ڕاهێنەرێ‌ تیما یانەیا دهۆك یێ‌ ئیرانی یەحیا گۆلمحەمەد ئەگەرێن وەكهەڤییا تیما خوە دیاركر و گازندەك ژ فدراسیۆنا فوتبۆلا ئیراقێ‌ هەنە و دخوازیت كارگێری دووڤچوونێ‌ بكەن، ئەڤچەندە د پرێس كۆنفرانسەكێ‌ رۆژنامەڤانی دا هات پشتی تیما وی ل گەل تیما یانەیا نەورۆز بێ‌ گۆل وەكهەڤبوو ژ چارچووڤەیێ هەڤڕكیێن گەڕا چارێ‌ ژ خولا ستێرێن ئیراقێ‌ ئەوا ل باژێرێ‌ سلێمانیێ هاتیە كرن.
زێدەتر ناڤهاتی گۆت: هەرچەندە یاریزانێن مە ئاستەكێ‌ باش نیشان دا و باشتر خوە د ناڤ یاریگەهێ‌ دا دیت، سرۆشتییە تیما بەرانبەر خودان ئەرد و جەماوەر بیت دێ‌ بزاڤێن مەزن كەت بگەهیتە گۆلا هەڤڕك، هەكە مە مفا ژ دەلیڤەیێن گۆلكرنێ‌ یێن نیڤا ئێكێ‌ وەرگرتبان دبیت ئەنجام د بەرژوەندییا مە دا ب دووماهی هاتبا، لێ‌ یارییەكا بهێز دهاتە كرن و ئەڤە قوتبۆلە.
ژلایەكێ‌ دووڤە یەحیا گۆلمحەمەد دەستخوەشییا پشتەڤانێن یانەیێ كر و گۆت: هەردەم و ل هەر جهەكێ‌ ئیراقێ‌ دا بیت پشتەڤانێن دهۆكێ‌ ل یاریگەهێ‌ بەرهەڤن و ب مۆرالەكا بلند پشتەڤانییا تیما خوە دكەن ئەڤە ژی خالەكا هێزێ یە بۆ یاریزانان، پشتەڤانێن سۆزدار و عاشقێن یانە و باژێرێ‌ خوە نە، هیڤییا مە ئەوە بەردەوامبن ژبەركو ئەون هێزا تیمێ‌
ڕاهێنەرێ‌ دهۆكێ‌ گازندە ژی هەبوون و گۆت: د هەر چار یاریێن بۆری دا خشتەیێ ئەنجامدانا یاریێن تیما مە گڤاشتنەكا بەرچاڤ ل سەر تیمێ‌ هەیە، د ماوەیێ ئێك حەفتی دا سێ‌ یاریێن بهێز بكەین و دناڤبەرا دهۆك بۆ بەغدا و دووڤدا بۆ سلێمانیێ كو دووراتییا ڕێكێ‌ كارتیكرن ل سەر ئاستێ‌ جەستەیی و شیانی كرییە، دخوازم ژ كارگێرییا یانەیێ دووڤچوونا ڤێ‌ بابەتی بكەت، نە یا ڕەواییە فدراسیۆنا فوتبۆلا ئیراقێ‌ خشتەیی بڤی شێوەیی ب دانیت كارتیكرنێ‌ ل سەر هندەك یانەیان بكەت.
دهێتە زانین ل پێنجشەمبییا بهێت تیما یانەیا دهۆك دێ‌ ل یاریگەها خوە و دناڤ جەماوەرێ‌ خوە دا مێڤاندارییا یانەیا جەوییە كەت، هەردو یانە ل ڕێزێن 14ێ‌ و 15ێ‌ نە و د چار یاریێن بۆری دا هیچ سەركەڤتنەك و خوسارەتیەك نە دایە ئەوێن بتنێ‌ وەكهەڤی ئیناین.

