رەمەزان زەكەریا:

‎ب بڕیارا سەرۆكێ حكومەتا هەرێما كوردستانێ، پڕۆژەیێ ستراتیژی یێ‌ ئاڤا ئاكرێ دەست ب كارێن خۆ كر و ئەگەر چو ئاریشەیێن دارایی دروست نەبیت، بڕیارە د دەمێ 10 مەهان دا بهێتە تەمامكرن و بكەڤیتە د خزمەت وەلاتیان دا.
‎ئەندازیار زرار ئەحمەد، ڕێڤەبەرێ ئاڤا ئاكرێ بۆ ئەڤرۆ گۆت: «پڕۆژەیێ ئاڤا ئاكرێ ئێك ژ پڕۆژەیێن ستراتیژی یێن ئاڤێ یە ل هەرێما كوردستانێ، كو د دەمێن بۆری دا كار تێدا هاتبوو كرن، پاشی هاتە راگرتن، بەلێ پشتی سەرەدانا سەرۆكێ حكومەتا هەرێما كوردستانێ بۆ دەڤەرداریا ئاكرێ‌، بڕیار دا دەست ب تەمامكرنا پڕۆژەی بهێتە كرن و نوكە بەردەوام كار تێدا دهێتە كرن و 60%ێ پڕۆژە تمام بوویە».
ناڤبری گۆتژی: «نڤیسینگەها سەرۆكێ حكومەتێ چاڤدێرییا پڕۆژەی دكەت، دەڤەرداریا ئاكرێ و ناوچەداریا بجیل و 18 گوند ژ وی پڕۆژەی دێ مفاداربن، كو گوژمێ تەرخانكری یێ پڕۆژەی ژی 109 ملیار دینارن».
ئەندازیار زرار خویا ژی كر، نوكە پڕۆژە د قووناغا دانانا بۆڕیێن ئاڤێ دایە، ب درێژاهییا 11 كیلۆمەتران بۆری دێ‌ هێنە دانان، ئاڤ ژ زێیێ بێخمێ بۆ ئاكرێ دێ‌ هێتە راكێشان و گۆت: «ئەڤ پڕۆژە گەلەك یێ‌ گرنگە بۆ دەڤەرێ‌، ب تەمامبوونا وی، مە پێدڤی ب 180 بیرێن ئاڤێ نابیت بۆ دابینكرنا ئاڤا ڤەخوارنێ، ژ بەركو ئارمانجا حكومەتا هەرێما كوردستانێ ئەوە، ل جهێ هندێ ئاڤا بن ئەردی بكار بینین، مفای ژ ئاڤا سەر ئەردی وەرگرین، ب تەمابوونا ڤی پڕۆژەی، ئاریشەیا كێمئاڤیێ ل ئاكرێ و دەوروبەرێن وێ ب تەمامی دێ‌ چارەسەر بیت».

هەولێر، قائید میرۆ:

بڕیارە سەرۆكایەتیا جڤاتا وەزیران بهایەكێ نوو بۆ كارەبا 24 دەمژمێری دیار بكەت و سەرۆكێ رێكخراوا وزێ ژی دبێژیت: پڕۆژەیێ‌ رۆناهی، پڕۆژەیەكێ پێشكەفتیە و دێ ل داهاتی مفایەكێ زۆر بۆ خەلكێ كوردستانێ هەبیت.
حەمە ئەمین هەورامانی، سەرۆكێ رێكخراوا وزێ بۆ رۆژناما ئەڤرۆ دیاركر، پڕۆژەیێ رۆناهی یێ كارەبا 24 دەمژمێری د بەرژەوەندیا وەلاتیان دایە و ئەو كەسێن دبێژن پڕۆژەیێ رۆناهی زیان بۆ وەلاتیان هەنە چو راستی بۆ نینە و گۆت: «پێدڤی بوو بەری چەندین سالان ئەو پڕۆژە هاتبا ئەنجامدان و سیستەمێ نوكە یێ بەلاڤكرنا كارەبێ ل چو وەلاتەكی نەمایە، بەری نوكە هژمارەكا بازاڕ و جهێن بازرگانی كارەبا وان بوویە 24 دەمژمێر و چو ئاریشە نەبووینە، چونكی وەلاتی دێ كارەبا بەردەوام هەبیت و ب تنێ دڤێت ل گورەی پێدڤیا خۆ كارەبێ بكار بینیت».
حەمەئەمین هەورامانی گۆتژی: «راستە نوكە گازندە ل دۆر بهایێ كارەبا 24 دەمژمێری هەنە، بەلێ ئەڤە هێشتا تێستە و بهایێ كارەبا پڕۆژەیێ‌ رۆناهی ب ڤی شێوەیێ نوكە نامینیت، بڕیارە سەرۆكایەتیا جڤاتا وەزیران ب بەرهەڤبوونا لایەنێن د ناڤا حوكمەتێ و لایەنێن پەیوەندیدار دا بهایەكێ گونجای بۆ كارەبا 24 دەمژمێری بهێتە دانان، ب شێوەكی د بەرژەوەندیا وەلاتیان دابیت و كاریگەری ل سەر رەوشا ئابووری یا وەلاتیان نەبیت، ئەز باوەرم ل چەند سالێن داهاتی دێ مفایێن ئەڤی پڕۆژەی بۆ خەلكی دیاربن و دێ كاریگەریێن خۆ هەبن».

