێخەمەت ل یاریگەها خوە پلێتا دەربازبوونێ‌ ئێكلابكەت ئەوا د نوكە دا مەزنترین رێژا گۆلان د خولێ‌ دا هەنە كو 55 تۆماربكەن، هەروەسان هێرشبەرا وێ‌ سیپەل شوكر خودانا 27 گۆلانە سەرێ‌ لیستا گۆلكەرێن خولێ‌ دهێت.
ل دۆر ڤێ‌ یاریێ‌ ئاراز سالح ڕاهێنەرێ‌ تیما ئافرەتێن دهۆكێ‌ گۆت: پێنەڤێت یاریێن چارگۆشەیا زێرین وەكو ئاست و پلان و بەرهەڤی جوداهییا خوە ژ قۆناغا كۆمان هەنە و هەر چار یاریێن دەربازبووین دێ‌ هەموو بزاڤان كەن بۆ سەركەفتنێ‌ پێخەمەت ب گەهنە یارییا دووماهیێ‌، تیما مە ژی ل سەر پلانەكا ڕێكخستی ب ڕێڤە دچیت پێخەمەت باشترین بەرهەڤی بۆ دیدارا سیروانی حەلەبجە، ئەركێ‌ مە ب سانەهی نابیت، لێ‌ ڕژدییا هەموو یاریزانان و پێگێرییا وان ب پلان و شیانێن خوە دیسان ئەو پشتەڤانییا بەردەوام یا كارگێریێ‌ گەشبینن دێ‌ ب ئەنجامەكێ‌ باش ژ سلێمانیێ‌ ڤەگەڕین، ب هیڤییا وێ‌ یەكێ‌ بگەهینە ئارمانجا خوە ئەوژی پاراستنا ناسناڤی بیت.
بۆ زانین هەر ژ قۆناغا چارگۆشەیا زێرین تیما كچێن یانەیا چەمچەمال خودانا رێزا دویێ‌ یا كۆما ئێكێ‌ دێ‌ یانەیا ئافرەتێن هەولێرێ‌ مێڤانكەت ئەوا رێزا ئێكێ‌ د كۆما دویێ‌ دا هاتی د یارییا ئێكێ‌ دا، بڕیارە یارییا دویێ‌ یا چارگۆشەیا زێرین و ئێكلاكەر ل شەمبییا دووڤدا ڕێكەفتی 17ێ‌ ئەیارێ‌ بهێنە كرن.