رەمەزان زەكەریا

د داخۆیانیەكێ دا ئەندامێ‌ یانەیا ئاكرێ یا وەرزشی دیار كر ئەوان دەست ب پێنگاڤا ئێكێ‌ یا بەرهەڤییا بۆ وەرزێ‌ نوو یا خولا پلا نایابا كوردستانێ‌ و خولا پلا دویێ یا ئیراقێ‌ بۆ یارییا فوتبۆلێ‌ كر و دەستپێك گرێبەستا ڕاهێنەرێ‌ خوە یێ‌ وەرزێ‌ بۆری یونس سلێمان بۆ وەرزەكێ‌ دی نووكر ژبەر شیان و شارەزاهییا وی.
زێدەتر سوهەیب عەلی بۆ رۆژناما ئەڤرۆ گۆت: هەردوسان د چارچووڤەیێ پێ نگاڤا مە یا ئێكێ‌ دا كارگێریا یانەیێ شیا گرێبەستێن سێ یاریزانێن دی یێن سەرەكی ئەوێن ل وەرزێ بووری باشترین ئاست نیشان دایی نوو بكەن ئەو ژی هەر ئێك ژ حسێن فەیسەل، ئاشتی ادریس و سەفین عبدالخالق، هەروەسا بۆ ب هێزكرنا هێلا پێشیا تیپێ یانەیێ ب فەرمی گرێبەست دگەل دو یاریزانێن نوو ئیمزا كرینە، ئەو ژی عەلی ڕەعد د هێلا هێرشبەرینیێ دا و سجاد حسێن د هێلا ناڤەراست دا، ئەڤ پرۆسە دێ‌ بەردەوامبیت ل دووڤ داخوازییا كادرێ‌ ڕاهێنانێ‌ و ل دووڤ شیانێن مە یێن دارایی ژبۆ هندێ‌ پێكهاتییەكێ‌ ب هێز و هەڤڕك د هەردو خولێن كوردستانێ‌ و ئیراقێ‌ دابن.
ناڤبری گۆتژی: هەتا نوكە چ ئاستەنگەك د ڕێیا ئامادەكاریێن وەرزێ نوو دا نینە و پلان یا ب شێوەیەكێ‌ ڕێكخستی ب ڕێڤە دچیت بەلێ پشكداریكرن د خولا پلا دویێ یا ئیراقێ دا بارگرانیەكا زۆر مەزن دئێخیتە سەر ملێن كارگێریا یانەیێ، ئەم دێ هەموو بارێن گران هەلگرین و بزاڤێ كەین تنێ بۆ هندێ كو دلێ پشتەڤان و جەماوەرێ خۆ خۆش بكەین و سەركەفتنێ تۆمار بكەین و ئارمانجا مە یا وەرزێ‌ نوو ب دەستڤە ئینانا ڕێزێن پێشیێ یە و ناسناڤن.

پشتی بۆ ماوەیێ زێدەتری مەهەكی ل سەر هەبوونا دانۆستاندن و پەیوەندیان دناڤبەرا یانەیا بەرشەلۆنا ل گەل یانەیا ئەتلەتیكۆ مەدرید یێن ئسپانی ژبۆ ڕازیكرنا ستێرێ‌ تیما وان یێ‌ ئەرجەنتینی جۆلیان ئالڤارێز و دانا سێ‌ ئۆفەرێن جودا، سەرەرایی ڕازیبوونا یاریزانی لێ‌ یانەیا ئەتلەتیكۆ مەدرید ڕەدكر دەستان ژێ‌ بەردەت
ژلایەكێ‌ دووڤە ژی یانەیا ئارسنال یا ئنگلتەرایێ ژلایێ خوەڤە هەموو بزاڤ كرن ب هەر كۆژمەیەكێ‌ گرێبەستێ‌ پێشكێشی یانەیێ كر، لێ‌ ب هەمان شێوە داخوازییا وان ژی هاتە ڕەدكر، بڤێ یەكێ‌ بابەتێ‌ چوونا ئالڤارێزی بۆ یانەیەكا دی هاتە گرتن و هەر دوهی دەست ب یەكەیا ڕاهێنانێ‌ كر و هەردو یانەیێن بەرشەلۆنا و ئارسنال بێ‌ هیڤی كرن.
بۆ زانین ئۆفەرا ژلایێ هەردو یانەیان بۆ ئالڤارێزی هاتی گەهشتیە 130 ملیۆن یۆرۆیان و ئەتلەتیكۆ مەدرید 150 ملیۆن دڤیان ئەوێ‌ گرێبەستا وی هەتا هاڤینا 2030ێ‌ یە ل گەل ئەتلەیكۆ مەدریدێ‌.

