رەمەزان زەكەریا:

سەرۆك مەسعود بارزانی دوهی 16/4/2025 ل دەڤەرا بارزان سەردانا یوسف بەرزنجی بابێ مامۆستا ئاڤێستایێ‌ كر، كو ل رۆژا 4/4/2025 ل دەمێ گەشتكرنێ بۆ دەڤەرا بارزان ل گەل خێزانا خوە، د زێیێ مەزن دا خەندقی و هەتا نوكە تەرمێ وێ نەهاتیە دیتن.
دیسا هەر دوهی سەرۆك مەسعود بارزانی، پشكداری د بەهیا بەدرۆ لەشكری بێستریانی دا، پێشمەرگەیێ شۆڕەشێن ئیلۆن و گولانێ‌ و كۆمارا مهابادێ‌ و هەلگرێ میدالیا بارزانی كر، كو ل رۆژا 15/4/2025 د ژییێ 98 سالیێ دا ژ ئەگەرێ نەخۆشیێ ل ئێك ژ نەخۆشخانەیێن هەولێرێ مالئاڤایی كربوو.

ب نوونەرایەتیا سەرۆك بارزانی و سەركردایەتیا پارتی سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارێزگەها دهۆكێ پشكداری د رێورەسمێن ڤەشارتنا تەرمێ خودێ ژێ رازی فەرماندە (حەمید خواستی) پێشمەرگەیێ دێرین یێ‌ هەردو شۆڕەشێن ئیلۆن و گولانێ‌ و هەلگرێ میدالیا بارزانیێ‌ نەمر دا ل گورستانا گرك سندی ل باژێرێ زاخۆ كر.
د رێورەسمێ دا سەباح بەیتوللا، هاریكارێ بەرپرسێ مەكتەبا رێكخستنێ و گوهدار شێخۆ، سەرپەرشتێ ئیدارا سەربخۆ یا زاخۆ و عومەر ئورەیی، بەرپرسێ لقێ‌ هەشت یێ‌ پارتی و هەژمارەكا بەرپرسێن حزبی و حكومی و لشكری و كەسایەتیێن دەڤەرێ و هەڤال و هەڤچەپەرێن خودئ ژێ رازی پشكدار بوون.
بەرپرسێ مەكتەبا رێكخستنا پارێزگەها دهۆكێ بناڤێ جەنابێ سەرۆك بارزانی و سەركردایەتیا پارتی پەیڤەك پێشكێشكر و هەڤخەمی و سەرساغی گەهاندە مالباتا خودێ ژێ رازی فەرماندە (حەمید خاستی).

ب مەرەما گەهـاندنا پەیاما پیرۆزباهیێ و ب هـەلكەفتا هاتنا سەرسالا نوو یا كوردێن ئێزدی سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا دهۆكێ ب هەڤالینیا خانم د. ڤیان سلێمان و سەباح بەیتوللا، هاریكارێن بەرپرسێ‌ مەكتەبا رێكخستنێ و بەرپرسێ لقێ‌ 20 یێ‌ پارتی ل شێخان و شاندەكێ مەكتەبێ دوهی 16/4/2025 سەرەدانا میر حازم تەحسین بەگ، میرێ ئێزدیان كر، ل دەڤەرداریا شێخان و هەروەسا سەرەدانا مالا شێخ عەلۆ ل كۆمەلگەها شاریا كر.
بەرپرسێ مەكتەبا رێكخستنا دهۆكێ د وان سەرەدانان دا پیرۆزباهـیێن خۆ ئاراستەی میری و جڤاكێ ئێزدیان كر و سەرسالا نوو لێ پیرۆز كر.
بەرپرسێ مەكتەبا رێكخستنا دهۆكێ هیڤی خواست، كو ئەڤ جەژنە ببیتە فاكتەرێ خورتكرنا گیانێ برایەتیێ و لێبۆرینێ و پێكڤەژیانێ د ناڤبەرا هەمی ئول و نەتەوەیان دا ل كوردستانێ‌.
دیسا هەر دوهی و ب هەلكەفتا هاتنا جەژنا سەرێ سالا ئێزدیان د. عەلی تەتەر، پارێزگارێ دهۆكێ سەرا میر تەحسین حازم بەگ، میرێ ئێزدیان دا و پیرۆزباهی ل هەمی خووشك و برایێن ئێزدی ل كوردستانێ و جیهانێ كر و خواست هەمی جەژن و هەلكەفتێن وان ب خوشی و ئارامی دەربازببن.

هەولێر، قائید میرۆ:

بەرپرسەكێ وەزارەتا چاندنێ ئاماژەكر، ژ ئەگەرێ نەهاتنا بارانێن پێدڤی و بلندبوونا بهایێ ئالیكێ دێ كاریگەری ل سەر بهایێ سپیاتی هەبیت و دبێژیت: ئەڤ سالە دێ بهایێ سپیاتی بلندبیت، ب تایبەتی ماست و پەنیری.
فیراس سەدیق، رێڤەبەرێ سامانێن ئاژەلی ل وەزارەتا چاندنێ بۆ رۆژناما ئەڤرۆ دیاركر، ئەڤ سالە رێژا بارانێ ژ سالا بۆری كێمتربوویە، ئەڤێ چەندێ ژی راستەوخۆ كاریگەری پەیداكریە و دێ بیتە ئەگەرێ بلندبوونا بهایێ ئالیكێ ئاژەلان د بازاڕی دا و گۆت: «دەمێ بهایێ ئالیكێ بلند دبیت و چەروان نەمینیت، ئەڤە ژی نابیتە‌ ئەگەرێ كێمبوونا بەرهەمێ سپیاتی د بازاڕی دا، چونكی دێ ئالیك هێتە بكارئینان».
فیراس گۆتژی: «نەبوونا بارانێ و گیا و چەروانی دێ كاریگەری ل سەر بهایێ سپیاتی هەبیت ل بازاڕی، چونكی دەمێ ئالیك گران دبیت، راستەوخۆ بهایێ سپیاتی ژی بلند دبیت، ب تایبەتی بهایێ ماست و پەنیری، كو هەموو سالێ ل مەها ئادارێ پێڤە دكەڤیتە بازاڕی و خواستەكا زۆر ل سەر هەیە».

زاخۆ، دلۆڤان هالۆ:

دكتۆرا دیار ئەحمەد، ڕاگرا كۆلیژا زانست ل زانكۆیا زاخۆ بۆ ڕۆژناما ئەڤرۆ دیار كر كو ب هەلكەفتا ڕۆژا ژینگەها كوردستانێ، پشكا زانستێن ژینگەهێ ل زانكۆیا زاخۆ، ڕابوو ب ساخكرنا ئەڤێ ڕۆژێ و پێشانگەهەكا زانستی ڤەكر، كو ژ چەندین پڕۆژەیێن زانستی یێن پێشكەفتی پێك دهات.
ڕاگرا كۆلیژا زانست ئاماژە ب وێ چەندێ ژی كر، د ڤێ پێشانگەهێ دا 25 پۆستەرێن زانستی یێن گرێدایی بیاڤێ پاراستنا ژینگەهێ هاتنە نیشادان و شرۆڤەكرن و گۆت: «ئەڤ پڕۆژە ژ لایێ قوتابیێن بەكالۆریوس و ماستەر و دكتۆرایێ هاتبوونە بەرهەڤكرن، ڕۆلێ زانستی د پێشڤەبرن و پاراستانا ژینگەهێ دا بەرچاڤكرن».