رەمەزان زەكەریا

بۆ جارا ئێكێ‌ ددیرۆكا وەرزشا فوتبۆلا پارێزگەهێ‌ دا دو یانەیێن پارێزگەهێ‌ دبنە سەركێشێن كۆمێن خوە و دەربازبنە پلا ئێكا كوردستانێ‌ و دبنە لایەنێن یارییا فینالێ‌ ژبۆ دەستنیشانكرنا قارەمانا وەرزێ‌ ئەڤ سالە یا خولا پلا دو یا كوردستانێ‌، ئەوا بڕیارە یارییا فینالێ‌ دناڤبەرا یانەیا شێخان و بەڕدەرەش شەمبییا بهێت دەمژمێر سێ‌ ئێڤاری ل یاریگەها یانەیا ئاكرێ‌ بهێتە كرن.
ل دۆر دووماهی بەرهەڤیێن تیما شێخان مەهدی سالح جێگرێ سەرۆكێ یانەیا شێخان بۆ رۆژناما ئەڤرۆ گۆت: ل دەستپێكا وەرزێ خولا پلە ئێكا كوردستانێ مە باوەریەكا مەزن ب تیما خوە هەبوو بگەهیتە ڤێ قۆناغێ و ب هیڤینە یاریا ئێكلا كەر بەرامبەر یانەیا بەردەڕەش سەركەڤیت و ببینە قارەمانێن وەرزێ‌ ئەڤ سالە،
ناڤبری گۆتژی: ل دووڤ شیانێن مە یێن بەردەست یا پێدڤی مە بۆ تیما خوە كرییە و ئەڤسالە ب رەنگەكێ گشتی ئاستێ یاریزان و راهێنەڕێن یانەیێ گەلەم یێ باش بوو، ئەڤ ئاستو گەهشتن بۆ فینالێ‌ چاڤەڕێ‌ بووین، ئەم دێ بۆ سەركەفتنێ یاریێ ئەنجامدەین .
ژلایێ خۆڤە سەمیر عەبدولقادر سەرۆكێ یانەیا بەردەڕەش بۆ رۆژناما ئەڤرۆ گۆت: ئاستێ تیما مە یا فوتبۆلێ‌ ل هەموو یاریێن ئەڤسالە گەلەك یێ باش بوو هەتا شیا ببیتە ئێكەما گروپێ خوە، دێ یاریەكا ئێكلاكەر ئەنجامدەین و ب هیڤینە كو سەركەڤین بۆ جارا ئێكێ‌ بشێن ناسناڤێ‌ خولا پلە دو یا كوردستانێ دەستڤە بینن.
ناڤبری گۆتژی: چ ئاستەنگ هەمبەر یانەیێ نینە دێ هەموو هێزا خوە ب كارئینین بۆ سەركەفتنێ ل ڤێ یارییا چارەنڤیسازدا بۆ وێ چەندێ دلێ جەماوەرێ خوە خۆش بكەین و بگەهینە ئارمانجا خوە یا مە بڤێت.
بۆ زانین ل دووڤ سیستەمێ‌ خولا پلا دو یا كوردستانێ‌ 20 یانە پشكداربووینە و هاتبوونە بەلاڤكرن ل سەر دو كۆمان، د كۆما ئێكێ‌ دا تیما بەردەڕەش شیا ببیتە قارەمانا كۆما خوە ب كۆمكرنا 22 خالان ئەوا یانەیا شێلادزێ‌ دڤێ‌ كۆمێ‌ دا بوو رێزا سێیێ‌ هاتبوو ب14 خالان، د كۆما دویێ‌ دا یانەیا شێخان بوو قارەمانا كۆما خوە ب كۆمكرنا 20 خالان، ئەوا یانەیا باتیفا ل رێزا پێنجێ‌ هاتی ب 15 خالا، بۆ زانین هەردو یانەیێن پارێزگەهێ‌ بەردەڕەش و شێخان دەربازبوونا خوە مسۆگەر كرییە بۆ پلا ئێك، بڕیارە پلێتا سێیێ‌ یا دەربازبوونێ‌ دناڤبەرا یانەیا سەنگەسەر خودانا رێزا دویێ‌ ژ كۆما ئێكێ‌ و حاجیاوا خودانا رێزا دویێ‌ ژ كۆما دویێ‌ بهێتە ئێكلا كرن.

عەلی حاجی:

د داخویانیەکێ دا سەرپەرشتێ تیما فوتبۆلا یانەیا زاخۆ بۆ رۆژنامەیا ئەڤرۆ دیار کر د وەرزێ ئەڤ سالە دا تیما وان ب کێماسی ژ هەژی ناسناڤەکێ یە ل سەر ئاستێ خول و قارەمانیێن کوردستانێ و ڕژدن ناسناڤێ کۆپا کوردستانێ بدەستڤە بینن، ئەڤچەندە هات پشتی تیما وان دەربازبوویە فینالا کۆپا کوردستانێ ئەوا بڕیارە ل ١٢ێ ڤێ مەهێ دگەل یانەیا هندرین ل هەولێرا پایتەخت بکەت.
زێدەتر نەدیار عەلی گۆت: د وەرزێ ئەڤ سالە یێ خولا نایابا کوردستانێ یا فوتبۆلێ دا تیما مە شیا ئاستەکێ باش پێشکێش بکەت و ئێک ژ تیمێن گەلەک ب هێز و زەحمەت بوو و هەتا چەند یارییەکێن دوماهیێ ژی ئەم هەڤرکێن ناسناڤێ خولێ بوین، لێ ب دەستڤەئینانا رێزا سیێ ژی د خولێ دا ب گرنگ دبینن ژبەرکو تیما مە گەلەک زەحمەتی کێشایە هەتا گەهشتیە ڤێ قوناغێ و من باوەرییەکا مەزن ب ڤێ تیمێ هەیە کو دێ د پاشەرۆژێ دا شێت هەڤرکیا ناسناڤی بکەت، زێدەباری هندێ کو تیما مە ل رێزا سیێ هات د خولێ دا د نوکە دا د جاما کوردستانێ ژی دا ئەم یێ ل یاریا دووماهیێ و ئەم ژ هەژیترین تیمن بشێن وی ناسناڤی ب دەست خوەڤەبینن و من باوەرییەکا مەزن ژی ب تیما خوە هەیە کو دێ شێن باشترین ئاست پێشکێش بکەن.
ناڤبری گۆت ژی: ئەم یێ د قوناغەکا باش دا دەرباز دبین و ب دەست ڤەئینانا ناسناڤێ جاما کوردستانێ دێ ب وەرزەکێ سەرکەڤتیانە بۆ یانەیا زاخۆ ب دووماهی ئینن.