زنار تۆڤی:

موسا ئەحمەد، سەرۆكێ دەزگەهێ خێرخوازییێ بارزانی دیار كر، د مەها رەمەزانا پیرۆز دا، وان پتر ژ 30 هزار كارتۆنێن ئاهێن خوارنێ ل سەر كەسێن كێمدەرامەت بەلاڤكرینە و چەندین خێزان ژی بووینە خودان خانیێن خۆ و ژ كرێدارییێ رزگاربووینە و دبێژیت: مە هژمارەكا زۆر یا خوارنێن فتارێ بۆ رۆژیگران بەرهەڤ كرینە، ل گەل هندێ مە دڤێت كێشەیا خەلكێ هەژار ب رەنگەكێ بنەرەتی چارە بكەین.
ناڤهاتی گۆت: «ل دەستپێكا ڤێ مەهێ‌ دەزگەهێ خێرخوازییێ بارزانی ب هەلكەفتا مەها رەمەزانێ، ب پشتەڤانییا خودان كۆمپانی و خێرخوازێن كوردستانێ، پڕۆژەیەك ڕاگەهاند و د قووناغا ئێكێ دا، مە پتر ژ ملیۆنەك و 361 هزار دۆلاران هاریكاریێن دارایی ل سەر سێ هزار و 562 زارۆكێن بێ دایك و باب بەلاڤكرن».
گۆتژی: «بڕیارە د قووناغا دویێ ژی دا ب هاریكارییا هەیڤا سوور یا ئیماراتی، پتر ژ چار ملیۆن دۆلاران ل سەر پتر ژ 11 هزار زارۆیان بەلاڤ بكەین».

ئامێدیێ، مەحمود نهێلی:

ژ بۆ زێدەتر گرنگیدان ب پڕۆژەییچن خزمەتگوزاری، ب تایبەتی د وارێ پەروەردەیێ دا، دەست ب نووژەنكرنا نەهـ قوتابخانەیان ل سنوورێ پەروەردا ئامێدیێ هاتیە كرن.
وەجیهـ سەعید، رێڤەبەرێ پەروەردەیا دەڤەردارییا ئامێدیێ بۆ رۆژناما ئەڤرۆ دیار كر، د بەرنامەیێ كابینەیا نەهێ یا حكومەتا هەرێما كوردستانێ دا گرنگیەكا زۆر دایە وارێ خزمەتگوزاریان و كەرتێ پەروەردێ و ئاڤاكرن و نووژەنكرنا قوتابخانەیان ژی ئێكە ژ وێ پلانا حكومەتێ و گۆت: «د ڤی بیاڤی دا و پشتی رازیبوون ل سەر هاتیە كرن، دەست ب نووژنكرنا نەهـ قوتابخانەیان ل سنوورێ پەروەردا ئامێدیێ‌ هاتیە كرن».
ناڤهاتی ئاشكرا ژی كر، پێدڤیە لەز د كارێ نووژەنكرنێ‌ دا بهێتە كرن، ب رەنگەكی كارتێكرن ل پرۆسەیا خواندنێ نەهێتە كرن و گۆت: «ژ بۆ ئەنجامدانا پڕۆژەیێ نووژەنكرنا ڤان نەهـ قوتابخانەیان گوژمێ 395 ملیۆن دیناران ل سەر بودجا تایبەت یا پارێزگەها دهۆكێ هاتینە تەرخانكرن».

شێخان، بارزان مزووری:

ئەندازیار سەمیر عیسا، سەرپەرشتێ پڕۆژەیێ جۆتسایدێ شێخان بۆ لالشێ‌ بۆ رۆژناما ئەڤرۆ دیار كر، بڕیارە سایدێ ئێكێ ژ پڕۆژەیێ جۆتسایدێ شێخان بۆ لالشێ‌ ل دەستپێكا مەها گولانا ئەڤ سالە ب فەرمی بهێتە ڤەكرن و بكەڤیتە د خزمەتا شۆفێر و وەلاتیان دا.
ناڤبری گۆت: «نوكە مە دەست ب قێركرنا سایدێ ئێكێ كریە و كار ناهێت راوەستاندن هەتا ئەڤ سایدە ب تمامی بهێتە قێركرن».
ئەندازیار خەدیجا، ریڤەبەرا رێك و پران ل پارێزگەها دهۆكێ‌ بۆ رۆژناما ئەڤرۆ دیار كر، قووناغێن ب زەحمەت یێن پڕۆژەی ب دووماهی هاتینە و گۆت: «بڕیارە د ڤان رۆژان دا كارێ سایدێ ئێكێ ب دووماهی بهێت و كار د سایدێ دویێ دا بهێتە كرن، دیسا هەر كەسێ ئەردێ وی بكەڤیتە بەر ڤی پڕۆژەی دێ‌ هێتە قەرەبووكرن، ئەم ناهێلین زیان ب وان بكەڤیت».