سندس سالح
ل ڤان سالێن دووماهیێ، گوهارتنەکا مەزن د بازارێ ترۆمبێلا دا پەیدا بوویە، ب تایبەت سەبارەت کومپانیێن چینی کو هاتنە پێش و شیان سەرکەفتنێ ب دەست خوه ڤە بینن و ههڤركیێ ل گەل کومپانیێن ئەمریکی و ئورۆپی بکەن.
چاوا کومپانیێن چینی سەرکەفتن؟
کومپانیێن چینی ب چەند رێیا شیان خوه پێش بێخن و ببنه ههڤركێن گرنگ ل بازارێ جیهانێ:
١. بهایێ نزم: کومپانیێن چینی ترۆمبێلێن خوه ب بهایەکێ زێدە نزم دفروشن. ئەڤە دبیتە ئەگەرێ هندێ کو گەلەک کەس ترۆمبێلێن چینی بکرن، ب تایبەت ل وەلاتێن پێشکەفتی و گەشەكری.
٢. تهكنۆلۆژیا پێشکەفتی: چین زۆر وەبەرهێنانێ د تهكنۆلۆژیا ترۆمبێلێن کارەبێ و هایبرید دکەت، کو ئەڤ چەندە بوویە سەرئێشەیەکا مەزن بۆ کومپانیێن ئەمریکی.
٣. پشتەڤانیا دەولەتێ: حوکمەتا چینی پشتەڤانیەکا مەزن ددەتە کومپانیێن ناڤخوهیی و رێکخستنێن گونجایی داناینە بۆ پێشکەفتنا ڤی کەرتی.
٤. ئینوڤاسیون و ڤەکولین: کومپانیێن چینی گەلەک پارە خەرج دکەن بۆ ڤەکولین و پێشڤەچوونێ، و شیان تهكنۆلۆژیا نوی دەربێخن و بکاربینن د ترۆمبێلێن خوهدا.
کومپانیێن چینی یێن سەرکەفتی
چەند کومپانیێن چینی یێن گرنگ کو سەرکەفتن بدەست خوهڤە ئینای:
– BYD (Build Your Dreams): ئێک ژ مەزنترین کومپانیێن چینێ کو بوویە پێشەنگا ترۆمبێلێن کارەبێ ل جیهانێ. ل سالا ٢٠٢٣، BYD شیا ژ تێسلایێ دەرباز ببیت د فروتنا ترۆمبێلێن کارەبێ دا.
– NIO: کومپانیەکا چینی یه کو ترۆمبێلێن لوکس یێن کارەبێ بهرههم دئینیت و سیستەمەکێ تایبەت بۆ گوهورینا پاتری یا پەیدا کری یه.
– Geely: ئەڤ کومپانیە نە ب تنێ ل چینێ یە، بەلکو ل دەرڤەی چینێ ژی گەلەک سەرکەفتی بوو، نها خودانێ کومپانیێن ناڤدار وەک ڤولڤۆ و لۆتەسە.
– Great Wall Motors: پێشەنگێ ترۆمبێلێن SUV یێن چینی کو نها ل گەلەک وەلاتا دهێنە فروتن.
چارچكرنا لەز و تەکنولۆجیا BYD
کومپانیا BYD شیایە رێکەکا دی بکاربینیت کو ژێرا دبێژن “Blade Battery” (پاتریا کادی). ئەڤێ تەکنۆلۆژیایێ چەند تایبەتمەندی هەنە:
١. چارچكرنا ب لەز: پاتریێن BYD شیاینە لەزاتیەکا زۆر ب هێز بدەن د چارچكرنێ دا کو دەمێ چارچكرنێ کێم دکەت. خودانێن ترۆمبێلێن BYD دشێن د ماوێ ٣٠ دەقیقا دا هەتا ٨٠٪ پاتریا خوه چارچ بکەن.
٢. سەلامەتی: پاتریا کادی ب سەلامەتیەکا بلند دهێتە ناسین، تێستێن گەلەک زەحمەت دەرباز کرینە بێی کو ئاگر بگریت یان تەقینەک پەیدا ببیت.
٣. تێکبەرایی زۆر: ئەڤ پاتریە هندەک جارا ههتا ٨٠٠ کیلومەتر پێ دچیت بێی چارچکرن، کو ئەڤە ژ پاتریێن کومپانیێن دی زێدەترە.
٤. زێدەکرنا جهی د ناڤ ترۆمبێلێ دا: پاتریا کادی تەنک و ب هێزە، کو دبیتە ئەگەرێ هندێ کو BYD بشێت جهەکێ زێدەتر بۆ رێرهویا دبن ترۆمبێلێ دا پەیدا بکەت.
ئەگەرێن سەرکەفتنا کومپانیێن چینێ ل سەر یێن ئەمریکی
سەرکەفتنا چینێ ل سەر ئەمریکیا گەلەک ئەگەر هەنە:
١. ڤەبەرهێنان د ئایندێ دا: چین زووتر دەست ب ڤەبەرهێنانێ د ترۆمبێلێن کارەبێ دا کر، دەمێ کومپانیێن ئەمریکی هێشتا خوه پابەندی ترۆمبێلێن بەنزین و دیزل دکرن.
٢. ئەزموونا پاتریا: چین پێشەنگێ پیشەسازیا پاتریا یە و شیایە پاتریێن نوو یێن باشتر دروست بکەت.
٣. هاریکاری د ناڤبەرا پیشەسازی و زانکۆیا: چین هاریکاریهكا باش د ناڤبەرا زانکۆ و کومپانیێن پیشەسازی دا هەیە کو دبیتە ئەگەرێ پێشکەفتنێ.
٤. نەرمی د گوهورتنا پیشەسازیێ دا: کومپانیێن چینی خوه ب لەز د گوهورن و ب رەوشا بازارێ دگورن، بەلێ کومپانیێن ئەمریکی گەلەک جارا ڤێ چەندێ ب لەز ناکەن.
ل دووماهیێ، ئەڤ سەرکەفتنا چینێ ل سەکتهرێن ترۆمبێلا دا بەلگەیە کو چاوا دشێن ئاستەنگێن تەکنۆلۆژیایێ دەرباز بکەن و ببنە ههڤركێن سەرەکی ل بازارێن جیهانی، هەکە ئەڤ رەوشه بەردەوام بیت، ئەم دێ دبینین کو هێدی هێدی بازارێ جیهانی یێ ترۆمبێلا دێ ب دەستێ چینیا ڤە بیت.
نيشاندان