شاهۆ فەرید:

د داخویانیەكێ‌ دا ڕەوان محەمەد كوڕێ باژێری دهۆكی و یاریزانێ تیما فوتبۆلا یانەیا ناسریە دیاركر: بۆ وی ئەزموونەكا نوو دگەل تیما خوە و فێری گەلەك تشتا بوومە و سەربۆرەكا نوویە د كاروانی وی دا زێدەكرییە.
هەروەسان ناڤهاتی بۆ رۆژنامەیا ئەڤرۆ گۆت:ل دەستپێكا خولا پلا نایابا ئیراقێ‌ تیما مە هێز و هەڤڕكی هاتە دیتن، لێ قەیرانا دارایی ڕەوشا مە گۆهارت، ئەو كوژمەیێ پارێزگاریی زیقار سوز دایی بدەتە یانەیێ بجهنەئینا، هەرچەندە ژ هەڤڕكیێ دوورنەكەفتینە لێ دەربازبوون بۆ خولا ستێرێن ئیراقێ زەحمەت كەفتیە، گوهۆڕینا راهێنەران ژی كارتێكرن ل ئاستێ یانەیێ كریە، لێ وەكۆ یاریزان لسەر ئاستێ خوە ماینە و مە ژ هێزترین یانەیا خولێ مووسل بریە یاریا هاتن و چوونێ، نەدانا مووچەیی یانەیێ كومڤەكرنا تیمێ بەری یاریێ ب رۆژەكێ و ئێكسەر یاریێ دكەین ئاست لاوازكر، دووریا رێكێ كارتێكرن لمن نەكریە 12 هەتا 13 دەمژمێرا دبرم هەتا بگەهمە باژێریی ناسریە، سەر ئەڤێ چەندێ دا من ئاستێ خوە باشتر لێكریە بەرەڤ باشبوونێ چوویمە.
زێدەرتر ڕەوانی گۆت: جێوازی نینە دناڤبەرا یاریزانێ ناڤخوەیی و بیانی تایبەت یێن كورد یاریێ ئاستەكێ باش دكەن، لێ یانەیێن كوردی گرنگی پتر دایە یاریزانێ نە یێ‌ كوردستانی، یاریزانێ ناڤخوە ئاستێ بلند پێشكێش دكەت ئەگەر گرنگیێ و چاڤدانەكا باش بۆ هەبیت، گەلەك یانەیێن دی هاتنە من ڤەگوهاستنێن زڤستانێ خواستن یاریێ بۆ بكەم ژ كوردستانێ و ئیراقێ ژبەر گرێبەستا من هەی گەل یانەیێ و كارگێریا وان ژی دەستبەردایی من نەبوو، هەتا دووماهییا وەرزی دێ بڕیاریێ لسەر مان یان چوونا خوە دەم، دێ بەردەوام هەتا بگەهمە ویێ یامن بڤێت، مالا من و نێزیكی من هەموو پشتەڤانیا من دەكەن، برایێ من كومێنتار ئارمانج دوسكی پتری هەموویان پالپشتێ منە و هاریكارە.