تاهر رێكانی

د داخویانیەکێ دۆرین رۆمێل كچا باژێرێ دهۆكێ و یاریزانا یانه‌یا سه‌نحاریب و هه‌لبژارتیێ ڤۆلی بۆلا ئیراقێ بۆ رۆژنامه‌یا ئه‌ڤرۆ دیاركر ئه‌ڤه‌ سالا دویێ یه‌ لدووڤ ئێك ل گه‌ل هه‌لبژارتیێ ئیراقێ پشكداریێ د ڤێ قاره‌مانیێ دکەت و گەشبینن ئەنجامەکێ باشتر بینن.
هەروەسان ناڤهاتی گۆت: بۆ ڤێ قارەمانیێ ب ئارمانجا هەڤرکی بۆ ڕێزێن پێشیێ خوە بەرهەڤ دکەبن ئه‌وا بڕیاره‌ سوبەهی ل وه‌لاتێ ئوردنێ بهێتە ئەنجامدان، هه‌رچه‌نده‌ ئه‌م ده‌ست ڤالا ژ قاره‌مانیا ئاسیا ڤه‌گه‌ریاین كو تێدا د هه‌رسێ یاریێن خۆدا تووشی خوسارەتیێن مه‌زن بوین، به‌لێ ئه‌ڤه‌ رامان هندێ نا دده‌ت كو ئاستێ تیما مه‌ یێ لاوازبوو، به‌رۆڤاژی تیمێن كۆما مه‌ باشترینێن ئاسیا و جیهانێ بوون ژوانا مێڤاندارا قاره‌مانیێ هه‌لبژارتیێ چینێ، گرنگ مه‌ مفا و شاره‌زاهییه‌كا باش ژ سه‌ربۆر و یاریێن ڤێ قاره‌مانیێ وه‌رگرت، هه‌روه‌سان باشترین به‌رهه‌ڤی بوو بۆ قاره‌مانیا رۆژئاڤا ئاسیایە.
ژلایەکێ دووڤە دۆرینێ گۆت: ل سالا بۆری مه شیا‌ رێزا سێیێ ب ده‌ستخۆڤه‌ بینن، لەوما ژی من باوه‌ره‌ ئه‌ڤ ساله‌ ده‌سكه‌فته‌كێ باشتر بده‌ستخۆڤه‌ بینین، چونكه‌ ئاستێ هه‌ر چار تیمێن پشكدار نێزیكی ئێكه‌، هەروەسان کەیفخوەشم كو پێنچ یاریزانێن ژ یانه‌یا سه‌نحاریب دگه‌ل هه‌لبژارتیێ ئیراقێ نه‌ و مه‌ كۆنتاكا باش دگه‌ل ئێك هه‌یه‌ له‌ورا دێ بۆ مه‌ ب ساناهیتربیت.
دهێته‌ زانین ئەو هەر پێنچ یاریزانێن ژ یانه‌یا سه‌نحاریب دگه‌ل هه‌لبژارتیێ ئیراقێ پشكدار دڤێ قاره‌مانیێ دا ئه‌وژی دۆرین رۆمێل، خویشكا وێ دۆرس، هێلین عومه‌ر، ڤانست بڕیار و هه‌میشه‌ هوشیار.